Ijije Hi Tro Eö a Lepetrij La Itre Aja i Eö Ka Ngazo

1. Nemene la ka traqa koi nöjei atr asë?

HAPEU hna hane fe kö tupathi eö troa kuca la ketre ewekë ka akötrë Iehova? Maine eje hi, the mekune kö ka hape, ka catrehnine kö la itupath ka traqa koi eö hune la ka traqa koi itre xan. Öni Tusi Hmitrötr: “Ame la itre itupath ka traqa koi nyipunie, kolo fe a hane traqa koi nöjei atr asë.” (1 Kor. 10:13) Kolo lai a hape, ceitune hi la itre aja ka ngazo hnei eö hna isi memin me itre xan. Tha eö casi kö, ijije hi tro eö a hun jëne la ixatua i Iehova.

2. Nemene la itre aja ka ngazo hna isi memin hnene la itre keresiano me itre ka ini Tus? (Wange ju fe la itre foto.)

² Önine fe la Tusi Hmitrötr: “Kolo pe a isa tupathi së, me huli së, me iaö së, hnene la itre sipu aja së.” (Iako. 1:​14) Isa kö la itre itupath ka traqa koi së isa ala cas. Ame itre xan e easë, kola tupathi angatr troa ce meköl memine la ketre trahmany maine föe. Nge ame la itre xan, angatr a pi ce meköl lue trahmany maine lue föe. Ame pena la itre atr ka goeë pornographie ekö, ke tro hmaca a ahlëne thei angatr la aja troa goeën. Ceitune hi lai memine la itre atr ka iji gorok me ka xomi dorog ekö. Celë hi itre xaa aja ka ngazo hna isi memin hnene la itre keresiano me itre ka ini Tusi Hmitrötr. Hnei easë asë hna hane qaja tui Paulo aposetolo ka hape: “Ame la eni a thele troa kuca la loi, ngazo la ka mama theng.”​—Roma 7:​21.

3. Tune kaa la atr ka isi pala hi memine la aja i angeic ka ngazo?

³ Maine eö pala hi a isi memine la ketre aja ka ngazo, ke ma ame koi eö, tha ijiji eö kö troa elë hun, nge eje hë lai. Ketre, eö a mekun ka hape, ka luzi hë eö, nge tha tro kö Iehova a hamë eö la mele ka pë pun, pine la itre aja ka ngazo cili. Ngo ame pe, ka tria la lue mekune cili! Tro la tane mekun celë a qejepengön la kepine matre ka tria lai, jëne la lue hnyinge celë: (1) Qa kaa la itre mekune cili ka ngazo? (2) Tune kaa la aqane troa lepetrij la itre aja i eö ka ngazo?

NEMEN LA HNEI “SATANA” HNA AJAN TRO SA MEKUN

4. (a) Pine nemen matre aja i Satana tro sa mekun ka hape, thatreine kö së cile kowe la ketre itupath? (b) Pine nemen matre atreine hi së cile kowe la itre aja së ka ngazo?

⁴ Aja i Satana tro sa mekun ka hape, tha ijiji së kö troa elë hun la ketre itupath. Easë a atre tune kaa? Hnei Iesu lo hna upe la itretre dreng troa thith ka hape: “The troxomi huni kö kowe la itupath, ngo thepe huni pe qaathei Satana.” (Mat. 6:​13) Hnei Satana hna qaja ka hape, tha tro kö la itre atr a drengethenge Iehova la kola tupathi angatr. (Iobu 2:​4, 5) Hnauëne la Satana a qaja lai, nge angeic pe lo hna pane iaön hnene la sipu aja i angeic, me tha mele nyipici koi Iehova? Angeic a mekun ka hape, ceitui së hi me angeic laka, qëmeken la itupath canga tro hi sa nuetriji Iehova. Ketre angeic fe a mekun ka hape, tro fe la Nekö i Akötresie ka pexej a hane kei kowe la itupath! (Mat. 4:​8, 9) Ngo hapeu, thatreine kö së cile kowe la itre aja së ka ngazo? Nyipici! Casi hi la mekuna së me Paulo, la angeic a hape: “Ngöne la nöjei ewekë asë, hetre trengecatreng qaathene la atre hamë men koi ni.”​—Fil. 4:​13.

5. Easë a atre tune kaa ka hape, xecie koi Iehova laka, atreine hi së cil kowe la itre aja së ka ngazo?

⁵ Tha ceitui Iehova kö me Satana. Xecie koi Iehova laka, atreine hi së cil kowe la itre aja së ka ngazo. Easa atre tune kaa? Hnei Iehova ha hna qaja ka hape, tro la ka ala nyimu atraqatr a mele nyipici koi Nyidrë, me mele pe qa ngöne la akötr atraqatr. Öni Iehova, Akötresieti ka tha thoi kö ka hape, nyimutre la itre atr ka troa lö kowe la fen ka hnyipixe, ngo tha ala xalaithe kö. Nge tro angatr a wië ke “hna wasine la itre iheetre i angatr, me awiën ngöne la madra ne la Neköi Mamoe.” (Hna Am. 7:​9, 13, 14) Eje hi, ame koi Iehova, ijiji së hi troa lepetrij la itre aja së ka ngazo.

6-7. Pine nemen matre aja i Satana tro sa mekun ka hape, itre atr ka luzi hë së?

⁶ Aja i Satana tro sa mekun ka hape, tha tro kö Iehova a kepe së, ke hetrenyi the së la itre aja ka ngazo. Hnauëne la Satana a qaja lai, nge tha hna aijijë angeic pe hnei Iehova troa kapa la mel ka pë pun? (Gen. 3:​15; Hna Am. 20:10) Aja i angeic tro sa mekun ka hape, ka luzi fe hë së. Angeic a zalu koi së, ke hna aijijë së troa kapa la mele ka pë pun, nge tha angeice kö. Matre, tha itre atr ka luzi kö së. Tusi Hmitrötr a amamane laka, aja i Iehova troa xatua së troa kapa la mel ka pë pun. Ej a hape, “xele kö Nyidrë troa apatrene la ketre e nyipunie, ngo loi e tro pe nyipunieti asë a ietra.”​—2 Pet. 3:9.

⁷ Ame la easa mekun ka hape, thatreine kö së cile kowe la itre aja së ka ngazo maine ka luzi hë së, ke easë hi lai a kapa la mekuna i Satana. Maine trotrohnine hi së lai, ke tro së lai a cile catr koi angeic.​—1 Pet. 5:​8, 9.

ITRE MEKUN KA EJE THE SË KE ITRE KA NGAZO SË

8. Nemene la ketre aliene la hnëewekë “ngazo?” (Salamo 51:5) (Wange ju fe la “Göi Troa Trotrohnin.”)

⁸ Tha Satana casi kö la ka uku së troa hetreny la itre mekun ka tria. Tro fe la pengö së ka ngazoa, hne së hna kapa qaathene la pane kem me thine së, a uku së troa mekun ka hape, thatreine kö së cile kowe la itre aja së ka ngazo, nge ka luzi hë së.​—Iobu 14:4; e jë la Salamo 51:5.

9-10. (a) Nemene la pun la tha idrei Adramu me Eva? (Wange ju fe la foto.) (b) Nemene la pun koi së pine la pengö së ka ngazo?

⁹ Pane mekun ju la pengöi Adramu me Eva. Nemene la thangane la hnei nyidroti hna tha idrei? Hnei nyidroti hna zae me thel troa hakuthe la ngönetrei i nyidro. Önine la itus, Étude perspicace des Écritures: “Hnene la ngazo hna axulune thei nyidro la hace hni, me seseu, me xou, me hmahma.” Kösë hna thinge qaluqalu nyidro hnine la ketre uma ka foa lao hnahag. Ijiji nyidroti hi troa tro kano ngöne la itre hnahag, ngo tha ijiji nyidroti kö troa tro e kuhu trön. Matre hna othi nyidro hnene la ngazo.

¹⁰ Eje hi, tha ceitui së kö me Adramu me Eva. Tha thatraqai nyidroti kö la thupene mel. Ej a seng la itre ngazo së, me xatua së troa hetre mekuthetheu ka wië. (1 Kor. 6:​11) Zöi nyidro, matre ngazo hë së me tha pexej. Matre tha sesëkötre kö së laka, easë fe a hace hni, me seseu, me xou me hmahma. Tusi Hmitrötr a qaja ka hape, easë pala hi a xeni pun la ngazo. Nge “hna ketre fe la itre atr ka tha hane eni wathebo tui Adramu.” (Roma 5:​14) Ngo tha tro pi kö sa mekun ka hape, pine laka hna hnaho së ngöne la ngazo, matre tha ijiji së kö troa kuca la meköt, nge ka luzi hë së. Loi e tro sa lepetrij la itre mekune cili ka tria. Troa tune kaa?

11. Nemene la nyine tro sa kuca, e thatreine kö së cil kowe la itre aja së ka ngazo, nge pine nemen? (Roma 6:​12)

¹¹ Pengö së ka ngazo a uku së troa mekun ka hape, thatreine kö së cile kowe la itre aja së ka ngazo. Tha tro pi kö sa kei thenge la mekun cili. Pine nemen? Pine laka Tusi Hmitrötr a ini së ka hape, tha tro kö a nue la ngazo troa ‘musinë’ së. (E jë la Roma 6:​12.) Kolo lai a hape, ijije hi tro sa isa iën troa cile catr kowe la itre aja së ka ngazo. (Gal. 5:​16) Tha tro kö Iehova a nue së kowe la itupath, e tha ka xecie kö koi Nyidrë laka, ijiji së hi troa cil kow. (Dreut. 30:​11-​14; Roma 6:6; 1 Thes. 4:3) Haawe, ijiji së hi troa isi memine la itre aja së ka ngazo.

12. Nemene la nyine tro sa kuca e easa mekun ka hape, ka luzi hë së nge pine nemen?

¹² Ketre tun, the thëthëhmine kö laka, pengö së ka ngazo la ka uku së troa mekun ka hape, ka luzi hë së, nge tha madrine kö Iehova koi së, ke hetre aja së ka ngazo. Ngo the drenge pi kö. Pine nemen? Pine laka, Tusi Hmitrötr a ini së laka, atre hnyawa hi Iehova ka hape, hna hnaho së ngöne la ngazo. (Sal. 103:​13, 14) “Atre kö nyidrëti la nöjei ewekë asë” me pengö së. Ketre atre fe hi Nyidrë la ka uku së matre hetrenyi pi the së la itre aja ka ngazo. (1 Ioa. 3:​19, 20) Ame la easa cile catr kowe la itre aja së ka ngazo me tha kei, ke ka wië së qëmekei Iehova. Pine nemen matre xecie koi së lai?

13-14. Ame la troa hetre aja ka ngazo ke kolo kö lai a hape, ka luzi hë së? Qejepengöne jë.

¹³ Tusi Hmitrötr a qaja la eisapengönene la troa kuca la ngazo (lo hne së hna atreine neën) memine la troa hetre aja kowe la itre ewekë ka ngazo (lo ka traqa xan). Ame ngöne lo hneijin ne la itre pane keresiano, hetre itre trejin ne la ekalesia ne Korinito ka ce meköl ekö trahmany me trahmany, maine pena föe me föe. Hnei Paulo hna cinyiany kowe la ekalesia cili ka hape: “Celë hi aqane ujë ne la itre xan e nyipunieti ekö.” Kolo kö lai a hape, thupen la angatr a atre la nyipici, ke tha hna traqa hmaca kö koi angatr la aja troa kuca la itre huliwa cili ka sis? Tha ijiji së kö troa mekune tun, ke itre aja lai qa kuhu hni ne la atr. Ngo ame la itre keresiano ka xomenöth nge ka tha kei kowe la itre aja cili, ke angatr a amadrinë Iehova. Ame koi Nyidrë “ase hë ahmitrötrë” angatr nge wië hë angatr. (1 Kor. 6:​9-​11) Ijiji fe hi tro eö a hane tun.

¹⁴ Ijiji eö hi troa cil kowe la nöjei aja i eö ka ngazo. Maine tha ijiji eö kö troa apatrene paluan itre ej, ngo ijiji eö hi troa xomenöth me tha “kei thenge la itre aja i ngönetrei me isa kuci mekun.” (Efe. 2:3) Nemene la nyine tro eö a kuca, matre lepetrij la itre aja i eö ka ngazo?

AQANE TRO SA HUN

15. Pine nemen matre nyipiewekë tro sa atre hnyawa la pengö së matre lepetrij la itre aja së ka ngazo?

¹⁵ Maine aja i eö troa lepetrij la itre aja i eö ka ngazo, nyipiewekë tro eö a atrehmekun hnyawa la pengöi eö. Hmekëne kö, wanga amenu eö pi “hnene la itre mekune ka tria.” (Iako. 1:​22) Maine jë tro eö a qaja ka hape, ‘Tru kö la aqane iji itre xan hung’, maine eö pena upezö itre xan ka hape, ‘Maine kolo ju a hnimi ni hnene la föeng, ke tha tro kö ni a goeë pornographie.’ Maine tro eö a xom ahmalohmaloeëne la jol, ke canga tro hi eö lai a kei. The thele kepine kö la aqane ujë i eö ka ngazo, ke eö kö lai ka thel.​—Gal. 6:7.

16. Tune kaa la aqane tro eö a acatrene la aja i eö troa cile catre qëmekene la itupath?

¹⁶ Loi e tro eö a atrepengöi eö hnyawa. Ngo ka nyipiewekë fe tro eö a acatrene la aja eö troa cile catr qëmekene la itupath. (1 Kor. 9:​26, 27; 1 Thes. 4:4; 1 Pet. 1:​15, 16) Hnyinge jë ka hape, ‘Nemene la ka akeinyi ni, nge eu?’ Maine jë, hetre hawa laka, jole koi eö troa elë hun la ketre itupath, nge kola uku eö troa kuca la ketre ewekë ka ngazo. Hapeu, jole kö koi eö troa cile catr la eö a kucakuca, maine pena e hnenyipajidr? Canga hnëkë jë qëmeken troa traqa la itupath, nge mekune jë la aqane tro eö a cil kowe ej. Eje hi, ame la ijine ka loi troa hnëkë, ke qëmeken troa traqa la itupath.​—It. Ed. 22:3.

17. Nemene la ini hne së hna xom qa ngöne la tulu i Iosefa? (Genese 39:​7-9) (Wange ju fe la itre foto.)

¹⁷ Tro sa ce wang la aqane ujë i Iosefa, lo föi Potifara a thele troa ce meköl me angeic. Hnei angeic hna canga thipetrij la itre sipo i eahlo. (E jë la Genese 39:​7-9.) Nemene la hna amaman e cili? Ame koi Iosefa, ka ngazo la troa xome la föe ne la ketre trahmany, nge hnei angeic hna canga mekun la jole cili qëmeken tro la föi Potifara a thel troa ce meköl me angeic. Ketre tui eö fe, ijije hi tro eö a acatrene la aja i eö troa kuca la loi qëmeken troa traqa la ketre itupath. Matre ame pë hë la kola traqa la itupath, hmaloi hi koi eö troa ujë tune lo aqane hnëkëne i eö.

“THE MANO KÖ NYIPUNIE ISA TUPATHE”

18. Tune kaa la aqane tro eö a thipetrij la itre aja i eö ka ngazo? (2 Korinito 13:5)

¹⁸ Maine aja i eö troa thipetrij la itre aja i eö ka ngazo, ‘the mano kö eö tupath’ la lapaune i eö. Kola hapeue lai? Loi e tro pala hi eö a thele ka hape, eö kö a kuca la itre ewekë ka loi. (E jë la 2 Korinito 13:5.) Ketre, loi e tro eö a waipengöne la itre mekun me huliwa i eö me saze. Maine jë, hnei eö hna elë hun la ketre itupath, ngo hnyinge jë ka hape: ‘Hapeu, hnenge kö hna canga thipën ej?’ Maine öhne hi eö ka hape, tha hnei eö kö hna canga thipën, ke the dekurag kö. Ngo acatrene jë pe la nyine tro eö a kuca, me hnying ka hape: ‘Ijije kö tro ni a canga thipetrij la itre mekunang ka ngazo? Hapeu, jole kö koi ni troa cil kowe la ketre itupath, pine la itre nyine iamadrinë hneng hna iën? Eni kö a canga ajeane la luemekeng la kola mama la ketre iatr ka ngazo? Hapeu, eni kö a wangatrehmekun laka, ame la itre trepen meköti Iehova, ke nyine loi koi ni, nge nyipiewekë tro hna atreine xomenöth matre trongën itre ej?’​—Sal. 101:3.

19. Pine nemen matre jole koi së troa lepetrij la itre aja ka ngazo, e tro sa xome la itre mekun ka co ka tha inamacan?

¹⁹ The thele kepine kö. Öni Tusi Hmitrötr: “Ka iaö catre la hni hune la nöjei ewekë asë, nge ka catre fë aja.” (Iere. 17:9) Nge hnei Iesu hna qaja ka hape, ej la qaane “la itre mekune ka ngazo.” (Mat. 15:19) Maine jë tro la ketre atr ka goeë pornographie ekö a mekun ka hape, pëkö engazon la troa goeën la itre xaa pengöne iatr, ke tha kolo kö a amaman la itre atr ka cilexöe. Maine pena tro angeic a qaja ka hape, ‘Tha ka ngazo kö la troa mekun la itre ewekë ka ngazo, e tha eni kö a kuca.’ Eje hi, hni angeic ka iaö a thele jëne “troa eatrëne la itre huliwa i ngönetrei.” (Roma 13:14) Nemene la nyine troa kuca matre tha tro kö a traqa kowe lai? Thupëne kö la itre mekun ka co, ka troa troxomi së kowe la itre jole ka tru, ene la troa kei kowe la ngazo.b Wange pala kö la itre mekune “ka co” hnei eö hna axeciën! Nge thipetrije pi la “itre mekune ka ngazo” ka troa uku eö troa wangacone la ngazo.

20. Nemene la hne së hna treqen, nge nemene la ixatua hne së hna kapa enehila?

²⁰ Tune la hne së hna ce wang, jëne la ixatua i Iehova, ijije hi tro sa cile kowe la itupath. Ketre, pine laka Akötresie ka utipine Nyidrë, matre ijije hi tro sa mele epine palua ngöne la fen ka hnyipixe. Drei jë kö la madrine la easa nyihlue i Nyidrë memine la hni me mekun ka wië! Loi e xecie koi së laka, ijiji së hi troa lepetrij la itre aja së ka ngazo, nge tha ka luzi kö së. Pine laka, Iehova a amanathithine la itre trengecatre së, matre ijije hi tro sa hun!