Tus Qaathei Collège Central
“LOI e eje thei nyipunie la ihnimi gufa, memine la tingeting qa thei Akötesie Tetetro shë, me Joxu Iesu Keriso.” Celë hi aqane italofa i Paulo ngöne itre tusi ka nyimutre hnei angeic hna iupi fë kowe la itre ekalesia. Celë mina fe hne huni lai hna mejiune koi nyipunieti asë.—Efe. 1:2.
Easë a olene atraqatr la ihnimi gufa i Iehova, hna jëne la mel hna huujën hnei Iesu Keriso! Jëne la thupene mel, ijije hi tro sa hane cile xajawa i Akötresie me mejiune laka tro Nyidrëti a kepe së. Thatreine jë kö së troa traqa kowe lai hnene la itre sipu trenge catr së, ngacama catre ju hë së inine la Tusi Hmitrötr, me cainöjëne la maca ka loi, maine kuca pena la itre xaa huliwa ka loi. Thaa hnene kö laka tru catre la itre ewekë hne së hna kuca ke tro ha senge la itre ngazo së me aijijë së troa hetrenyi la mele ka thaa ase palua kö; ohea, lue ahnahna la hna hamëne hnei Iehova, nyine amamane la ihnimi gufa i Nyidrë jëne Iesu Keriso.—Rom. 11:6.
Hnei Paulo hna cinyihane kowe la itre sine hmi nyidrë ka hape: “Eëhuni . . . a iele nyipunie wanga kapa gufane hnei nyipunie la ihnimi gufa i Akötesie, (ke öni nyidëti, ka hape, “Hnenge hna dei ‘ö ngöne la ijine kapa, nge hnenge hna xatua eö ngöne la drai ne mel”; hana wang, enehila la ijine kapa, nge hana wang, enehila la drai ne mel).” Hetrenyi la ketre “ijine kapa” qëmekene la troa apaatrenyi Ierusalema ngöne lo hneijine i Iesu. Hna amelene ngöne la götrane la ua la itre atr ka hni ka menyik nge ka hnimi Iehova. Celë hi ewekë lai ka aijijëne la itre atr asë cili ka lapaun troa mele pe ngöne la götrane la ngönetrei, ke, canga kötre petre kö angatr qaa Ierusalema qëmekene troa apaatren la traone cili ngöne la macatre 70 M.K.—2 Kor. 6:1, 2.
Ame mina fe enehila, easë fe a hane melën la ketre “ijine kapa” nge ketre “drai ne iamele.” Ame la itre atr hna kapa hnei Iehova, lo itre hlue i Nyidrë hna amelene ngöne la götrane la ua, tre, hetre mejiune i angatr, ene la troa amele angatr ngöne la ngönetrei elanyi la kola traqa la “drai ka tru i Iehova” laka easenyi catre hë.—Zef. 1:14.
Pine laka calemi hë la drai i Iehova, haawe, easë qëmekene la ketre hnëqa ka tru. Easë a troa thuemacane la itre atr me xatuane la itre ka hni ka ajan, matre tro fe angatr a hane kepe thangane la ihnimi gufa i Iehova, ene pe tro fe hë angatr a hane mel. Hnei Paulo hna amamane hnyawa la enyipiewekën la hnëqa cili. Hnei nyidrëti hna cinyihane ka hape: “Ngo ekölö hi ni , e tha cainöjëne kö ni la maca ka loi!” Hnei nyidrëti fe hna qaja la mekune ka eje e kuhu hni nyidrë kola hape: “Angete inamacan, me angete tha ‘tein. Qa ngöne lai ini a hnëkëne, e ateine ni, troa cainöjëne la maca ka loi.”—1 Kor. 9:16; Rom. 1:14, 15.
Tro Iehova a hnyingë thupene koi së elany, e hne së hna wangacone la huliwa ka sisitria celë, ene la troa thuemacane me hmekëne la itre atr. Easë a wanga atrune hnyawa la hnei Iehova hna qaja koi Ezekiela perofeta, kola hape: “Nekö i ate fe, ase hë ni acilë eö nyine ate thupe thatraqane la lapa i Isaraela, nge dengeju eö la tenge ewekë qa ngöne la qeng, nge kuji angate qa theng. E qaja eni kowe la ate ka ngazo, ka hape, Tro eö a mec ; nge tha kuji angeice hnei ‘ö, nge tha ewekë eö troa kuje la ate ka ngazo qa ngöne la goji angeice ka ngazo mate mele angeic ; tro la ate ka ngazo a meci fë la ngazo i angeic, ngo tro pe ni a thele la madra i angeice thei ‘ö.”—Eze. 3:17, 18.
Jole catr troa mele ngöne la itre drai tixenuë celë. Thaa ka hmaloi kö troa ce xome hnyawa la itre huliwa ka eje e hnine la fami; me huliwa i maseta, me itre huliwa ne la ekalesia memine la troa cainöje trootro. Ketre, nyimutre the së la itre hna tithe hnene la itre mec, me itre ka meci ne inehe; itre xan kolo ha uti ipië trootro, nge itre xan a qëmeke kowe la itre icilekeu. Ala nyimu nyipunie itre ka “hace.” Eahuni a ajan troa pane hane qaja amamane la ihnimi hun, mekun ka ihmeku memine lo hna qaja hnei Iesu ka hape: “Trohemi koi ni, nyipunieti asë ange ka huliwa me hace, nge tro ni a amanonyi nyipunie.” (Mat. 11:28) Eahuni a madrine koi nyipunieti asë itretre nyihlue i Iehova cememine la lapaun, ngacama tru maine co la itre jole ka traqa koi nyipunie.
Hetre thangane catr la hna catre cainöj me inine la itre atr; ketre kola mama laka Iehova a amanathithin la huliwa së, ngöne laka kösë 4 762 lao hna bapataisone e nöjei wiik e cailo fene hnengödrai asë. Ame ngöne lo huliwa ne la macatre hnapan, kola e la 1 375 la ekalesia hna acil. Easë a mejiune me thithi fë laka tro la itus ka hnyipixe, Nemene La Nyipi Ini Hna Hamën Hnei Tusi Hmitrötr?, hna ujëne kowe la 120 nge sin lao qene hlapa; a xatuane la itre atr, itre milio la etrun, troa hane kepe thangane la ihnimi gufa memine la tingeting qaathei Iehova ngöne la “drai ne iamele.”
Epi troa xecie hnyawa koi nyipunieti laka, atraqatre la ihnimi ne la Collège central koi nyipunie, nge eahuni a thithi thatraqai nyipunie. Eahuni mina fe a olene la itre thithi nyipunieti thatraqai hun.
Itre trejine me nyipunie,
Collège Central Ne La Itretre Anyipici Iehova