Cile Catre Jë Së Kowe La Itre Ejolene La Mele Enehila
“Akötesieti la hnāpo shë me tenge cate shë, mama ha laka nyidëti la ate nyipi ixatua ngöne la aköt.”—SAL. 46:1.
IJIJI NYIPUNIETI KÖ TROA SA?
Maine tha ajane kö së tro la itre ewekë ka ngazo a ananazijë së, nemene la nyine tro sa kuca?
Nemene la itre kepine matre loi e tro pala hi sa catr?
Nemene la itre hnei Iehova hna hamëne nyine xatua së troa cile catr qëmekene la itre jol?
1, 2. Nemene itre pengöne hulö la ka ketr la itre atr enehila? Nemene la hne së isa ala cas hna ajan?
EASË enehila a melëne la hneijine ka jol. Kola lepe la fene hnene la nöjei pengöne hulö. Kola akötre catr la itre atr hnene la itre sa, me gejë madra, me man, me di, me volka, me udreli, me janacas, me wene. The qaja kö la itre xa jole hnine la itre hnepe lapa me itre jole ka traqa kowe la itre atr isa ala cas, nge ka ahleuhleune me axouene la itre atr. Tune la hna qaja hnene la Tusi Hmitrötr, pë ju pë hë tha hna troa ketr hnei hulö ngöne la ketre ijin.—Ate cai. 9:11.
2 Ngacama traqa ju hë la nöjei pengöne jole cili, ngo tha patre kö la madrine thene la itre ka nyi hlue i Akötresie. Eje hi laka, mama ha koi së laka calemi catre hë la pun; haawe, ame la aja së ka tru, tre, ene la troa isa hnëkë matre e traqa ha la ketre jole koi së, atreine hi tro sa isa xomihnin. Ngo tro sa atreine nyi hlue i Akötresieti tune kaa ce memine la madrin, e traqa ju koi së la itre hulö? Nemene la ka troa xatua së troa hetrenyi la trenge catre ka ijij?
XOMI TULU JË QAATHENE LA ITRE KA CILE CATRE HË EKÖ
3. Tune la hna qaja ngöne Roma 15:4, nemene la ka troa akeukawanyi së e traqa pi koi së la itre jol?
3 Ngacama tru catre pala kö la hna akötrëne la itre atr enehila hnene la itre jole ka traqa, ngo ame pe, qaane ekö pëkö hna patr la itre jol. Tro pe sa pane ce wange la itre ini hne së hna xom qaathene la itre hlue i Akötresie, lo angetre cile catr ekö hnine la itre jol.—Rom. 15:4.
4. Nemene lo itre xa ewekë hna xomihnin ekö hnei Davita? Nge drei la ka xatua nyidrë?
4 Pane mekune jë së lo itre xa ewekë hna xomihnin ekö hnei Davita. Kola pi humuthi nyidrë hnei Saulo joxu. Hnene la itre ithupëjia hna isi me nyidrë, nge goi kötre fë fe angatre la itre ifënekö i nyidrë. Hna wanaxoeë nyidrë hnene la sine la itre sooce i nyidrë, me itre xa sinee me itre xa atrene la hnepe lapa i nyidrë. Ame e cili, gomegome hë la hni nyidrë. (1 Sam. 18:8, 9; 30:1-5; 2 Sam. 17:1-3; 24:15, 17; Sal. 38:4-8) Tusi Hmitrötr a amamane la aqane akötrë Davita hnene la itre jole celë. Ngo tha hnene kö la itre jole cili, ka traqa koi nyidrë hna ananazijëne la lapaune i nyidrë koi Iehova. Matre öni nyidrëti jë hi: “Iehova la ecatene la meleng ; tro ni a qoue dei ?”—Sal. 27:1; e jë la Salamo 27:5, 10.
5. Nemene la ka xatua Aberahama me Sara, troa madrine pala hi ngacama hna traqa la itre jole ka tru koi nyidro?
5 Ame la götrane gaa tru ne la mele i Aberahama me Sara, tre, hna melëne hnine la itre uma maano. Hnei nyidro hna lapa trehnyiwa ngöne la itre nöje ka nyimutre. Tru hnei jole ka traqa koi nyidro ngöne la itre ijine cili. Ka tune la jiine memine fe la itre iangazo ka xulu qa ngöne la itre nöje ka lapa xötreithi nyidro. (Gen. 12:10; 14:14-16) Nemene la ka xatua nyidro troa xomihni? Önine la Wesi Ula i Akötresie ka hape, hnei Aberahama “hna teqene la lapa ka hete tepen, nge ame la ate acile me huliwan, te, Akötesie.” (Heb. 11:8-10) Tha hnene kö la itre jole ka tru ka traqa koi Aberahama me Sara hna apatrene qaathei nyidro la madrin. Hnei nyidroti pe hna lapa mekune pala hi lo itre hnei Akötresieti hna thingehnaeane koi nyidro.
6. Tro sa nyitipu Iobu tune kaa?
6 Iobu la ketre trahmany hna akötrëne catrën. Pane mekune ju hi së la mekune ka ej e kuhu hni angeic, lo kola traqa itrai la itre jol. (Iobu 3:3, 11) Tha trotrohnine hnyawa kö angeice la kepine matre traqa pi koi angeice la nöjei ewekë cili. Ngo ngöne la itre ijine cili, tha hna akeinyi angeice kö. Hnei angeice pala hi hna mele nyipici me lapaune koi Akötresie. (E jë la Iobu 27:5.) Hane hi la ketre tulu ka loi nyine tro sa xötrethenge!
7. Nemene la itre jole ka akötrë Paulo ngöne la angeic a nyi hlue i Akötresie? Nemene la ka hamë trenge catre i angeic troa tro fë catrëne la huliwa i angeic?
7 Mekune ju fe lo tulu i Paulo aposetolo. Hnei angeice hna cinyihane la nöjei pengöne jole ka traqa koi angeice ngöne la traon, me ngöne la hnapapa, me e kuhu hnagejë. Angeic a qaja ju fe la “pi xen, me pi ij,” me “hnöt, me tro xö.” Hnei Paulo mina fe hna qaja la itre xa ijine kola lö la he nge angeic e hnin, matre ca drai nge ca jidri angeic a aje cile e kuhu hnagejë. (2 Kor. 11:23-27) Ngacama nyimu jole ka traqa koi angeic, ngo tha saze kö la aqane wai ewekë i angeic. Ame la ketre ijin, xönë hi troa humuthi angeic a mec, matre öni angeice ju hi: “Mate tha tro kö huni a lapau huni kö, ngo loi pe koi Akötesie ate amelene hmaca la ite ka mec ; lo ate amele huni qa ngöne la meci atraqate ka tun, nge ate amelene enehila.” (2 Kor. 1:8-10) Xalaithe hi la itre atr ka hane melëne la itre jol, tune la itre ka traqa koi Paulo. Ngo ame itre xa ijin, ala nyimu the së la ka hane drenge la itre akötr tune la itre ka traqa koi Paulo. Qa ngöne lai, ijije tro la tulu i angeic a ithuecatre së me akeukawanyi së.
WANGE KÖ, KE, NANAZIJE PI HNENE LA ITRE JOL
8. Tune kaa la aqane wai ewekë së e traqa pi fe koi së la itre jol? Hamëne pi la ketre ceitun.
8 Hnene laka tiqa ha la fen enehila hnene la nöjei pengöne hulö, me itre ewekë ka akötrëne la mel, tru hnei atr ka wange atrune menune pala ha la itre jole e kola traqa koi angatr. Hna wai ewekë tune fe hi lai hnene la itre xa hlue i Akötresie. Tui Lania ekö, lo kola ce pionie me fö i angeic e Australie. Atre jë hi angeic e cili ka hape, kaasere hë angeic. Haawe, lapa fë ifekë itreine ju pe hi angeic. Öni angeice ka hape, wezipo catre hë angeic hnene la itre drösinöe hna hamën, matre lapa pi hi angeice kösë atr ka hleuhleu. Nge nyi xane hmaca ju kö hnene la meci ka traqa kowe la fö i angeic ngöne la ijine cili. Hna xöje la ju meköt i nyidrë, matre kola nyi xa qa i angeice hmaca. Maine ewekë ju lai ka traqa koi së, tro ju hë së lai a kuci nemen?
9, 10. (a) Tha tro kö sa nyi jë i Satana troa uë së? (b) Nemene aqane wai ewekë ka xatua së troa xomihnine la “ite aköte ka kösau” ngöne Ite Huliwa 14:22?
9 E traqa pi koi së la itre jol, wange kö, ke, lö hnine jë Satana troa apujene la lapaune së, me xome trije la madrine së. The nyi jë i angeice pi kö hne së. Kola qaja hnei Ite Edomë 24:10 ka hape, e kucakuca ha së, pëkö trenge catre së troa xomi hnine la itre akötr. Maine tro sa sine thele la itre tulu qa hnine la Tusi Hmitrötr, tune lo itre hne së hna ce ithanatane hë, tro hë së lai a hetre trenge catre ka ijije troa cile kowe la itre jol.
10 Loi e tro sa atre ka hape, tha hmeku së kö troa apatrene la itre jol. Ngo ame pe, atreine hi tro sa hmekën. (2 Tim. 3:12) Kola qaja hnei Ite Huliwa 14:22 ka hape: “Qâ shë troa lö kowe la baselaia i Akötesie hna jëne la ite aköte ka kösau.” Wange kö la itre jol, ke, ananazijë epuni pi, ngo xome jë pe itre ej nyine akökötrene la lapaune i epuni kowe la mene i Akötresie, ka ijiji troa xatua epun.—2 Tim. 3:12.
11. Maine xele së tro la itre ewekë ka ngazo ne la mele së a akucakucanyi së, nemene la nyine tro sa kuca?
11 Loi e eje pala hi ngöne la he së la itre ewekë ka loi ka traqa kowe la mele së. Kola qaja koi së hnene la Wesi Ula i Akötresie ka hape, “ame la hni ka madin, te, at’ aloine” la mele së, ngo “ame la hni ka aköt” tre, atre ahleuhleunyi së. (Ite edomë 15:13) Önine la itre droketre ame la ka xatuane la ka wezipo troa loi, tre, la aqane mekuna i angeic. Nyimu ijine hna hamë wene kasi menu kowe la itre ka thë fë mec ngacama tha hmekune kö la meci angatr la wene kasi hna hamën, ngo e mekune hë angatre ka hape nyine hi lai, haawe xapo ju hi la ka akötr. Ngo e mekune pena ha la ka wezipo ka hape, tro la itre wene kasi hna hamë angeic a angazone catrëne la meci angeic, haawe, tro hë angeice lai a wezipo catr. Kola amamane e celë ka hape, e tro sa mekune laka pëkö nyin la jole ka traqa koi së, tro së lai a kucakuca catre hmaca kö. Eloine pe, Iehova pala hi a hamë së la nyipi ixatua. Ame ngöne la itre ijine kola traqa koi së la jol, tro Nyidrëti a hamë trenge catre koi së jëne la Wesi Ula i Nyidrë, me jëne la itre trejine me easë, trahmanyi me fö, memine fe la mene ne la uati hmitrötre i Nyidrë. Celë hi itre ewekë lai nyine tro sa lapa mekun, nge ka hamë madrine koi së. Wange kö, ke, angazo së pi hnene la hna mekune la itre ewekë ka ngazo ka traqa kowe la mele së, ngo catre pi pe së xomihnine la itre jol, me wange atrune la itre ewekë ka loi ka hetrenyi hë the së.—Ite edomë 17:22.
12, 13. (a) Nemene la ka xatuane la itre hlue i Akötresie troa xomihnine la itre akötre hna axulune hnene la itre hulö? Hamëne jë la ketre ceitun. (b) Nemene la hna ini së hnene la itre ewekë hna axulune hnei hulö?
12 Eue hi lo, hna traqa kowe la itre xa nöje la itre hulö. Ijije tro sa xomi ini qa ngöne la itre akötr hna xomihnin hnene la itre trejin, me easë ngöne la itre ijine cili, nge eje hi laka ame la itre ewekë cili, tre, tha ka hmaloi kö koi angetre melën. Ame lo kola xejë lo macatre 2010, traqa ju hi la ketre sa ka tru, me gejë madra e Chile, a thë me theng la itre hnalapa me ewekë ne la itre trejine ka nyimutre. Pë pi hi huliwa i itre xan. Ngo ame pe, tha hnene kö la itre ewekë cili hna ajolëne la itre trejine troa kuca pala hi la huliwa i angatre koi Iehova. Önine la ketre hna thë triji uman, ene Samuel: “Ngacama hna traqa la itre itupath ka tru cili, ngo tha ase pi kö ni me ifëneköng triane la itre icasikeu me patre ngöne la hna cainöje trootro. Eni a mekune laka ame la nyiho a cile catr, tre, hnene hi la itre hna majemine cili.” Tha hnei nyidroti kö me itre xa trejine ka nyimutre, trahmanyi me föe hna nue la itre hulö troa ananazijë angatr, ngo hnei angatre pala hi hna catre nyi hlue i Iehova.
13 Ame lo Semitrepa macatre 2009, hna traqa la itre mani ka tru matre hna di menu e Manille, ketre traon e Philippines. Önine la ketre trene mani ka nyimu ewekëne hna aluzine ka hape, hnene la di hna angazone la nöjei atr matre xulu pi la “itre jole me akötre kowe la trenamo me puafala.” Amekunë së jë hi lo eamo i Iesu: “Amëjë thatraqai nyipunie la tenga mo e koho hnengödrai, ga pë nekö i fenifeni me xojene troa an, nge ga pë ate kë ’nö troa thë me ënö.” (Mat. 6:20) Canga saqe i mani hi me itre mo patr, celë hi matre e amë panëne hë së itre ej, canga tro hi a akötrëne la hni së. Ka loi ju kö la tro sa amë panë Iehova ngöne la mele së, ke, ngacama traqa ju hë koi së la nöjei pengöne ewekë, ngo thatreine pi kö itre eje troa thë la aqane imelekeu së me Iehova.—E jë la Heberu 13:5, 6.
ITRE KEPINE MATRE LOI E TRO SA CATR
14. Nemene kepine matre tha tro kö sa xou?
14 Hnei Iesu hna qaja kowe la itretre drei nyidrëti laka, troa traqa la itre jole ngöne la ijine hlepëti nyidrë, ngo öni nyidrëti pe: “The qou kö.” (Luka 21:9) Catre pi së, ke, kolo pala hi a xatua së hnei Iesu la Joxu së, me Iehova Atre Xupe la hnengödrai me fen. Hnei Paulo ekö hna thuecatre koi Timoteo me hape: “Tha hnei Akötesie hna hamë shë la u ka qou ; ngo loi pe ka men, me ka ihnim, me ka inamacan.”—2 Tim. 1:7.
15. Hna qeje pengöne tune kaa hnene la itre xa hlue i Akötresie la lapaune i angatre koi Nyidrë? Tro fe sa hane nyitipu angatre tune kaa?
15 E hnine la Tusi Hmitrötr la aqane qeje pengöne hnene la itre xa hlue i Akötresie la lapaune i angatre koi Nyidrë. Hanawange la hna qaja hnei angatr; öni Davita: “Iehova la tenge catenge me peteng ; hna lapau nyidëti hnene la hning, nge hna xatua ni ; nge nyipi madine la hning.” (Sal. 28:7) Öni Paulo: “Eëshë palua ha e hune la nöjei ewekë cili hnei nyidëti ate hnimi shë.” (Rom. 8:37) Atre hë Iesu, ka hape, tha hmitre pe kö matre xolouthi nyidrëti pi me humuthi nyidrë; nyidrëti hi lai a qaja ju kowe la itre aposetolo la ketre ithanata nyine amamane la ecatrene la aqane imelekeu i nyidrëti me Akötresie. Öni nyidrë: “Tha ini hmekuje kö, ke ce ini me Tetetro.” (Ioane 16:32) Nemene la hna amamane hnene la itre hna qaja e celë hnene la itre hlue i Akötresie? Mama hnyawa pi koi së la lapaune i angatre koi Iehova. E tro sa hane lapaune tune lai koi Akötresie, tro hë së a atreine cile catr e traqa ju la nöjei pengöne jol.—E jë la Salamo 46:1-3.
KEPE MANATHITHINE JU LA ITRE IXATUA QAATHEI AKÖTRESIE
16. Nemene la enyipiewekëne la tro sa inine la Wesi Ula i Akötresie?
16 Tha easë kö a catre hne së kö, ngo qa ngöne pe la hne së hna lapaune koi Akötresie. Tro sa hetrenyi la trengecatr, e hne së hna inine pala hi la Wesi Ula i Nyidrë, ene la Tusi Hmitrötr. Maine tro sa ujë tune lai, tro hë sa atre Akötresieti hnyawa, me ini së troa lapaune koi Nyidrë. Hnene la ketre trejine föe hna tith la mekune hnei kucakuca, hna qaja ka hape, lolo mina pi hi la mele i angeic hnene la hna e, matre e hmaca jë la itre xötre ka akeukawanyi angeic qa hnine la Tusi Hmitrötr. Hne së kö hna eatrëne lo hmi ne la hnepe lapa së e nöjei wiik, tune la aqane amekötine koi së hnene la hlue ka nyipici me ka inamacan? Tro la aqane inine së la Wesi Ula i Akötresie a xatua së troa wai ewekë tune la ketre atre cinyihane la Salamo ka hape: “Atraqate la ajange kowe la wathebo i cilie, ini a mekune kow’ ej’ o drai.”—Sal. 119:97.
17. (a) Nemene la ketre hnei Iehova hna kuca nyine xatua së troa cile catr? (b) Hna xatua nyipunieti tune kaa hnene la ketre hna melëne hnene la itre trejine me easë hna fejane ngöne lo itre sine itusi së?
17 Ame la ketre hna kuca hnei Iehova nyine xatua së troa cile catr, tre, jëne la itre itusi ka ini së la Wesi Ula i Nyidrë, me xatua së troa acatrene catrëne la lapaune së koi Nyidrë. Hetre ithuecatre hna kapa hnei itre xan jëne la hna e la itre hna melëne hnene la itre xa trejin, hna fejane ngöne la itre sine itusi së; tune la ketre trejine föe me easë e Asie. Hna hane tithi fe la mekuna i angeic hnei kucakuca, ngo ka ketre pengöne pe, ke hetre drai ne loi nge hetre drai ne ngazo. Hnei angeice hna e la hna melëne hnene la ketre trejine trahmany ka mesinare, nge casi hi la meci nyidro. Tha hnei meci kö hna ajolëne la trejine trahmanyi troa nyi hlue nyipici koi Akötresie. Qa ngöne lai angeice pë hë a cinyanyine ju ka hape: “Celë hi lai, ka xatua ni troa atreine trotrohnine la pengöne jole ka eje theng, me acatrene la mejiuneng.”
18. Pine nemene matre ka loi la tro sa majemine thithi lapa?
18 Hnei Iehova fe hna xatua së hna jëne la thith. Ixatua koi së lai ngöne la nöjei götrane la mel. Öni Paulo e amamane hnyawa la enyipiewekëne la thithi ka hape: “The kuke hnine kö la kete ewekë ; ngo loi e cengöne amamane koi Akötesie la ite aja i nyipunie hnene la thith, me sipo, me ole. Nge tro ha thupëne la ite hni nyipunie me ite mekune i nyipunie göi Keriso Iesu, hnene la tingetinge ka sisitia qa thei Akötesie hune la nöjei mekun’ asë.” (Fil. 4:6, 7) Ka majemine fe kö së thithi e kola traqa koi së la nöjei pengöne jol? Hna qaja hnei Alex, ketre trejine trahmany qa Agele, hna tithi la mekune hnei kucakuca koi itre macatre ka hape, ame la ka xatua angeice hnyawa, tre, ene la troa “ithanata koi Iehova jëne la thithi me drei Nyidrë hnei hna e la Tusi Hmitrötr.”
19. Nemene la enyipiewekëne la troa sine la itre icasikeu?
19 Itre icasikeu la ketre jëne ixatua koi së qaathei Iehova, göi troa cile catr. Hnene la ketre atre cinyihane la tusi Salamo, hna iawe fë la aja i angeice troa lapa hnine la ēnē i Iehova. (Sal. 84:2) Ka tune fe kö la mekuna së lai? Hnei Lani, lo hne së hë hna qaja, hna qeje pengöne ka hape, ka nyipi ewekë catre koi angeice troa sine la nöjei icasikeu, me itraqa itrony memine la itre trejine trahmanyi me fö. Öni angeice hmaca jë: “Atre hi ni laka, loi e tro jë ni kowe lai, matre xatua ni jë hnei Iehova.”
20. Troa xatua së tune kaa troa cile catr, hnene la hna huliwa atrunyi ngöne la hna cainöje trootro?
20 Ame mina fe la ketre jëne tro sa öhnyi ixatua, tre, ene la tro sa huliwa atrunyi ngöne la hna cainöje trootro. (1 Tim. 4:16) Hnene la ketre trejine föe qa Australie lo hna tithi hnene la nöjei pengöne jol hna qaja ka hape: “Pëkö ejolene koi ni la troa kuca la nöjei pengöne huliwa, ngo tha cainöje trootro fe kö. Eloine hi laka hë ni jë hi hnene la ketre qatre thupe troa ce cainöje trootro me nyidrë; eni pëhë a drenge ju. Iehova lai e hnin, ke, e tro hi ni kowe la hna huliwa ne cainöj, ka tru pala hi la madrinenge qa ngön.” (Ite edomë 16:20) Ala nyimu la angetre trotrohnine ka hape, ame la ixatua hne së hna hamëne göi tro la itre xan a atre Iehova me lapaune koi Nyidrë, tre, celë fe hi lai ka acatrene catrëne la lapaune së. Ame la easa xatua itre xan, kösë pane patre ju hi la itre jole ka traqa koi së, nge mama cile ju pë hë la itre ewekë ka sisitria, lo hna hape, “nöjei ewekë ka isa pengöne kö.”—Fil. 1:10, 11.
21. Ngacama troa traqa koi së la itre jol, ngo nemene la ka xeci hnyawa e kuhu hni së?
21 Tru la nöjei ewekë hnei Iehova hna hamë së nyine xatua së troa cile catre kowe la itre jol. Maine tro sa nue Iehova troa xatua së, tro sa hetre madrin, ngacama traqa ju hë koi së la nöjei pengöne jol. Ketre, ijije fe hi tro sa hetre trenge catr, qa ngöne la hne së hna lapa mekune hnyawa la itre tulu ka lolo ne lo itre hlue i Akötresie, me qa ngöne la hne së hna kuca tui angatr. Ngacama tru la nöjei pengöne jole ka traqa ngöne la fene celë, qa ngöne la easenyi catre hë la pun, ngo epi tro pe sa qaja tui Paulo ka hape: “Hna akein, ngo tha patepi kö ; tha kucakuca kö hun.” (2 Kor. 4:9, 16) Ame la ixatua qaathei Iehova, tre, atre hamë së la trenge catr ka aijijë së troa cile catre qëmekene la itre jole ka traqa koi së.—E jë la 2 Korinito 4:17, 18.
[Ithueamacany]
a Tha sipu ëje kö.