“Ame Iehova Akötesi Shë, Te, Iehova Ka Cas”

1, 2. (a) Pine nemene matre ka hlemu la itre trenge ewekë ngöne Deuteronomi 6:4? (b) Pine nemene matre Mose a thuecatrene la nöj?

AME ngöne la itre hadredre lao macatre, hetre thithi hna qaja lapan hnene la itretre Iudra, nge hna xome qa ngöne Deuteronomi 6:4. Hna hëne la thithi cili ka hape, Shema, ke celë hi la pane hnë ewekë ne la xötre cili ngöne la qene heberu. Matre itretre Iudra a qaja la thithi celë e nöjei hmakanyi me hej nyine amamane ka hape, angatr a mele nyipici koi Akötresie.

² Hna xome la thithi celë qa ngöne la cainöj hnei Mose hna hamëne kowe la angetre Isaraela lo macatre 1473 qëmeke i Keriso. Kolo ijine angatr e Moaba, nge angatr ngöne la ketre götrane la Hneopegejë Ioridano qëmekene troa lö hnine la Nöje Hna Thingehnaean. (Deuteronomi 6:1) Footre hë lao macatre ne elemekene Mose la nöje i Akötresie, nge aja i angeice tro la nöj a cile catr qëmekene la itre itupath. Nge nyipi ewekë e cili tro angatr a mejiune koi Iehova, me mele nyipici koi Nyidrë. Matre, celë hi aliene la cainöje i Mose. Hnei angeice fe hna amexeje la 10 lao wathebo me hamëne fe la itre xa wathebo ju kö. Thupene lai, angeic a thuecatrene jë la nöj me qaja la itre trenge ewekë hna amë ngöne Deuteronomi 6:4, 5. (E jë.)

3. Nemene la itre hnying nyine tro sa ce ithanatan?

³ Atre hnyawa hi la angetre Isaraela laka, ame la Akötresi angatr, tre “Iehova ka cas.” Angatr a nyihluene la Akötresie ne la itre xötrapane i angatr. Nga pine nemene kö matre Mose a amexeje hmaca koi angatr ka hape, ame la Akötresi angatr tre, Akötresie “ka cas”? Kola ce tro tune kaa la mekune celë memine lo wathebo hna hape, troa aja Iehova hnene la hni së ka pexej, me mekuna së ka pexej, me trenge catre së ka pexej? Nge nemene la aqane tro sa trongëne enehila la hna qaja ngöne Deuteronomi 6:4, 5?

“IEHOVA KA CAS”

4, 5. (a) Nemene la aliene la hna hape “Iehova ka cas”? (b) Hnei nemene matre isa pengöne kö Iehova memine la itre xa haze?

⁴ Pëkö ketre ka tui Nyidrë. Ame la hnë ewekë hna hape “Iehova ka cas,” tre nyine amamane laka, pëkö ka ceitu me Iehova. Pine nemene matre Mose a qaja tune lai? Tha angeice kö e cili a thele troa jelethoine lo ini hna hape, A.I.U. Iehova hi la Atre Xupe la hnengödrai me fen, nge atre Musi kow ej. Nyidrëti hi la nyipi Akötresie, nge pëkö ka ceitu me Nyidrë. (2 Samuela 7:22) Matre, ame la aliene la trenge ithanata i Mose, tre nyine amekunëne la angetre Isaraela ka hape, Iehova hi la nyine tro angatr a thili kow. Tro angatr a thupëne matre tha tro kö a xome la thiina ne la itre ka mele xötreithi angatr, itre ka thili kowe la itre haze thoi. Ke ame kowe la itre nöje cili, itre haze i angatr la ka musi kowe la itre ewekë ka ej e celë fen, tune la itre feja me eny, me itre xa ewekë ju kö.

⁵ Nyimutre catre la itre haze hna thili kow hnene la angetre Aigupito. Kola qaja la itre öni tui Ra haze ne jö, me Nut haze ne hnengödrai, me Geb haze ne ihnadro, me Hapi haze ne la hneopegejë Nil. Ngo draië catre kö Iehova! Hnei Nyidrëti lo hna amamane la etrune la mene i Nyidrë ngöne lo kola lepi Aigupito hnene la treene lao akötr. Nge ame pena la angetre Kanana, tre angatr a nyihluene la haze i angatr, Baala. Ame koi angatr, Baala la atre xupe la nöjei ewekë e celë fen, memine la hnengödrai, me mani, me wene. Matre angatr a thithi me sipo angeic troa thupë angatr. (Numera 25:3) Celë hi matre, nyipi ewekë kowe la angetre Isaraela troa lapa mekune laka, Iehova hi la nyipi Akötresie, “Iehova ka cas.”—Deuteronomi 4:35, 39.

6, 7. Nemene la ketre aliene la hnaewekë hna hape “cas,” nge kola eatre tune kaa göi Iehova?

⁶ Tha saze kö nge ka nyipici. Ame fe la hna ithanata “ka cas” ngöne la hnaewekë “Iehova ka cas,” tre kola hape, tha tro pi kö a saze la aja i Nyidrë, nge tro kö Nyidrëti lai a aeatrën. Nge ame Iehova, tha ka saze mekune kö! Ka nyipici Nyidrë, nge tha saze kö la aja i Nyidrë. Ame ekö, hnei Iehova hna thingehnaeane koi Aberahama ka hape, tro la itre matra i angeic a mel ngöne la ketre nöj ka mingöming. Matre, hnei Nyidrëti pë hë hna kuca la itre iamamanyikeu ka tru göi troa eatrëne lo hnei Nyidrëti hna thingehnaean. Thupene la 430 lao macatre, tha saze pi kö lo aja i Nyidrë troa lö sai angetre Isaraela kowe la Nöje Hna Thingehnaean.—Genese 12:1, 2, 7; Esodo 12:40, 41.

⁷ Itre hadredre lao macatre thupen, hnei Iehova hna hëne la itre hlue i Nyidrë ka hape, itretre anyipicin. Nge öni Nyidrëti koi angatr: “Ini hi; pëkö haze hnapane nge pinge pe, nge kete pëkö e thupeng.” Iehova hi lai a qaja axeciëne koi angatr ka hape, tha saze kö la aja i Nyidrë. Ame hnei Nyidrëti hna anyipicine me hape: “Eje hi ini hi.” (Isaia 43:10, 13; 44:6; 48:12) Drei la ketre manathithi ka tru kowe la angetre Isaraela ekö me koi së mina fe troa nyihluene la Akötresie ka nyipici nge ka ca mekun!—Malaki 3:6; Iakobo 1:17.

8, 9. (a) Nemene la nyine troa kuca hnene la itre hlue i Iehova? (b) Hnei Iesu hna acatrene tune kaa lo hna qaja hnei Mose?

⁸ Mose fe a amamane kowe la angetre Isaraela ka hape, ka eje pala hi la ihnimi Iehova koi angatr, nge tro pala kö Nyidrëti a thupë angatre hnyawa. Ngo nyipi ewekë tro angatr a nyihlue i Nyidrë hmekuj, me hnimi Nyidrë hnene la hni angatr ka pexej, me u i angatre ka pexej, me trenge catre i angatr ka pexej. Haawe, hnëqa ne la keme me thin ekö troa qeje Iehova lapa kowe la itre nekö i nyidro, matre tro fe nyudreni a hane nyihlue i Iehova hmekuj.—Deuteronomi 6:6-9.

⁹ Tha saze kö la aja i Iehova koi së, matre tha tro fe kö lai a saze la itre wathebo i Nyidrë thatraqane la itre hlue i Nyidrë. Haawe, maine aja së troa amadrinë Iehova, loi e tro fe sa nyihlue i Nyidrë hmekuj, me hnimi Nyidrë hnene la hni së ka pexej, me mekuna së ka pexej, me trenge catre së ka pexej. Hnei Iesu lo hna qaja ka hape, celë hi la wathebo ka sisitria. (E jë la Mareko 12:28-31.) Tro sa ce wange la nyine troa kuca matre amamane laka, ka xecie koi së ka hape, ame “Iehova Akötesi shë, te, Iehova ka cas.”

NYIHLUE IEHOVA HMEKUJE JË

10, 11. (a) Nemene la aqane tro sa nyihlue i Iehova hmekuj? (b) Hna amamane tune kaa hnene la foa lao thöth ekö laka, angatr a nyihlue i Iehova hmekuj?

¹⁰ Iehova hi la Akötresi së, nge easë a amamane la ihnimi së koi Nyidrë ngöne la easa nyihlue i Nyidrë. Tha tro kö së a nyihluene la ketre haze, maine nyiköne la hmi Iehova hnene la itre ini thoi. Nyipici laka, easë a nyihlue Iehova ke ka draië catre kö Nyidrë hune la itre xa haze, ngo hnene fe laka, Nyidrëti hi la Akötresie ka cas!—E jë la Hna Amamane 4:11.

¹¹ Ame ngöne la tusi Daniela, kola qaja la hna melën hnene la foa lao thöth, ene Daniela, Hanania, Misaela, me Azaria. Hnei angatre hna nyipici koi Iehova ngöne la angatr a xele ma kapa la itre göxen hna wathebone kowe la angetre Isaraela. Ketre, hnene la köni sinee i Daniela hna xele ma thili kowe la hnasaatre i Nebukaneza. Ame koi angatr, Iehova hi la ka tro pa ngöne la mele i angatr. Hnei angatr e cili hna amamane ka hape, Iehova hmekuje hi la nyine tro angatr a nyihlue kow.—Daniela 2:1–3:30.

12. Nemene la nyine tro sa thupën?

¹² Enehila mina fe, loi e tro Iehova a hane tro pa ngöne la mele së. Maine aja së troa nyihlue i Iehova hmekuj, loi e tro sa thupëne matre, pëkö ketre ewekë ka troa xome la göhne i Iehova ngöne la mele së. Nemene la nyine tro sa thupën? Ame ngöne lo Trene lao Wathebo, hnei Iehova hna wathebone kowe la nöj troa thili kowe la itre xa haze. Tha tro pi kö angatr a nyihluene la ketre haze. (Deuteronomi 5:6-10) Nyimutre pi hë enehila la itre xa aqane troa thili kowe la itre idrola, nge ame la itre xan tre tha canga mama kö. Ngo tha saze kö la itre wathebo i Iehova, ke Nyidrëti pala hi la “Iehova ka cas.” Tro sa pane ce wange la aqane tro sa ananyine la kuci idrola enehila.

13. Nemene la ka troa thë la aqane imelekeu së me Iehova?

¹³ Hetrenyi ngöne Kolose 3:5 (E jë), la itre xa ewekë ka troa thë la aqane imelekeu së me Iehova. Hna ce qaja la meciu ewekë me kuci idrola. Pine nemen? Ame la kola lapane la hni së hnene la meciun, tune la meciu mani me meciune la itre huliwa ka sis, ceitun eje hë me ketre haze laka, kola ha musinëne la mele së. Nge ame la itre ngazo hna qaja ngöne Kolose 3:5, tre itre ka ce tro asë hi memine la meciun. Haawe ame la meciun tre, ketre jëne thili fe lai koi idrola. Matre, e traqa jë kökötr e kuhu hni së la meciun kowe la itre huliwa cili, tro hë itre eje lai a sisitria koi së hui Iehova. Ame hë e cili, tha “Iehova ka cas” hmaca kö Nyidrë koi së.

14. Nemene la aqane hmekë së hnei Ioane?

¹⁴ Hnei Ioane mina fe hna qaja la mekune cili ngöne lo angeice a hmekëne la itre keresiano ka hnine la itre aja ne fen. Kola qaja “la meciunyi ewekë i ngönetei, memine la meciune ne la lue mek, memine la nyi döne la mele celë.” Öni angeic ka hape, ame la atre thele la itre ewekë cili, tre “pëkö aja koi Tetetro e kuhu hni angeic.” (1 Ioane 2:15, 16) Celë hi matre, nyipi ewekë tro sa isa waipengö së lapa me thele ka hape, ‘Hna hane fe kö löthi ni hnene la itre aja ne fen?’ Maine jë, tro hë sa öhne laka, easa piine la itre nyine iamadrinë, me itre aqane heetre me mel ne la fen. Maine pena, easa thele “la ite ewekë ka tru” ene la troa kuca la itre ini ka tru. (Ieremia 45:4, 5) Easenyi catre hë la pun, matre nyipi ewekë tro sa trotrohnine lo aliene lo trenge ewekë i Mose me lapaune laka, ame “Iehova Akötesi shë, te, Iehova ka cas.” Haawe, tro hë së lai a nyihlue i Nyidrëti hmekuj me kuca hnyawa la aja i Nyidrë.—Heberu 12:28, 29.

ACATRENE JË LA CASI THE SË

15. Pine nemene matre Paulo a amexeje kowe la itre keresiano ka hape, Akötresieti la “Iehova ka cas”?

¹⁵ Ame lo hna ithanata hna hape, “Iehova ka cas,” tre kola amamane ka hape, loi e tro la itre hlue i Nyidrëti a cas, me ca aqane mel. Ame lo kola xötrei eköthe la pane ekalesia, hetrenyi la itretre Iudra, me itretre heleni, me itretre Roma, me itre trejin ka xulu qa ngöne la itre xa nöje ju kö. Isa hetre aqane mele i angatr, me qenenöj, me aja i angatr. Matre kola nango ajolë angatr troa nue la itre ewekë hnei angatr hna majemin ekö, me nyihlue i Iehova thenge la aja i Nyidrë. Ame hnei Paulo hna amexeje koi angatr ka hape, casi hi la Atrötresie së, ene Iehova.—E jë la 1 Korinito 8:5, 6.

16, 17. (a) Nemene la hna perofetan hnei Isaia, nge nemene la aqane eatr enehila? (b) Nemene la itre ewekë ka troa thë la aqane imelekeu së me itre trejin?

¹⁶ Nge tune kaa la itre keresiano enehila? Hnei Isaia hna perofetane ka hape, ame “ngöne la ite drai hnapine,” tro la nöjei atr ka xulu qa ngöne la nöjei nöj a nyihlue i Iehova. Tro angatr a qaja ka hape: “Tro nyidëti a ini shë la ite jë i nyidë, nge tro sha trongëne la ite gojenyi qa thei nyidë.” (Isaia 2:2, 3) Drei la madrine së enehila troa öhne la aqane eatre la hna perofetane celë! Ka xulu la itre keresiano qa ngöne la itre nöje ka nyimutre, me itre qene hlapa ka nyimutre, me itre qenenöje ka nyimutre. Ngo ame pe, ka casi së ngöne la easë a nyihlue i Iehova. Qa ngöne laka, isa pengö së kö, kola traqa e itre xa ijin la ihmönyinyi e hnine la ekalesia.

¹⁷ Hapeu, nemene la aqane goeën epuni la itre trejin ka traqa qa ngöne la itre xa nöj? Eje hi laka, isa qene lapa i angatr, me aqane heetre i angatr, me itre hnei angatre hna majemin, me itre pengöne xen. Epuni kö a ananyi angatr me ce tro hi memine la itre trejin ne la nöje i epun? Nge nemene fe la aqane goeëne epuni la itre qatre thup ka co kö hui epun, nge ka traqa qa ngöne la ketre nöj? Maine tha hmekëne kö së, haawe, tro la itre ewekë cili a thë la aqane imelekeu së me itre trejin.

18, 19. (a) Nemene la eamo hna amë ngöne Efeso 4:1-3? (b) Nemene la nyine tro sa kuca göi troa acatrene la aqane imelekeu së me itre trejin?

¹⁸ Nemene la nyine tro sa kuca matre tro pala hi a lolo la aqane imelekeu së me itre trejin? Hetre eamo hna hamëne hnei Paulo kowe la itre keresiano ka mel e Efeso, ketre traon ka trenamo nge hna lapan hnene la itre atr ka xulu qa ngöne la nöjei nöj. (E jë la Efeso 4:1-3.) Hnei Paulo hna qaja la itre thiina ka lolo, tune la ipië, me menyik, me xomihni, me ihnim. Hnei angeice hna aceitunëne la itre thiina cili memine la ketre ikapa ka sajuëne la ketre uma. Ngo eje hi laka, nyipi ewekë tro sa catre nyidrawane la uma matre tha tro kö ej a hnyiqetr. Celë hi aliene la ithuecatre i Paulo koi angatr, ene la troa catr “xölehuje la ce hni.”

¹⁹ Loi e tro sa isa kuca asë la hne së hna atrein göi troa acatrene la casi e hnine la ekalesia. Nemene la nyine tro sa kuca? Loi e tro sa pane melëne la itre thiina hnei Paulo hna qaja, ene la ipië, me menyik, me xomihni, me ihnim. Nge loi e tro fe sa huliwa catr göi troa acatrene la “otene la iloi.” Ngo eje hi laka, hetre itre ijine laka, tha itrotrohni kö së, matre hetre ethane lai kowe la aqane imelekeu së me itre trejin. Ame e cili, nyipi ewekë tro sa huliwa catr göi troa lolo hmaca la aqane imelekeu së me angatr.

20. Nemene la aqane tro sa amamane ka hape, trotrohnine hi së lo hna hape, ame “Iehova Akötesi shë, te, Iehova ka cas”?

²⁰ Haawe, kola mama laka ka tru aliene catr la hna ithanata, “Iehova Akötesi shë, te, Iehova ka cas.” Celë hi ka acatrene ekö la lapaune ne la angetre Isaraela, ngöne lo angatr a lö kowe la Nöje Hna Thingehnaean. Tro mina fe la itre trenge ewekë celë a acatrene la lapaune së ngöne la ijine akötr atraqatr, me hane mele tingetinge me casi me itre trejin ngöne la fene ka hnyipixe. Matre, loi e tro pala hi sa nyihlue i Iehova hmekuj. Kola hape, tro sa nyihlue i Nyidrë hnene la hni së ka pexej, me mekune së ka pexej, me trenge catre së ka pexej. Nge loi e tro fe sa huliwa catr göi troa thele tingeting, me acatrene la casi thene la itre trejin. Maine aqane ujë së hi lai, tro hë Iesu a jele meköti së, nge tro fe hë së e cili a öhne la aqane eatre la trenge ewekë i nyidrë, lo kola hape: “Trohemi, nyipunie ange hna amanathithine hnei Kaka, hetenyiju la baselaia hna hnëkëne thatraqai nyipunie qane la hna ami tepene la fen.”—Mataio 25:34.