Qaane Me Kepine La Faipoipo
“Hnei Iehova Akötesieti hna ulatin, ka hape, Tha loi kö e troa lapa casi la at ; tro ni a kuca thatraqai angeice la ixatua.”—GENESE 2:18.
1, 2. (a) Drei la qaane la faipoipo? (b) Nemene la hna atre hnyawa hnene la lue pane trefën? (Wange ju la pane iatr.)
PENGÖNE kö la atr troa faipoipo. Ngo nemene la qaane me kepine la faipoipo? Tro la aqane sa la hnyinge celë a xatua së troa waipengöne hnyawa la faipoipo, me itre manathithi ka xulu qa ngön. Hnei Akötresieti hna xupe la pane atr, Adamu, me upi angeice troa ati ëjene la nöjei öni asë. Öhne hi Adamu e cili ka hape, hetre öni trahmanyi me föe, ngo “pë pe hna öhne thatraqai [angeic] la ixatua ka ijiji angeic.” Celë hi kepin matre, Akötresieti a ameköle angeice jë, me xome la ca wengesisila i angeic, matre troa xupe la föe. Nge Iehova pë hë a tro sai nyiidroti jë koi Adamu, matre nyi föe i angeic. (E jë la Genese 2:20-24.) Haawe, ame la faipoipo, tre ketre ahnahna lai qaathei Iehova.
2 Itre macatre thupen, hnei Iesu hna amexeje lo trenge ithanata i Iehova ekö ngöne lo hlapa e Edena, öni nyidrë: “Tro la trahmanyi a nue la keme me thine i angeic, me fede kowe la fö’ i angeic ; nge tro nyidoti a ca ngönetei.” (Mataio 19:4, 5) Pine laka, hnei Iehova hna xupe la föe qa ngöne la wengesisila i Adamu, matre atre hnyawa hi nyidro laka, tro pala hi nyidroti a casi me ce mel. Tha aja i Iehova kö tro la lue trefën a sei hna cil, maine troa nyimu föe maine trahmanyi pena.
KEPIN MATRE ACILE JË LA FAIPOIPO
3. Nemene la ketre kepine ka tru matre acile jë la faipoipo?
3 Atraqatre la aja i Adamu kowe la föi angeic, nge hnei angeice pë hë hna hë nyiidro ka hape, Eva. Nyiidro la ixatua ka ijije koi Adamu, nge tro nyidroti ekö a ce mele madrin ngöne la faipoipo. (Genese 2:18) Nge ame la ketre kepine ka tru matre acile jë la faipoipo, tre ene la troa nyi aliene la ihnadro. (Genese 1:28) E cili, tro la itre nekö i nyidro, trahmanyi me föe, a metrötrë nyidro. Nge e thupene hë, tro fe hë nyudreni lai a ketre nue keme me thin, troa hane ikötresai. Nge qa ne la itre atre cili troa nyidrawane la ihnadro matre aparadraison ej.
4. Nemene la ka traqa kowe la pane faipoipo?
4 Ngazo pe, hna jole la faipoipo pine la hnei Adamu me Eva hna ena la wathebo i Iehova. Hnene lo “une ekö,” ene Satana Diabolo, hna iaö Eva ka hape, tro hë nyiidro a hane inamacane catr, e tro nyiidro a xeni la wene ne “la sinöe ne ate hmekune la loi me ngazo.” Nge ijiji nyiidro hë lai troa wangatrehmekune la loi qa ngöne la ngazo. E cili, tha hnei Eva pi kö hna metrötrë Adamu, lo he ne la hnepe lapa, ke tha hnei nyiidro kö hna pane ce ithanatan qëmekene troa xeni la wene sinöe. Nge ame Adamu, tha hnei angeice kö hna drengethenge Akötresie, ngo hnei angeice pe hna kei thenge la aja ne la föi angeic.—Hna Amamane 12:9; Genese 2:9, 16, 17; 3:1-6.
Maine aja së troa tro loi la faipoipo së, nyipi ewekë tro la lue trefën a drengethenge Iehova, nge tha tro kö nyidro a thele kepine la isa aqane ujë i nyidro
5. Nemene la hna ini së hnene la aqane sa i Adamu me Eva koi Iehova?
5 Ame lo Iehova a ithanata koi nyidro, hnei Adamu hna canga upezöne la föi angeic. Öni angeic: “Hnene la föe hnei Cilieti hna nue koi ni hna hamë ni la wene sinöe, ame hnenge hna xen.” Ketre, hnei Eva mina fe hna upezöne la un pine iaö nyiidro. (Genese 3:12, 13, MN) E cili, Adamu me Eva a isa thele kepine la aqane ujë i nyidro, matre hnei Iehova pë hë hna ameköti nyidro ceitu me lue ka icilekeu me Nyidrë. Haawe, ketre tulu lai nyine troa hmekë së! Maine aja së troa tro loi la faipoipo së, nyipi ewekë tro la lue trefën a drengethenge Iehova, nge tha tro kö nyidro a thele kepine la isa aqane ujë i nyidro.
6. Troa trotrohnine tune kaa la Genese 3:15?
6 Ngacama hna ie la iaö i Satana, ngo hnei Iehova kö hna thupëne matre tha tro kö a paatre la mejiun ne la itre atr. Hna qaja la mejiune cili ngöne la pane hna perofetan. (E jë la Genese 3:15.) Kola amamane hnene ej ka hape, tro a athe la he i Satana hnene “la matra” ne la “fö.” Ame la föe cili, tre kola qaja la nöjei angela ka mel e hnengödrai, ke angatr a imelekeu hnyawa me Iehova. Matre, hna aceitunë angatr me föi Nyidrë. Tro hë Nyidrëti lai a upe la ketre e angatr troa “athe” la he i Diabolo. Nge tro la matrane cili a aijijëne la itre atr ka idrengethenge troa hetrenyi hmaca lo mel hna aluzine hnene lo lue pane atr. Haawe, tro ha eatre lo aja i Iehova ngöne la qaane laka, tro la itre atr a mel epine palua hune la ihnadro.—Ioane 3:16.
7. (a) Nemene la ka traqa kowe la faipoipo thupene la hna icilekeu hnene la lue pane atr? (b) Nemene la aja i Iehova kowe la trahmanyi me föe?
7 Pine laka hnei Adamu me Eva hna icilekeu, ene pe jole pi hi la faipoipo i nyidro, memine la itre xa faipoipo thupe i nyidro. Qaane ju hi lai, akötre jë hi la nöjei föe asë ngöne la angatr a hnaho. Ketre, atraqatre ju hi la aja ne la föe kowe la trahmany, ngo kolo pe a musinë nyiidro. Nge hetre itre xa föe fe hna qanangazon. (Genese 3:16) Ame pe, aja i Iehova tro la itre trahmanyi a musinëne la hnepe lapa i angatr cememine la ihnim, nge aja i Nyidrëti fe tro la itre föe a metrötrëne la itre föi angatr. (Efeso 5:33) Matre, ame la kola ce huliwa hnene la lue trefën, ketre patre pi hi la itre xa jol.
FAIPOIPO QAANE ADAMU UTI HË NOA
8. Nemene la pengöne la faipoipo qaane Adamu uti hë Noa?
8 Qëmekene tro Adamu me Eva a mec, hnei nyidroti hna pane hetre kuku. (Genese 5:4) Ame la neköne haetra i nyidro, tre Kaina. Hnei angeice pë hë hna ikötresai memine la ketre sine la madra i angeic. Lameka la ketre matra i Kaina, nge angeice hi la pane trahmanyi hna qaja hnei Tusi Hmitrötr ka xomi lue föe. (Genese 4:17, 19) Matre qaane Adamu koi Noa, xalaithe hi la itre atr ka nyihlue i Iehova. Kola qeje Abela, me Enoka, me Noa me hnepe lapa i angeic. Kola qaja hnei Tusi Hmitrötr ka hape, ame ngöne la hneijine i Noa, ‘hnene la itre nekö i Akötesie hna öhne la itre jajinyi laka, mingöminge angatr.’ Ame hnei “angate hna xome nyine ite fö’ i angate lo hnei angate hna isa ajan.” Tha meköti kö lai, matre hnei angatre pë hë hna hnahone la itre nekönatr ka qea hmae, nge ka tru trenge catr. Matre, ame ngöne lo ijine cili, “atraqate la ngazo i ate e celë fen,” nge “ngazo o drai pala hi la nöjei mekun’ asë e kuhu hni nyën.”—Genese 6:1-5.
9. Nemene la hna kuca hnei Iehova ngöne hneijine i Noa, nge nemene la ini koi së?
9 Hnei Iehova ekö hna canga thuemacanyi Noa ka hape, tro Nyidrëti a lepe la fen hnene la ketre Iwë Atraqatr. Celë hi matre hnei Noa “ate cainöjëne la thina ka meköt,” hna thuemacane fe la itre atr. (2 Peteru 2:5) Ngazo pe, tha hnei angatre kö hna semesine Noa, ke tru catre pala ha la itre huliwa i angatr, tune la troa faipoipo. Hnei Iesu pë hë e thupen hna aceitunëne la hneijine i Noa memine la hnedrai së. (E jë la Mataio 24:37-39.) Enehila mina fe, xele kö la itre atr ma drei së ngöne la easë a tro fë la maca ka loi ne la Baselaia. Ketre, easë a isine troa cainöj trootro, qëmekene troa lepe apatrene la fene ka ngazo celë. Matre, nemene la ini nyine tro sa xome qa ngöne la aqane mel ngöne la hneijine i Noa? Tha tro pi kö sa nue la itre ewekë, tune la faipoipo me troa hetre nekönatr troa lapane la hni së, wanga hajihaji pi la drai Iehova la ka calemi hë.
FAIPOIPO QAANE NOA UTI HË IESU
10. (a) Nemene la ka mama ngöne la itre xa qenenöj? (b) Hnei Aberahama me Sara hna amamai tulu tune kaa göne la faipoipo?
10 Hnei Noa me köni nekö i angeic trahmanyi hna xome la isa ca föe. Ngo thupene la Iwë, ala nyimu catre hë la itre trahmanyi ka nyimu föe. Nge ame fe thene la itre xa qenenöj tre, ka pë pengöne hi la troa ce meköl hnene la lue atr ka tha faipoipo kö. Nge ketre aqane hmi i angatre hi lai. Matre ame la Aberahama me Sara a fek a tro Kanana, kola lapa xötreithi nyidro hnene la itre atr ka tha metrötrëne kö la faipoipo. Hnei Iehova e cili hna lepe apatrene la lue traon, ene Sodoma me Gomora ke sisi catre pala ha la thiina ne la itre atrene la lue traone cili. Eloine pe, isa pengöne catre la aqane ujë i Aberahama me angatr. Ketre he ne hnepe lapa ka ihnim catr angeic, nge ame Sara, tre ketre tulu ka lolo göi aqane troa metrötrëne la fö hmunë. (E jë la 1 Peteru 3:3-6.) Hnei Aberahama mina fe hna thupën matre tro kö la nekö i angeic, Isaaka, a xomi föe thene la itre hlue i Iehova. Nge hnei Isaaka mina fe hna hane kuca tun koi Iakobo, matre, itre matra i angeice pë hë la 12 lao tribu i angetre Isaraela.
11. Hna thupëne tune kaa la angetre Isaraela hnene la Trenge Wathebo i Mose?
11 Itre macatre thupen, hnei Iehova hna kuca la ketre isisinyikeu memine la nöje Isaraela. Hnei Nyidrëti hna acile la ketre wathebo lo hna hape, Trenge Wathebo i Mose. Hna hamëne ej nyine thupëne la itre trahmanyi me föe ngöne la angatr a nyihlue i Iehova. Hetre itre hna amekötine göi aqane kuca la faipoipo, me göne fe koi itre ka nyimu föe. Hna wathebo angatre fe troa xomi föe thene la itre wanaithihlë. (E jë la Deuteronomi 7:3, 4.) Ketre, e traqa jë hetre jole ka traqa kowe la lue trefën, ijiji nyidro troa wang la itre qatre ne la nöj göi troa kepe ixatua. Hetre itre wathebo fe göi nyixetë, me izalukeu, me imeku hni. Nge maine nyipici laka, hna nue la troa sei hna cil, ngo ame pe hetre wathebo kö göne matre tro pala hi a thupëne la lue trefën. Hna aijijëne la trahmanyi troa sei hna cil pine la “kete ngazo” hna kuca hnei föe. (Deuteronomi 24:1) Tha hnei Tusi Hmitrötr kö hna qejepengöne la aliene la hna hape, “ngazo,” ngo eje hi laka, tha tro pi kö la trahmanyi a xome la itre hnepe tria i föe matre nyi kepine la troa sei hna cil.—Levitiko 19:18.
NYIPICI JË KOWE LA HNA SISINY
12, 13. (a) Nemene la aqane ujë ne la itre trahmanyi ngöne la hneijine i Malaki? (b) Nemene la pun kowe la ketre trejin ka xome la ifekë föen?
12 Ngöne la hneijine i Malaki, nyimutre la itre trahmanyi ne Iudra ka xome la nöjei pengöne kepine göi troa sei hna cil. Angatre a ujë tun, ke angatr a ajane troa faipoipo memine la ketre föe ka co, maine pena memine la ketre föe ka tha nyihlue i Iehova kö. Nge ame ngöne la hneijine i Iesu, itre trahmanyi ne Iudra pala hi a sei hna cil pine “la nojei ewekë asë.” (Mataio 19:3) Methi Iehova Akötresie la troa sei hna cil menu.—E jë la Malaki 2:13-16.
13 Ame enehila, itre hlue i Iehova pala hi a wange angazone la nyixetë, matre xalaithe hi la itre ka ujë tun thei angatr. Ngo hapeu, nemene la nyine troa kuca e traqa ju la ketre trejin nyi xetë me trije la föi angeic matre troa faipoipo me ketre? Maine tha ietra kö angeic, troa upe trön eë la atr cili matre tro pala hi la ekalesia a pë ethan me lolo. (1 Korinito 5:11-13) Loi e tro la atre cili a pane “wa wene,” kola hape, troa mama la ietra thei angeic, matre kepe angeice hmaca jë e hnine la ekalesia. (Luka 3:8; 2 Korinito 2:5-10) Tha hna sa ijine kö la troa kepe angeic hmaca e hnine la ekalesia. Maine jë, troa traqa koi cas, maine nyimu macatre matre mama pi ka hape, ka nyipi ietra angeic. Nge ngacama kola kepe angeic hmaca hnene la ekalesia, ngo tro kö angeice lai a “cile qëmekene la ita ne amekötine i Akötesie.”—Roma 14:10-12; Wange ju la Ita Ne Thup qene Wiwi ne 15 Febuare 1980, götrane 31-32.
FAIPOIPO THENE LA ITRE KERESIANO
14. Pine nemene matre acile jë la Trenge Wathebo i Mose?
14 Hnene la nöje Isaraela ekö hna trongëne la Trenge Wathebo i Mose koi 1 500 lao macatre. Hnene ej hna xatuane la nöje i Akötresie ngöne la nöjei götrane la mele i angatr, tune la troa senge la itre jol e hnine la hnepe lapa. Hnene ej mina fe hna thupëne la nöj uti hë traqa la Mesia. (Galatia 3:23, 24) Nge ame hë la kola meci hnei Iesu, tre kolo fe hi a apëne la Wathebo, nge hna acile pena ha hnei Akötresie la ketre hna amekötine ka hnyipixe. (Heberu 8:6) Matre, ame la itre xa hna amekötine ekö hnene lo Trenge Wathebo i Mose, tre tha nyine tro hmaca kö a trongëne hnene la itre Keresiano.
15. (a) Nemene la hna amekötin kowe la itre keresiano göi faipoipo? (b) Nemene la kepin ka aijijëne la lue trefën troa sei hna cil?
15 Ame ngöne la ketre drai, hnene la ketre Faresaio hna hnying koi Iesu göi sei hna cil. Hnei Iesu hna sa koi angeic ka hape, ngacama hnei Akötresie hna nue la angetre Isaraela ekö troa sei hna cil, ngo tha eje kö lo aja i Nyidrëti ngöne la qaan. (Mataio 19:6-8) Iesu hi lai a amamane laka, tro hë la itre Keresiano a trongëne la itre hnei Iehova hna amekötin. (1 Timoteo 3:2, 12) Qaane ju hi lai, tro la lue trefën a “ca ngönetei,” kola hape, tro nyidroti a casi me ce mel. Tro nyidroti a atreine traqa kow, hnene la ihnimi nyidro lue trefën, me ihnimi nyidroti koi Iehova. Nge e traqa jë nyidro sei hna cil, nge tha hna nyixetë kö, tha meköti kö tro nyidro a faipoipo hmaca me ketre. (Mataio 19:9) Ngo ame pe, ijije fe hi tro la atre hna nyixetë trij a nue la ngazo ne la föi angeic, nge celë hi lai hna kuca hnei Hosea. Ngacama hnei Gomera, föi angeic hna nyixetë, ngo hnei angeic hna nue la ngazo i nyiidro. Ketre, hnei Iehova mina fe hna ujë tun kowe la nöje Isaraela. (Hosea 3:1-5) Nge maine tro la atr hna nyixetë trij a ce meköle hmaca memine la föi angeic, kolo hi lai a amamane ka hape, iloi hmaca ha nyidro. E cili, pë hë kepine ka aijijëne la lue trefëne troa sei hna cil.
16. Nemene la hnei Iesu hna qaja göi itre ka lapa cas?
16 Hnei Iesu hna amamane hnyawa kowe la itre Keresiano laka, ame hi la kepin troa sei hna cil, tre ene la tro ketre a ce meköl me ketre, nge tha föi angeice kö. Thupene lai, hnei nyidrëti hna ithanatane la itre atr ka atreine troa lapa cas. Öni nyidrë: “Ame la [ka] ateine troa kapa lai, kapaju.” (Mataio 19:10-12) Itre xan a mekune troa tha hane faipoipo matre hmaloi koi angatr troa nyihlue i Iehova. Haawe, loi e tro sa qaja aloinyi angatr pine lai!
17. Nemene la ka xatuane la ketre trejine troa axeciëne ka hape, ijiji angeice hë troa faipoipo?
17 Nemene la ka troa xatuane la ketre trejine troa axeciëne ka hape, tro angeic a faipoipo maine lapa casi pena? Loi e tro angeic a pane mekune ka hape, ‘Ijijinge kö troa mele cas?’ Nyipici laka, hnei Paulo hna qaja la eloine la troa lapa cas, ngo öni angeice fe: “Loi la ite trahmanyi troa isa ca fö’ i angat, nge kete loi la ite föe isa ca fö’ i angat, wanga kuci ngazo.” Nge öni angeice hmaca jë: “E tha ’teine kö angate xomi hni, ange faipoipojë ; loi e troa faipoipo hune la hededei.” Eje hi laka, e traqa jë angeice faipoipo, tro lai a xatua angeic matre tha tro kö angeic a kei kowe la itre huliwa ka sis, tune la troa elone la götrane ga hmitrötr i angeic maine kuci ngazo pena. Ngo loi e tro la itre nekö trahmanyi me jajinyi ka pi faipoipo a pane treqene matre ijiji angatre jë. Öni Paulo: “Maine hace koi angeic troa lapa fë aqeane la nyipi jajinyi angeic, nge ase hë angeice shashaithe la ijine eng, nge ijije troa faipoipo, loi e tro angeic a kuca la aja i angeice kö ; tha ngazo kö angeic ; loi e troa faipoipo.” (1 Korinito 7:2, 9, 36, MN; 1 Timoteo 4:1-3) Haawe, tha loi kö tro la ketre trejin a faipoipo ke angeic a traqa kowe la ijine “eng,” kola qaja la ijine kola thithë la itre aja ne la ngönetrei. Ame ngöne la ijine cili, tha ijiji angeice pala kö troa xome la itre hnëqa ne faipoipo.
18, 19. (a) Drei la ka troa faipoipo? (b) Nemene la nyine tro sa ce wang ngöne la tane mekune ka troa xulu?
18 Nyipi ewekë tro la keresiano a faipoipo hmekuje hi memine la ketre trahmanyi maine föe hna bapataisone hë, nge ka hnimi Iehova hnene la hni angeice ka pexej. Nge ame koi lue ka iaja, nyipi ewekë tro nyidro a acatrene la ihnimi nyidro, matre troa hetre aja i nyidro troa ce mel. Tro hë Iehova lai a amanathithi nyidro ke hnei nyidro hna trongëne la hnei Nyidrë hna amekötine ka hape, troa faipoipo “göi Joxu hmekuje hi.” (1 Korinito 7:39) Nge e tro nyidro a melëne pala hi la itre eamo qa hnine la Tusi Hmitrötr, eje hi laka, tro ha tro loi la faipoipo i nyidro.
19 Easë enehila a melëne “la ite drai hnapin,” matre xalaithe hi la itre atr ka melëne la itre thiina ka nyipi ewekë kowe la faipoipo. (2 Timoteo 3:1-5) Matre, ame ngöne la tane mekune ka troa xulu, tro sa ce wange la itre xa eamo qa hnine la Tusi Hmitrötr ka aijijëne la itre keresiano troa mele madrin ngöne la faipoipo, ngacama nyimutre ju hë la itre jol. Tro lai a xatuane la lue trefën troa xötrëne pala hi la gojenyi ne mel.—Mataio 7:13, 14.