Isapengöne Kö La Hlue i Iehova Memine La Ka Tha Nyihlue i Nyidrë
“Tro . . . nyipunie a isa wangate hmekune la ate ka meköti me ate ka ngazo.”—MALAKI 3:18.
1, 2. Nemene la jol hna cile kow hnene la itre hlue i Akötresie enehila? (Wange ju la pane iatr.)
ITRE droketre me infirmier a nyinyine la mec ne la itre atr, itre mec ka ixötrekeu ke, hetre aja i angatr troa xatua nyudren. Ngo, nyipiewekë tro angatr a thupëne hnyawa wanga xötre pi fe koi angatr la itre mec cili. Ceitune hi lai memine la Itretre Anyipici Iehova. Easë fe a mel, me ce huliwa memine la itre atr laka, ka isazikeu catr la itre thiina i angatr memine la itre thiina i Akötresie. Matre, tha ka hmaloi kö koi së.
2 Ame ngöne la itre drai tixenuë celë, thatre kö la itre atr la loi me ngazo. Paulo aposetolo a qejepengöne la itre thiina i angatr ngöne la tusi angeic koi Timoteo. Öni Paulo, troa mama catr la itre thiina cili ngöne la kola easenyi catr kowe la pune la fene celë. (E jë la 2 Timoteo 3:1-5, MN, 13.)a (Wange ju la ithuemacany.) Maine nyipici laka, easa hokötre hnene la itre thiina cili, ngo ijije fe hi troa hane xötre koi së la itre aqane mekun, me aqane ithanata, me aqane ujë ne la itre atr. (Ite Edomë 13:20) Ame ngöne la tane mekun celë, tro sa ce wange la eisapengönene la itre thiina cili memine la itre thiina ne la itre hlue i Akötresie. Tro fe sa ce ithanatane la nyine tro sa kuca matre tha tro kö a hane löthi së hnene la itre thiina ka ngazo ne la itre atr hne së hna ini Tusi memin.
3. Nemene la itre thiina ka mama thene la itre atr hna qaja ngöne 2 Timoteo 3:2-5?
3 Öni Paulo, ame ngöne la itre drai ne la pun, troa traqa la “nöjei ijine ka aköte.” Angeic a amë wengëne jë la 19 lao thiina ka ngazo ka troa mama thene la itre atr. Kolo fe a mama la itre thiina cili ngöne Roma 1:29-31, ngo hetre itre xa hnëewekë e cili ka tha mama kö ngöne la itre xa tusi ne la Itre Hna Cinyihan Qene Heleni. Hnei Paulo hna nyiqaane qaja ka hape, “tro nöjei ate.” Kola qaja la itre trahmanyi me föe ka hetre thiina ka ngazo. Ngo, tha nöjei atr asë kö la ka ujë tune lai. Patre kö la itre thiina cili thene la itre keresiano.—E jë la Malaki 3:18.
LEPETRIJE PI LA THIINA KA PI TRU
4. Nemene la aqane ujë ne la atr ka pi tru?
4 Öni Paulo göi itre atr ka hnimi angatre kö, me itre ka meciu mani ka hape, tro angatr a selën, me pi draië, me pi tru. Ame koi angatr, ka sisitria kö angatr hui itre xan qa ngöne la itre hnei angatr hna atreine kuca, memine la pengöi angatr, me itre mo i angatr, maine itre hnëqa hna cilën. Hetre aja i angatr troa atrunyi angatre kö. Önine la ketre ka inamacan: “Ame e kuhu hni angatr, kösë hetre haze laka, angatr a thil koi angatre kö.” Hna xele ma wang la thiina cili hnene la itre atr, nge goi xele fe ma wang hnene la itre ka pi tru.
5. Nemene la aqane mama la pi tru thene la itre xa hlue i Iehova?
5 Xele catre Iehova ma wange la atr ka pi tru. (Ite Edomë 6:16, 17) Ka nanyi catre angeic qaathei Akötresie. (Salamo 10:4) Diabolo hi lo atre pi tru. (1 Timoteo 3:6) Nge, tro fe a hane löthe la itre hlue i Iehova hnene la thiina cili. Uzia joxu ne Iuda la ketre atr ka nyipici koi Iehova ngöne la itre macatre ka nyimutre. Ngo, öni Tusi Hmitrötr: “Nge catë hë nyidë, nyidëti a pi tru mate hnëjinepi ; ke nyidëti a thina ka ngazo koi Iehova Akötesi nyidë.” Hnei Uzia hna tro kowe la ēnē me dreu sinöe ka pui loi, ngo tha hnëqa i angeice pe. Thupene lai, hna hane traqa koi Hezekia joxu la pi tru, ngo ngöne hi la hnepe ijine ka co.—2 Aqane lapa ite Joxu 26:16; 32:25, 26.
6. Nemene la pengöi Davita? Pine nemene matre hnei angeic palahi hna ipië?
6 Alanyimu la itre atr ka pi tru ke, itre ka mingöming e tro sa goeën, maine itre ka hlemu, me ka atreine elo miuzik, nge atre catr, nge hna atrune hnene la itre atr. Hetrenyi asë hi Davita la itre pengöne cili, ngo tha hnei angeice kö hna pi tru, me pi draië. Thupene la hnei Davita hna ngaa Goliatha, hnei Saulo hna hamëne la nekö i nyidrë nyine föi Davita. Ngo, öni Davita: “[Drei eni] ? nge nemene la eIoing, memine la lapa i kaka e Isaraela, mate tro ni a [tresi] ne la joxu?” (1 Samuela 18:18) Nemene la ka xatua Davita tro palahi a ipië? Atre hnyawa hi angeic laka, hnene la ipië ka ej thei Akötresie, matre hnei Nyidrëti hna wangatrunyi angeic. Celë hi ka aijiji angeic troa hetre thiina ka lolo, me itre hnëqa, me itre hna atreine kuca. (Salamo 113:5-8) Trotrohnine hi Davita laka, ame la nöjei ewekë ka loi ka ej thei angeic tre, itre hnei angeic hna kapa qaathei Iehova.—Wange ju fe la 1 Korinito 4:7.
E mama hnyawa hi la thiina ka ipië the së, tro itre atr lai a ajan troa atre Iehova
7. Nemene la itre eamo ka aijiji së troa hetrenyi la thiina ka ipië?
7 Ame enehila, itre hlue i Iehova a thel troa ipië tui Davita. Kola ketr la hni së la easa atre ka hape, ka ipië Iehova, lo Kapucatinasë. (Salamo 18:35) Easa thel troa trongëne la itre eamo celë, ka hape: “Xetëneju nyipunie la ihnimi ka tru, me utipin, me thina ka loi, me hni ka ipië, me thina ka menyik, me xomi hni ahoeany.” (Kolose 3:12) Ketre, “tha ate selëne kö la ihnim, nge tha ate pi tru kö.” (1 Korinito 13:4) E mama hnyawa hi kowe la itre atr la thiina ka ipië the së, tro angatre lai a hane ajan troa atre Iehova. Ceitune hi lai memine la trahmanyi ka tha hmi kö. Angeic a thel troa easenyi koi Iehova hnene la aqane ujë ne la föi angeic ka nyihlue i Iehova. Haawe, tro fe la itre atr a thel troa easenyi koi Akötresie jëne la thiina ka ipië thene la itre hlue i Nyidrë.—1 Peteru 3:1.
IMELEKEU HNYAWA JË ME ITRE ATR
8. (a) Nemene la aqane wang enehila la tha idrei? (b) Nemene la hnei Tusi Hmitrötr hna amekötin kowe la itre nekönatr?
8 Hnei Paulo hna qaja la aqane ujë ne la itre atr ngöne la ijine la pun. Öni angeic, tro la itre nekönatr a tha drei keme me thin. Ame enehila, hna wangaloine la aqane ujë cili e hnine la itre itus, me film, me ngöne tele. Ngo, hnene la tha idrei cili matre kola isa thë la itre hnepe lapa. Nge atre hnyawa hi së laka, ame la hnepe lapa tre, trepene hi la nöj. Tha ka sihngödri kö lai kowe la atr qaane hë ekö. Ame thene la angetre Heleni ekö, ame la atr ka lepi keme me thin tre, hna xom ceitu angeic me atr ka hnëjin. Nge, ame fene la musi angetre Roma, ame la atr ka lepi kem tre, hna tranyi angeic ceitu memine la atre ihumuth. Ame ngöne la Itre Hna Cinyihan Qene Heberu me Qene Heleni tre, kola thuecatrene la itre nekönatr troa metrötrë keme me thin.—Esodo 20:12; Efeso 6:1-3.
9. Nemene la ka xatuane la nekönatr troa drei keme me thin?
9 Nemene la ka troa xatuane la itre nekönatr troa drei keme me thin, ngacama itre xa nekönatr a tha idrei? E tro la nekönatr a mekun la nöjei ewekë ka lolo hna kuca thatraqai angeic hnene la keme me thin, tro angeice lai a hetre hni ne ole koi nyidro, nge tro fe lai a upi angeic troa idrengethenge. Loi e tro la nekönatr a trotrohnine laka, aja i Iehova, Keme së, tro angeic a drei keme me thin. Ame la angeic a qaja aloinyi nyidro, kolo hi lai a upe la itre sinee i angeic troa metrötrëne fe la keme me thine i angatr. Nyipici laka, e tha hnime kö keme me thin la nekönatr, tro lai a jol koi nyën troa idrengethenge. Ngo, e kola dreng hnei nyën laka, tru la ihnimi keme me thin koi nyën, tro nyëne lai a idrengethenge, ngacama jole pi hë koi nyën. Öni Ostin, ketre trejin thöth ka hape: “Hnei kaka me nenë hna acil la itre ifego ka hmaloi troa trongën, ngacama eni a thel e itre xa ijin troa sasaith la itre ifego cili. Ketre, nyidroti palahi a qejepengöne koi ni la kepin matre amekötine jë nyidro tune lai, nge hnei eahuni palahi hna ce ithanatan. Celë hi ka xatua ni troa idrengethenge me amadrinë nyidro. Nge, kola mama koi ni laka, nyidroti a nyipiewekë ni.”
10, 11. (a) Nemene la itre thiina ka amamane ka hape, pëkö ihnim thene la itre atr? (b) Nemene la etrune la ihnimi ne la itre keresiano kowe la itre atr?
10 Hnei Paulo hna qaja fe la itre xa thiina ka amamane laka, pëkö ihnim thene la itre atr. Tha sesëkötre kö së laka, thupene la hna qaja la “tha dei keme me thin,” angeic a amexeje la itre atr ka tha ole kö. Ame la atr ka tha ole kö, tha angeice kö a nyipiewekën la itre ewekë ka lolo hna kuca thatraqai angeic. Hnei Paulo hna qaja fe la itre atr ka tha nyipici kö, me itre ka icilekeu, matre tha lapa tingetinge kö angatr me itre atr. Tro fe la itre atr a qaja angazone la itre xa atr me Akötresie, me hane mele hnihni. Nge, tro la itre atr a ixöjetrij, kola silitrengathoi itre xa atr matre adrone la ëje i angatr.b—Wange ju la ithuemacany.
11 Isapengöne kö la itre hlue i Iehova memine la itre atrene fen ke, hetre ihnimi angatr kowe la itre atr. Celë hi thiina i angatr qaane ekö. Öni Iesu, ame la hnaaluene Wathebo ka tru tre, ene la troa hnime la atr easenyi së. (Mataio 22:38, 39) Nge, hatrene hi la itre nyipi keresiano la troa ihnimikeu. (E jë la Ioane 13:34, 35.) Ketre, tro la keresiano a hnime la ithupëjia me angeic.—Mataio 5:43, 44.
12. Nemene la aqane hnim Iesu la itre atr?
12 Hnei Iesu hna amamane ka hape, hetre ihnimi nyidrë kowe la itre atr. Hnei nyidrëti hna trongëne la itre hlapa trootro matre troa ce thawa me itre atr la maca ka loi ne la Baselaia i Akötresie. Hnei nyidrëti hna nyinyine la itre mec, itre timek, me itre ka peje ca, me itre lepera, memine la itre ka simi hnangenyë. Hnei nyidrëti fe hna amelene hmaca la itre ka mec. (Luka 7:22) Goi huujëne fe Iesu la mele i nyidrë thatraqane la itre atr, ngacama itre ka xele ma wai nyidrë. Hnei nyidrëti hna xötrethenge la ihnimi ne la Keme i nyidrë. Kola nyitipu Iesu hnene la Itretre Anyipici Iehova e cailo fen, me hnim la itre atr.
13. Nemene la ka troa thue aja ne la itre atr troa atre Iehova?
13 Jëne la ihnimi së kowe la itre atr, tro ha hetre aja i angatr troa atre Iehova. Hnene la ketre trahmanyi e Thaïlande hna sine la ketre asabele ka tru. Nge hna ketri angeic hnene la ihnimi ne la itre trejin. Ame la kola bëeke koi hnalapa, angeic ha sipone troa alua ini Tusi Hmitrötr memine la Itretre Anyipici Iehova ngöne la wiik. Nge, kolo fe ha qeje Iehova kowe la itre sinee i angeic. Thupene la sikisi lao treu, angeice hë a cile fë la ketre hnëqa, ene la troa e Tusi Hmitrötr ngöne la Uma Ne Baselaia. Nge tune kaa epun, epuni kö a hnim la itre atr? Isa waipengöi epuni jë, me hape: ‘Eni kö a kuca asë la hnenge hna atrein troa xatuane la hnepe lapang, memine la itre trejin, memine la itre atr ngöne la hna cainöje trootro? Eni kö a goeëne la itre atr tune la aqane goeën Iehova?’
LUKO ME MAMOE
14, 15. Nemene la itre xa thiina ka ngazo ka mama enehila? Tune kaa la aqane saze la itre xa atr?
14 Ame ngöne la itre drai ne la pun, troa mama la itre thiina ka ngazo thene la itre atr, nge nyine tro sa neën. Alanyimu la itre atr ka tha ajane kö la loi. Angatr a xelene la loi, me catre fë la mekuna i angatr. Ame itre xan, ka thatreine xomehnöth, nge ka iakötrë. Nge hetre itre ka catreqë, tha mekune kö la itre ethane la huliwa i angatr koi itre xan.
15 Alanyimu la itre ka ujë ceitu me öni, nge saze hë angatr. Hna thingehnaeane hë lai hnei Tusi Hmitrötr. (E jë la Isaia 11:6, 7.) Easa trotrohnin e celë laka, ame la itre öni ka ses, tune la luko me liona, tro itre ej a mele tingeting memine la itre öni ka mem, tune la mamoe me neköi kau. Pine nemene matre tingetinge hë itre ej? Kola sisedrëne hnei Isaia perofeta ka hape: “Troa tiqa la fene hnengödrai hnene la ate hmekunyi Iehova.” (Isaia 11:9) Thatreine kö la itre öni troa atre Iehova, matre ame la hna perofetane celë tre, kola qaja la itre atr ka saze.
Kola saze la mele ne la itre atr jëne la itre trepene meköt qa hnine la Tusi Hmitrötr! (Wange ju la paragarafe 16)
16. Hnene la Tusi Hmitrötr hna xatuane tune kaa la itre atr troa saze?
Tha ka hmaloi kö troa saze, ngo tro la uati Akötresie a xatuane la itre ka ajan troa amadrinë Nyidrë
16 Alanyimu la itre trejin ekö ka ujë ceitu me itre öni, ngo itre ka ce mele tingetinge hë enehila me itre atr. Tro epuni lai a e la itre hnei angatr hna melën ngöne la hna hape, “Saze Hë La Mel, Hnei Tusi Hmitrötr,” ka mama ngöne la site së jw.org. Ame göi angetre “xome la pengöne la atr ka hmi koi Akötresie, ngo tha mama pe ngöne la mele i angatr” tre, tha kolo kö a qaja la itre hlue i Iehova. Kolo pe a qaja la itre atr ka pi mama fë ka hape, angatr a nyihlue i Akötresie, ngo tha mama pe ngöne la thiina i angatr. Ame thene la itre hlue i Iehova enehila, hetrenyi la itre ka ujë tun ekö, ngo hnei angatr hna ‘xetrëne la atre ka hnyipixe, lo hna xupe tui Akötresie ngöne la thiina ka meköt, me thiina ka hmitrötre me nyipici.’ (Efeso 4:23, 24) Ame la kola atre Iehova, trotrohnine hë angatr la enyipiewekëne troa trongëne la itre hna amekötin hnei Nyidrë. Celë hi ka xatua angatr troa saze amekötin la itre ini hnei angatr hna lapaune kow, me itre mekuna i angatr, me itre aqane ujë i angatr. Tha ka hmaloi kö troa saze, ngo tro la uati Akötresie a xatuane la itre ka ajan troa amadrinë Nyidrë.
“IANANYI PI EÖ ME ITRE KA TUNE LAI”
17. Nemene la nyine tro sa kuca matre tha tro kö a hane löthi së hnene la itre thiina ka ngazo ne la itre atr?
17 Troa mama cile hnyawa la eisapengönene la itre ka nyihlue i Akötresie, me itre ka tha nyihlue i Nyidrë. Loi e tro sa thupën matre tha tro kö a löthi së hnene la itre thiina ne la itre ka tha nyihlue i Iehova kö. Matre, nyipiewekë tro sa trongëne la itre hna amekötin hnei Iehova, me iananyi memine la itre atr hna qaja ngöne 2 Timoteo 3:2-5. Nyipici laka, thatreine kö së troa iananyi memine la nöjei atr ka hetrenyi la itre thiina cili ke, easa ce huliwa me angatr, maine ce ini me angatr, me ce mel me angatr. Ngo, tha tro pi kö sa ixomithiina. Tro sa atreine neëne la thiina i angatr, e hne së hna acatrene la aqane imelekeu së me Iehova jëne la hna ini Tusi cas, me nyisineene la itre ka hnimi Nyidrë.
18. Nemene la nyine tro sa kuca matre tro la itre atr a thel troa atre Iehova?
18 Loi e tro sa isine troa xatuane la itre atr troa atre Iehova. Thele jë la itre ijine troa qeje Nyidrë, nge sipone jë la ixatua i Nyidrë matre troa qaja la itre ithanata ka lolo ngöne la nyipi ijin. Qaja amamane jë ka hape, Atre Anyipici Iehova së. Tro hë la aqane ujë së e cili a atrunyi Akötresie, ngo tha easë kö. Hnei Iehova hna upi së troa “xelene la thina ka tha ijiji Akötesie me nöjei aja ne la fen, ngo [loi pe] tro sha [“inamacan,” MN], me thina meköt, me thina ka ijiji Akötesie ngöne la mele celë.” (Tito 2:11-14) E tro sa nyitipu Iehova, me kuca la aja i Nyidrë, tro lai a mama koi itre atr. Nge tro angatr a hape: “Tro huni a ce tro me nyipunie, ke ate hë huni laka thei nyipunie la Akötesie.”—Zakaria 8:23.
a 2 Timoteo 3:1-5, MN: “Nge wangatrehmekune ju eö la, ka hape, tro ha traqa la itre ijine ka akötre ngöne la itre drai tixenuë. Ke, tro nöjei atr a hnimi angatre kö, me meciu mani, me selën, me pi draië, me qaja angazone la itre atr me Akötresie, me tha drei keme me thin, me tha ole kö, me tha nyipici kö, angetre tha hnimi sinen, me icilekeu, me itretre ixöjetrij, me ka thatreine xomehnöth, nge ka iakötrë, me itretre tha ajane kö la loi, itretre mele hnihni, me catreqë, me pi tru, itretre ajane la itre nyine iamadrinë ngo tha aja Akötresieti kö, kola xome la pengöne la atr ka hmi koi Akötresie, ngo tha mama pe ngöne la mele i angatr. Iananyi pi eö me itre ka tune lai.”
b Ame la hnaewekë qene Heleni hna hape, “atre ixöjetrij” tre, di·aʹbo·los. Ame ngöne la Tusi Hmitrötr, hna ati ëje i Satana la hnëewekë celë ke, angeice hi la atre xöjetriji Akötresie.