Aqane Troa Kepe Thangan Qa Ngöne La Ini Tusi Hmitrötr

Iosua a e la Wathebo; hna lep apatrene la traon e Ieriko ngo mele ju pe kö Rahaba; Iosua a gala draië ngöne la angeic a thith

HNËQA i Iosua troa elemekene la nöje Isaraela uti hë la troa traqa kowe la Nöje Hna Thingehnaean. Tha ka hmaloi kö la hnëqa. Ngo, hnei Iehova hna ithuecatre koi angeic me hape: “Catejë, nge nyipi iahlëpi.” Öni Nyidrë koi Iosua ka hape, maine tro angeic a e me trongëne la Wathebo, tro hë angeic a atreine axecië mekune hnyawa, nge troa tro loi la mele i angeic.—Iosua 1:7, 8.

Pine laka easa melëne “la nöjei ijine ka aköte,” tro ha hace la mele së. (2 Timoteo 3:1) Maine easa ajane troa tro loi la mele së tui Iosua, nyipiewekë tro sa trongëne la eamo hnei Iehova hna hamën. Nyipiewekë tro sa catre e la Tusi Hmitrötr, me huliwane ej matre troa axecië mekune hnyawa.

Maine jë, thatre kö së la aqane troa ini tus, maine pena pëkö aja së troa ini tus. Ngo ame pe, ka nyipiewekë catre troa inine la Tusi Hmitrötr. Tro la hna eköhagen hna hape, “Pane Tupathe Jë,” a xatua së troa kepe thangan me madrine troa ini tus.

Önine la atre cinyihane la Salamo: “Ea trongë ni jë ngöne la jë ne la ite wathebo i cilie, ke ini a madin’ ej.” (Salamo 119:35) Tro fe sa madrine qa ngöne la hne së hna inine la Wesi Ula i Akötresie. Tha nyine qaja kö la elolone la itre ewekë hne së hna troa inin e hnine la Tusi Hmitrötr!

Nyipici laka, tha easë kö a elemekene la ketre nöj tui Iosua, ngo ame pe, hetre itre jole fe ka troa traqa koi së. Celë hi matre, nyipiewekë tro sa inin me xötrethenge hnyawa la itre hna qaja e hnine la Wesi Ula i Akötresie, tui Iosua. E cili, tro hë sa axecië mekune hnyawa, nge troa tro loi la mele së.

PANE TUPATHE JË

Troa thith qëmekene troa ini tus. Tusi Hmitrötr a qatreng la itre mekuna i Iehova, nge nyine loi koi së. Celë hi matre, ame la epuni a e la Tusi Hmitrötr, loi e troa pane sipo Iehova troa xatua epun troa trotrohnine la itre hna e, me mekune hmaca qëmekene troa axecië mekun.—Ezera 7:10.
Troa isa hnying, ngöne la easa e la Tusi Hmitrötr maine itre xa itusi së pena. Troa hnying, ka hape: ‘Nemene la pengöi Iehova ka mama koi ni? Pine nemene matre ka ce tro hnyawa memine la hna qaja hnei Tusi Hmitrötr? Nemene la aqane tro ni a xatuane la itre xan jëne la itre mekun celë?’
Troa lapa mekune la hna inin. Pane cile ju, matre lapa mekune la itre hna e. Isa hnyinge jë ka hape: ‘Nemene la ka ketri ni ngöne la xötre celë, nge pine nemen? Pine nemene matre ka ihmeku hnyawa la xötr memine la itre hnenge hna melën ekö, me enehila, me elanyi fe? Nemene la aqane tro ni a trongëne la trepene meköt maine eamo celë ngöne la meleng?’ (Iobu 23:5; Salamo 49:3) Pane mekune jë la itre kepin matre Iehova a sawa la nöje i Nyidrë troa kuca la itre xa ewekë. Ame la epuni a e la ketre hna melën e hnine la Tusi Hmitrötr, pane mekune jë la thangan hna troa kapa hnene lai atr e tro angeic a thele troa saze.—Deuteronomi 32:28, 29.
Troa mekun la hne së hna e. Drei la ketre ceitun. Pane mekune jë la kola salemë Iosefa hnene la itre trejin me angeic, koi angetre Isamaela. (Genese 37:18-28) Nemene la hnei epuni hna öhn, me dreng, me punepun? Pane mekune jë laka, ce epuni me angatr ngöne la ijine cili. Nemene la mekuna i epun? Maine tro epuni a kuca tune lai, tro hë epuni a kepe thangan qa ngöne la hnei epuni hna ini tus.
Troa xome la itre jia ne huliwa hna hnëkëne hnene la organizasio. Inine jë troa huliwane la itre jia ne huliwa hna ujën ngöne la sipu qene hlapa i epun. Itre hna amë ngöne ëternet maine hna fejan ngöne pepa. The xou kö troa sipo ixatua thene la itre xa trejin, göne la aqane troa huliwane la itre xa jia ne huliwa. Hetrenyi e hnine la Index des publications des Témoins de Jéhovah me Nyine Thele Mekune Ne La Itretre Anyipici Iehova, la itre ithuemacany göne la itre xa tane mekun me itre xa xötr. Hetrenyi fe la sine boroshür hna hape, Ixatua Göi Ini Tusi Hmitrötr. Kola hamë ithuemacany göne la itre nöj, me itre hneijin, me itre xa ewekë ju kö hna qaja e hnine la Tusi Hmitrötr.
Troa xome la itre mekun ka tru, matre tha tro kö a thëthëhmine la itre hna inin. Loi e tro fe a ce thawa me itre xan la itre hnei epuni hna inin. Hapeu, hetre mekune kö nyine tro epuni a tro fë ngöne la hna cainöj? Maine eje hi la hnei epuni hna kuca, tro hë epuni a xome la itre mekun ka tru, nge tro fe la itre xan a hane kepe thangan qa ngöne la hnei epuni hna ini tus.