Acatrene Jë La Ihnim Ka Keukawahnin
“Ame la ihnim, te, ate akeukawan.”—1 KORINITO 8:1.
1. Nemene la hna ahnithe hnei Iesu kowe la itretre drei nyidrë ngöne lo jidri tixenuë?
AME ngöne la jidri tixenuë i Iesu memine la itretre drei nyidrë, tre, a 30 lao qaja nyidrëti la ihnim. Öni nyidrë kowe la itretre drei nyidrë, ‘ihnimikeu jë nyipunie.’ (Ioane 15:12, 17) Pine laka, ka pexej me nyipici la ihnimi angatr, matre mama hnyawa ha kowe la nöjei atr laka, itre nyipi hlue i Keriso hi angatr. (Ioane 13:34, 35) Tha Iesu kö e celë a qaja la troa hnime hi la ketre atr. Ngo nyidrëti pe a qaja la ketre thiina ka upi së troa xatuane la itre xan. Öni Iesu: “E tro kete ate a hamëne la mele i angeice thatraqane la ite sine i angeic, pëkö ihnimi ka sisitia hune lai. Maine tro nyipunie a kuca la nöjei ewekë hnenge hna ahnithe koi nyipunie, ite sinenge nyipunie.”—Ioane 15:13, 14.
2. (a) Pine nemene matre kola canga wangatrehmekune la itre hlue i Iehova enehila? (b) Nemene la itre hnying hne së hna troa ce wang?
2 Ame fe enehila, kola canga wangatrehmekune la itre hlue i Iehova qa ngöne la ihnimi nyipici angatr, memine la aqane caasi angatr. (1 Ioane 3:10, 11) Tha ka nyipiewekë kö la nöj maine tribu, maine qene hlapa, maine aqane hetru së pena. Eje hi, nyipi ihnimi la hna melëne hnene la itre hlue i Iehova e cailo fen. Pine nemene matre ka nyipiewekë troa ihnimikeu enehila? Nemene la aqane thuecatrenyi së hnene la ihnimi Iehova me Iesu? Nge nemene la aqane tro sa amamane la nyipi ihnim, matre troa akeukawan me ithuecatrene la itre xan?—1 Korinito 8:1.
KEPIN MATRE NYIPIEWEKË LA IHNIM
3. Nemene la thangane la “nöjei ijine ka aköt” kowe la itre atr?
3 Easa mele ngöne la “nöjei ijine ka aköt,” matre “ngazo me aköte” la mele së enehila. (2 Timoteo 3:1-5; Salamo 90:10) Nyimutre la itre atr ka hleuhleu me akötr, matre kösë pëhë aliene la mele i angatr. Ase hë sasaith enehila la 800 000 lao atr ka hnöjua e nöjei macatre, nge hna traqa tune fe kowe la itre trejin me easë.
4. Drei la itre hlue i Iehova ekö ka hleuhleu me akötr?
4 Ame fe ekö, nyimutre la itre hlue i Iehova ka hleuhleu me akötr ke, tru palaha la itre jol hnei angatr hna cile kow. Pëhë aliene la mele i angatr. Hanawang la ketre ceitun. Iobu la ketre atr hna akötrën. Öni angeic: “Sisi ni it’ ej; tha ajange kö la tro pala kö a mel.” (Iobu 7:16; 14:13) Hnei Iona mina fe hna qaja ngöne lo ijine angeic a akötr, ka hape: “Iehova fe, enehila epi xomejë la meleng; ke loi e tro ni a meci ngo ngazo e troa mel.” (Iona 4:3) Ketre tui Elia perofeta, öni nyidrë: “Iehova fe, loi hë enehila, xomi ni jë.” (1 Ite Joxu 19:4) Tru la ihnimi Iehova kowe la itre hlue i Nyidrë, matre aja i Nyidrë tro angatr a mel. Tha hnei Iehova kö hna ameköti angatr pine la hnei angatr hna qaja. Ngo hnei Nyidrëti pe hna akeukawan la itre hni angatr, matre madrine hmaca jë angatr troa catre nyihlue i Nyidrë.
5. Pine nemene matre nyipiewekë troa hnime la itre trejin enehila?
5 Ame enehila, nyimutre la itre trejin ka cile kowe la itre jol ka catr. Celë hi matre, nyipiewekë tro sa hnimi angatr. Hetre itre trejin hna hnyima fë me qanangazon. Nge hetre itre xan hna axouen, me qajangazone ngöne la hna huliwa. Ame itre xaa trejin, hace la huliwa nge pëkö ijine mano, matre angatr a kucakuca. Ame itre xan, angatr a cile kowe la itre jol e hnine la hnepe lapa. Tha ka hmi kö la föi angatr, matre kola xöjetriji angatr. Eje hi, hnene la itre jol cili me itre xane ju kö, matre pëhë trengecatre ne la itre trejin. Ame koi angatr, ka gufa la itre hnei angatr hna kuca. Drei la ka ijije troa xatua angatr?
KOLA ITHUECATRENYI SË HNENE LA IHNIMI IEHOVA
6. Nemene la aqane ithuecatrenyi së hnene la ihnimi Iehova?
6 Iehova a ajane troa trotrohnin hnene la itre hlue i Nyidrë laka, Nyidrëti a troa hnimi angatr uti hë epine palua. Pane mekune jë lo ijine Iehova a qaja kowe la angetre Isaraela ka hape: “Eö la hniminang, tro ni a atrunyi ’ö; nge hnenge hna hnimi ’ö.” Öni Nyidrëti mina fe: “The qou kö, ke ce ini me eö”! (Isaia 43:4, 5) Iehova a nyipi së isa ala caas.a (Wange ju la ithuemacany.) Tusi Hmitrötr a thingehnaean ka hape: “Akötesi ’ö, ate cat, ate amelen; tro nyidëti a madi ’ö me aciacin.”—Zefania 3:16, 17.
7. Nemene la ka amamane ka hape, ceitune hi la aqane ihnimi Iehova memine la thin? (Wange ju la pane iatr.)
7 Iehova a thingehnaean ka hape, ngacama nyimutre la itre akötre së, ngo tro kö Nyidrëti a ithuecatrenyi së me akeukawane la itre hni së. Öni Nyidrë: ‘Tro ha hnapinyi nyipunie, me hiane ngöne la lue watingönecang. Kola aupune la nekönatr hnei thin, ketre tune tro ni a aupunyi nyipunie.’ (Isaia 66:12, 13) Pane mekune jë la elolone la mele ne la medreng hna xepe maine ka elo me thin! Atraqatr la ihnimi Iehova koi së, nge Nyidrëti a ajane troa tingetinge la mele së. Iehova a nyipi së.—Ieremia 31:3.
8, 9. Nemene la aqane ithuecatrenyi së hnene la ihnimi Iesu?
8 Hetre ketre aqane amamane Iehova la ihnimi Nyidrëti koi së. Öni Tusi Hmitrötr: “Hnei Akötesieti hna hnime la fene hnengödrai, mate nyidëti a hamëne la Nekö i nyidëti ka cas, mate tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.” (Ioane 3:16) Kola mama la etrune la ihnimi Iesu hnene la hnei nyidrëti hna meci pi së. Nge celë hi ka ithuecatrenyi së. Tusi Hmitrötr a qaja ka hape, thatreine kö la ‘akötr maine hleuhleu’ troa “iananyi shë memine la ihnimi Akötesie thei Keriso.”—Roma 8:35, 38, 39.
9 Nyimutre la itre jole hne së hna cile kow, matre akötre me hleuhleu la mele së. Ijije hi tro la itre jole cili a thapa la madrine së me aja së troa nyihlue i Iehova. Ngo maine ej e kuhu hni së la etrune la ihnimi Iesu koi së, tro hë sa atreine xomihnine itre ej. (E jë la 2 Korinito 5:14, 15.) Ketre, tro fe lai a thue aja së troa mel me catre nyihlue i Iehova. Tro la ihnimi Iesu a ithuecatrenyi së matre tha tro kö sa hmacahmaca, ngacama kola akötrë së me qanangazo së.
KA TRU KOWE LA ITRE TREJIN LA IHNIMI SË
Troa xatua së hnene la tulu i Iesu (Wange ju la paragarafe 10, 11)
10, 11. Drei la ka troa ithuecatrene la itre trejin ka kucakuca? Qejepengöne jë.
10 Iehova a ithuecatrenyi së jëne la ekalesia. Ame la easa hnime la itre trejin, easë hi lai a amamane la ihnimi së koi Iehova. Easa kuca asë la hne së hna atrein, matre amamane koi angatr laka, ka sisitria angatr koi së, nge Iehova a hnimi angatr. (1 Ioane 4:19-21) Hnei Paulo aposetolo hna cinyihan ka hape: “Eamojë nyipunie, me akeukawane ipitön, tune lo hnei nyipunie hna kuca.” (1 Thesalonika 5:11) Eje hi, tha hnëqane hmekuje kö la itre qatre thup. Loi e tro së isa ala caasi a nyitipu Iehova me Iesu, ene la troa akeukawane la itre trejin.—E jë la Roma 15:1, 2.
11 Ame e hnine la ekalesia, hetre itre trejin ka akötre u (dépressifs), me ka canga hnehengazo. Nge nyipiewekë tro angatr a wai droketre. (Luka 5:31) Trotrohnine hi la itre qatre thup me itre trejin e hnine la ekalesia laka, tha itre droketre kö angatr. Ngo ame pe, ka nyipiewekë la ixatua i angatr. Ijiji së asë hi troa ‘haji angete hni ka ewë, xatuane la ite ka kucakuca, xomi hnine ahoeane la nöjei ate asëjëihë.’ (1 Thesalonika 5:14) Nyipiewekë tro sa thele troa atre la aliene hni ne la itre trejin me trotrohni angatr. Loi e tro sa atreine xomihni ahoeany me ithanata amenyiken, ngöne la angatr a kucakuca. Hapeu, easë kö a thele troa ithuecatrene la itre xan? Nemene la nyine tro sa kuca matre troa ixatua me akeukawanyi angatr?
12. Qaja jë la ceitun ne la ketre trejin hna xatuane hnene la ihnimi ne la ekalesia.
12 Önine la ketre trejin qa Europe: “Ame e itre xaa ijin, eni a pi hnöjua, ngo eloine pe, hetre ka xatua ni. Hnene la ekalesiang, matre mele palakö ni. Hnene palahi la itre trejin hna hnimi ni me ithanata amenyikenyi koi ni. Ngacama xalaithe hi la itre ka atre ka hape, eni a wezipo, ngo tha hna nue ni kö hnene la ekalesia. Hetrenyi la lue trefën ka thupë ni, nge kösë keme me thinenge nyidro. Hnei nyidroti palahi hna ceme eni.” Eje hi, tha ceitu kö la aqane hamë ixatua së. Ngo ame pe, ijiji së asë hi troa catre xatuane la itre trejin.b (Wange ju la ithuemacany.)
AQANE TROA ITHUECATRENE LA ITRE XAN HNENE LA IHNIM
13. Nemene la aqane tro sa akeukawane la hni ne la itre xan?
13 Tro sa atreine dreng. (Iakobo 1:19) Ketre hatrene ihnim, la troa drenge la ketre trejin ka kucakuca, cememine la utipin. Loi e tro sa hnyingëne thele la hnei angeic hna melën, matre troa trotrohni angeice hnyawa. Ketre, loi e troa mama ngöne la iqëmeke së laka, hetre aja së troa xatua angeic. Nge ame la angeic a ithanata, drei angeice hnyawa ju së, matre atre la aliene hni angeic. Loi e troa mama koi angeic laka, ijije hi tro angeic a mejiune koi së. E cili, tha jole hë koi angeic troa drenge la itre hne së hna qaja. Eje hi, maine easa ajane troa akeukawane la hni ne la itre xan, loi e tro sa pane hnehengazo angatr.
14. Pine nemene matre tha tro pi kö sa qeje gelene la itre xan?
14 Tha tro kö sa qeje gelene la ketre atr. Maine tro sa qajangazone la ketre atr ka akötre u (dépressif) ke, troa ngazo catr la meci angeic. E cili, jole hë koi së troa xatua angeic. “Hetete ewekë kösë hna thine hnei taua; ngo nyine ameune la sesepeneqe ne la ate ka inamacan.” (Ite Edomë 12:18) Eje hi laka, tha ajane kö së troa akötrë angeic. Ngo tro hë sa akötrë angeic e hne së hna ithanata menu. Maine easa ajane troa xatua angeic, loi e tro sa amamane koi angeic ka hape, trotrohnine hi së la jol ka eje thei angeic.—Mataio 7:12.
15. Nemene la jiane huliwa ka troa xatuane la itre xan?
15 Tro sa akeukawane la hni ne la itre xan, jëne la Wesi Ula i Akötresie. (E jë la Roma 15:4, 5.) Ame la Tusi Hmitrötr, tre, ewekë i “Akötesie, ine la xomi hni me ate akeukawan.” Celë hi matre, ijiji hi troa akeukawanyi së hnei Tusi Hmitrötr. Ketre, hetrenyi së la Index des publications des Témoins de Jéhovah memine la boroshür, Nyine Thele Mekun Ne La Itretre Anyipici Iehova. Hetrenyi e hnine la lue jiane huliwa cili, la itre xötr me itre itus, ka troa iakeukawany me ithuecatre kowe la itre trejin.
16. Nemene la lue thiina ka lolo ka troa xatua së troa ithuecatre kowe la ketre atr?
16 Tro sa menyik me loi thiina. Iehova la “Tetetroti ka ihnimi me Akötesieti ate akeukawan’ asë.” Nyidrëti la trene “nyipi ihnimi ka menyike” kowe la itre hlue i Nyidrë. (E jë la 2 Korinito 1:3-6; Luka 1:78; Roma 15:13) Ketre tulu ka lolo Paulo ke, hnei nyidrë hna nyitipu Iehova. Öni nyidrë: “Hne huni hna menyike koi nyipunie, tune la ate ijithine kola hiane la ite nekö i nyido, hne huni hna hnime atrunyi nyipunie, mate loi koi huni troa hamëne koi nyipunie, tha maca ka loi Akötesie hmekuje hi, ngo ite mele huni fe, ke hna hnimi nyipunie hne hun.” (1 Thesalonika 2:7, 8) Ame la easa thiina ka menyik tui Iehova, easë hi lai a hamën kowe la ketre trejin la ixatua hnei angeic hna sipone jëne la thith!
17. Nemene la nyine tro sa mekun ngöne la easa xatuane la itre trejin?
17 Tro sa mekun ka hape, tha ka pexeje kö la itre trejin. Maine tro sa mekun ka hape, pëkö engazo i angatr, tro hë së lai a kucakuca. (Ate Cainöj 7:21, 22) Easa ajane troa nyitipu Iehova. Atre hi Nyidrë laka, hetre ifego së. Celë hi matre, loi e tro sa ixomihnikeu. (Efeso 4:2, 32) Tha tro kö sa qaja kowe la itre trejin ka hape, tha ijije kö la hnei angatr hna kuca. Loi e tro pe sa ithuecatre me olene koi angatr la itre huliwa hna kuca. Celë hi ka troa xatua angatr troa madrin troa nyihlue i Iehova.—Galatia 6:4.
18. Pine nemene matre easa ajane troa ihnim me ithuecatrekeu?
18 Iehova me Iesu a wangatrunyi së. (Galatia 2:20) Pine laka, atraqatr la ihnimi së kowe la itre trejin, matre easa thiina ka menyik koi angatr. Loi e “tro sha xöte thenge la ite ewekë ne tingeting, me ite ewekë nyine iakeukawanekeun.” (Roma 14:19) Easa trengeneun la mel ngöne la Paradraiso laka, tha tro hmaca kö sa kucakuca me hleuhleu! Pë hmaca kö mec me isi. Tha tro hmaca kö a meci la itre atr, nge pëhë iakötrë, pëhë jol ngöne la mele së, tune la itre jol e hnine la hnepe lapa. Thupene la caa thauzan lao macatre, troa pexej la itre atr. Ame pë hë la itre ka mele nyipici ngöne la itupath tixenuë, angatre hi la itre hna troa kapa hnei Iehova. Nge troa ‘nue gufane la itre nekö i Akötresie.’ (Roma 8:21) Haawe, catre pi së ihnim me ithuecatrekeu me itö ixatua, uti hë la fene ka hnyipixe elany.
b Maine epuni a ajane troa xatuane la itre ka pi hnöjua, wange ju la itre tane mekun hna amë ngöne la Hmeke jë!, hna hape, “Trois bonnes raisons de s’accrocher à la vie” (Eiperem 2014); “Quand on veut en finir avec la vie” (Januare 2012); me “Il vaut la peine de vivre” (22 Okotropa 2001).