Hapeu Ce Mekuna Së Hi Me Iehova?

1, 2. Nemene la hna upi së troa kuca, hnene la ihnimi së koi Iehova? Qaja jë la ketre ceitun.

PANE mekune jë së la kola nyi ahnahna hnene la ketre atr kowe la nekönatr. Maine jë tro la kem me thine a qaja koi nyën, ka hape, “Öi olene jë.” Maine tro nyën a olen ke, hna upi nyën. Ngo ame la kola tru trootro la nekönatr, nyën a trotrohnine la enyipiewekëne la troa amamane la hni ne ole i nyën kowe la itre ka nyi ahnahna. Tha cile hmaca kö nyëne troa olene kowe la ka nyi ahnahna koi nyën, pine laka hna ini nyëne tune lai.

² Maine jë, ame ngöne lo easa xötrei atre Iehova, ke, aqane ujë së hi lai. Easa inine laka, nyipiewekë troa drengethenge la itre trepene meköti Iehova. Ketre, ame la kola kökötre trootro la ihnimi së koi Iehova ke, easa atre hnyawa la itre mekuna i Nyidrë. Itre hnei Nyidrëti hna ajan, me xelen, me aqane waiewekë i Nyidrë. Celë hi matre, ame la easa axecië mekun me kuca la itre ewekë thenge la itre mekuna i Iehova, kösë caasi hi la aqane waiewekë së me Nyidrë.

3. Pine nemene matre jole koi së troa atreine waiewekë tui Iehova?

³ Eje hi laka, easa ajane tro palahi sa ce mekune me Iehova. Ngo ame pe, thatreine hnyawa kö së, pine laka itre atr ka ngazo së. Pane mekune jë së la aqane goeëne Iehova la kuci ngazo, me pi aja mo, memine la huliwa ne cainöj, memine la aqane huliwane menune la madra, me itre xane ju kö. Maine jë, jole koi së troa trotrohnine la mekuna i Iehova, göne la itre ewekë cili. Haawe, nemene la nyine tro sa kuca, matre troa atreine waiewekë tui Iehova? Nge tro lai a xatua së tune kaa, troa atreine axecië mekun enehila me elany?

AQANE TRO SA CE MEKUNE ME IEHOVA

4. Nemene la nyine troa kuca matre tro sa atreine waiewekë tui Iehova?

⁴ E jë la Roma 12:2. Hnei Paulo aposetolo hna qaja la nyine tro sa kuca, matre tro sa atreine waiewekë tui Iehova. Öni nyidrë, “The ce thina kö nyipunie memine la fene hnengödrai.” Eje hi, tune lo hne së hna ce wang ngöne lo tane mekune hnapan, loi e tro sa thipetrije la itre mekun me itre thiina ka ngazo ne la fen. Hnei Paulo hna qaja, ka hape, isa qanyi së troa saze la aqane mekuna së. Celë hi matre, loi e tro sa catre inine la Tusi Hmitrötr matre troa atre la itre mekuna i Iehova. Loi e tro fe sa lapa mekun itre ej, me nue trengecatre matre troa atreine waiewekë tui Iehova.

5. Nemene la eisapengönene la troa e la Tusi Hmitrötr memine la troa inine ej?

⁵ Ame la easa inine la Tusi Hmitrötr, tre, tha easë hmekuje kö a e la itre ithuemacanyi hna hamën, maine sija pena la itre mekun ka sa mekötine la itre hnying. Ngo easa mekune la itre ini hne së hna xom, göne la pengöi Iehova. Ketre tune la kepin matre Nyidrëti a kuca la itre ewekë, memine la aqane waiewekë i Nyidrë. Loi e tro fe sa thele troa trotrohnine la kepin, matre Iehova a upi së troa kuca la ketre ewekë maine sewe së pena. Nyipiewekë troa thele la aqane tro sa trongëne la itre hne së hna inin. Maine jë troa saze la aqane ujë së me itre mekuna së. Eje hi laka, tha ijiji së kö troa lapa mekune la nöjei ini hne së hna troa xom ngöne la easa ini tus. Ngo ame pe, kola ithuecatre koi së troa xomi ijin, matre troa lapa mekune la itre hne së hna e.—Salamo 119:97; 1 Timoteo 4:15.

6. Nemene la thangan, e tro sa lapa mekune la Wesi Ula i Akötresie?

⁶ Nyipici laka, hetre thangan hne së hna kapa qa ngöne la hne së hna catre lapa mekune la itre ini qa hnine la Tusi Hmitrötr. Xecie hnyawa e kuhu hni së laka, ka pexeje la itre mekuna i Iehova. Ketre, easa trotrohnine la aqane waiewekë i Iehova, nge easë fe a kapa asë la itre mekuna i Nyidrë. Easa saze la aqane waiewekë së, uti hë la caasi la mekuna së me Iehova.

HNENE LA AQANE WAIEWEKË SË MATRE KOLA SAZE LA AQANE UJË SË

7, 8. (a) Nemene la mekuna i Iehova, göne la itre mo? (Wange ju la pane iatr.) (b) Maine caasi hi la aqane waiewekë së me Iehova göne la itre mo, nemene la ka sisitria koi së?

⁷ Ame la aqane waiewekë së, ke, ka hetre thangane catr kowe la itre hne së hna kuca. (Mareko 7:21-23; Iakobo 2:17) Tro sa xome la itre ceitun matre troa trotrohnine hnyawa la mekune celë. Tro sa ce wange la ewekë ka traqa ngöne lo ijine kola hnaho Iesu. Kola mama hnyawa la mekuna i Iehova, göne la itre ewekë. Hnei Nyidrëti hna sipu ië Iosefa me Maria, matre troa hiane la Neköi Nyidrë, ngacama tha ka trenamo kö nyidro. (Levitiko 12:8; Luka 2:24) Ame la kola hnaho Iesu, ke, hnei Maria hna ‘ameköle nyidrëti ngöne la trepene a i öni, ke pëkö göhne i angatr ngöne la hnehmelöm.’ (Luka 2:7) Maine ju tro Iehova a kuca, matre troa hnaho Iesu ngöne la ketre uma ka lolo. Ngo tha celë kö mekuna i Nyidrë. Ame la ewekë ka sisitria catre koi Iehova, tre, ene la troa hetru Iesu ngöne la ketre fami ka nyihlue i Nyidrë.

⁸ Hetre ini hne së hna xome qa ngöne la aqane waiewekë Iehova, göne la itre mo. Ame la itre xa kem me thin, ke, angatr a ajane tro la itre neköi angatr a thele catrëne la itre mo, ngacama atre hnyawa hi angatr laka, ka hetre ethane lai kowe la aqane imelekeu i nyudren me Iehova. Ame koi Iehova, ka sisitria catre la aqane imelekeu së me Nyidrë. Hapeu caasi hi la mekuna së me Iehova, ngöne la götrane cili? Kolo kö lai a mama ngöne la itre huliwa së?—E jë la Heberu 13:5.

9, 10. Nemene la aqane tro sa amamane laka, caasi hi la mekuna së me Iehova, göne la troa athixötrëne la itre xan?

⁹ Hanawange la ketre ceitun, ka amamane la aqane goeëne Iehova la atr ka athixötrëne la itre xan. Kola qaja la atr ka hule la itre xan kowe la ngazo, maine ka trotriji Iehova. Öni Iesu: “Ame la ate nyi zöne la kete ne la ite ka co celë ka lapaune koi ni, te, loi koi angeice troa fena ngöne nyinawa i angeice e la etë nyine amudromudron, me kuië angeic’ e kuhu hnagejë.” (Mareko 9:42) Drei la itre trengewekë ka sisitria catr koi së! Ka meköti Iesu tui Iehova, Tretretro i nyidrë. Celë hi matre, kola akötrë Iehova hnene la atr ka athixötrëne la ketre atre drei Iesu.—Ioane 14:9.

¹⁰ Hapeu caasi hi la mekuna së me Iehova me Iesu, ngöne la götrane cili? Nemene la ka mama ngöne la itre huliwa së? Maine jë tro sa iëne la ketre aqane heetr maine aqane iseji pena. Ngo hapeu, tro kö sa saze mekun, e atre hi së laka, kola athixötrëne la itre xan e hnine la ekalesia maine aciane pena thei angatr la itre mekune ka ngazo? Hapeu tro kö xomehnöthe la itre aja së hnene la ihnimi së kowe la itre trejin?—1 Timoteo 2:9, 10.

11, 12. Kola thupë së tune kaa, la easa sisine la itre hna sisin hnei Iehova me catre xomihni?

¹¹ Hanawang la hnaakönine ceitun. Iehova a sisine la ngazo. (Isaia 61:8) Atre hi Nyidrëti laka, jole catre koi së itre xa ijin troa kuca la loi, pine laka, itre atr ka tha pexeje kö së. Ame pe, Iehova a ajane tro sa sisine la ngazo, tui Nyidrë. (E jë la Salamo 97:10.) Maine tro sa lapa mekun la kepin matre Iehova a sisine la ngazo, tro lai a xatua së troa ce mekun me Nyidrë. Ketre, tro lai a hamë së la trengecatr, matre tha tro kö sa kuca la itre ewekë ka ngazo.

¹² Maine tro sa inine troa sisine la ngazo, tro lai a xatua së troa wangatrehmekune la itre ewekë ka ngazo, ngacama tha hna qaja kö hnei Tusi Hmitrötr. Drei la ketre ceitun. Ame la ketre aqane ujë ka ngazo hna majemine kuca enehila, tre, kolo fia hna hape, lap dance. Ame koi itre xan, ka isapengöne la aqane fia cili memine la kola kuci ngazo. Tha ka ngazo kö lai koi angatr.a (Wange ju la ithuemacany.) Ngo nemene la mekuna i Iehova? The thëthëhmine kö laka, Iehova a sisine la nöjei pengöne aqane kuci ngazo. Haawe, catre pi së sisine la ngazo, me catre xomihni, me kötrene la itre hna sisin hnei Iehova.—Roma 12:9.

CANGA MEKUNE JË LA HNA TROA KUCA ELANY

13. Pine nemene matre loi e tro sa lapa mekun la aqane waiewekë i Iehova?

¹³ Ame la easa ini tus, ke, loi e tro sa lapa mekun la aqane waiewekë i Iehova. Tro lai a xatua së troa axecië mekune hnyawa. Ketre tro fe lai a xatua së elany, ngöne easa cile kowe la ketre jol ka tru. Celë hi matre, loi e tro sa canga hnëkë hnyawa enehila. (Ite Edomë 22:3) Tro sa ce wang la itre xaa ceitun hna hamën hnei Tusi Hmitrötr.

14. Nemene la ini hne së hna xom qa ngöne la aqane sa i Iosefa kowe la föi Potifara?

¹⁴ Ame la kola thele troa iaö Iosefa hnene la föi Potifara, hnei angeic hna canga kötr. Kola amamane laka, hnei Iosefa hna lapa mekune la aqane waiewekë i Iehova göne la faipoipo. (E jë la Genese 39:8, 9.) Öni Iosefa kowe la föi Potifara: “Tro ni a kuca tune ka la ngazo atraqate cili, nge ngazo koi Akötesie?” Eje hi, hnei angeic hna ce mekun me Akötresie. Tune kaa fe së? Nemene la aqane tro sa ujë e kola wesiwesi koi së hnene la ketre sine huliwa së? Nemene la hne së hna troa kuca e kola iupi fë tusi maine iatr ka ngazo ngöne mobilis?b (Wange ju la ithuemacany.) Troa hmaloi koi së troa mele nyipici koi Iehova, e hne së hna pane thele me kapa la mekuna i Nyidrë me canga hnëkë.

15. Nemene la ka xatua së troa mele nyipici koi Iehova, tune lo köni atre Heberu?

¹⁵ Hanawang la tulu i Saderaka me Mesaka me Abedenego, lo köni atre Heberu. Hnei Nebukaneza joxu hna upi angatr troa thili kowe la hna saatr gool, hnei nyidrëti hna xup. Ngo hnei angatr hna canga thipën. Kola amamane, laka, hnei angatr hna canga hnëkë matre tro palahi angatr a mele nyipici koi Iehova. (Esodo 20:4, 5; Daniela 3:4-6, 12, 16-18) Tune kaa fe së enehila? Nemene la hne së hna troa kuca e traqa ju maseta sipo së troa kuië manie, thatraqane la ketre feete ne la hmi ka thoi? Loi e tro sa canga hnëkë me thel enehila la mekuna i Iehova. E cili, tha tro hë sa xou troa kuca me qaja la ka loi, tune lo köni atre Heberu.

16. Troa xatua së tune kaa hnene la mekuna i Iehova, troa hnëkë hnyawa ngöne la kola tithi së hnei mec?

¹⁶ Maine tro palahi sa thele troa atre la mekuna i Iehova, tro hë lai a xatua së troa mele nyipici koi Nyidrë, ngöne la kola tithi së hnei mec. Eje hi, thatreine kö tro sa nyinyine la meci së jëne la madra ka pexej, maine jëne lo foa lao aliene ka tru ne la madra. (Itre Huliwa 15:28, 29) Ngo, hetre itre xaa drösinöe laka, ka hetre mutine madra. E cili, isa qanyi së kö axecië mekun, thenge la itre trepene meköti ne la Tusi Hmitrötr. Eu la ijine tro sa iëne la nyine troa kuca? Ngöne la easë e pital, ngöne la easa akötr, maine pena ngöne la kola upi së troa axecië mekun? Ohea. Enehila hi la ijin ne tro sa ithel, me nyialiene la pepa ka qejepengöne hnyawa la aja së, me ithanata kowe la itre droketre.c (Wange ju la ithuemacany.)

17-19. Pine nemene matre nyipiewekë troa canga atre enehila la itre mekuna i Iehova? Qaja jë la ketre ceitun.

¹⁷ Haawe, pane mekune jë la aqane sa i Iesu koi Peteru, ngöne la angeic a qaja ka hape: “Ekölö hi ni enëtilai, Joxu.” Hnei Iesu hna catre thele la aja i Akötresie, nge hnei nyidrëti hna lapa mekun la itre hna perofetan göne la mele i nyidrë e celë fen, memine la aqane tro nyidrëti a mec. Celë hi ka xatua nyidrë troa catre mele nyipici koi Iehova, me huujëne la mele i nyidrë thatraqai së.—E jë la Mataio 16:21-23.

¹⁸ Ame enehila, Akötresieti a ajane tro sa nyisinee i Nyidrë, me catre cainöjëne la itre maca ka lolo. (Mataio 6:33; 28:19, 20; Iakobo 4:8) Ngo hetre itre xan ka troa sewe së, tune la aqane ujë i Peteru koi Iesu. Drei la ketre ceitun. Tune kaa e traqa ju la maseta i epun thele troa aelëne la thupe i epun, ngo kola ha troa xome la traeme ne tro epuni a icasikeu me cainöje trootro? Maine epuni palakö a ini, maine jë tro la itre porofesör a upi epuni troa trotrije la hnalapa, matre troa kuca la itre ini ka tru. Qëmekene troa axecië mekun, hapeu, epuni kö a thele troa pane thith? Epuni kö a ithel me ithanata kowe la itre atrene la hnepe lapa i epun, me itre qatre thup? Loi e tro sa catre thel enehila la mekuna i Iehova göne la itre ewekë cili, matre troa ce mekun me Nyidrë. Tha tro ha jole koi së troa thipetrij itre ej, nge tro fe lai a acatrene la aja së troa nyihlue i Iehova.

¹⁹ Maine jë epuni a mekune la itre xaa ijine kola tupathe la lapaune i epun. Eje hi laka, thatreine kö së troa canga hnëkëne la aqane troa cile kowe la nöjei jol ka troa traqa elany. Ngo maine tro sa lapa mekune la itre mekuna i Iehova ngöne la easa ini tusi caas, tro hë sa canga mekune la itre hne së hna inin, me thele la aqane troa trongëne ngöne la mele së. Celë hi matre, ame ngöne la easa inine la Tusi Hmitrötr, nyipiewekë troa thele la itre mekun ka troa aijijë së troa ce mekun me Iehova. Loi e tro fe sa thele la aqane tro la itre mekune cili a xatua së, troa atreine axecië mekun hnyawa enehila me elany.

MEKUNA I IEHOVA ME MELE SË ELANY

20, 21. (a) Pine nemene matre easa troa mele madrin ngöne la fene ka hnyipixe? (b) Nemene la aqane tro sa mele madrin enehila?

²⁰ Easa trengeneune la mel elany, ngöne la fene ka hnyipixe. Easa mejiune laka, tro sa hane mel e hnine la Paradraiso e celë fen. Patre hë la itre akötr me treij, ngöne la fen hna musinëne hnene la Baselaia i Akötresie. Ame hë elanyi ngöne la fene ka hnyipixe, ijiji së hi troa isa axecië mekun, thenge la itre hne së hna ajan.

²¹ Ngo tha kolo kö lai a hape, ka pëkö ifegone la aqane ië ewekë së. Tro la itre atr ka menyik elany a axecië mekun thenge la itre wathebo i Iehova, me thele troa ce mekune me Nyidrë. Tro ha madrin me tingetinge la mele i angatr. (Salamo 37:11) Ngo qëmekene troa traqa la ijine cili, ijije hi tro sa mele madrin enehila, pine laka, easa ce mekun me Iehova.