Ithuemacany

a Tune la ketre ceitun, ame la itre atr qa Nizeria, angetre Yoruba, angatr’a hni kowe la itre ini ne la kutimi angatr, ene laka thupene la mec, ke, tro la u a mele hnine la ketre ngönetrei. Hawe, maine kola meci hnene la ketre nekönatr, ke, ketre hace atraqatre kowe la thin, ngo tha qea pe. Ejehi laka, tha hna goeëne kö kösë pune la fen, ngo tune la Yoruba kola hape: “Tiqa ha hnei tim. Tha kaqa kö la trenge ne tim.” Ame göi angetre Yoruba, ke, kola hape ame la trenge ne tim, ene la thin, ijije troa hnahone la ketre nekönatr, maine jë kolo nekönatre ka mec, a mele hmaca. Tha hna xötrethenge kö hnene la angetre anyipici Iehova, la itre kutime hna eköthe hune la qoue haze, me itre ini ka tria ne la u, ene laka thatreine kö eje troa mec, nge tro fe ej’a lö hnine la ketre ngönetrei, itre ini ka pëkö trepene hnine la Tusi Hmitrötr.​—Ate Cainöje 9:5, 10; Ezekiela 18:4, 20.