Draiangedic 2 Semitrepa
Ame la ua, ej a thelethelëne la nöjei ewekë, ene fe la itre ewekë ka jui i Akötresie.—1 Kor. 2:10.
Maine epun ngöne la ketre ekalesia ka tru, nge tha öhnyi epuni kö e liim, ke maine jë, xele hë epuni ma sa. Ngacama jole ju hë koi epun, ngo the cile kö troa liim. Hnëkëne jë la nyimu mekun nyine troa sa ngöne la icasikeu. Matre e tha sa kö epun ngöne la kola nyiqane la ini, ijije palahi tro epuni a sa e thupen. Ame la epuni a hnëkëne la Ita Ne Thup, thele jë la aqane ce tro la itre paragarafe memine la tan. Celë hi lai ka troa xatua epun troa hamën la itre mekun ka ithuecatr. Ketre, hnëkëne hnyawane jë la itre paragarafe ka qaja la itre ini ka jui ne la Tusi Hmitrötr, nge ka jol troa qejepengön. Pine nemen? Pine laka, ala xalaithe hi la itre ka sa ngöne la itre paragarafe cili. Ngo tune kaa e tha hna nue epuni kö troa hane sa? Ijije hi tro epuni a qaja kowe la trejin ka troa cile fë la hnëqa, la hnying hnei epuni hna pi sa. w23.04 21-22 par. 9-10
Draihnacian 3 Semitrepa
Hnei Iosefa hna . . . kuca thenge la hna amekötine hnene la angela i Iehova, me xome la föe kowe la hnalapa i angeic.—Mat. 1:24.
Ketre trahmanyi ka lolo thiina Iosefa, ke ka canga drengethenge la itre hna amekötine hnei Iehova. Akönia hamëne jë kö Iehova la itre hna amekötine göne la fami angeic. Ngacama tha ka hmaloi kö koi angeic, ngo hnei angeic hna canga idrengethenge. (Mat. 1:20; 2:13-15, 19-21) Nge jëne lai, angeice a thupë Maria. Ketre, kolo fe lai a acatrene la ihnim me metrötre i Maria koi angeic! Itre trahmanyi fe, xötrethenge jë la tulu i Iosefa, ene la troa thele la itre eamo qa hnine la Tusi Hmitrötr göne la aqane troa thupëne la fami epun. Nge ame la epuni a trongëne itre ej ngacama tha ka hmaloi kö, ke epun hi lai a amamane la ihnimi epun kowe la föi epun me acatrene la imelekeu i epon. Önine la ketre trejine föe qa Vanuatu ka faipoipo a 20 hë lao macatre enehila, ka hape: “Ame la föeng a thel me trongëne la itre eamo qaathei Iehova, ke tru catr la metrötreng koi nyidrë. Ame la nyidrëti axecië mekun, ke mejiune ni koi nyidrë nge ka tingetinge la hning.” w23.05 21 par. 5
Draikaco 4 Semitrepa
Tro ha hetre gojenyi ka tru e cili, eje hi, ketre gojenyi hna troa ati ëjen ka hape, Gojenyi ka hmitrötr.—Isa. 35:8.
Tro la angetre Iudra ka bëeke qa Babulona a tro Isaraela a ketre “nöje ka hmitöt” koi Iehova. (Dreut. 7:6) Tha kolo kö lai a hape, pëkö nyine tro angatr a saze. Hetre nyine tro palahi angatr a kuca matre amadrinë Iehova. Alanyim thene la angetre Iudra hna hnahon e Babulona, ka xome la aqane mekune me aqane ujë ne la angetre Babulona. Itre macatre thupene la angatre a bëek a tro Isaraela, kola sesëkötr hnei Nehemia Gavena laka, tha ka Qene Heberu kö la itre nekönatr hna hnahon e Isaraela. (Dreut. 6:6, 7; Neh. 13:23, 24) Tro nyudren a hnim me nyihlue i Iehova tune kaa, nge tha trotrohnine pe nyudren la Qene Heberu, lo qene hlapa hna cinyanyine la Trengewekë Akötresie? (Ez. 10:3, 44) Eje hi, hetre nyine tro palakö la angetre Iudra a saze. Ngo tro lai a hmaloi, e angatre hë e Isaraela, hnë acile hmaca la hmi ka wië.—Neh. 8:8, 9. w23.05 15 par. 6-7