Ngacama hetre aja së troa eatrëne la mekuna së, ngo hna traqa koi së asë hi la itre jol. Ame itre xa ijin, traqa xane pi hi la itre jol matre pëhë ijine i easë troa kuca la hne së hna mekun. (A. Cai. 9:​11) Tro itre ej lai a akucakucanyi së, nge pëhë madrine së. (It. Ed. 24:10) Nge hnene fe laka, itre atr ka ngazo së, matre tha canga eatrëne kö së la mekuna së. (Roma 7:​23) Maine pena easë hi a kucakuca. (Mat. 26:43) Tro sa elëhune tune kaa la itre jole cili? Tha hnene kö laka, epuni a cile kowe la ketre jol matre ka luzi hë epun. Öni Tusi Hmitrötr, troa traqa itrai la itre jole koi easë. Ngo eje fe a qaja ka hape, ijije hi tro sa elë hune la itre jol. Nyipici, ame la epuni a elëhune la itre jol, epuni hi lai a amamane ka hape, aja i epun troa amadrinë Iehova. Nge drei jë kö la madrine i Nyidrë la Nyidrëti a öhnyi epuni a nue trengecatr! w23.05 30 par. 14-​15

Ame la easa pionie, easa ce huliwa memine la itre trejin ka isapengöne kö me easë. Ketre, easë fe a inin troa huliwan hnyawan la mani, me melën la hna hetreny. (Fil. 4:​11-​13) Ame la itre xaa pionie lapa, ke hnei angatr hna pane pionie ka ixatua. Ame enehila, itre xan a huliwa ngöne la hnë xupi Uma maine ngöne la Bethela. Haawe, nyiqane jë troa hane pionie ka ixatua. Loi e tro la nöjei trejin trahmanyi a isine troa qatre thup ngöne la ekalesia. Tusi Hmitrötr a qaja ka hape, ame la atr ka “ajane troa atre thup, [ke] ka loi lai.” (1 Tim. 3:1) Tro la trejin trahmanyi a pane atre ixatua. Itretre ixatua a ce huliwa memine la itre qatre thup ngöne la ekalesia. Angatr asë a ce huliwa kowe la itre trejin, me catre cainöj. w23.12 28 par. 14-​16

Hnei Iosea joxu hna nyiqane thele Iehova lo angeic a nekötrahmany. Aja i angeic troa atre Iehova hnyawa me kuca la aja i Nyidrë. Ngo, tha ka hmaloi kö koi angeic, ke alanyimu la angetre Isaraela ka thil kowe la itre haze. Matre tha huliwa ka co kö la troa isigöline la nyipi hmi. Trahmanyi ka catre Iosea, ke tha 20 palakö lao macatre i angeic, nge ase hë angeic apatrene la hmi ka thoi ngöne la nöj. (2 Aq. Jo. 34:​1, 2) Ngacama jeune palakö eö, ijiji eö hi troa nyitipu Iosea, ene la troa easenyi Iehova me inine la itre thiina i Nyidrë. Celë hi ka troa uku eö troa nue mele koi Nyidrë. Nemene la thangane lai? Öni Luke, hna bapataisone lo angeic a 14 lao macatre ka hape, “Qane enehila, huliwa i Iehova la ka tro pa ngöne la meleng, nge tro ni a isine troa amadrinë Nyidrë.” (Mar. 12:30) Maine celë fe hi aja i eö, ke tro hë eö lai a mele madrin! w23.09 11 par. 12-​13