“Maine Ate Nyipunie La Ite Ewekë Cili, Manathithi Hë Nyipunie Maine Nyipunie a Kuca It’ Ej”

1. Nemene la ethanyin e tro sa nyitipune la itre aqane ujë ne la fene celë ka pi tru?

PINE nemene matre tha ka hmaloi kö troa trongëne la itre ini qa hnine la Tusi Hmitrötr? Pine laka, ame la troa kuca la itre ewekë ka loi ke, nyipiewekë troa hetre hni ne ipië. Ketre, easa mele ngöne la “ite drai hnapin,” matre tha ka hmaloi kö troa hetre hni ne ipië. Nyimutre la itre atr ka “hnimi angate kö, me meciu mani, me selën, me nyi tru, me ka tha’ teine xomihnöth.” (2 Timoteo 3:1-3) Ame koi së, itre hlue i Akötresie, tre, itre aqane ujë lai ka ngazo. Ngo ame e itre xaa ijin, easa piine la madrin me mele ne la itre atr ka ujë tune lai. (Salamo 37:1; 73:3) Celë hi matre, tro sa isa hnying ka hape: ‘Ka nyipiewekë kö troa amë panëne la itre aja itre xan, nge pine pë hë la itre sipu ajang? Tro kö la itre atr a metrötrë ni, e hnenge hna hni ka ipië?’ (Luka 9:48) Eje hi, maine tro sa nyitipune la itre aqane ujë ne la fene celë ka pi tru, tro ha ngazo la aqane imelekeu së memine la itre trejin. Tro ha jol e cili kowe la itre xan troa atrehmekune laka, itre nyipi Keresiano së. Celë hi matre, nyipiewekë tro sa pane ce wange la tulu ne la itre hlue i Akötresieti ekö, ka hni ka ipië. Maine tro sa thele troa nyitipu angatr, tro hë sa kepe thangane ka loi.

2. Nemene la itre hnying ka troa xatua së troa xomi ini qaathene la itre hlue i Akötresieti ekö?

² Nemene la ka xatuane la itre hlue i Akötresieti ekö troa nyisinee i Nyidrë? Nemene la aqane amadrinë Nyidrëti hnei angatr? Nemene la ka ithuecatre koi angatr troa kuca la loi? Maine tro sa e me lapa mekune la itre tulu i angatr e hnine la Tusi Hmitrötr, tro ha acatrene la lapaune së.

AQANE TROA ACATRENE LA LAPAUNE SË

3, 4. (a) Nemene la hna hamën hnei Iehova? (b) Nemene la ketre aqane tro sa acatrene la lapaune së?

³ Ase hë Iehova hamëne la itre ewekë ka troa xatua së troa acatrene la lapaune së. Hetre eamo me ini ka lolo hna hamëne hnei Tusi Hmitrötr, me itre itusi së, me site së, me JW Télédiffusion, me itre icasikeu me itre asabele. Ngo hetre ketre ewekë kö nyine tro sa kuca. Öni Iesu: “Ange la tro ni a kuca la ajane la ate upi ni, me umuthe la huliwa i nyidë.”—Ioane 4:34.

⁴ Ame la troa kuca la aja i Akötresie, tre, ceitune hi memine la xen koi Iesu. Tune la thangan la nyipi xen kowe la ngönetrei, ame la easa kuca la aja i Akötresie, tre, kolo mina fe a acatrene la lapaune së. Drei la ketre ceitun. Ka kucakuca së, ngo easë kö a tro troa hane sine la icasikeu göi cainöje trootro. Thupene la hna cainöj, paatre hë la kucakuca, tru la madrine së nge egöcatre hë së.

5. Nemene la itre manathithi e tro sa inamacan?

⁵ Ka inamacane la atre drengethenge Iehova. (Salamo 107:43) Nyimutre la itre manathith hnei angeic hna troa kapa. “Ame la nöjei tenge nyi ’ö asë tha ijije kö ej. . . . Sinöe ne mele angeice koi angete xomi angeic, nge manathithi angete xölehuji angeic.” (Ite Edomë 3:13-18) Öni Iesu: “Maine ate nyipunie la ewekë cili, manathithi hë nyipunie maine nyipunie a kuca it’ ej.” (Ioane 13:17) Maine tro palahi a drengethenge Iesu hnene la itretre drei nyidrë, tro hë angatr a mele madrin. Nyipiewekë tro angatr a xötrethenge la itre ini me tulu i nyidrë ngöne la mele i angatr.

6. Pine nemene matre nyipiewekë tro palahi sa trongëne la itre hne së hna inin?

⁶ Ame fe enehila, nyipiewekë tro sa catre trongëne la itre hne së hna inin. Pane mekune jë la ketre atr ka kuci loto. Atreine catr angeice kuci loto nge hetrenyi angeic la itre zuti. Ngo tha tro kö a hetre thangan e tha hna huliwane kö itre ej. Ngacama nyimutre hë la itre macatre ne kuci loto angeic, ngo ame pe, nyipiewekë tro palahi angeic a trongëne la itre hnei angeic hna inin ekö, matre maca ngöne la huliwa. Ketre tu së mina fe, tru la madrine së ekö la easa xötrei atre la nyipici ke, hne së hna trongëne la itre hne së hna inin. Maine tro palahi sa trongëne la itre ini hne së hna kapa qaathei Iehova, haawe tro ha cile hut la madrine së.

7. Nemene la aqane tro sa xomi ini qa ngöne la itre tulu ne la Tusi Hmitrötr?

⁷ Ame e itre xaa ijin, tha ka hmaloi kö troa hetre hni ne ipië. Tro sa ce wang ngöne la tane mekun celë, la hni ne ipië ne la itre hlue i Akötresieti ekö. Ngo hetre ketre ewekë nyine tro sa kuca matre nyixane la itre ithuemacanyi cili. Nyipiewekë tro sa mekun ajuin me trongëne la tulu i angatr ngöne la mele së.

THA TRO KÖ SA IËHNAHNIM

8, 9. Nemene la hna ini së hnene la xötre Ite Huliwa 14:8-15, göne la lapaune i Paulo? (Wange ju la pane iatr.)

⁸ Akötresieti a ajane tro la nöjei atr asë a “mele me wangate hmekune la nyipici.” (1 Timoteo 2:4) Nemene la aqane goeëne së la itre atr ka thatre palakö la nyipici? Hnei Paulo aposetolo hna cainöj kowe la angetre Iuda ka atre Iehova ha. Hnei nyidrëti fe hna cainöj kowe la itre ka thil koi itre haze. Eje hi, tha ka hmaloi kö koi Paulo troa cainöj koi angatr. Celë hi matre, nyipiewekë tro nyidrëti a hetre hni ne ipië.

⁹ Ame lo pane tronge i Paulo, hnei nyidrëti me Banaba hna ce tro Lusetara eë. Hnene la angetre Lukaonia ka mel e cili hna atrunyi nyidro, me ati ëje i nyidro ka hape, Zeus me Heremes, lue ëjene haze. Hapeu, hnei nyidroti kö hna pi mama fë lai? Hnei nyidroti kö hna pi mama fë laka, tha hna qanangazo nyidroti kö e cili, tune ngöne lo lue xaa nöj? Maine mekune pena ka hape, kaloi hi matre tha jole koi nyidroti troa qaja la maca ka loi e cili? Ohea! Hnei nyidroti hna elëhni me sue ka hape: “Ue lae nyipunieti a kuca la ite ewekë cili? Lue ate hi nyiho la cei tune me nyipunie.”—Itre Huliwa 14:8-15.

10. Pine nemene matre tha hnei Paulo kö me Banaba hna selë nyidro?

¹⁰ Hna qaja hnei Paulo me Banaba ka hape, lue atr ka tha pexeje kö nyidro. Ketre, tha ceitune kö la hmi nyidro memine la angetre Lukaonia. Hnei Akötresieti hna upi Paulo me Banaba troa mesinare. (Itre Huliwa 13:2) Eje hi, hna sië nyidro hnei uati hmitrötr, matre ketrepengöne kö la mejiune i nyidro. Ngo tha hnei nyidroti kö hna selë nyidro. Atre hi nyidro laka, maine tro la angetre Lukaonia a kapa la itre maca ka lolo, tro fe hë angatre lai a hane kapa la mejiune cili.

11. Nemene la aqane tro sa hni ka ipië tui Paulo, ngöne la hna cainöj?

¹¹ Hane hi la ketre aqane tro sa hetre hni ne ipië, tui Paulo. Tha easë kö a selëne la hnëqa së ne cainöj, maine itre xaa hnëqa hna hamën hnei Iehova. Loi e tro sa isa hnying, ka hape: ‘Nemene la aqane goeëne ni la itre atr ne la teritoar? Hapeu, ka iwangatrehmekunyi atr ni?’ Itretre Anyipici Iehova e cailo fen a thele la itre atr ka aja itre maca ka lolo. Itre xan a inine la qene hlapa maine aqane mele ne la itre atr hna wangacon. Ngo tha angatre kö a mekun laka, ka draië kö angatr hune la itre xan. Angatre pe a thele troa trotrohnine la itre atr, matre xatua angatr troa kapa la maca ne la Baselaia.

THITHI SAI ANGATRE JË

12. Nemene la aqane amamane Epafera laka, ka tru koi angeic la itre trejin?

¹² Ame la ketre aqane tro sa hetre hni ne ipië, tre, ene la troa thithi sane la itre trejin me easë, itre ka “hetenyi la lapaune ka nyipi ewekë tui eëhun.” (2 Peteru 1:1) Celë hi hna kuca hnei Epafera. Akönia qeje angeic e hnine la Tusi Hmitrötr. Ame lo Paulo a lapa kalabus e Roma, hnei nyidrëti hna cinyianyi kowe la itre Keresiano ne Kolose. Öni nyidrë göi Epafera: “Ate cate thithi thatraqai nyipunie.” (Kolose 4:12) Atre hnyawa hi Epafera la itre trejin, nge ka tru angatre koi angeic. Öni Paulo göi angeic ka hape, “hna ce kalabusine me ini.” Eje hi, hetre jole fe hna melën hnei Epafera. (Filemona 23) Ngo hnei angeic palahi hna wangatrun la itre aja ne la itre xan, me thele troa xatua angatr. Hnei Epafera hna thithi sane la itre trejin, me qaja fe la itre ëje i angatr. Ketre tulu ka lolo koi së. Ka hetre emenene la itre thithi cili.—2 Korinito 1:11; Iakobo 5:16.

13. Nemene la aqane tro sa nyitipu Epafera ngöne la easa thith?

¹³ Loi e tro sa mekune la ketre trejin hne së hna troa thithi san. Maine jë, tro sa thithi sane la itre trejin ne la ekalesia maine itre sinee së ka cile kow la itre jol. Maine jë, jol koi angatr troa axecië mekun, maine pena kola traqa la itre itupath. Ijije fe tro sa thithi sane la itre trejin hna qaja ngöne la sit jw.org, ngöne la götran hna hape, “Témoins de Jéhovah emprisonnés en raison de leur foi.” (Tro jë kowe la hna hape, SALLE DE PRESSE > VEILLE JURIDIQUE.) Loi e tro fe sa thithi sane la itre ka meci sineen, me itre ka melëne la itre hulö me itre isi, me itre ka hetre jol göi mani. Nyimutre la itre trejin hne së hna troa thithi san. Ame la easa thithi sai angatr, easë hi lai a meku angatr. (Filipi 2:4) Nge Iehova a dreng la itre thith.

LOI E TROA “CANGA DENG”

14. Pine nemene matre ijije hi tro sa qaja ka hape, Iehova a drei së?

¹⁴ Ame la ketre aqane tro sa hetre hni ne ipië, tre, ene la troa dreng. Kola qaja ngöne Iakobo 1:19 ka hape, loi e tro sa “canga deng.” Iehova a drei së. (Genese 18:32; Iosua 10:14) Pane e jë la hna qaja ngöne Esodo 32:11-14. (E jë.) Ngacama tha nyipiewekë kö koi Iehova troa drei Mose, ngo ame pe, hnei Nyidrëti hna nue angeic troa qaja la mekuna i angeic. Hapeu, epuni kö a drenge la hna qaja hnene la ketre trejin? Iehova a drenge la itre thithi ne la itre hlue i Nyidrëti asë.

15. Nemene la aqane tro sa nyitipu Iehova me wangatrune la itre xan?

¹⁵ Isa hnyinge jë ka hape: ‘Maine ka hni ka ipië Iehova troa drenge la itre hlue i Nyidrë, tui Aberahama, Rakela, Mose, Iosua, Manoa, Elia, me Hezekia, hapeu, ijije kö tro ni a hane nyitipu Nyidrë? Tro kö ni a wangatrune la itre trejin me drenge la mekuna i angatr? Hapeu, hetrenyi kö e hnine la ekalesia maine e hnine la hnepe lapang, la itre atr ka aja ixatua? Nemene la hnenge hna troa kuca?’—Genese 30:6; Angete Amekötin 13:9; 1 Ite Joxu 17:22; 2 Aqane lapa ite Joxu 30:20.

“MAINE TRO IEHOVA A WANGE LA AKÖTENG”

16. Nemene la aqane ujë i Davita ngöne la kola qanangazo nyidrë hnei Simei?

¹⁶ Maine tro sa hetre hni ne ipië, tro ha xatua së troa xomihnine la kola qanangazo së. (Efeso 4:2) Hetre ketre ceitune ka lolo hna qaja ngöne 2 Samuela 16:5-13. (E jë.) Hnei Simei, ketre sinee i Saulo joxu, hna qajangazo Davita me thele troa isi memine la itre hlue i nyidrë. Ijije hi tro Davita a sewe Simei, ngo hnei nyidrëti pe hna xomihni. Nemene la ka xatua Davita troa xomihni? Tro sa atreine sa la hnying celë, jëne la hna qaja ngöne Salamo mekene 3.

17. Nemene la ka xatua Davita troa atreine xomihni, nge nemene la aqane tro sa nyitipu nyidrë?

¹⁷ Hnei Davita hna cinyihane la Salamo 3, ngöne lo ijine Abasaloma a thele troa humuthi nyidrë. Kolo hi lo ijine Simei a icilekeu me Davita. Ngo hnei Davita hna atreine xomihni. Hna tune kaa? Öni Davita ngöne Salamo 3:4: ‘Ini a hë koi Iehova hnene la aqan’ ewekëng, nge Nyidrëti a drei ni hune la wetr gaa hmitrötre i Nyidrë.’ Ame la kola qanangazo së, loi e tro sa thithi tui Davita. Tro kö Iehova a xatua së troa xomihni, jëne la uati hmitrötr. Hapeu, atreine kö së xomihnin me nue la ngazo hna kuca koi së? Ka mejiune kö së laka, tro kö Iehova a xatua së me amanathithi së?

“KASISITIA LA INAMACAN”

18. Nemene la eloin e tro sa trongëne la itre hna amekötin hnei Iehova?

¹⁸ Ka inamacane la atre kuca la loi, nge tro kö Iehova a amanathithi angeic. Kola qaja ngöne Ite Edomë 4:7, ka hape: “Kasisitia la inamacan.” Nyipici laka, ka inamacane la atr ka hetre atrehmekun. Ngo, tha eje hmekuje kö lai. Troa mama la inamacane jëne la aqane axecië mekun. Ka inamacane fe la itre xejë ke, itre ej a hnëkë koi ijine hnötr. (Ite Edomë 30:24, 25) Ketre, hna hë Keriso ka hape, “inamacane qa thei Akötesie” ke, hnei nyidrëti palahi hna kuca la aja ne la Keme i nyidrë. (1 Korinito 1:24; Ioane 8:29) Maine tro sa hetre hni ne ipië me inamacan me catre kuca la loi, haawe tro hë Akötresieti lai a amanathithi së. (E jë la Mataio 7:21-23.) Haawe, catre jë huliwa i Iehova e hnine la ekalesia, cememine la hni ka ipië. Eje hi laka, nyipiewekë troa hetre traem me atreine xomihni, matre troa kuca la loi. Ngo aqane tro hi së lai a hetre hni ne ipië, nge celë hi ka troa thue madrine koi së, enehila me uti hë epine palua.