Aqane Xatuane La Itre Atr Troa Atrehmekune La Enyipiewekëne La Itre Itus
1 “Ke mele la wesi ula i Akötresie, me men.” (Heb. 4:12) Hnene la itre itusi së, itre hna nyi trepene ngöne la Tusi Hmitrötr, hna aijijëne la itre atr matre tro angatr’a hane öhnyi thangane la menene la wesi ula i Akötresie. Celëhi matre easë palahi a huliwaane la itre itusi cili troa xatuane la aja ne la atr kowe la Tusi Hmitrötr ngöne la easë a cainöje trootro e itre ijine ka ijij, me ngöne la itre hnalapa.
2 Ame la itre itusi nyine hamëne e treu januare, ke, itre boroshür. Hnëkëne jë la nyine tro epuni a qaja e kola trofë trongëne la maca ne la Baselaia, qangöne la ketre mekune hnine la boroshüre hnei epuni hna troa amaman. Nemene la aqane troa kuca?
3 Aqane hnëkë: Ame la ewekë hnapan, ke, troa pane iëne la ketre mekune e kuhu hnine la boroshür, mekune ka ijije troa ketr hnyawane la wenethëhmine la itre atr ka hni ka loi ngöne la götrane i epun. Thupene lai, pane thele jë la ketre ewekë ka ihmeku memine la aja ne la atr, maine ketre ewekë hna majemine ithahnataane hnei angatr, matre troa nango porotrikëne qëmekene la troa amamane lo mekune hne së hna iëne ngöne lo boroshür. Nyimu pengöne aqane kuca, maine troa amamane la ketre xötre qa hnine la Tusi Hmitrötr, maine pena qa hnine la boroshür, matre nyine anyipicine lo mekune hne së hna iën. The cile kö troa amamane kowe la atr lai boroshür, nge qaja jë fe koi angeice la thupen. Ngo eje palahi laka qëmekene troa inu, ke, amë minaju pëhë la ketre hnyinge maine ketre mekune nyine troa ithahnataane ngöne la kola bëeke hmaca troa iwai.
4 Hetre itre xaa boroshüre ngöne la ekalesia. Maine hetrenyi la itre boroshür cili, pine nemene matre tha hnëkëne la itre mekune nyine porotrikëne memine la itre atr hnei epuni hna troa ixelë memine ngöne la götrane i epun?.
5 Itusi ne trofë trongën: L’humanité à la recherche de Dieu: Ijije tro epuni a nyiqaane la ithahnata, jëne la ketre mekune qa hnine la ketre zonale ne nuvel, ka qeje pengöne ka hape ame la itre hmi kola hane lö hnine la fene me hane nyi sinen’ej, maine mina kola hule fe la mele i angatre hnene la itre hmi e cailo fen.
Thupene lai, pane hnyinge jë ka hape:
◼ “Tuneka la mekune i nyipë, ajai Akötresieti kö tro la itre hmi a hane nyi sinene la fene enehila? [Nuepi troa sa.] Hapeu, tha sesëkötre kö nyipë troa atre laka, ame la itre trepene ini ne la itre hmi cili, ke, itre ka ceitune asë hi ngo ka isazikeu catre pe memine la itre ini ne la Tusi Hmitrötr?” Tro fe epuni a amamane koi angeice lo itre ëjene mekene ngöne kola xötrei fe lai itus, nge nango qeje pengöne jë hi, laka ceitune hi la ka hmi maine la ka tha hmi kö, ngo tro palahi a ketr la mele i angeice hnene la uqanyine la itre hmi. Amamane jë la thangane koi angeice troa atre la kepine matre kola thele Akötresie hnene la fene hnengödrai ngöne la itre gojenyi ka nyimutre me ka nany, ngo hetre jëne tro angeic’a atre hmekune la hmi ka nyipici.
6 Ngöne la itre xaa ijin, ke, ka loi mina fe troa hamë zonale maine tarak. Nge hetre mejiune së troa catre me madrin, ngöne la easë a upe la nöjei atr troa e la itre itus, matre nyine hnëkë angatre troa öhnyi thangane la mene ne la wesi ula i Akötresie ngöne la mele i angatr, e tro angatr’a drengethenge Nyidrë.