Mekene 12
Catre Jë Së Cile Kowe La Itre Ua Ka Ngazo!
1. Nemene la aqane ujë i Iesu, ngöne la nyidrë a cile kowe la itre ua ka ngazo?
AME ju fe kö lo thupene bapataiso Iesu, ke, nyidrëti a canga tro ju troa thithi me thele pengöne la itre mekune ngöne la hnapapa ne Iudra. Ame hnei Satana hna thele troa tupathi nyidrë matre tro nyidrëti a sasaithe la itre trenge wathebo i Akötresie. Ngo hnei Iesu hna kötrene la itupathi diabolo, matre thaa kei kö nyidrë ngöne la hnö i angeic. Ketre, ngöne la Iesu a cainöje trootro e celë fen, ke, hnei nyidrëti fe hna hane cile kowe la itre ua ka ngazo. Hnei Iesu pala hi hna wesitrë angatre me cile koi angatr, a nyimu ijin.—Luka 4:1-13; 8:26-34; 9:37-43.
2. Nemene la itre hnyinge nyine tro së a wangatrun?
2 Tusi Hmitrötre a pune qaja la itre ewekë cili, nyine acatrene hnyawa the së lo mekune laka, ka mele la itre ua ka ngazo. Angatre a tupathe troa amenune la itre atr, ngo atreine tro së a cile kowe la itre ua cili. Ngo ka fetra qa ka la itre ua ka ngazo cili? Pine nemene matre angatre a amenune la itre atr? Nge nemene la itre aqane iamenu i angatr, matre traqa kowe la hnei angatre hna mekune kow? Eje hi laka, maine epuni a aja ixatua matre atreine epuni troa cile kowe la itre ua ka ngazo, ke, nyipi ewekë troa sa la itre hnyinge celë.
ITRE UA KA NGAZO—QAANE I ANGATRE ME AJA I ANGATR
3. Nemene la qaane i Satana Diabolo?
3 Hnei Akötresieti hna pane xupe hë ekö la itre ua ka nyimutre, qëmekene tro Nyidrëti a xupe la atr. (Iobu 38:4, 7) Tune lo hne së hna ce wange hë ngöne lo mekene 6, hnene la ketre angela hna lapa fë me akökötrene la aja ka eje thei angeic; ene laka tro la itre atr a tro triji Akötresie me thili koi angeic. Pine laka hna lapa fë pala hi la aja cili, hnene lai angela ka ngazo hna catre fë pala hi la mekune ka ngazo me qaja angazone la Atre Ixup, ngöne laka hnei angeice hna qaja ka hape ka thoi lae Akötresie. Celë hi matre mama hnyawa pi hi ka hape ame angeice ke, Satana (ka icilekeu) nge diabolo (ka sili trengathoi).—Genese 3:1-5; Iobu 1:6.
4. Hna tuneka matre kei pi la itre xaa angela ngöne la ijine i Noa?
4 Thupene lai, hna xötrethenge Satana hnene la itre xaa angela. Ame lo hneijine i Noa ketre atr ka meköt, hnene la itre xaa angela hna kötretrije la itre hnëqa i angatre e hnengödrai me xomi ngönetrei ne atr matre kuca la aja i angatr, ene la troa kuci ngazo memine la itre föe e celë fen. Eje hi laka, Satana hi la ka uku angatre troa icilekeu. Celë hi matre angatre a nyi keme ne ju la itre atr ka hoea, ene lo itre nefilim, itre ka catre iangazo me ithahluë. Ngöne la Iehova a axulune la di, ke, hna apaatrene la nöjei atr memine la itre neköne lo itre angela ka thaa idrei. Mele ju pe hi lo itre angela ka thaa idrei, pine laka hnei angatre hna nuetrije la itre ngönetrei ne atr, me bëeke hmaca kowe la nöje ne la ua. Ngo hnei Akötresieti pe hna xome acone la itre dremoni cili me othi angatre ngöne la jidri ne la ua, tune la itre ka iwanaxoë. (Genese 6:1-7, 17; Iuda 6) Ngo thaa hnei Satana kö “tixene la nöjei demoni” memine la itre angela ka ngazo i angeic, hna hmaca me cile troa canga amamane la icilekeu i angatr. (Luka 11:15) Matre nemene la aja i angatr?
5. Nemene la aja i Satana memine la itre demoni i angeic, nge nemene la hnei angatre hna kuca matre troa kei la itre atr hnine la itre ihnö hnei angatre hna amë?
5 Ame la aja i Satana me itre dremoni i angeic, ke, ene la troa aiananyine la itre atr me Iehova. Celë hi matre ngöne la mele ne la atr, ke, thaa hna cile kö me mano la itre ua cili ka ngazo troa iamenu, me troa ilep, maine troa ikucahmë pena. (Hna Amamane 12:9) Nge kola mama hnyawa ngöne la hnedrai së enehila jëne la itre ewekë ka traqa laka, catrehnine hë la iakötrë ne la itre dremoni. Angatre a ami thethine la itre atr, jëne la nöjei aqane kuci haze. Nemene la aqane kuca ne la itre demoni la itre theth, nge tuneka la aqane tro së a hmekëne itre ej?
NEMENE LA AQANE AMENU EPUNI HNENE LA ITRE UA KA NGAZO
6. Nemene la kuci haze, nge nemene la nöjei pengöne aqane kuci haze?
6 Nemene la kuci haze? Ame la kuci haze, ke, ene la kola ithahnata me ce huliwa memine la itre ua ka ngazo; maine easë hmekuje me angatr, maine jëne pena la ketre u ne ta. Ame la kuci haze, ke, ketre aqane nyinyithina i itre dremoni lai, hna aceitunëne eje memine la ane thethi ka pui loi kowe la atre traa theth: ka hnyapa kowe la itre öni hna troa jel. Nge tune la ketre ka thele tha, angeice a thele troa tupathe la itre maja ka nyimutre nge ka isa pengöne kö, matre troa jöötre hnene la ketre öni, haawe, ketre tune fe la itre ua ka ngazo, ngöne laka angatre a xatuane la nöjei pengöne aqane kuci haze, matre eje e ngöne itre ihnatrapaime i angatre la itre atr. (Wange ju la Salamo 119:110.) Ame la itre pengöne aqane kuci haze cili, ke, ene la troa nyi haze, ene la troa tune la itre ka uthi drösinö, troa saxepu maine perofeta thoi, troa trene haze, troa nyinyithina, troa wange la itre trene u ne ta, me troa ithahnata me ua ne la itre ka meci hë.
7. Tuneka la aqane hlemu la kuci haze, nge pine nemene matre eje a cia hlöeë ngöne la itre nöje lo hna hape itre ka hmi koi Akötresie, hmi keresiano?
7 Kuci haze la ketre maja ka sisitria catr, pine laka, eje a hna thele ngöne la fene hnengödrai asë. Ame la itre atr ka mele ngöne la itre hunahmi, ke, angatre a thele mele thene la itre trene drösinöe maine wai gerisör, nge ame koi itre ka mele ngöne la itre traon, ke, angatre a wange la itre magoi. Ketre, kola mana la kuci haze ngöne la itre nöje ka catre hmi. Maine tro së a goeëne e Amerika, ke, 30 lao zonale ka isa pengöne kö, nge hna salemëne la 10 000 000 lao etrun, nge kola hamë ithuemacanyi göne la nöjei pengöne aqane kuci haze. Ngöne la nöjei macatre, ke, angetre Berezile a itöne la itre ewekë nyine kuci haze; 500 milio lao dralë hna kapa qa ngöne lai hna salem. Kola öhne laka, ngöne la nöje cili, ke, ka tiqa catre hnei katolike hna bapataisone ka nyinyape thele la itre hnë kuci haze; 80 koi 100 la etrun. Qangöne laka, nyimu hene hmi ka catre kuci haze, hna mekune hnene la nöjei atr ka hmi ka hape, hna kapa hnei Akötresie la troa ithahnata memine la itre ua. Ngo hapeu, nyipici kö lai?
PINE NEMENE MATRE KETRE THIINA KA SISI KOI TUSI HMITRÖTRE LA KUCI HAZE?
8. Nemene la mekune hna amamane hnene la Itre Hna Cinyihane göne la kuci haze?
8 Maine hane fe epuni drenge ka hape, jëne la nöjei pengöne aqane troa kuci haze, atreine hi troa ithahnata memine la itre ua ka ngazo me itre ua ka loi, ngo eje hi laka, tro epuni a sesëkötre la hna qaja hnei Tusi Hmitrötre göi kuci haze. Ase hë thuemacane la nöje i Iehova, ka hape: “The tro kö nyipunie a jea kowe la ite tene u ne ta, me thele thene la ite perofeta thoi, mate ngazo pi nyipunie hnei nyuden.” (Levitiko 19:31; 20:6, 27) Ketre, kola thuemacanyi së hnene la tusi Hna Amamane ka hape, troa kuiëne lo itre ka “kuci haze” kowe la “hneopegejë ka ideuthi hnei eë me teio; celë hi meci [palua] hnaaluen.” (Hna Amamane 21:8; 22:15) Pë kö pengöne aqane kuci haze, hna kapa pe kö hnei Iehova. (Deuteronomi 18:10-12) Pine nemen?
9. Pine nemene matre, ijije tro sa qaja ka hape, ame la itre ithuemacanyi hna kapa qa ngöne la nöje ne la ua, ke, thaa qa thei Iehova kö?
9 Hnei Iehova hna upe la itre ua ka loi, maine itre angela ka drengethenge Nyidrë, troa ithahnata memine la itre atr ekö lo thaa pexeje pala kö la Tusi Hmitrötr. Ame enehila pexeje hë ej, celë hi matre Wesiula i Akötresieti pë hë la ka amamane me hamëne la nyine tro la itre atr a trongën, matre nyihlue i Iehova thenge la aja i Nyidrë. (2 Timoteo 3:16, 17; Heberu 1:1, 2) Thaa hnei Nyidrëti kö hna nyi xaa gojenyi hmaca e tröne la trenge ewekë i Nyidrë ka hmitrötr, göi troa hamë ithuemacanyi jëne la itre u ne ta. Ame asë pë hë la nöjei ithuemacanyi ka traqa hmaca pe qa caha ngöne la zi ange ua, ke, ka xulu pë hë qa thene la itre ua ka ngazo. Ketre, ame la atr ka kuci haze, ke, angeice a nue jëne la itre demoni troa kucahmë angeic, maine tro pena la itre ua ka ngazo a löthi angeic. Ngo, qa ngöne la ihnimi Iehova, Nyidrë a thuemacanyi së matre tro së a hmeke wanga tro së a lö hnine maine ketr la itre pengöne aqane kuci haze. (Deuteronomi 18:14; Galatia 5:19-21) Nge maine thaa mano kö së kuci haze, nge atre hë së la mekune i Iehova göne la ewekë cili, eje hi laka, tro hë së lai a hane ce memine la itre ua ka ngazo, ka icilekeu matre itre ithupëjia jë fe hë së me Akötresie.—1 Samuela 15:23; 1 Aqane lapa i ite Joxu 10:13, 14; Salamo 5:4.
10. Nemene la nyi haze, nge pine nemene matre loi e tro së a kötrene ej?
10 Ame la ketre pengöne aqane kuci haze ka hlemu, ke, ene la nyi haze—kola thele troa canga atre la pengöne la itre drai hnapin, maine troa thele la ketre ewekë ka sihngödre jëne la itre ua. Ame itre pengöne aqane nyi haze, ke, ene la thele ewekë jëne la itre wëtresij, me wene balo ver lo hna hape “boule de cristal,” troa qejepengöne la itre pu, troa qeje qeje loi, troa elo hano (taro). Alanyimu la itre atr ka mekune ka hape, nyine elone la nyi haze nge pëkö engazone ej, ngo Tusi Hmitrötre pe a amamane laka lue tremesinene nyidro, itre ka qeje loi me itre ua ka ngazo. Kola amamane la ketre ceitune ngöne Ite Huliwa 16:16-19, hetrenyi “la ketre demoni ka nyi haze” ka löthe la ketre jajiny, matre tro angeice a “atreine perofeta.” Ngo eje hi laka, ame la kola ase helëne la demoni, ke, thatreine ju hi angeice qaja la itre ewekë ka troa traqa. Kola mama hnyawa e cili laka, ame la nyi haze, ke, ketre maja lai hna huliwane me piine hnei itre demoni, matre jele la nöjei atr ngöne la itre sipu theth i angatr.
11. Nemene la aqane tro la ketre atr a kei hnine la ihnö, qa ngöne hnei angeice hna thele troa ithahnata memine la ka meci hë?
11 Maine epuni a hnëmecine la ketre atr hnei epuni hna hnim, tro fe hë a hane tupathi epuni jëne la ketre maja. Tro jë la ketre u ne ta a hamë ithuemacanyi ka ketre pengöne koi epun, jëne la aqane ithahnata ne lo ketre atr ka mec. Thupëne hnyawa kö! Ame la atr ka thele troa ithahnata memine la ketre ka mec, ke, angeice a tro meköti kowe lai hnö hna amë hnei itre demoni. Pine nemen? Pine laka, thaa ka ithahnata kö la ka meci hë. Ketre, Tusi Hmitrötre a qaja hnyawa laka, ame ngöne la angeice a mec, ke, kola “hmaca ju angeice kowe la dro i angeic; ngöne la drai cili patre hë la itre mekune i angeic.” Ketre, “thatre kö la ketre ewekë” hnei itre ka meci hë. (Salamo 146:4; Ate Cainöj 9:5, 10) Eje hi, ame enehila atre hnyawa së laka, hnene la itre demoni hna nyitipune la aqane ithahnatane la itre ka meci hë, me hamëne jëne la ketre u ne ta la itre ithuemacanyi ngöne lo lai itre atr ka mec. (1 Samuela 28:3-19) Haawe, eje hi laka, ame la “ate ithahnata me u ne wezipo,” ke, angeice lai a kei hnine la itheth i Satana, me icilekeu memine la aja i Iehova.—Deuteronomi 18:11, 12; Isaia 8:19.
THUPENE LA HNA ITRATHETHI KOLA ISI
12, 13. Nemene enyipicine ka amamane ka hape, itre demoni pala hi a catre troa tupathe me kucahmëne la itre atr?
12 Ame la epuni a kapa la ixatua qa hnine la Wesiula i Akötresie göi troa neëne la kuci haze, ke, epuni hi lai a thipetrije la maja hna amë qëmeke i epuni hnei itre demoni. (Wange ju la Salamo 141:9, 10; Roma 12:9.) Hapeu, kola qaja lai ka hape, thaa tro hmaca kö la itre demoni a jeli epuni ngöne la itre theth i angatr? Ohe! Thupene la hna akönia tupathi Iesu, hnei Satana hna “nue anganyidrë utihë e ketre ijin.” (Luka 4:13) Ceitune hi lai me enehila, thaa itre ua hmekuje kö a tupathe la itre atr, ngo angatre fe a isi.
13 Mekune hnyawa hmaca jë së lo itre ewekë ka ngazo hnei Satana hna kuca koi Iobu, ketre atre nyihlue i Akötresie. Hnei Diabolo hna kuca matre meci pi la itre öni i Iobu, me itre xaa hlue i angeic, me humuthe fe la itre nekö i angeic. Thupene lai, hnei Diabolo hna lepi Iobu hnene la ketre meci ka tru catr. Ngo, hnei Iobu hna cile huti me huliwa nyipici koi Akötresie, celë hi matre atraqatre la manathithi hnei angeice hna kapa. (Iobu 1:7-19; 2:7, 8; 42:12) Qaane ju hi la drai cili, hna huliwa tune pala hi hnene la itre demoni, hnei angatre hna thele jëne troa ahumune la sepeneqë ne la itre atr, me thunge la itre lue meke i angatr; nge atraqatre la madrine i angatre troa goeëne la itre atr troa akötr. (Mataio 9:32, 33; 12:22; Mareko 5:2-5) Ngöne la hneijine së, kola mama ngöne la itre ewekë ka traqa enehila laka, nyimutre catre hë la itre atr hna kucahmëne hnene la itre demoni, troa ce meköle me angatr, maine troa ahmone pena la itre xan. Angatre a ukune la itre xane troa ihumuthe maine troa hnöjua, lue xaa ngazo katru ka sisi koi Akötresie. (Deuteronomi 5:17; 1 Ioane 3:15) Ngo eje hi laka, hna lapa xome la itre thauzane lao atr ekö hnene la itre ua ka ngazo, ngo hnei angatre hna lö me uke qa ngöne la ihnatrapaimene la itre demoni. Nemene la ka xatua angatre matre atreine jë angatr, troa uke me kötrene la itre demoni? Hnei angatre hna catre trongëne la itre hna amekötine hna melen.
NEMENE LA AQANE TROA KÖTRENE ME CILE KOWE LA ITRE DEMONI
14. Thenge la tulu hna amë pe ngöne lo hneijine i Iesu hnene la itre keresiano ne Efeso, tuneka la aqane tro epuni a cile catre kowe la itre ua ka ngazo?
14 Nemene la aqane tro la ketre atr a thupë angeice kö memine la fami i angeic, matre thaa tro kö angatre a eatre hnine la itre theth, hna amë hnene la itre ua ka ngazo? Ame ngöne la hneijine i Iesu, ke, hnene la itre keresiano ne Efeso ka kuci haze qëmekene la tro angatre a atre la nyipici, hna trongëne la itre hna amekötine ka loi. Easë a e ka hape, “nge alanyimu fe angetre nyinyithina a icasinekeune la itre tusi angat, me dreuthe trije it’eje qëmeke ne la nöjei ate asë.” (Ite Huliwa 19:19) Ketre, maine thaa ka hane kö epuni ekö kuci haze, loi mina fe tro epuni a trije asë la nöjei ewekë hna xome nyine kuci haze, maine itre hnei epuni hna mekuhnine pena. Maine itre itus, maine itre zonal, itre video, itre poster, itre nyima, maine itre ewekë ka nyimutre hna xome nyine kuci haze. Ketre, hna e fe la itre idrola, itre wene drösinöe nyine ithupë, maine itre ahnahna pena hna hamëne hnene la itre ka kuci haze. (Deuteronomi 7:25, 26; 1 Korinito 10:21) Hanawange la ketre ceitun: ngöne la ketre nöj, Tailaade la ëjen, ke, ekö hë kucahmëne la lue trefëne hnene la itre demoni. Ame hnei nyidroti hna trije pi la itre ewekë hna mekune ka hape hna kuci hazen. Nemene hë la thangane koi nyidro? Mano hë nyidro qa ngöne la iakötrë ne la itre demoni, nge nyidroti a kökötre hnyawa ngöne la ua.
15. Ngöne la isi së memine la itre ua ka ngazo, nemene la ketre ewekë nyine tro së a wangatrune matre atreine së troa kötrene la itre demoni?
15 Ame la hnaluene aqane troa kötrene la itre demoni, ke, ene la troa trongëne la ixatua hna hamëne hnei Paulo Aposetolo; nyidrë a upe la itre atr troa xetrëne la hnahetre ka pexeje hna hamëne hnei Akötresie; celë hi ixetre ne la ua. (Efeso 6:11-17) Nyipi ewekë tro la itre keresiano a catre petr, me neëne la itre itupathi ne la itre ua ka ngazo. Matre kola qaja ka hapeu, la troa xetrëne la ixetre ne isi ngöne la ua? Öni Paulo ka hape, “Nge ceme it’ej’ asë xome jë fe la pete ene la lapaun, matre catre nyipunie troa apine la itre jo ne hazo eë ne la ka ngazo.” Nyipici laka, e catrecatre la lapaune i epun, haawe, atreine fe hi epuni lai troa cile kowe la itre ua ka ngazo.—Mataio 17:14-20.
16. Tuneka la aqane tro epuni a acatrene la lapaune i epun?
16 Nemene la aqane tro epuni a acatrene la lapaune i epun? Eje hi laka, hnene la troa catre inine pala hi la Tusi Hmitrötr, me trongëne eje ngöne la mele i epun. Ame la ecatrene la lapaune la ketre atr, ke, eje e ngöne la aqane tro angeice a eköthe hutine la trepen, ene la—atrepengönyi Akötresie. Hapeu, eje fe kö la mekune i epuni laka, hna hane akökötrene la lapaune i epuni hnene la nyipi atrehmekune hnei epuni hna thele ielen, me wangatrune hnyawa ngöne la epuni a inine la Tusi Hmitrötr? (Roma 10:10, 17) Haawe, maine hnei epuni pala hi hna sisedrëne la ini Tusi Hmitrötre me majemine sine la itre icasikeu ne la itre Temoë i Iehova, ke, tro ha acatrene catrëne la lapaune i epun. (Roma 1:11, 12; Kolose 2:6, 7) Drei la ipetre së qëmekene la itre iangazo i itre demoni.—1 Ioane 5:5.
17. Nemene fe la itre xaa ewekë ka troa aijijë së, troa cile kowe la itre ua ka ngazo?
17 Nemene la itre aqane ujë ka loi nyine tro së a kapa, matre atreine tro së a cile kowe la itre ua ka ngazo? Eje hi laka, hna aja nyine troa petre hnene la itre keresiano ne Efeso ngöne la hneijine i angatr, pine laka, hna jilapane hnene la itre demoni la nöje hnei angatre hna mele ngön. Celë hi matre hnei Paulo hna qaja koi angatre ka hape: “Nge kola thithi pala hi nyipunie, ene la thithi sipo asë ngöne la ua.” (Efeso 6:18) Pine laka, easë a mele enehila ngöne la fene hna jilapane hnene la itre demoni, eje hi laka, nyipi ewekë tro së a catre thithi matre tro Akötresieti a thupë së, nge ketre mina fe, atreine fe së troa cile kowe la itre ua ka ngazo. (Mataio 6:13) Ketre, hetre ixatua ka tru fe hna troa hamëne hnene la itre qatre thupe hnine la ekalesia i keresiano; ene la ixatua jëne la itre ewekë ne la ua, maine ixatua pena jëne la itre thith i angatr.—Iakobo 5:13-15.
CATRE JË TROA CILE KOWE LA ITRE UA KA NGAZO
18, 19. Nemene la ewekë nyine troa kuca, e maine kucahmëne hmaca jë la ketre atr hnene la itre demoni?
18 Nyipici, ngacama hna xötrethenge lo itre hna amekötine matre thaa tro kö a itupathe hnene la itre demoni, ngo alanyimu kö la itre hna kucahmëne hnene la itre ua ka ngazo. Celë hi ewekë ka traqa kowe la ketre trahmanyi ne Kote Ivoar, ka inine hë la Tusi Hmitrötre memine la itre Temoë i Iehova, nge ka thë asë la itre drösinöe i angeice nyine isi. Thupene lai hnei angeice hna kökötre trootro ngöne la ua, me nue la mele i angeice koi Iehova, nge hnei angeice hna hane xome la bapataiso. Ngo ngöne la wiike thupene la angeice a ase bapataiso, ke, kolo hmaca ha nyiqaane kucahmë angeice hnene la itre demoni, nge angeice fe a drenge la itre aqane ewekë kola qaja koi angeice ka hape, tro angeice a nuetrije la hnei angeice hna hnyipi lapaune kow. Maine ase fe hë hane traqa tune lai koi epun, ma tro epuni a mekune ka hape thaa Iehova kö a thupë epun? Ohe, thaa tro kö epuni a mekune tune lai.
19 Ngacama loi la aqane thupë Iesu lo atr ka pë ethane hnei Akötresie, ngo hnei nyidrëti fe hna hane drenge la kola ewekë hnene la ua ka ngazo, ene Satana lo Diabolo. Hnei Iesu hna amamane la nyine troa kuca. Hnei nyidrëti hna qaja koi Diabolo ka hape: “Satana, [tro pi, NW]!” (Mataio 4:3-10,) Celë hi aqane tro epuni lai a hane kuca, matre kötre pi me thaa drenge pi la itre nine ula me aqane ewekë qa ngöne la götrane ne la ua. Ketre, loi e troa u catre me hë Iehova, matre tro nyidrëti a xatua epuni troa cile kowe la itre ua ka ngazo. Ketre, thithi jë draië me hëne catrëne la ëje i Iehova. Itre Edomë 18:10 a qaja ka hape: “Hnapo ka catre la atesiwa i Iehova; kola köte kowe hnene la at ka meköt, mate adraië angeic.” Celë hi hna kuca lai hnene la ketre keresiano trahmanyi ne Kote Ivoar, matre paatre ju la itre ua ka ngazo kucahmë angeic.—Salamo 124:8; 145:18.
20. Tune la aqane ce wange së, nemene la nyine tro epuni a kuca matre atreine epuni troa cile kowe la itre ua ka ngazo?
20 Hnei Iehova hna nue la itre ua ka ngazo troa mel, ngo Nyidrëti pe a amamane la mene i Nyidrë, jëne la aqane ujëne la itre hlue i Nyidrë, celë hi matre hlemu hë la ëje i Nyidrë ngöne la fene asë. (Esodo 9:16) Maine tro epuni a lapa qale koi Akötresie, ke, thaa tro jë kö epuni a xouene la itre ua ka ngazo. (Numera 23:21, 23; Iakobo 4:7, 8; 2 Peteru 2:9) Hna nyi ifegone hi la trenge catre i angatr. Hna thaucë angatre ngöne lo ijine i Noa, hna helëne triji angatre ngöne la hneijine së, nge angatre pë hë a treqene la pune hna amekötine koi angatr. (Iuda 6; Hna Amamane 12:9; 20:1-3, 7-10, 14) Eje hi laka, angatre pë hë lai a hmengöhmengöne hnei xou, pine laka, easenyi hë matre apaatrenyi angatre pi. (Iakobo 2:19) Haawe, maine tro la itre ua ka ngazo a tupathe troa huli epuni jëne la nöjei pengöne ihnö, me angazo epuni pena elanyi ngöne la itre xaa götran, ijije fe hi tro epuni a hane cile koi angatr. (2 Korinito 2:11) Kötrene jë, nge the ketr kö la nöjei pengöne aqane kuci haze, xötrethenge jë la itre ixatua qa hnine la Wesiula i Akötresie, thele jë la itre ewekë hnei Iehova hna ajan, matre tro Nyidrëti a kepe epun. Canga trongëne jë la itre ewekë cili, nge eje hi laka tro epuni a mel, e tro epuni a cile catre qëmekene la itre ua ka ngazo!
HAPEUE LA HNEI EPUNI HNA ININ
Nemene la aqane kuca la itre ua ka ngazo troa amenune la nöjei atr
Pine nemene matre Tusi Hmitrötre a qaja angazone la kuci haze?
Nemene la nyine tro la atr a kuca matre utretrepi angeice qa ngöne la ihnatrapaime ne la itre ua ka ngazo?
Pine nemene matre nyipi ewekë tro epuni a catre cile kowe la itre ua ka ngazo?
[Iatr ne la götran 110]
Troa atrehmekune tuneka la itre aqane kuci haze?