Loi e Troa Atraqatre Pala Hi La Itre Huliwa Së
1 Atraqatre pi hë la itre huliwa hna kuca hnei Iesu Keriso ngöne lo ijine nyidrëti a cainöj. Hnei nyidrë hna kuca la itre iamamanyikeu me ithuane la itre atr, itre thauzane la etrun; hnei nyidrëti fe hna aloine la itre meci angatr, me amelene hmaca la itre xane qa hna mec. (Mat. 8:1-17; 14:14-21; Ioane 11:38-44) Kola haine hnene la nöjei atr, lai huliwa hnei nyidrëti hna kuca. Nge ame ngöne la jidri tixenuë qëmekene tro nyidrëti a mec, hnei nyidrëti hna qaja kowe la itretre drei nyidrë, ka hape: “Ame la ate lapaune koi ni, tro angeic’a kuca fe la nöjei huliwa hnenge hna kuca; nge tro angeic’a kuca la ite huliwa atraqate hune lai.” (Ioane 14:12) Nemene la aqane tro së a kuca matre troa “atraqate” la itre huliwa së?
2 Loi e Troa Kuca Asë La Itre Teritoar: Hnei Iesu hmekuje hi hna cainöje ngöne la götrane e Palestin, ngo nyidrëti pë hë a upe lo itre pane drei nyidrë, troa hane anyipicine fe ngöne la itre xaa götrane thaa hnei nyidrëti hna cainöje ngön, a “uti hë la cane la fene hnengödrai.”(Ite Huliwa 1:8) Ase hë lapane enehila la fene hnengödrai asë hnene lai maca hnei nyidrëti hna cainöjën, kola e la 232 lao nöje ka tru hna ketr hnene lai ithuemacany. (Mat. 24:14) Hapeu, epuni kö a hane kuca hnyawa la teritoare hna athipe thatraqane la ekalesia i epun?
3 Loi e Troa Thele La Itre Atr Ka Ala Nyim: Qëmekene tro Iesu a mec, kola troa sisedrëne pë hë hnene la itretre drenge la huliwa ne cainöje i nyidrë. (Ite Huliwa 1:15) Qa ngöne laka, catre catre angatre cainöje ngöne la ijine Penetekos 33 M.K., haawe, hna e la theri thauzane la etrune la itre atr ka kapa la nyipici, me xome la bapataiso. (Ite Huliwa 2:1-11, 37-41) Qaane la ijine cili nge enehila fe, kolo pala hi a lö hnine ngöne la organizasio i Iehova hnene la itre atr “hna hnëkëne kowe la mele ka tha ase palua kö,” matre kösë 1 000 lao etrune la ange ka bapataiso ngöne la caa drai. (Ite Huliwa 13:48) Hapeu, easë kö a kuca asë la hne së hna atrein, matre troa ithahnata memine la itre atr ka hetre hni ka menyik, ngöne la nöjei götran easë a iöhnyi me angatr, me thele troa wai angatre hmaca?
4 Loi e Tro Pala Hi a Catre Cainöj: Kola e la könitre nge sin lao macatre ne cainöje Iesu ekö. Ala nyimu catre the së itre trejine la ka sasaithe hë la theri nge sin lao macatre ne cainöj. Ngacama thatre kö së la ijine troa fenesi la huliwa ne cainöj, easë pe a olene me madrine troa xatuane la nöjei atr ka xötrei xome la bapataiso, troa nyiqaane trongëne la gojenyi ne tro kowe la mel. (Mat. 7:14) Hapeu, easë kö a hane catre huliwa i joxu ngöne la nöjei treu?—1 Kor. 15:58.
5 Maine tro së a catre mejiune kowe la ixatua hna troa hamëne koi së, haawe, tro hë së a ceitune memine la itre atr ka xötrethenge nyidrëti hnyawa, laka, atraqatre catre pala hi la itre huliwa hna kuca ngöne la hna cainöj.—Mat. 28:19, 20.