“Xomi Hnine Ju”
1 Pine laka, easenyi catre hë la pune la fene i Satana, nyipi ewekë tro pala hi së a “xomi hni ahoeany”, ngöne la easë a treqene la drai ne iamele i Iehova. Nyipi ewekë catre enehila la thiina cili, pine laka, kola catre thele hnene la itre ithupëjia ka ala nyim, troa ajeanyi së qa ngöne la mekune hne së hna isi kow, ene la troa cilëgöline la Musi ka draië i Iehova; nge angatre tupathi së me thele troa aciane the së la itre sipu mekune së kö ka kösau. Haawe, Satana hi lai, a thele matre tro së a nue trije la huliwa ne cainöjë Baselaia, maine tro pena së a nanazije la aqane troa tro xome ej. (Iako. 5:7, 8; Mat. 24:13, 14) Nemene la itre aqane tro së a amamane la xomihni ka sisitria cili?
2 Troa Xome Hnöth: Tro la xomehnöth a xatua së troa catre cainöjëne pala hi la maca ka loi, ngacama pëkö hni ne ajane la itre atr troa drei së, maine angatre a icilekeu pena memine la huliwa së. Thaa tro jë kö së a qoue menu, me drenge akötrëne la kola kapa angazonyi së hnene la ketre atr, maine ithahnata akökötrenyi koi së hnei angeic. (1 Pet. 2:23) Tro la trenge catre ka eje e kuhu hni së, a sewe së troa qaja angazone la itre atr ne la teritoare së, ka xele ma drei së, maine ka icilekeu memine la huliwa së; easë a trotrohnine hnyawa laka, itre ithahnata lai ka troa ananazijë së, memine fe la itre ka ce cainöje me easë.
3 Troa Catre Pala Hi Troa Xomihni Ahoeany: Eje hi laka, troa mama la xomihni ahoeanyi the së, maine easë a isa pui memine la ketre atr ka drei së, nge ame la easë a bëeke troa wai angeice hmaca, paatre kö angeic. Troa tune mina fe ngöne la easë a inine la Tusi Hmitrötre memine la itre atr, nge hmitre catre angeice troa kökötre ngöne la atrehmekun, maine troa kapa pena la nyipici. Ngo kola mama laka, hetrenyi la itre thangane ka lolo hne së hna kapa, e hne së hna catre xomihni ahoeanyi pala hi. (Gal. 6:9) Hnene la ketre söre hna anyimua wange hmaca pala hi la ketre föe hmae, qëmekene tro nyidroti nyiqaane inine la Tusi Hmitrötr. Ame ngöne la hnaafaifine iwai hmaca ne la trejine föe, kolo pe kö a hnehengazone la itre xaa ewekë hnene lai atr hna wang. Ame ngöne la hnaasikisine iwai, ngazo catre la drai, nge hnei eahlo hna tro fë ka cabi troa iwai; ngo hnei nyidroti hna thele troa wange lai; ngo traqa nyidroti a öhne la hnalapa a pëkö atren. Ngo, atraqatre catre la ajane i nyidroti tro la föe a hane atrepengöi Iehova, haawe, ene pe hnei nyidroti hna iwai hmaca ju, nge traqa ha öhne la föe a itreqe troa nyiqaane inine la Tusi Hmitrötr. Ame hë thupen, hnene la hnainine hna kökötre trootro ngöne la atrehmekun, nge thaa qea ju kö nge angeice fe hë a hane nue la mele i angeice troa nyihluei Iehova.
4 Atre hnyawa hi së laka, easenyi catre hë la drai i Iehova, nge thaa tro kö eje a hmitr. Qa ngöne lai, easë a thele troa nyihluei Iehova, me huliwa atre laka, troa hetre thangane me wa wene ka lolo catre la xomihni ahoeanyi Nyidrë. (Hab. 2:3; 2 Pet. 3:9-15) Loi e tro së a xomihni ahoeanyi fe tui Iehova, nge thaa tro pi kö së a nue trije la huliwa ne cainöje së. Epi tro Iehova a amanathithine la huliwa hne së hna catre kuca, thenge la “lapaun me xomi hnin.”—Heb. 6:10-12.