Mekene Tren
Ngöne La Kola Wezipo La Ketre Atrene La Fami
1, 2. Nemene la aqane nyijëne Satana la itre ngazo me itre mec, matre troa thele troa athixötrë Iobu?
IOBU la ketre trahmanyi ka öhnyi manathithine la aqane mele ne fami. Kola qaja hnei Tusi Hmitrötre ka hape, “sisitia la ate cili hune la nöjei ate ne kohië asë.” Treene lao nekö i nyidrë, sevene lao nekötrahmanyi nge köni jajiny. Atreine hi nyidrë troa aeatrëne hnyawa la hnëqa i nyidrë ngöne la fami pine laka, tru catre hnei mo i nyidrë. Ngo ame kö la ewekë ka tru, ke, ene laka, nyidrëti a elemekene la itre huliwa ngöne la ua, me hnengazone la mele ne la itre nekö i nyidrë xajawa i Iehova. Haawe, hetre thangane ka loi asë hi la itre ewekë cili, ngöne laka, kola isilekeune la fami nge madrine troa ce mele la itre atren.— Iobu 1:1-5.
2 Thaa sihngödri kö la pengöi Iobu koi Satana, lo ka ithupëjia catre me Iehova. Satana hi lo ka lapaa thele la nöjei aqane troa thë la aqane mele nyipici ne la itretre nyihlue i Akötresie, celë hi matre hnei angeice hna ujë koi Iobu me lepe apaatrene la fami i nyidrë ka mele madrin. Thupene lai, hnei angeice hna “lepi Iobu hnene la piagote ka ngazo qane la lue hnatrapaca uti hë la ulëne he i angeic.” Satana hi lai a thele troa athixötrë Iobu, hnene la itre thanatresi, memine la itre xaa pengöne mec.— Iobu 2:6, 7.
3. Nemene la itre hatrene la meci ka eje thei Iobu?
3 Thaa hnei Tusi Hmitrötre kö hna hamëne la ëjene la meci ka traqa koi Iobu. Ngo, kolo hi a qaja la pengöne aqane tithe la atr hnene la mec. Hna kuje la ijöne i nyidrë hnene la itre wanak, nge gaa trenge pi asë hë la ikupeine i nyidrë matre kolo fe hë a piipi asë la ngönetrei. Pui ngazo catre la hna mano hnei Iobu, nge pui dro catre la ngönetrei i nyidrë. Itre ewekë lai hna kuca matre tro angeice a akötr. (Iobu 7:5; 19:17; 30:17, 30) Kola akötre sile hnei Iobu, nge nyidrë a lapa ngöne la itre hnatresij, me xome la sine la inege matre xo la ngönetrei i nyidrë. (Iobu 2:8) Akötre ka tru koi nyidrë!
4. Nemene la hna troa melëne hnene la nöjei fami asë?
4 Nemene fe la aqane tro epuni a ujë, maine troa tithi epuni me akötrë epuni hnene la ketre meci ka tru ka tune lai? Ame enehila, thaa Satana hmaca kö a lepe la itretre nyihlue i Akötresie hnei mec, tune lo aqane kuca i angeice koi Iobu. Ame pë hë la kola tithe hnei meci la itre atrene la fami enehila, ke, hnene laka, itre atr ka ngazo asë hi së, me qa ngöne fe la itre ehacene la mele ngöne la nöjei drai, nge hnene fe la aqane angazone hnene la atr la fene hne së hna mele ngön. Ngacama hetre itre drosinöe hne së hna xome nyine neëne la itre meci ka tru, ngo eje hi laka, tro asë hi a tithi së hnei mec, ngo ala xalaithe hi la ka akötre tui Iobu. Nyipici laka, ketre itupathi ka tru la kola tithe hnei meci la itre atrene la hnalapa së. Tro së a ce wange la aqane xatua së hnei Tusi Hmitrötr, troa cile ngöne la nöjei drai kowe la ithupëjia ne la nöjei atr asë.— Ate Cainöj 9:11; 2 Timoteo 3:16.
NEMENE FE LA AQANE MEKUNE I EPUN?
5. Tuneka la aqane tro la itre atrene la fami a qëmeke kowe la ketre meci ka thaa huti kö?
5 Eje hi laka, nyimutre catre la itre ewekë ka troa ajolëne la mele ne la atr, ketre ewekë ka jole catre la troa saze la aqane mel, ngöne la nöjei götrane asë, nge troa mama hnyawa lai, ngöne la kola tithe la atr hnene la ketre meci ka tru. Ngo ame mina fe la kola traqa la itre meci ka thaa ngazo menu kö, itre eje a amenune me thele the së troa waipengöne hmaca la aqane mele së, me nue la itre xaa aja së, me wange fe la aqane troa meku itre xan. Ma tro la itre atrene la fami ka egöcatre pe, a metrötrëne la ka wezipo, matre thaa loi kö troa nyimejen, matre ijije tro angeice a mano fë la akötre ka eje thei angeic. Maine thaa tro hmaca kö angatre a kuca lo itre xaa hna majemin. Ketre, ngöne la itre fami, hetrenyi la itre nekönatre ka co, angatre fe a hane hnime la trejine me angatre trahmanyi maine jajiny ka wezipo, maine keme maine thine pena, ngo ame itre xaa ijine ke, troa amekunë angatre troa hetrenyi la metrötr. (Kolose 3:12) Ngöne la kola tithe la ketre atrene la fami hnene la ketre meci ka thaa qea kö, canga hnëkë hi la fami troa kuca la itre ewekë ka ijij. Ketre, celë hi hna ajane lai hnene la ketre atrene la fami, ene la troa metrötrë angeice e tithi angeice ju elanyi hnei mec.— Mataio 7:12.
6. Nemene la itre aqane ujë hna wangatrehmekune ngöne la kola tithe la ketre atrene la fami hnene la ketre meci ka tru nge ka troa hut?
6 Nge tuneka fe, e tithe jë la ketre atr hnene la ketre meci ka tru, nge pine laka, ketre meci ka qea, tru fe hë hnei nyine troa saze hnine la fami? Hanawange la ketre ceitun, tuneka e kola genyi la ketre atrene la fami hnene laka, hna kaqa la ketre none la atuate i angeic, maine sinatr pena ha hnene la meci Alzheimer, maine kucakuca jë pena ha hnene la itre xaa pengöne meci ju kö? Hapeu pena, maine ketre atrene la fami hna akötrëne hnene la meci ne mekun, tune lo schizophrènie? Eje hi laka, ngöne la itre ewekë cili, utipine hi la pane hne së hna drenge e kuhu hni së— easë a hacene la akötre atraqatr ka eje thene la atr hne së hna hnim. Ngo maine nyipici laka, troa utipine ngöne la xötrei, ame hë ngöne la thupen, troa hetrenyi fe la itre xaa aqane ujë. Pine laka, troa ketr catrëne la itre atrene la fami, matre tro ha nyifegone la mele i angatre hnene la meci ne la caa atr, haawe e cili, angatre a nango wesitr. Ma tro angatre a thele ka hape: “Pine nemene matre kola traqa la ewekë celë koi ni?”
7. Ngöne la kola tithi Iobu hnene la ketre meci ka tru, tuneka la aqane ujë ne la föe i angeic, nge nemene pe la hnei eahlo hna thëthëhmin?
7 Celë fe ewekë lai ka mama ngöne la mekune ne la föe i Iobu. Pane mekune jë epun, hna meci triji eahlo hë hnene la itre nekö i eahlo memine la itre hlue i eahlo. Hnene laka, kola traqa tretr la itre ewekë ka akötr, ame hna traqa koi eahlo la luelue. Ngöne hë la pun, ame la eahlo a öhne lo fö i eahlo ka fetra etine nge ka egöcatr, a kola akötr me puingazo hnene la ketre meci ka tru, e cili tru pala ha la nöjei ngazo ka traqa kowe la mele i eahlo, nge thëthëhmine pë hë lo ewekë ka sisitria— ene lo eloine la aqane tro eahlo me fö i eahlo a mele koi Akötresie. Tusi Hmitrötre a qaja ka hape: “Ame hnene la ifënekö i [Iobu] hna qaja koi angeic, ka hape: ‘Hape u, tro pala kö nyipëti a cate ngöne la meköti nyipë? Jele ngazo Akötesieti jë nge meciju!’ ”— Iobu 2:9.
8. Ngöne la kola tithe la ketre atrene la fami hnei mec, nemene la mekene tusi ka troa xatuane la itre xaa atrene troa hetrenyi la aqane ujë ka loi?
8 Nyimutre la itre atr ka hace me elëhni, pine laka, ketre pengöne hë la mele i angatre hnene la hna tithe la ketre e angatre hnei mec. Ngo maine tro la keresiano a mekune hnyawa, celë hi ijine tro angeice lai a hane amamane la ejuine la ihnimi angeic. Nyipi ihnimi la ate “xome ahoeane me ka menyik; . . . [nge] tha ate thele ewekë i nyëne kö, . . . Ate juetëne la nöjei ewekë asë, ate kapa la nöjei ewekë asë, ate mejiune la nöjei ewekë asë, ate xomi hnine la nöjei ewekë asë.” (1 Korinito 13:4-7) Nyipi ewekë tro epuni a xomehnöthe la itre mekune ka ngazo, thaa tro kö a nue itre eje troa musinëne la mele së.— Ite Edomë 3:21.
9. Nemene la itre ewekë nyine mejiune kow ka troa xatuane la fami ngöne la aliene la hni angatr, me ngöne la ua, e traqa ju tru la meci kowe la ketre atrene ej?
9 Nemene la nyine troa kuca matre troa thupëne la mele ne la fami ngöne la ua me ngöne la itre aliene la hni ne ej, e tithe ju la ketre atrene hnene la ketre meci ka tru? Eje hi laka, ngöne asë hi la nöjei mec, isa hetre aqane troa cile kow, me drösinöe thatraqan, nge thaa kolo kö a troa hamëne hnene la itusi celë la itre nyin, maine itre aqane troa ithupë pena ngöne hnalapa. Ngo eje hi laka, ngöne la götrane la ua, ke, Iehova a “acili ameköti angete wewë asë.” (Salamo 145:14) Hna cinyihane hnei Davita joxu, ka hape: “Manathithi la ate mekune kowe la ate pë ewekë; tro Iehova a amele angeice ngöne la drai ne ngazo. Tro ha thupë angeice me amele angeice hnei Iehova. . . . Tro Iehova a kepe angeice ngöne la göhnë ne inyi.” (Salamo 41:1-3) Iehova a thupëne la mele ne la itre hlue i Nyidrë ngöne la ua, nge nyidrëti fe a mama ngöne la kola traqa la itre akötre ka tru hna thatreine xomihnin, tune la itre aliene la hni i angatr. (2 Korinito 4:7) Nyimutre la itre atrene la fami ka cile kowe la itre meci ka tru ka traqa ngöne la hnalapa, angatre a hane qaja tune la atre cinyihane la salamo, me hape: “Atraqate la hna akötë ni; Iehova fe, amele ni jë thenge la wesi ula i cilie.”— Salamo 119:107.
TROA THUPËNE LA MEKUN
10, 11. (a) Nemene la ka nyipi ewekë, e kola ajane hnene la fami troa cile kowe la ketre meci? (b) Tuneka la aqane ujëne la ketre föe, ngöne la kola tithe la trahmanyi eahlo hnei mec?
10 Tusi Hmitrötre a qaja la ketre edromë ka hape, “Tro la hni ne la at’a xomi hnine la meci angeic; ngo dei la ate troa xomi hnine la hni ka aköt?” (Ite Edomë 18:14) Ceitune hi la aqane ketr la “hni ne la atr” memine la aqane troa nyi ehacene la mele ne la fami, hnene la ethane la ketre ngazo ka traqa. Ngo ame pe, “ame la wenethëhmi ka egöcat, te, mele ne la ngönetei.” (Ite Edomë 14:30) Maine troa atreine maine thatreine pena la fami troa cile kowe la ketre meci ka tru, ngo eje hi laka, troa hetre thangane catre la aqane ujë, maine aja ne la hni ne la itre atren.— Wange ju la Ite Edomë 17:22.
11 Hna xomihni hnene la ketre keresiano föe, ngöne la eahlo a goeëne la kola uti trootro la mele ne la fö i eahlo ka meci fë wenethëhmi; nge sikisi petre hi lao macatre thupene la hnei nyidro hna faipoipo. Eahlo a mekune hmaca me qaja la pengöne la trahmayi eahlo, öni eahlo ka hape, “kola ngazo catre la aqane ithahnata i nyidrë, nge thatreine hnyawa ha troa porotrike me nyidrë. Ketre, nyipi jole catre troa trotrohnine hnyawa la hnei nyidrë hna ajane troa qaja.” Pane mekune ju la akötre atraqatre memine la kucakuca ka troa eje thene la trahmany. Nemene la hna kuca hnene la lue trefën? Ngacama ka nanyi la hnalapa i nyidro qa ngöne la ekalesia i keresiano, ngo hnene pala hi la trejine föe hna kuca la hnei eahlo hna atreine troa acatrene la lapaune i eahlo, hnene la troa thele troa atre la itre ithuemacanyi ka hnyipixe hna hamëne hnene la organizasio, tune la ixatua hna hamëne pala hi jëne la xeni ne ua, ene la itre zonale La Tour de Garde me Réveillez-vous! Celë hi la ka hamë eahlo lai la trenge catre ka ijije ngöne la ua, matre atreine eahlo troa thupëne la hniminai eahlo ngöne la foa lao macatre qëmekene la tro nyidrë a mec.
12. Tune la hne së hna atre hë ngöne la pengö i Iobu, nemene fe la ewekë ka loi hna troa kapa e itre xaa ijin, ngöne laka hna wezipo la ketre atr?
12 Ngöne la pengö i Iobu, ke, ka catre lapaune hmaca pena ha la hna akötrën. Nyidrë a hnyinge ju kowe la föe i nyidrë ka hape, “Hape u tro sha kapa la loi qahei Akötesie, nge tha tro fe sha kapa la ngazo?” (Iobu 2:10) Celë hi kepine matre thaa sesëkötre kö së la kola qeje Iobu hnene la ketre atre dreng, ene Iakobo, kösë ketre tulu ne xomihni ahoeany nge ka atreine itreqe! Ngöne Iakobo 5:11 easë a e ka hape: “Dengë hë nyipunie la xomi hni i Iobu, nge ate hë la hna nyi pune hnei Iehova ka hape, Iehova la ate utipine me hnime atraqat.” Ketre tune fe ngöne la hnedrai së enehila, hetre thangane la trengecatre hna kuca hnene la ketre atrene la fami ka wezipo, ngöne laka, kola troa xatuane la itre xane ngöne la hnalapa troa hetrenyi la aqane wai ewekë ka lolo.
13. Nemene la ewekë thaa nyine tro kö a aceitunëne hnene la ketre fami, e hna tithe la ketre atrene eje hnene la ketre meci ka tru?
13 Ngöne la itre fami ka melëne hë la ewekë cili, alanyimu catre la itre ka qaja ka hape, nango jole pi hë ngöne lo xötrei, troa kapa la hace cili hnene la itre atrene la fami. Angatre a qaja hnyawa laka, nyipi ewekë catre la aqane troa waipengöne hnene la atr la ewekë ka troa traqa. Maine troa jole ngöne la qaan, pine laka, kola troa saze la itre hna amekötine hna majemine xötrethenge ngöne la hnalapa. Ngo maine tro la atr a catre me hetrenyi la ajane ngöne la hni angeic, atreine hi tro angeice a melëne lai aqane mele ka hnyipixe. Qa ngöne lai, maine easë a trongëne la itre mekune celë, ke, thaa loi kö e tro së a aceitunëne la aqane mele së memine la itre xaa fami ka pëkö trene kucakuca e hnin, me mekune ka hape, lolo la aqane mele i angatr, nge ‘thaa ka meköti kö lai!’ Eje hi laka, pëkö ka atreine troa atre la itre hace hna troa thue hnene la itre xan. Troa akeukawane la hni ne la itre keresiano asë hnene la itre trenge ewekë i Iesu, hna hape: “Trohemi koi ni, nyipunieti asë ange ka huliwa me hace, nge tro ni a amanonyi nyipunie.”— Mataio 11:28.
MEKUNE JË LA ITRE NYINE TROA PANE KUCA
14. Tuneka la aqane troa amë panëne la itre nyipi ewekë?
14 Qëmekene la ketre meci ka tru, nyipiewekë tro la fami a mekune hnyawa la itre trengewekë celë kola hape: “Kola acaten’ it’eje hnene la itete ithahnata ka ala nyimu.” (Ite Edomë 15:22) Hapeu, e wezipo ju la ketre atrene la fami, ijije kö troa pane icasikeune asë la fami, matre troa ce ithahnatane la itre nyine troa kuca ngöne la hnalapa? Maine troa tro tune lai, ke, sisitria la troa thith, me troa thele ixatua jëne la Wesiula i Akötresie. (Salamo 25: 4) Nemene la itre ithahnata nyine troa ihamënekeune ngöne la icasikeu cili? Eje hi laka, loi e troa ce axeciëne göi droketre, me göi mani, me göne fe la itre hnëqa e hnine la fami. Drei la pane atrekë hnëqane la troa ithupë? Tuneka la aqane tro la iatrene la fami a xatuane lai ka ithupë? Tuneka la aqane tro la itre hna amekötine a ketr la nöjei atrene la fami? Nemene la aqane troa xatuane la ka ithupë, ngöne la ua me ngöne la itre xaa götrane ju kö?
15. Nemene la ixatua hna hamëne hnei Iehova kowe la itre fami ka troa ce mele memine la ketre atr hna tithe hnene la ketre meci ka tru?
15 Maine tro së a sipo Iehova jëne la thith, matre tro Nyidrë a tro xomi së, nge maine tro fe së a sine thele la Wesiula i Nyidrë, me catre xötrethenge la gojenyi hna köjane hnei Tusi Hmitrötr, eje hi laka, tro ha atraqatre la itre manathithi hne së hna troa kapa qa ngöne lai. Hetrenyi mina fe la itre meci ka pëkö nyin. Ngo maine tro pala hi së a lapa qale koi Iehova, tro hë së a atreine cile kowe la nöjei ewekë ka traqa koi së. (Salamo 55:22) Hna qaja hnene la atre cinyihane la salamo, ka hape: “Ihnimi cilie, Iehova fe la ate e ni draië. Ngöne la nyimu mekun’e kuhu hning, kola akeukawane la hninge hnene la itre nyine aupune qa thei Akötresie.”— Salamo 94:18, 19; wange ju la Salamo 63:6-8.
XATUANE JË LA ITRE NEKÖNATR
16, 17. Nemene la itre mekune nyine troa ce ithahnatane memine la itre nekönatr, e tithe ju la ketre trejine me angatre hnei mec?
16 Atreine fe troa traqa la itre jole kowe la itre nekönatr, qa ngöne la hna tithi angatre hnene la ketre meci ka tru. Nyipi ewekë tro la itre keme me thine a xatuane la itre nekönatre troa trotrohnine la itre nyine troa kuca, memine la ixatua ka ijije hnei angatre hna troa hane hamën. Maine ketre nekönatre la ka wezipo, ke, loi e troa qeje pengöne hnyawa kowe la itre xaa kuku ka hape, kola aja ixatua catre hnene lai ka wezipo, haawe, the tro kö angatre a mekune ka hape, kola wangaconyi angatre pë hë. Loi e tro la itre keme me thine a xatuane la itre xaa nekönatre troa ihnimekeu me ixatuanekeune la hace ka eje hnine la fami, wanga tro angatre a iwenemejelë maine ikucanyi pena.
17 Tro la itre nekönatre a canga kapa me trotrohnine la ewekë cili, e tro la itre keme me thine a ketr la itre hni angatr, ngo thaa tro pe a qeje pengöne atrune menune pala ha la pengöne la ka wezipo. Haawe, ijije fe hi troa hane ithuemacanyi göne la pengöne la atrene fami ka wezipo. Maine tro la itre nekönatre ka egöcatre a öhne la aqane akötre ne la atr hna tithe hnei mec, pine laka, kola sewe angeice troa kuca la itre ewekë ka nyimutre hnei angatre hna atreine troa kuca ekö, haawe, tro hë angatre a hetrenyi la “ihnimi trejin” me “feje hnine” kowe la ka wezipo.—1 Peteru 3:8.
18. Tuneka la aqane troa xatuane la itre nekönatre ka nango tru, troa trotrohnine la itre jole ka xulu qa ngöne laka, hetre ka wezipo, nge nemene la aqane tro angatre a kepe thangane lai?
18 Loi e troa xatuane la itre nekönatre ka nango tru hë, troa trotrohnine la pengöne la mele e hetre ka ajolën, matre tro angatre a atreine xomehnöthe la itre aja i angatr. Pine laka, tru la nöjei jëne mani, ene la troa nyithupene droketre me drösinöe, drei la kepine matre, thaa ijije kö kowe la itre keme me thine troa aeatrëne asë la itre hna ajane hnene la itre nekö i angatr. Hapeu, tro kö la itre nekönatre a wesitre pine lai, me mekune laka, kola cipa ewekë angatr? Maine tro pena ha angatre a trotrohnine hnyawa la ewekë ka traqa kowe la fami, me thele troa kuca asë la hnei angatre hna atrein? Troa hetre thangane ka loi, e hna ithahnatane hnyawa la aqane troa cile kowe lai jol, ketre, nyipi ewekë fe la aqane mekune e hnine la fami. Eje hi laka, ngöne la itre fami ka nyimutre, hetre ixatua pi hë hna kapa qa ngöne la hna wezipo hnene la ketre atren, ene laka, kola inine la itre nekönatre troa xötrethenge la eamo hna hamëne hnei Paulo, kola hape: “The kuca kö kete ewekë thenge la ikucanyi me pi tru; ngo loi e isa mekune memine la hni ka ipië, laka sisitia angate hui angeic; the isa wai ewekëne kö, ngo loi e isa wange la ite ewekë i ite xan.”— Filipi 2:3, 4.
TROA WANGE TUNEKA LA AQANE NYINYINE LA ITRE MEC
19, 20. (a) Nemene la itre hnëqane la itre hene fami, ngöne la kola wezipo la ketre atrene ej? (b) Ngacama thaa ketre itusi droketre kö, nemene la aqane hamë ixatua hnei Tusi Hmitrötr, göi aqane troa cile kowe la itre mec?
19 Pëkö engazone kowe la itre keresiano ka macaj, troa thele nyin thei droketre la itre meci angatr, ngo ngazo hi e isazikeu jë memine la trenge wathebo i Akötresie. Ngöne la kola wezipo la ketre atrene la fami, angatre a canga thele nyin la meci ne la sinee i angatr. Ngo, thaa tro pe a canga kapa mekëne ju hi la itre mekune ne la itre droketre, loi troa atreine tuluthe hnyawa itre ej. Ketre, kola öhne ngöne la hnedrai së, laka, nyimutre catre hë hnei meci ka hnyipixe me itre xaa akötre ju kö ka asesëkötrë së; ngöne la itre meci cili, pë pala kö nyin itre ej. Ketre, ame ngöne la itre xaa ijin, ke thatreine kö troa öhne la qaane la itre mec. Haawe, nemene la nyine tro la keresiano a kuca?
20 Nyipici, hetre droketre fe ka hane cinyihane la Tusi Hmitrötr, nge Paulo aposetolo fe a hane hamë ixatua ngöne la aqane tro Timoteo enehmu i nyidrë a nyinyine la meci angeic, ngo ame pe la itre eamo e hnine la Tusi Hmitrötr, ke, hna cinyihane itre ej, nyine xatua së troa hetrenyi la thiina ka loi, me ee së ngöne la götrane la ua. (Kolose 4:14; 1 Timoteo 5:23) Qa ngöne lai, maine kola hetre jole ngöne la aqane troa nyinyine la itre mec, tro la itre hene fami keresiano a tuluthe hnyawa la itre sipu mekune hnei angatre hna troa axeciën. Maine jë angatre a ajane troa nyimu ixatua qa thene la itre droketre. (Wange ju la Ite Edomë 18:17.) Angatre a thele loi thatraqane la atrene la fami ka wezipo, nge alanyimu la itre ka tro troa wange la itre droketre. Itre xane a mekune ka hape, ka hetre thangane catre kö e troa thele nyin la itre mec, jëne la itre aqane inyië ka thaa hlemu kö. E cili, isa qanyi mekuna së kö. Ngo maine troa tithe la ketre keresiano hnene la itre mec, thaa tro pi kö angatre a nuetrije la ‘wesi ula i Akötresie, ene lo lamepa ne la lue ca i angatr, me lai ne la jë i angatr.’ (Salamo 119:105) Tro pala hi angatre a xötrethenge la itre hna amekötine qa hnine la Tusi Hmitrötr. (Isaia 55:8, 9) Qa ngöne lai, angatre a nuetrije la itre aqane inyi ka itretrengekeu memine la kuci haze, memine fe la itre aqane inyidrösinöeë ka sasaithe la itre trepene meköti ne la Tusi Hmitrötr.— Salamo 36:9; Ite Huliwa 15: 28, 29; Hna Amamane 21:8.
21, 22. Tuneka la aqane thele mekune hnene la ketre föe ne Azia, hnine la itre trepene meköti ne la Tusi Hmitrötr, nge nemene la pune ka loi koi eahlo, ka amamane hnyawa laka, lolo la aqane wai mekune i eahlo?
21 Tro sa ce wange la pengöne la ketre föe hmae ne Azia. Thaa qea pala kö la hnei eahlo hna inine la Tusi Hmitrötre memine la ketre temoë i Iehova, nge eahlo a hnahone pi la caa jajinyi ka mala ija, matre 1 470 kilo i nyëne hi. Atraqatre pi hë la hace ne la föe ene la kola qaja koi eahlo hnene la droketre ka hape, ka tro pë hë a sine wezipo la nekö i eahlo, nge thaa tro pë hë nyëne a hane tro. Nydrëti a upi eahlo ju troa amë la medrenge ngöne la ihnatrapaime ne la ketre uma i mus, hnë troa thupëne la itre ka tru mecin. Ketre, thatre pena kö la fö i eahlo la nyine troa kuca. Matre tro eahlo a ujë koi drei?
22 Eahlo a qaja ka hape: “Eni a mekune la ini hnenge hna kapa qa ngöne la Tusi Hmitrötr, laka, ‘edö shë qa thei Iehova la ite nekönat; nge wene la hni, te, june qa thei nyidrë.’ ” (Salamo 127: 3) Eahlo a mekune ju troa sipu thupëne la “edö” i eahlo ngöne la hnalapa, me hetru nyën. Nyipici laka, jole pi hë ngöne la xötrei, ngo jëne la ixatua hna hamëne hnene la itre enehmu keresiano ne la ekalesia ne la itre Temoë i Iehova, atreine hë la föe troa cilëmekene me hamëne la ixatua ka ijije hna ajane hnene la nekönatr. Thupene hë la truelofe lao macatre, nekönatre a hane sine pala hi la itre icasikeu hnine la uma ne Baselaia, nge atraqatre la madrine i angeice troa ce elo memine la itre xaa nekönatre e cili. Kola qaja hnene la föe ka hape: “Eni a olene atraqatre laka, hna eatrongë ni hnene la itre trepene meköti ne la Tusi Hmitrötre kowe la itre mekune ka loi. Hna xatua ni hnei Tusi Hmitrötre troa hetrenyi la mekuthethewe ka lolo xajawa i Iehova Akötresie, nge pëkö hnenge hna troa akötre fë pe ngöne la meleng, pine laka, hnenge hna kuca hnyawa la hnëqang.”
23. Nemene la itre ixatua hna hamëne hnei Tusi Hmitrötr, nyine ithuecatre kowe la ka wezipo memine fe la itre ka troa ce mele me angeic?
23 Thaa ka tro kö a lapa huti epine palua la meci the së. Hnei perofeta Isaia hë hna canga amamane la ijin, “tha tro kö a qaja hnene la ate lapan’eje, ka hape, ‘Ini a mec.’ ” (Isaia 33:24) Ketre hna thingehnaeane lai ka troa eatre ngöne la fene ka hnyipixe, laka, calemi catre hë. Ngo eje hi laka, enehila easë pala kö a troa cile kowe la itre kucakuca ne la ngönetrei memine fe la mec. Eloine pe, Wesiula i Akötresieti a hamë së la itre ixatua nyine troa eatrongë së. Ka troa cilehuti epine palua la itre hna amekötine hnei Tusi Hmitrötre göi aqane ujë, nge ka draië catre kö itre eje hune la itre mekune ne la atr ka ngazo laka saze lapa. Qa ngöne lai, troa caasi la mekune ne la atr ka inamacane memine la atre cinyihane la salamo, hna hape: “Pexeje la wathebo i Iehova, ate ahmacane la u; eje kö la hna anyipicine hnei Iehova, ate ainamacanëne la ite wangadrapa. . . . Nyipici me cengöne meköti la ite hna amekötine hnei Iehova. . . . Nge atraqate la june trongën’ it’ ej.”— Salamo 19: 7, 9, 11.
NEMENE LA AQANE TRO LA ITRE TREPENE MEKÖTI CELË QA HNINE LA TUSI HMITRÖTRE A XATUANE. . .LA FAMI TROA CILE KOWE LA KETRE MECI KA NGAZO MEMINE LA ITRE ETHANE EJ?
Ame la troa ihnim, ke, ene la troa xomihnine aqeane la nöjei ewekë asë.— 1 Korinito 13:4-7.
Nyipi ewekë troa hetrenyi la aqane mekune ka loi.— Ite Edomë 18: 14.
Loi e troa thele la itre ihaji ka loi, qëmekene troa axeciëne la itre mekune ka nyipi ewekë.— Ite Edomë 15:22.
Iehova a hamëne koi së la ixatua ka ijij, ngöne la kola traqa la ketre jole kowe la mele së.— Salamo 55:22.
Wesi ula i Iehova la ka troa eatrongë së, ngöne la nöjei götrane la mele së.— Salamo 119:105.
[Iatr ne la götran 118]
Ngöne la kola tithe hnei meci la ketre sinee i angatr, e cili itre keresiano a amamane la ejuine la ihnimi angatr
[Iatr ne la götran 125]
Maine tro la fami a ce huliwa atreine hi troa cile kowe la itre jol