Mekene Fifitrin

Metrötrëne Jë La Keme Me Thine i Epuni Ka Qatre Hë

1. Nemene la qa së kowe la itre keme me thine së, nge tuneka la aqane tro së a imelekeu me angatr, memine la aqane tro së a ujë koi angatr?

HNA eamone hë ekö hnene la atr ka inamacane ka hape: “Denge ju la keme i’o ate hnaho eö, nge the methinëne la thine i’o e qate hë nyido.” (Ite Edomë 23:22) Ma tro epuni a qaja ka hape, ‘Thaa tro jë kö ni a hane kuca la ewekë celë!’ Thaa tro kö së a methinëne la itre thine së​—maine itre keme së pena​—ngo loi pe troa atraqatre la ihnimi së koi angatr. Easë a atrehmekune hnyawa laka, hetre hnëqa nyine tro së a kuca koi angatr. Ame la ewekë hnapan, ke, ame la easë pi e celë fen, ke hnene la itre keme me thine së. Nyipici, Iehova la qeqene mel, ngo maine thaa hnaho së ju hnene la itre keme me thine së, haawe, ma paatre fe kö së enehila e celë fen. Pëkö nyine tro së a hamëne kowe la itre keme me thine së, a ka sisitria kö e hune la mel. Pane mekune ju hi la aqane hujëne angatre la mele i angatr troa thupëne la nekönatre qaane lo nyëne a co uti hë la kola tru; angatre a ketre nue la mele i angatr, me catre ithupë, me hnehengazone la itre aja ne la nekönatr, me hnime hnyawa nyën. Drei la enyipicine lai, celë hi matre Wesiula i Akötresie a eamo ka hape: “Metötëne ju la keme me thine i’ö . . . matre manathithi’ ö, me lapa ahoeanyi ju e celë fen”!​—Efeso 6:2, 3.

WANGATREHMEKUNE JU SË LA ITRE AJANE LA HNI

2. Nemene la aqane tro la itre nekönatre a “titë” kowe la itre keme me thine i angatr?

² Hna cinyihane hnei Paulo aposetolo kowe la itre keresiano ka hape: “Loi e tro angat [itre nekönatre maine itre api hmunë] a pane inine troa thiina ka loi ngöne la hnalapa i angate kö, me titë kowe la ite keme me thine i angat; ke celë hi loi me sheming xajawa i Akötesie.” (1 Timoteo 5:4) Ngöne la angatre a tru trootro, loi e tro la itre nekönatre a “titë” hnene la troa olene la itre macatre ne hnimi angatr, me huliwa koi angatr, me thupë angatre hnene la itre keme me thine i angatr, me itre qaqa hmunë. Ame la ketre aqane ka aijijëne la itre kuku troa kuca tune lai, ke, hnene la troa wangatrehmekune laka, tune la nöjei atr kolo fe a hane aja ihnimi me ixatua hnene la itre qatre föe me trahmany​—ame itre xaa ijin, ke, angatre a hace, pine laka paatre kö la itre ewekë celë. Tune asë hi la nöjei atr, angatre fe a hane ajane troa wangatrunyi angatr. Loi e tro angatre a drenge ngöne la itre hni i angatre laka, kola hane nyipi ewekë angatr.

3. Nemene la aqane tro së a metrötrëne la itre keme me thine së, me itre qaqa së?

³ Atreine hi tro së a metrötrëne la itre keme me thine së me itre qaqa së, hnene la troa qaja amamane koi angatre laka, easë a hnimi angatr. (1 Korinito 16:14) Maine thaa easë kö a ce mele memine la itre keme me thine së, ngo troa atraqatre la madrine i angatre e hne së pala hi hna thele troa atre la itre nuvele i angatr. Maine troa cinyany, maine troa telefon, maine tro pena a hane troagö koi angatr, celë hi itre ewekë lai ka troa akökötrene la madrine i angatr. Hna cinyihane hnei Meio, ketre qatre föe ka 82 lao macatre, nge ka mele e Zapo, ka hape: “Kola qaja koi ni hnene la nekönge jajiny [ka föene la qatre thupe ka wange trongëne la itre ekalesia], öni angeice koi ni, ‘Nenë, eni a sipo eapo matre tro eapo a hane ce “tro” me nyiho.’ Matre jëne la porogarame ne iwai trootro i nyidro ngöne la itre ekalesia, me numero ne telefone hna troa hëne ngöne la nöjei wiik, haawe kösë eni fe hi lai a ce tro me nyidro. Eni a fe ju la karte i eni, me hape: ‘Haawe, ame enehila nyidroti e celë!’ Eni pala hi a olene la aqane amanathithi ni hnei Iehova, ngöne laka, hnei Nyidrë hna hamë ni la nekönatre cili.”

TROA IXATUA FE HNEI EWEKË NE NGÖNETREI

4. Tuneka la aqane iupi ne la itretre hmi ne Iudra troa pë caa ihnimi kowe la itre keme me thine ka qatre hë?

⁴ Hapeu, eje kö laka ame la troa metrötrëne la itre keme me thin, ke kolo fe lai a hape troa hamëne la itre hnei angatre hna ajane ngöne la ngönetrei? Eje hi. Ketre thiina ka loi lai hna majemine kuca ngöne la itre xaa ijine ekö. Ngöne la hneijine i Iesu, hnene la itre hene hmi ne Iudra hna catre fë la qene nöj, ene laka, maine tro la ketre atr a qaja ka hape, angeice a hamëne la manie maine hnepadro i angeice nyine “[ahnahna hna hujëne koi Akötresie],” kösë kola aijijë angeice la troa nue la hnëqa i angeic, ene la troa huliwane lai mani nyine troa thupëne lai keme me thin. (Mataio 15:3-6) Pë pi kö caa wenethëhmi angatr! Eje hi laka, thaa kolo kö a xatuane la itre atr hnene la itre hene hmi, troa metrötrëne la itre keme me thine i angatr, ngo kolo pe lai a wangesixa angatre hnene la isa pi kuci aja. Thaa tro pi kö së a huliwa tune lai!​—Deuteronomi 27:16.

5. Maine troa hetre itre ixatua hna hnëkëne hnene la itre mus ngöne la itre xaa nöj, pine nemene matre, ame la troa metrötrëne la itre keme me thine ke, ene la troa hane xatua angatre fe hnei mani me mo, thenge la hna atrein, thatraqane la itre xaa jole ka eje thei angatr?

⁵ Ngöne la itre nöje ka nyimutre enehila, hna ixatua hnei mus, me hnëkëne la itre porogarame göi aqane troa hamëne la itre hna ajane hnene la itre qatr, tune la xen, me ihetr, me hnalapa. Ketre, atreine fe tro la itre qatr, a ami manie thatraqane elanyi la itre ijine kola troa uti ipië trootro la mele i angatr. Ngo maine ase hë xenine asë, maine thaa ijije pena ha, loi e tro la itre nekönatre a metrötrëne la itre keme me thine i angatr, ene la troa hamëne la hnei angatre hna atrein. Eje hi laka, ame la troa thupëne la itre keme me thine ka qatre hë, ke, celë hi ketre hatrene la ajane troa nyihlue i Akötresie, celë hi aqane hni koi Iehova, Atre acile la pengö i fami.

IHNIMI ME MELE HNA HUJËN

6. Nemene la hna kuca hnene la itre xan, matre troa thupëne la itre keme me thine i angatr?

⁶ Nyimutre catre la itre thupëtresiji ka hnehengazone pala hi la itre aja ne la itre keme me thine i angatre ka wezipo, angatre a kuca la hnëqa i angatre ngöne la ihnime me hujëne la mele i angatr. Alanyimu la itre kuku ka hëne la itre keme me thine i angatre troa ce mele me angatr, maine pena nyudren a saze hnalapa matre troa lapa easenyi angatr. Itre xane a tro pena troa ce mele memine la itre keme me thine i angatr. Jëne la itre hnepe aqane mele cili, kola mama hnyawa laka, hetre manathithi hna kapa hnene la itre keme me thine memine la itre nekö i angatr.

7. Pine nemene matre thaa loi kö e troa canga xomi mekune thatraqane la itre keme me thine ka qatre trootro?

⁷ Ame itre xaa ijin, pëkö thangane ka loi hna kapa qa ngöne la itre aqane ujë cili. Pine nemen? Ma pine laka, itre mekune hna xome nyimenyimëne pala ha, maine pena, thaa hna ce ithahnatane ju kö, ngo angeice pë hë a ketre kuca thenge ju la itre sipu aliene la hni i angeic. Tusi Hmitrötre a hamë ixatua me hape, “Ame la ate maca mek, te, kola trotrohnine la jë i angeic.” (Ite Edomë 14:15) Hane la ketre ceitun, maine nango jole kowe la thine i epuni ka qatre hë, troa mele caas, epuni a mekune ka hape, ka loi e tro epuni a thupë eahlo. Ngöne la epuni a waipengöne hnyawa la itre aqane ujë cili, pane wangatrune ju fe la ewekë celë: Nemene la itre nyipi aja i eahlo? Hapeu hetre ixatua kö ka loi hnei eahlo hna kapa qa thei mus maine itre xaa organizasio pena? Ajane kö eahlo troa lapa thei epun? Maine eje hi, nemene la itre thangane lai ngöne la mele i eahlo? Hapeu fe la itre atr hnei eahlo hna imajemikeu memin, elanyi e tro triji angatre jë? Nemene la aqane troa ketri eahlo hnene la ewekë cili? Hapeu, hnei epuni kö hna ce ithahnatane la itre ewekë cili me eahlo? Nemene la aqane tro la ewekë cili a ketri epun, me fö i epun, memine la itre sipu nekö i epun? Maine tro la thine i epuni a aja ixatua, drei la ka troa thupë eahlo? Hapeu ijije kö troa ce ithawakeune la itre götrane qa? Hnei epuni kö hna ce ithahnatane lai memine la itre atrene la fami asë, itre ka troa ce mele me eahlo?

8. Drei la nyine tro epuni a wang, ngöne la epuni a mekune la aqane tro epuni a xatuane la itre keme me thine i epuni ka qatre hë?

⁸ Pine laka, ketre hnëqa lai ka troa ketr la itre nekönatre asë ngöne la fami, loi e troa inamacane me pane icasikeune asë la itre atrene la fami, matre troa ce xome la itre xaa hnepe mekun. Ketre, troa atreine fe troa kapa la itre ixatua ka ijij, e hna ithahnata memine la itre qatre thupe hnine la ekalesia i keresiano, maine qa thene pena la itre enehmu ka mele tune lai. Kola ithuemacanyi hnei Tusi Hmitrötre me hape, “Tha nyipi ewekë la ite mekune e hna ithahnatan, ngo kola acatren’ it’ eje hnene la itete ithahnata ka ala nyimu.”​—Ite Edomë 15:22.

LOI E TROA CE HNI ME ATREINE ITROTROHNI

9, 10. (a) Ngacama qatre trootro hë angatr, nemene la aqane metrötrëne la itre keme me thine ka qatre hë? (b) Ngacama hetrenyi la itre mekune hnene la itre neköne ka tru trootro hna troa xome thatraqane la itre keme me thine i angatr, ngo nemene la ewekë nyine tro pala hi angatre a hamëne koi nyudren?

⁹ Maine easë a ajane troa metrötrëne la itre keme me thine së, ke, loi e tro së a ce hni me angatre me trotrohni angatr. Pine laka, kolo ha nango ipië trootro la mele ne la itre qatre me qatre föe, ketre nango jole trootro fe hë koi angatre troa tro, me xen, nge paatre trootro fe hë la itre mekun. E cili, angatre a aja ixatua. Celë hi matre, ngöne la itre xaa ijin, kola ajane catrëne la itre kuku, troa thupëne la mele ne la itre keme me thine i angatr, me tupathe troa hamëne la itre nyin la itre jole hnei angatre hna cile kow. Ngo loi e troa atre hnyawa pala hi laka, ase hë angatre melëne la itre macatre ka nyimutre, nge hetre inamacane ngöne la aqane troa mel, ene la troa ketre thupëne la mele i angatr, memine la troa ketre axeciëne la itre xaa mekun. Ma troa mama la pengö i angatre memine la sipu aqane metrötre i angatr, ngöne la hnëqa hnei angatre hna kuca, kösë itre keme me thin, nge itre thupëtresiji ka macaje fe hë. Ketre, troa kucakuca catre maine elëhni pena la itre keme me thine ka mekune laka, mele i angatre hë a hna musinëne hnene la itre nekö i angatr. Qa ngöne lai, itre xane a wesitr, me icilekeu memine la itre hna kuca nyine troa xome trije qa thei angatre la aja, ene la troa lapa caas.

¹⁰ Eje hi laka, thaa ewekë ka hmaloi kö la itre jole cili, ngo thiina ka loi fe la troa nue la itre keme me thine ka qatre hë troa isa melëne la mele i angatr, me isa sipu musinëne la mele i angatr e ijij. Thaa nyine loi kö kowe la itre keme me thine la troa xomi mekune thatraqai angatr, nge thaa hna pane thuemacanyi kö. Atreine hi troa uti ipië nyimenyime la mele i angatr. Nue angatre pi troa melëne la mele i angatr. Ma tro epuni a öhne laka, maine thaa tro kö epuni a lö hnine menu pala ha ngöne la mele ne la itre keme me thine i epun, tro ha sisitria catre la aqane imelekeu i epun. Tro asë hë epuni a madrin. Maine ngöne la itre xaa ijin, epuni a ajane troa thele la loi thatraqane la itre keme me thine i epun, ngo troa mama ka hape, epuni a metrötrë angatr, e hnei epuni hna ahmitrötrëne la pengö i angatr, me wangatrunyi angatr. Kola eamo hnene la Wesiula i Akötresie ka hape: “Tro eö a mejë qëmeke ne la qia he me metötëne la qat.”​—Levitiko 19:32.

LOI E TROA HETRENYI PALA HI LA THIINA KA MEKÖT

11-13. Maine ka ngazo ekö la aqane imelekeu ne la kuku memine la keme me thine i angeic, nemene la aqane tro angeice a atreine cile kowe la itupath göi troa thupë nyidro ngöne hë la nyidro a qatre trootro?

¹¹ Ame la ketre jole hna cile kow hnene la itre kuku ka tru hë ngöne la angatre a troa metrötrëne la itre keme me thine i angatre ka qatre hë, ke, eje e ngöne la aqane imelekeu i angatre ekö ngöne lo angatre a co. Maine hnene laka, ka calogitre me pë ihnimine la keme i epun, nge ame thine i epun, ke, ka imusinë eahlo, nge ka iwathöthölë. Ma tro pala kö epuni a nanazije me lapa fë elëhni, maine troa akötre pena, pine laka, thaa celë kö la aqane ujëne ene la itre keme me thine hnei epuni hna treqen. Hapeu, ijije kö tro epuni a trije la itre mekune celë?a

¹² Kola qaja hnei Basö, ketre atr ka mele e Fëlaad, ka hape: “Ame la hnaluene kemenge ke, ka hane nyidrë ekö sine lo itre polisi Alema, ene lo itre SS. Ka canga elëhni catre nyidrë, nge thupene lai nyidrë a iakötrë. Hnei nyidrë pala hi hna lepi nenë qëmeke i eni. Ngöne la ketre ijine kola elëhni hnei nyidrë, hnei nyidrë hna senge la beletre i nyidrë me lepe la iluemekenge hnene la faon. Nge hnene laka catrehnine pala ha la aqane lepi ni hnei nyidrë, matre kei ju hi ni hune la ibetr.”

¹³ Ngo hetre ketre ewekë ka mama ngöne la pengö i nyidrë. Kola qaja hmaca hnei Basö, ka hape: “Ngo ame ngöne la ketre götrane ke, ka huliwa catre nyidrë, nge thaa ka kötrene kö nyidrë la hnëqa i nyidrë, ene la troa thupëne la fami. Thaa hane ju fe kö ni kapa qa thei nyidrë, lo ihnimi hna troa hamëne hnei keme koi kuku, ngo eni pe a lapa fë lo itre akötre i nyidrë ekö. Ngöne la nyidrë a co, hna kötretriji nyidrë hnei thine i nyidrë. Hnei nyidrë hna tru trootro memine la pi isi, celë hi matre hane jë fe hi nyidrë lö hnine la isi nge nekötrahmanyi petre kö. Ijije hi tro ni a trotrohnine la itre ewekë cili, celë hi matre thaa eni kö a upe catrëne la zöne koi nyidrë. Ame hë la nyidrë a qatre trootro, eni a xatua nyidrëti ju uti hë la paatre la hna mano i nyidrë. Thaa ka hmaloi kö la mele cili, ngo hnenge hna kuca la ka ijije koi ni. Hnenge hna tupathe troa amamane ka hape, ketre kuku ka lolo ni, uti pala ha la pune la mele i kaka, nge eni a mekune laka, ame e kuhu hni nyidrë, hna xomi ni ceitune memine la sipu nekö i nyidrë.”

14. Nemene la xötre hna troa xötrethenge ngöne la nöjei aqane mele asë, nge ngöne fe la troa thupëne la itre keme me thine ka qatre trootro hë?

¹⁴ Ngöne la itre aqane mele ne la fami, a tune mina fe la itre xaa jole ju kö, nyipi ewekë troa trongëne la eamo i Tusi Hmitrötr, hna hape: “Qa ngöne lai, xetëne ju nyipunie la ihnimi ka tru, me utipin, me thina ka loi, me hni ka ipië, me thina ka menyik, me xomi hni ahoeany, tui ange hna iëne hnei Akötesie ange ka hmitöte me hnimina; loi e ixomi hninekeune me inuekeune nyipunie, maine hete gele i kete ate koi kete; hna nue nyipunie hnei Keriso, kete tro nyipunie a tun.”​—Kolose 3:12, 13.

KA AJA IXATUA FE LA ITRE KA ITHUPË

15. Pine nemene matre ewekë ka hace e itre xaa ijin, la troa thupëne la itre keme me thin?

¹⁵ Ketre huliwa ka tru catre la troa thupëne la keme me thine ka kucakuca, ngöne laka, nyimutre la itre jol, me itre hnëqa, nge ketre tru fe la itre hawa hna troa xome thatraqai angatr. Ngo ame la ewekë ka tru ejolene ke, ene la itre aliene la hni. Ketre hace atraqatre la troa goeëne la kola uti trootro la mele ne la itre keme me thine i epun, ngöne la egöcatr, memine la mekun, memine la atreine troa ketre mel. Hna qaja hnei Sandy, föe ne Puerto Riko, ka hape: “Sisitria catre nenë ngöne la mele ne la fami.” Nge atraqatre pi hë la hace hun, ngöne la eahuni a thupë eahlo. Hnei eahlo hna pane nyiqaane pej; thupene lai, eahlo a huja tö, nge kola xome ju koi eahlo la ketre nyine tro, uti hë la kola uku eahlo hune ikatr, ke, thatreine hnyawa ha eahlo tro. Ame hë ngöne la itre drai thupen, kolo ha ngazo catre la pengö i eahlo, uti hë la meci eahlo. Hna tithi eahlo hnene la ketre kaser ka lapane la hne ijun, nge loi pala hi troa lapa ezi eahlo​—lai me jidr. Hnei eahuni hna sië eahlo, me ithua i eahlo, me e tusi koi eahlo. Eje hi laka, ketre ewekë ka jole catr​—nge ka ajolëne la itre hni hun. Ame ngöne la eni a atre hnyawa laka, itre hnepe hawa pe hi matre meci pi hë nenë, e cili, eni a latresi me treij, pine laka, atraqatre catre la ihniminge koi nenë.”

16, 17. Nemene la eamo ka ijije troa xatuane la ka ithupë, troa tuluthe la aqane troa waiewekë?

¹⁶ Nemene la nyine tro epuni a kuca, maine epuni fe a hane melëne la ewekë cili? Tro epuni a kapa la ketre ixatua ka tru, qa ngöne la hna drei Iehova jëne la Tusi Hmitrötr, memine fe la troa ithahnata koi nyidrë jëne la thith. (Filipi 4:6, 7) Ketre, nyipi ewekë la tro epuni wange hnyawa la aqane xeni epun, nge loi e troa meköle hnyawa. Maine hnei epuni hna kuca tune lai, tro hë epuni a egöcatr, ngöne la mekun me ngöne fe la ngönetrei, matre troa thupëne la atr hnei epuni hna hnim. Ma loi fe e tro epuni a pane vakaas. Nge maine thaa ijije kö, ngo loi e troa hetrenyi la wangatrehmekun, me thele ijine troa pane mano. Qa ngöne lai, maine epuni a mekune troa pane ananyine la keme maine thine i epuni ka kucakuca, loi e tro epuni a wange matre tro pë hë la ketre a ce lapa me nyidro.

¹⁷ Qa ngöne laka, angatre a hnehengazone menune pala ha la itre nyine troa kuca, ene pe triane hmaca pi pena ha la tulu ne ithupë. Ngo the hace kö pine la itre ewekë hnei epuni hna thatreine kuca. Ngöne la itre xaa ijin, nyipi ewekë tro epuni amë la atr hnei epuni hna hnim ngöne la ketre uma hna kuca thatraqai angatr. Maine epuni la ketre ka ithupë, hnëkëne jë la itre ewekë hmekune la itre hnei epuni hna atreine troa kuca. Ketre, thaa tro kö a nyipiewekëne hmekuje la itre aja ne la itre keme me thin, ngo loi e troa wangatrune fe la itre nekö i epun, me föe hmunë, memine fe la sipu mele i epun.

THAA QA THE SË KÖ LA MEN

18, 19. Nemene la ixatua hna thingehnaeane hë hnei Iehova, nge nemene la ewekë hna melëne hë ka amamane laka, Nyidrë a aejëne lai?

¹⁸ Jëne la Wesiula i Nyidrë, ene la Tusi Hmitrötr, Iehova a hamëne ngöne la ihnimi la itre eamo ka sisitria nyine troa xatuane la ketre atr, troa thupëne la itre keme me thine ka qatre trootro, ngo eje hi laka, thaa ixatua hmekuje kö la hna hamën. Qa thene la uati hmitrötre la mekune hna hamëne hnene la atre cinyihane la salamo, hna hape, “Eashenyi Iehova koi angat’asë angete hë nyidë  . .  Tro nyidëti a shamatine la hnei angate hna teij, me amele angat.” Tro hë Iehova a amelene me thupëne la itretre nyihlue i Nyidrëti hnyawa, qa ngöne la itre ewekë ka jole troa melën.​—Salamo 145:18, 19.

¹⁹ Hna melëne la ewekë cili hnei Merena, ketre föe ne Filipin, ngöne la angeice a thupëne la thine i angeic, ka thatreine hë troa enije, nge thaa drenge fe hë la itrei, hnene laka, hna xecie la ketre none he i eahlo. Kola cinyihane hnei Merena, ka hape, “Pëkö ketre akötre ka tune la, ene la troa goeëne la atr hnei epuni hna hnime a awe, nge thatreine hmaca kö qaja koi epuni la gaa akötr. Caasi hi, kolo pe hi a goeëne la kola uti ipië trootro la mele i eahlo, ngo pëkö ketre ewekë hna atreine troa kuca. Nyimutre la itre ijin, eni a pane sa watingöneca me hë draië koi Iehova, pine laka, pë hë caa egöcatreng. Eni a hokötre tui Davita, ngöne lo angeice a xëwe koi Iehova me sipo Nyidrë troa amë hnine la ketre ge, la itre trenge tihmidra i angeice me meku angeice hmaca. [Salamo 56:8] Nge tune la hnei Iehova hna thingehnaeane hë, hnei Nyidrëti hna hamëne koi ni la trengecatre hnenge hna ajan. ‘Mama ha koi ni laka, Iehova la juëng nge ixatua koi ni.’ ”​—Salamo 18:18.

20. Nemene la hnei Tusi Hmitrötre hna thingehnaeane nyine ixatua kowe la itre ka ithupë matre tro pala hi angatre a goeëne aloine la itre ewekë, ngacama troa meci lai atr hna troa thupën?

²⁰ Hna qaja pala hi laka, ame la troa thupëne la itre keme me thine ka qatre hë, ke, celë hi ketre “ewekë hna melëne ka pëkö pune ka loi.” Ngacama troa catre thele troa lolo la aqane ithupë, ngo eje hi laka meci pala hi la pune kowe la itre qatr, tune la thine i Merena. Ngo atre hnyawa hi la itre ka lapaune koi Iehova laka, ame la mec, ke, thaa eje kö a nyipune la hna melën. Hna qaja hnei Paulo aposetolo ka hape: “Nge ini a mejiune koi Akötesie . . . laka, tro ha mele hmaca la nöjei ka meköt, me ka tha meköti kö.” (Ite Huliwa 24:15) Tro ha akeukawane la itre atr ka meci keme me thine pine laka qatre hë, hnene la mejiune kowe la melehmaca, memine lo hna thingehnaeane hnei Akötresie, Atre troa axulune la ketre fene ka hnyipixe me ka mingöming, nge “pa hmaca kö meci” e hnin.​—Hna Amamane 21:4.

21. Nemene la itre thangane ka loi, hna troa kapa qa ngöne la hna metrötrëne la itre keme me thine ka qatre trootro?

²¹ Kola nyipiewekëne hnyawa fe hnene la itretre nyihlue i Iehova la itre keme me thine i angatr, uti fe hë la nyudrene a qatre trootro. (Ite Edomë 23:22-24) Angatre a metrötrë nyudren. Maine tro angatre a kuca tune lai, angatre hi lai a melëne la hna qaja hnei Ite Edomë, ka hape: “Tro la keme me thine i’ö a madin, nge tro nyidoti ate hnaho eö a aciacin.” (Ite Edomë 23:25) Nge hune la nöjei ewekë asë, ame la itre ka metrötrëne la itre keme me thine i angatre ka qatre hë, ke angatre fe hi lai a amadrinëne me atrunyi Iehova Akötresie.

[Ithueamacany]

NEMENE LA AQANE TRO LA ITRE TREPENE MEKÖTI CELË QA HNINE LA TUSI HMITRÖTRE A XATUANE . . .LA ITRE KUKU TROA METRÖTRËNE LA ITRE KEME ME THINE I ANGATRE KA QATRE HË?

Loi e tro së a titë kowe la itre keme thine së me itre qaqa së. ​—1 Timoteo 5:4.

Loi e tro së a kuca asë la itre huliwa së thenge la ihnim. ​—1 Korinito 16:14.

Thaa tro kö a axeciëne nyimenyimëne la itre mekun. ​—Ite Edomë 14:15.

Loi e troa metrötrëne la itre keme me thine ka qatre hë, ngacama angatre a wezipo, nge uti ipië trootro la mele i angatr. ​—Levitiko 19:32.

Thaa tro kö së elanyi a cile pala hi, kowe la mele celë, ene la troa qatre trootro me mec.​—Hna Amamane 21:4.

[Iatr ne la götran 179]

Thaa nyipi loi kö e troa xome la itre mekune thatraqane la keme maine thin, nge thaa hna pane ithuemacanyi kö