Mekene Sikisitrin
Atreine Hi Troa Mele Madrine Epine Palua La Fami i Epun
1. Nemene lo aja i Iehova göi pengö i fami?
NGÖNE la Iehova a acaasi Adamu me Eva jëne la faipoipo, hnei Adamu hna amamane e cili la madrine i angeice jëne la ketre hna cinyihane hna silinyimane ka hekö catr, qene heberu. (Genese 2:22, 23) Ngo thaa eje hmekuje kö ngöne la mekune ne la Atre ixup, la troa amadrinëne la itre nekö i Nyidrë. Ame la aja i Nyidrë ke, ene la tro la itre trefëne memine la itre fami a kuca la aja i Nyidrë. Hnei Nyidrëti hna qaja kowe la pane trefëne ka hape: “Manapi me hate, me atiqane la fene hnengödrai, me xom’acon’ej; nge musinëne jë la ite i e kuhu hnagejë, me ite öni ka sheshë e caha nyipin, me ite öni asë ka wewë e celë fen.” (Genese 1:28) drei la etrune me eloine la huliwa celë! Nge drei kö la madrine i Adamu me Eva memine la itre nekö i Nyidro thupen, maine hnei nyidroti ju hna kuca la aja i Iehova, me drenge thenge Nyidrëti hnyawa!
2, 3. Nemene la aqane tro la itre fami a madrine enehila?
2 Ame enehila, ketre atraqatre catre fe la madrine ne la itre fami ngöne la angatre a ce nyihlue i Iehova. Hna cinyihane hnei Paulo aposetolo, ka hape: “Loi la thina tune la thina i Akötesie, ka hete thangane ngöne la nöjei ewekë asëjëihë, hete hna thingehnaeane thatraqane la mele enehila, memine la mele epin.” (1 Timoteo 4:8) Troa manathithi fe ngöne la “mele enehila” la fami ka mele thenge la aja i Iehova, me ka xötrethenge la itre trepene meköti Nyidrë e hnine la Tusi Hmitrötr. (Salamo 1:1-3; 119:105; 2 Timoteo 3:16) Ketre maine troa caasi hi la atrene la fami ka xötrethenge la itre trepene meköt i Iehova, tro ha lolo fe la mele ne la lapa; loi ju kö lai hune la pëkö ka trongën.
3 Nyimutre la itre trepene meköti ne la Tusi Hmitrötre hna ithahnatane hnene la itusi celë, jëne troa öhnyi manathithi hnene la itre fami. Ma ase hë epuni wangatrehmekune laka, nyimutre ngöne la itre trepene meköti cili, ka anyimua mama e hnine la itus. Pine nemen? Pine laka, itre trenge nyipici ka men, nyine loi thatraqane la nöjei atr ngöne la itre götrane ka kösau ne la mele ne la fami. Troa öhne hnene la fami ka catre trongëne la itre trepene meköti celë qa hnine la Tusi Hmitrötr, laka, nyipici, ame la troa mele thenge la aja i Akötresie ke, ‘hete hna thingehnaeane thatraqane la mele enhila.’ Tro sa ce wange hmaca la foa, qa ngöne la itre trepene meköti cili ka nyipi ewekë catre thatraqane la mele së.
ENYIPIEWEKËNE LA TROA XOMEHNÖTH
4. Pine nemene matre emelene la faipoipo la troa xomehnöth?
4 Hna qaja hnei Solomona joxu ka hape: “Lapa hna kenithe nge pëkö thithë la ate ka tha xome hnöthe la hni angeice kö.” (Ite Edomë 25:28; 29:11) Ame la troa ‘xome hnöthe la hni angeice kö,’ ene la troa xomihni, ke jëne mele hi lai kowe la itre trefëne ka ajane troa mele madrine ngöne la faipoipo. Maine thaa hna thele kö troa lepe trije la itre thiina ka ngazo, tune la elëhni memine la ajane troa kuci ngazo, tro ha hetre ethane itre eje kowe la mel, nge thaa ewekë ka hmaloi kö elanyi e troa canga apaatren — ene ju kö e atrein.
5. Tuneka la aqane tro la ketre atr ka ngazo a atreine xomehnöth, nge nemene la itre thangane hna kapa qa ngön?
5 Eje hi laka, pëkö matra i Adamu ka atreine troa ea mekötine hnyawa la ngönetrei i angeice ka ngazo. (Roma 7:21, 22) Ketre, ame la troa xome hnöth, ke celë hi ketre wene ne la ua. (Galatia 5:22, 23) Qa ngöne lai, maine hne së hna sipone jëne la thithi la thiina celë, me trongëne la eamo ka ijij, e hnine la Tusi Hmitrötr, nge maine hne së fe hna easenyine pala hi la itre atr ka melëne la thiina cili, me ananyine la itre ka methinëne ej, haawe, tro hë la ua i Akötresie a xatua së troa hetrenyi la xomehnöth. (Salamo 119:100, 101, 130; Ite Edomë 13:20; 1 Peteru 4:7) Ketre, jëne ixatua fe lai koi së, matre tro së a “kötene la kuci ngazo,” ngacama troa tupathi së. (1 Korinito 6:18) Tro hë së a lepe trije la ajane troa isi, me neëne maine ngaane la pi iji menu la ka haitr. Nge tro hë së a atreine cile kowe la itre jole ka tru, me xomihnine la itre atr ka ijeletrengehni. Epi tro asë hi së—itre nekönatre fe—a inine troa eënyine la thiina ne iamele celë, wene ne la ua.—Salamo 119:1, 2.
AQANE WANGE KA LOLO GÖI MUS
6. (a) Nemene la hna acile hnei Akötresie, göi mus? (b) Nemene la nyine tro la trahmanyi a mekun, maine götraneqa i angeice troa hamë madrine kowe la fami?
6 Ame la hnaluene trepene meköti ka tru, ke, ene la troa metrötrëne la ka mus. Hnei Paulo hna qeje pengöne la aqane ameköti ewekë, öni nyidrë ka hape: “Ngo ajange tro nyipunie a ate laka, Keriso la he ne la nöjei trahmany; nge trahmanyi la he i fö; nge Akötesieti la he i Keriso.” (1 Korinito 11:3) Kolo la a hape, trahmanyi la he ne la fami, föe a troa ixatua angeice hnyawa, nge haa nekönatre a troa drengethenge la itre keme me thine i angatr. (Efeso 5:22-25, 28-33; 6:1-4) Mekune hyawa ju, laka, troa hetrenyi la manathith, e hna xötrethenge la aqane amekötine celë göi mus. Atre hi la itre trahmanyi ka mele thenge la aja i Iehova, laka, ame la troa he ne la fami, ke thaa ene kö la troa imusinë. Angatre a troa nyitipu Iesu, lo he i angatr. Ngacama hna ami Iesu troa “he ne la nöjei ewekë asë,” ngo thaa hnei nyidrëti kö hna “traqa troa hete hlue i nyidë, ngo tro pe a hlue.” (Efeso 1:22; Mataio 20:28) Ceitune hi lai memine la keresiano trahmany, thaa tro kö angeice a musi me meku angeice hmekuj, ngo loi pe tro angeice a thele loi thatraqane la föe me itre nekö i angeic.—1 Korinito 13:4, 5.
7. Nemene la itre trepene meköti ka troa xatuane la föe troa kuca la hnëqa qa thei Akötresie?
7 Ketre tune mina fe, ame la föe ka mele thenge la aja i Iehova, thaa tro kö nyidro a ithepe hnëqa, maine thele troa musinëne la fö i nyidro. Atraqatre la madrine i nyidro troa sajuëne la trahmany, me ce huliwa me nyidrë. Hna hane fe qeje föe hnei Tusi Hmitrötr, kösë nyidro la “ewekë” ne la trahmany, kola mama e cili laka, nyidrë la he i nyidro. (Genese 20:3) Qa ngöne la isisinyikeu ne la faipoipo, hna othi nyidroti hë hnene la “wathebo kowe la fö’i nyido.” (Roma 7:2) Ketre mina fe, Tusi Hmitrötre a hane hë nyidro kösë, ketre “ixatua ka ijij.” (Genese 2:20) Hetrenyi thei nyidro la itre thiina me itre atreine ka paatre kö thene la trahmany, nge kola hamë nyidrë fe hnei nyidro la itre ixatua hna ajan. (Ite Edomë 31:10-31) Kola qaja fe hnei Tusi Hmitrötre ka hape, ame la föe ke, ketre “trefëne” ka ce huliwa pala hi memine la fö i nyidro. (Malaki 2:14) Kola xatuane la trahmanyi me föe hnene la itre trepene meköti ne la Tusi Hmitrötr, troa iwangatrunyi ngöne la kola isa kuca la itre hnëqa, me imetrötrekeu, nge thaa tro kö a iwangacony.
“LOI E TROA CANGA DENG”
8, 9. Qaja jë la itre xaa trepene meköt, nyine xatuane asë la fami, troa ifekeune hnyawa la itre mekun.
8 Hna amexeje catrëne pala hi ngöne la itusi celë, la enyipiewekëne la troa ifekeune la itre mekun. Pine nemen? Pine laka, troa tro loi la itre ewekë, maine tro la itre atr a ithahnata, nge angatre fe a drenge hnyawa la itre xan. Hna anyimua qaja catrëne pala hi laka, ame la troa ifekeune la itre mekun, ke thaa ene kö la troa ithahnata caas, ngo troa hane drenge fe la itre mekune qa thei ketre. Celë fe mekune lai hna qaja hnei Iakobo, ketre atre dreng, öni angeic: “Loi e tro la nöjei at asë a canga deng, me hnöthe troa ewekë, me hmitre troa elëhni.”—Iakobo 1:19.
9 Nyipi ewekë catre tro së a thupëne la aqane tro së a ithahnata. Pëkö troa hetre thangane ka loi la hna ifekeune la itre mekun, e hna ujë cememine la elëhni, me iwesitrë, maine catrehnine nge akötre pena la itre trenge ewekë hna qaja. (Ite Edomë 15:1; 21:9; 29:11, 20) Ngacama meköti la ewekë hne së hna qaja, ngo maine hna fe amamane hnene la hni ka calogitr, me pi draië, maine pë pena kö hni ne ihnim, kösë lo kola iakötrë lai, nge pëkö pune ka loi. Loi e tro la aqane ithahnata së, a hnyapa kösë hna “aloine hnei alase.” (Kolose 4:6) Loi e troa ceitu la itre trenge ewekë së memine la “ite waucathingene gole hnine la ite tenge sileva.” (Ite Edomë 25:11) Ame la itre fami ka ifekeune hnyawa la itre mekun, ke angatre hi lai a kuca la ketre huliwa ka tru, jëne manathithi koi angatr.
SIPU ALIENE LA IHNIM
10. Nemene la ihnimi ka sisitria ngöne la faipoipo?
10 Ketre hnaewekë la “ihnim,” a hna anyimua qaja hnine la itusi celë. Hapeu, mekune hi epuni lo pengöne ihnimi hna pane qaja? Nyipici laka, nyipi ewekë fe la ihnimi tune la lue ka iaja (qene Heleni, eʹros) ngöne la mele ne trefën, nge ngöne fe la itre faipoipo ka mele madrin, kola mama laka, kola kökötre la ihnimi trejine (qene Heleni, phi·liʹa). Ngo ame kö lo ihnimi ka sisitria catr, ke ene lo hnaewekë qene Heleni hna hape a·gaʹpe. Celë hi aqane tro së a hnimi Iehova, me Iesu, memine la itre ka lapa easenyi së. (Mataio 22:37-39) Nge celë fe ihnimi lai, hna amamane hnei Iehova kowe la nöjei atr asë. (Ioane 3:16) Drei kö la elolone e tro së a amamane la ihnimi ka tune lai, kowe la föe së, me kowe fe la itre nekö së!—1 Ioane 4:19.
11. Tuneka la aqane tro la ihnimi a hamëne la loi kowe la faipoipo?
11 Eje hi laka, ketre “otrene ka nyipi loi” la ihnimi ka tru celë, ngöne la faipoipo. (Kolose 3:14) Eje a isilekeune hnyawa la lue trefën, me hamë nyidro la ajane troa ikucakeune la loi, nge kowe fe la itre nekö i nyidro. Ngöne la kola cile hnene la itre fami kowe la itre jole ka tru, atreine hi tro la ihnimi a xatua angatre troa caasi me ce kuca la itre ewekë. Tro la ihnimi a xatuane la lue trefëne ka qatre trootro, tro pala hi nyidroti a ce huliwa, me iwangatruny. “Ihnim . . . thaa ate thele ewekë i nyëne kö. . . . Ate juetëne la nöjei ewekë asë, ate kapa la nöjei ewekë asë, ate mejiune la nöjei ewekë asë, ate xomi hnine la nöjei ewekë asë. Tha tro kö a ase la ihnim.”—1 Korinito 13:4-8.
12. Pine nemene matre kola catre la faipoipo, ngöne la lue trefëne a amamane la ihnimi nyidro koi Akötresie?
12 Troa cile catre la faipoipo, e hna acatrene ej, a thaa hnene hmekuje kö la ihnimikeu ne la lue trefën, ngo hnene pe la ihnimi nyidroti koi Iehova. (Ate Cainöj 4:9-12) Pine nemen? Hna cinyihane hnei Ioane aposetolo, ka hape: “Ke dei lola aja koi Akötesie, laka eësha denge thenge la ite wathebo i nyidë.” (1 Ioane 5:3) Qa ngöne lai, loi e tro la lue trefëne a hiane la itre nekö i nyidro thenge la aja i Akötresie, a thaa hnene caasi kö laka, atraqatre la ihnimi nyidro kowe la itre nekö i nyidro, ngo ngöne laka, hnëqa i angatre lai qa thei Iehova. (Deuteronomi 6:6, 7) Ketre, thaa tro hmekuje kö nyidro a kötrene la kuci ngazo, pine la ihnimekeu ka eje thei nyidro, ngo hnene laka, atraqatre la ihnimi nyidro koi Iehova, Atre troa “ahnëjinë angete nyi xetë me angete kuci ngazo.” (Heberu 13:4) Maine tro la ketre trefëne a axulune la itre jole ka tru e hnine la faipoipo, tro la ihnimi ne la ketre koi Iehova a upe la ketre, troa xötrethenge pala hi la itre trepene meköti ne la Tusi Hmitrötr. Drei la madrinene la itre fami, e troa acatrene la aqane ihnimikeu i angatr, hnene la ihnimi angatre koi Iehova!
FAMI KA KUCA LA AJA I AKÖTRESIE
13. Maine hne së hna catre kuca pala hi la aja i Akötresie, nemene hë la ixatua hne së isa ala caasi hna troa kapa, matre troa waiemekötine hnyawa la itre nyipi ewekë thatraqane la mel?
13 Ame la troa kuca la aja i Akötresie, ke celë hi ewekë lai ka tru aliene ngöne la nöjei götrane la mele ne la keresiano. (Salamo 143:10) Celë hi sipu aliene la trenge ewekë hna hape, kola catre mele thenge la aja i Akötresie. Maine tro la itre fami a kuca la aja i Akötresie, jëne tro lai a xatua angatre troa lapa goeëne la itre ewekë ka sisitria catr. (Filipi 1:9, 10) Hanawange la ketre ceitun, hnei Iesu hna ithuemacanyi ka hape: “Ke traqa ha ni troa iananyine la kuku memine la keme i angeic, me jajinyi memine la thine i angeic, me tesine memine la tesi angeic. Ame la nöjei ithupëjia memine la at, te, it’eje kö ngöne la hnalapa i angeice kö.” (Mataio 10:35, 36) Tune la hna ithuemacanyi hnei Iesu, nyimutre catre la itretre drei i nyidrë hna axösisine hnene kö la itre atrene la fami i angatr. Ka hace catre la ewekë celë, memine la iakötrë ka eje ngön! Ngo thupëne hnyawa kö, thaa tro kö la itre aqane imelekeu ne la itre atrene la fami a ananazijëne la ihnimi së koi Iehova Akötresie me koi Iesu Keriso. (Mataio 10:37-39) Maine tro la ketre atr a atreine xomihni ngöne la kola icilekeu hnene la fami, ijije hi troa ujëne la mekunene la itre ka icilekeu, hnene laka tro angatre a öhne la itre thangane ka loi, qa ngöne la hna mele thenge la aja i Akötresie. (1 Korinito 7:12-16; 1 Peteru 3:1, 2) Nge maine thaa hna traqa kö kowe la pune cili, ngo thaa loi kö e troa thuejëne la icilekeu troa ahmacanyi së troa nyihlue i Akötresie.
14. Nemene la aqane tro la ajane troa nyihlue i Akötresie, a xatuane la itre keme thin, troa thele nyine loi kowe la itre nekö i angatr?
14 Maine tro la itre keme me thine a kuca la aja i Akötresie, celë hi ka troa xatua angatre lai troa atreine axeciëne hnyawa la itre mekune ka loi thatraqane la mele i angatr. Hanawange la ketre ceitun, ngöne la itre xaa nöj, hna majemine goeëne la itre nekönatre hnene la itre keme me thin, kösë ketre trengamo, nge angatre a mejiune kowe la itre nekönatr, troa thupë angatre elanyi e qatre hë angatr. Pine laka, meköti kowe la itre kuku ngöne la angatre a tru, troa thupëne la itre keme me thine i angatre ka qatre hë, thaa nyipi ewekë kö tro la itre keme me thine a ukune la itre nekö i angatre troa nyinyape thele la itre mo ne fen. Thaa angatre kö lai a hamëne la itre ixatua ka lolo kowe la itre nekönatr, e tro angatre a uku nyudrene troa hnime la itre mo ne fen, hune la itre ewekë ne ua.—1 Timoteo 6:9.
15. Tuneka la pengö i Eunika, thine i Timoteo, a ketre tulu ka loi ne trefëne ka kuca la aja i Akötresie?
15 Hetrenyi la ketre ceitune ka lolo ngöne la götrane cili, hna hamëne hnei Eunika, thine i Timoteo, lo thöth, enehmu i Paulo. (2 Timoteo 1:5) Ngacama ame la trahmanyi nyidro, ke thaa ka ce hmi kö me nyidro, ngo hetre thangane catre pi hë la aqane ihetru i nyidro me Lois qaqa i Timoteo, ngöne laka, kola iupi troa catre mele thenge la aja i Iehova. (2 Timoteo 3:14, 15) Ngöne hë la kola thupëtresiji trootro hnei Timoteo, kolo ha nue angeice pi hnei Eunika troa tro qa ngöne la hnalapa, me xome la huliwa ne cainöjëne la baselaia, matre mesinare sine tronge i Paulo. (Ite Huliwa 16:1-5) Nge drei kö la etrune la madrine i eahlo, ngöne la eahlo a öhnyi Timoteo, a ketre mesinare ka hlemu hë ngöne la nöj! Ame laka catre jë angeice mele thenge la aja i Akötresie ngöne la angeice a tru, ke, thangane hi la hna canga ini angeic, nge co petre kö angeic. Eje hi laka, ngacama paatre kö Timoteo ngöne la hnalapa, ngo elitrauje la madrine i Eunika e troa drenge la itre ithuemacanyi ngöne la aqane nyipici i Timoteo kowe la huliwa ne cainöj.—Filipi 2:19, 20.
FAMI ME MELE I EPUNI ELANY
16. Tuneka la aqane amamane Iesu ka hape, nyidrëti la ketre kuku ka metrötr, ngo nemene kö la pane aja i nyidrë?
16 Hna hia Iesu hnine la ketre fami ka hmi, nge ngöne la nyidrë a thupëtresij, hnei nyidrë hna amamane laka, ketre neköne nyidrë ka hnimi thin. (Luka 2:51, 52; Ioane 19:26) Ngo eje hi laka, ame la pane aja i Iesu, ke, ene la troa aeatrëne la aja i Akötresie, ketre, hna jëne nyidrë, kola troa fe gojenyine la itre atr, matre tro angatre a hane mele madrine epine palua. Celë hi hnei nyidrë hna kuca, ngöne laka, hnei nyidrë hna hamëne la mele i nyidrë ka pë ethan, nyine thupene mele thatraqane la itre atr ka ngazo.—Mareko 10:45; Ioane 5:28, 29.
17. Nemene la itre hna thingehnaeane ka tru, hna aijijëne hnei Iesu kowe la itre ka kuca la aja i Akötresie?
17 Thupene la hna meci hnei Iesu, hnei Iehova hna adraië nyidrë hna hamë nyidrë la mele e koho hnengödrai, nge hna hamë nyidrë fe la ketre musi ka tru, nge hna acili nyidrë matre joxu ne la Baselaia ne hnengödrai. (Mataio 28:18; Roma 14:9; Hna Amamane 11:15) Hna aijijëne hnene la thupene mele i Iesu, troa iëne la itre xaa atr matre troa ce musi me nyidrë hune la Baselaia cili. Ketre kolo fe a hane fe la gojenyi kowe la itre atr ka hni ka meköt, matre tro angatre a kapa la mele ka pë ethane ngöne la ihnadro hna troa ahnyipixene matre paradraiso. (Hna Amamane 5:9, 10; 14:1, 4; 21:3-5; 22:1-4) Ame la ketre hnëqa ka tru hne së hna kapa enehila, ke, ene la troa qaja la etrune la maca ka loi celë kowe la itre ka lapa easenyi easë.—Mataio 24:14.
18. Nemene la nyine amekunën, me ixatua hna hamëne kowe la itre fami, me koi së isa ala caas?
18 Tune lo hna amamane hë hnei Paulo aposetolo, ame la troa catre nyihlue i Akötresie, ke, kolo hi lai a acatrene la hna thingehnaean, ene laka, ijije hi tro la itre atr a hetrenyi la itre manathith, ngöne la mele “ka troa traqa.” Nyipici, celë hi gojenyi ka sisitria lai, nge jëne troa kepe manathith! Mekune hnyawa ju, “kola pate la fene hnengödrai, memine la hna aja kow; ngo troa cile huti epine palua la ate kuca la aja i Akötesie.” (1 Ioane 2:17) Qa ngöne lai, ngacama nekönatre maine ketre keme me thine epun, trahmanyi maine föe, maine ketre atr ka thaa faipoipo trene kuku maine ka pë pena, catre jë troa kuca la aja i Akötresie. Maine catrehnine la itre itupathi ka traqa koi epun, maine epuni a cile pena kowe la itre jole ka tru, thaa tro pi kö epuni a thëthëhmine laka, epuni la ketre atr nyihluene la Akötresie ka mel. Haawe, epi tro la itre huliwa i epuni a amadrinë Iehova. (Ite Edomë 27:11) Nge epi tro fe la aqane ujë i epuni a hamë manathithi koi epuni enehila, me mele ka thaa ase palua kö ngöne la fene ka hnyipixe ka troa traqa!
NEMENE LA AQANE TRO LA ITRE TREPENE MEKÖTI CELË QA HNINE LA TUSI HMITRÖTRE A XATUANE . . .LA FAMI I EPUNI TROA MADRIN?
Atreine hi troa hetrenyi la xomehnöth.—Galatia 5:22, 23.
Loi e tro la trahmanyi me föe a thele loi thatraqane la fami, cememine la aqane musi ka lolo.—Efeso 5:22-25, 28-33; 6:4.
Ame la troa ifekeune la itre mekun, ke ene fe la troa hane dreng.—Iakobo 1:19.
Troa catrecatre la faipoipo, e hna hnimi Iehova hnyawa.—1 Ioane 5:3.
Loi e troa ketre aja ka sisitria a nyipi ewekë catre kowe la fami, ene la troa kuca la aja i Akötresie.—Salamo 143:10;1 Timoteo 4:8.
[Hna eköhagen götran 188]
AHNAHNA FE LA TROA THAA FAIPOIPO
Thaa ka faipoipo asë kö la itre atr. Nge ame koi itre trefën, thaa ajane asë kö angatre troa hnaho. Nekö trahmanyi Iesu, nge hnei nyidrë hna qaja la thaa faipoipo kösë ketre ahnahna, e hna huliwane “thatraqane la baselaia ne hnengödrai.” (Mataio 19:11, 12) Thaa hnei Paulo aposetolo kö hna mekune hmaca troa faipoipo. Hnei nyidrë hna qaja la itre ka thaa faipoipo me itre ka faipoipo, kösë lue ‘ahnahna’ asë hi. (1 Korinito 7:7, 8, 25-28) Qa ngöne lai, maine nyipici laka, tru la hna ithahnatane hnene la itusi celë la itre mekune hna troa kuca hnine la faipoipo, me göi aqane troa hetrune la itre nekönatr, thaa tro pi kö së a thëthëhmine la itre manathithi ka tru hna troa kapa, memine la itre thangane ka loi qa ngöne la hna thaa faipoipo, maine hna faipoipo pena ngo pëkö nekönatr.