Hëne Jë Fe La Itre Ka Pi Ij

¹ Tune la hna thingehnaeane hë hnei perofeta Amosa, enehila kola akötre la itre atr pine la “[jinë pë nyine ij, a thaa timi kö NW], ngo jinë wesi ula i Iehova.” (Amosa 8:​11) Maine easë a ajane troa xatuane la itre atr ka pi iji ngöne la götrane la ua, haawe, loi e tro së a hane thuemacanyi angatre la itre hna hnëkëne hnei Akötresie thatraqane la itre atr ka drenge thenge; jëne la itre hna amekötine cili, tro ha xome trije qa thei angatre la ngazo memine la mec; drei la aqane qeje pengöne ngöne la pune la mekene la tusi Hna Amaman, kola hape, kösë “hneopegejë timi ne mel.” Hnëqa së la troa hane tro fë fe la ithuemacanyi kowe la nöjei atr ka pi ij, nge ka thele la meköt; ene la troa hë angatre nge hape ju, “xome gufane jë la timi ka mel.” (Hna ama. 22:​1, 17) Tune ka la aqane tro së a ihë ngöne la treu celë, treu febuare? Tro sa tro fë la itusi La Révélation: le grand dénouement est proche! kowe la itre atr ka hni ka menyik, nge ka ajane troa hane kapa la itus. Atreine hi tro epuni a xome la itre aqane nyiqaane ithahnata celë:

Itre Hna Amekötiin

◼ Itre itusi nyine troa tro fë e treu febuare: La Révélation: le grand dénouement est proche! koi 400 F. Maac: Atrehmekune Ka Eatrongë Nyipunie Kowe La Mele Ka Pë Pun, koi 150 F. Thele jë troa nyiqaane etidi memine la itre atr. Eipereme Me Mei: Troa trofë La Tour de Garde me Révéillez-vous! nge troa abone La Tour de Garde koi 1000 F (caa macatre) maine 500 F (sikisi lao treu).

◼ Tro la seketere memine la atre thupëne la huliwa ne cainöje a ce wange la huliwa ne la itre pionie lapa. Maine jole koi itre xane troa eatrëne la itre hawa, ke, loi e tro la itre qatre thupe a hamë ixatua koi angatr. Ce wange ju la itre mekune hnine la itre tusi sasaiatri (S-201) ne 1 Okotropa 1993, me 1 Okotropa 1992. Ketre, wange ju fe la itre paragarafe 12-​20 ne la Huliwa ne Baselaia ne treu Semitrepa 1986, ene lo sinecetrone ej.

◼ Maine kola ajane hnene la itre ekalesia memine la itretre cainöj, troa cinyanyi koi sasaiatri, haawe, loi e tro angatre xome la aderesi ngöne poste ka hnyipixe, ene la B.P. 1741, 98810 Mont Dore. Kola sipone matre, thaa tro hmaca kö a xome lo aderesi hnapan, lo B.P. 787 Nouméa. Maine hetrenyi thei epuni la itre trengene tus, hna cinyihane hun la aderesi hnapane cili, haawe, loi e troa trije itre ej. Ketre, nyipi ewekë troa cinyihane pala hi la aderesi së hutröne la trengene tus.

◼ Itre kaset ka hnyipixe hna xötrei kapa:

Why Respect Theocratic Arrangements? (Daram, ngöne caa kaset)​—Qene Papale

◼ Itre kaset video hna xötrei kapa:

La fermeté des Témoins de Jéhovah face à la persécution nazie​—Qene Faras

◼ Troa nyiqaane xome ngöne la itre Ini Tusi ne la ekalesia qene drehu la itus, Atrehmekune Ka Troa Eatrongë Nyipunie Kowe La Mele Ka Pë Pun, qaane e drai 4 mei 1998 me wiike cili.

“Iehova La Atre Xatua Ni”

¹ Ame ngöne lo Iesu a upe la itre pane drei nyidrë troa cainöj, hnei nyidrëti hna qaja ka hape: “Hana wang, ini a upi nyipunie tune la nöjei mamoe nyipine la ite luko.” (Mat. 10:16) Hapeu, hna axouenyi angatre hnene la ewekë cili, maine shewe angatre pena troa cainöj? Ohe. Hnei angatre hna xötrethenge la aqane ujë hna qeje pengöne hnei Paulo aposetolo, ngöne la nyidrëti a qaja kowe la sine cetro i nyidrë keresiano, ka hape: “Ateine shë troa qaja catëne ka hape: ‘[Iehova NW] la ate xatua ni, tha tro kö ni a xou; nemene la hna troa kuca koi ni hnei ate?’ ” (Heb. 13:⁠6) Angatre a madrin, pine laka, hna akotrë angatre me ahmahmanyi angatr, pine la atesiwa i Iesu, nge thaa mano kö angatre o drai troa ini, me cainöjëne la maca ka loi.​—⁠Ite Huliwa 5:​41, 42.

² Ame enehila, easenyi catre hë matre nyipune pi hë la huliwa ne cainöje ngöne la fene hnengödrai asë. Kola eatre hnyawa lo hnei Iesu hna thingehnaeane hë ka hape, troa methinë së hnene la nöjei nöje asë. (Mat. 24:⁠9) Itre atr a icilekeu me hnyima fë la huliwa së, nge ame ngöne la itre xaa götrane ne la fen, hna wathebone ej. Maine thaa catre kö la lapaune së, haawe, tro ha hetrenyi the së la xou. Ngo maine tro sa mekune hnyawa pala hi laka, Iehova la Ate xatua së, eje hi laka, tro ha akeukawane la itre hni së, me hetrenyi the së la trenge catre troa kuca pala hi la huliwa së.

³ Ame la atr ka catr, ke, pëkö hnei angeice hna xouen, hetre trenge catre i angeic, nge kola cile kowe la itre jol. Thaa ceitu i angeice kö memine la atr ka xou, me ka meij, nge ka kötrene la itre jol. Nyipi ewekë pala hi kowe la itretre drei Iesu, troa catre xomihnine la itre jol. Loi e tro së a catr, me hmekëne wanga ananazijë së pi hnene la itre thiina, me itre aqane ujë ne la fen, ka icilekeu me Akötresie. Drei la ketre ithuecatre ka tru koi së, ngöne la easë a mekune la tulu ka sisitria hnei Iesu hna hamën, nyidrë atre apone la fen! (Ioane 16:33) Loi e mekune fe së lo aqane cile la itre aposetolo kowe la itre itupathi ka tru ngöne la ngönetrei, öni angatre ka hape: “Ijiji huni troa denge thenge Akötesie hune la at.”​—⁠Ite Huliwa 5:⁠29.

⁴ Thaa Itre Atr Ka Cilehnö Kö Së: Loi e tro sa thele troa wangaloine pala hi la aqane tro së a huliwa. (Heb. 10:39) Tro pala hi së a mekune hnyawa laka, hna upi së hnei Iehova, kösë nyine hatrene hi la ihnimi me utipine i Nyidrëti kowe la nöjei atr asë. Thaa hane kö së öhne la Nyidrëti a upe la itre hlue i Nyidrë, troa kuca la ketre ewekë ka troa gufa. Ame asë hi la itre huliwa hna upi së troa kuca, ke, nyine loi asë hi kowe la itre atr ka hni koi Akötresie.​—⁠Rom. 8:⁠28.

⁵ Troa xatua së hnene la aqane wai ewekë ka loi, troa thele ngöne la teritoare së la itre atr ka hetre hni ne mamoe. Easë a öhne laka, pëkö ajane la itre atr troa drei së, ke tru la hleuhleu thei angatr, nge pëkö mejiun. Loi e upi së hnene la ihnim, troa hetrenyi la utipin, memine la atreine xomihnine ahoean. Ame la hne së hna ajane ngöne la nöjei ijine easë a amë la ketre itus, maine ngöne la easë a öhne laka, hetre hni ne ajane la atr troa drei së, ke ene la troa canga iwai hmaca, me akökötrene la ajane la itre atr. Thaa tro pi kö së a mekune ka hape, thatreine kö së troa nyiqaane la ketre etid, maine tro jë pena a hetre thangane ka loi la aqane tro sa xomiujine ej. Loi e tro pe së a catre sipo Iehova jëne la thith, troa hnaiapë së, me ee së, nge easë a mejiune laka, tro hë Nyidrëti a xatua së.

⁶ Hetrenyi la mejiune the së laka, tro hë Iehova a öhne la huliwa hna kuca apexejene hnyawa. (Wange ju la Filipi 1:⁠6.) Maine hetrenyi the së la mejiune laka, tro Iehova a hamëne la trenge catre koi së, haawe, “the kucakuca kö shë ngöne la huliwa ka loi.”​—⁠Gal. 6:⁠9.