Atrunyi Iehova Jë Hnine La Icasikeu Ka Tru
1, 2. Nemene la hna aijijë së hnene la kovasio ne distrik, nge nemene la itre aqane tro sa aejëne lai?
1 Ngöne la nöjei macatre kola aijijë së hnene la Itre Kovasio Ne Distrik troa atrunyi Iehova. Ame the së, tre troa kovasio e Tas e 26-28 Ogas, thupene lai Kaledonia e 16-18 Semitrepa me 23-25, nge troa nyipun hnei Walis e 1-2 Okotropa. Caasi hi la mekuna së me Davita, lo nyidrë a nyima ka hape: “Tro ni a ole koi cilie nyipine la icasikeu atraqat ; tro ni a atrunyi cilie nyipine la nöje ka ala nyimu.” (Sal. 35:18) Ngöne la kola easenyi la Kovasio Ne Distrik “Loi e Troa Drengethenge Akötresie,” tune kaa la aqane troa xecie koi së laka, easë a troa caas matre troa ce atrunyi Iehova?
2 Troa mama hnene la aqane ujë së. Hna qaja hnene la ketre atr ka cilën la ketre hnë kovasio ka hape: “Hne huni hna qeje epuni kowe la itre xaa hmi ka ajan troa hane hnen la icasikeu i angatr e celë; ka loi tro angatr hane traqa me goeën la elolon la aqane eköthe la Itretre Anyipici Iehova la kovasio i angatr.” Ijije tro së isa ala caas a atrunyi Akötresie hnene la aqane heetre së me isej, me aqane idrei së, me aqane ujë së.—1 Pet. 2:12.
3, 4. Tune kaa la aqane tro la qahmihmi a xatua së troa heetr tune la itre hlue Keresiano, ngöne la itre ijine kovasio?
3 Aqane Heetre Së Me Isej: Nyipi ewekë tro sa qahmihmi, matre tro sa atrunyi Iehova hnene la aqane heetre së me isej. (1 Tim. 2:9) Kola qaja hnene la itus École du ministère, götrane 132, ka hape: “Ame la atr ka qahmihmi tre, thaa angeice kö a athixötrën la itre xan me pi mama.” Ngöne la itre nöj ka nyimutre, majemine la itre atr troa heetr angazony. Ngo Iehova a wanga atrun la aqane catre së troa anyipici Nyidrëti hnyawa. (Ite hu. 15:14) Ngacama hna hnen la kovasio ngöne la ketre hnë kuci elo maine ngöne ketre iuma pena ne kuci madrin, ngo ame la traqa itronyi së, tre, ceitun me ketre “icasikeu ataqat,” ene la köni drai ne kovasio. Haawe, loi e tro sa heetre hnyawa ngöne la easa cengöne cile qëmeke i Iehova, ke, Nyidrëti la ka draië catr e cailo fen me e koho hnengödrai.—1 A. l. ite jo. 29:11.
4 Nyipi ewekë fe tro sa thupëne la aqane heetre së me iseji së thupene la itre icasikeu ne kovasio. Tro pala hi së a thupën matre ame la easë a tro troa ngenu maine koi itre hnë xeni pena, loi e tro pala hi la aqane heetre së me iseji së a ihmeku memine la “thiina ka ijiji Akötesie.” (1 Tim. 2:10) Thaa hnene kö laka ketre hnaheetr ka hlemu ngöne la fen, ke tro fe hë së a hane kapa. (1 Ioane 2:16, 17) Kola amamane hnene la itre itusi së itre Keresiano la itre ceitun, la elolone la aqane heetr ne la itre trahmanyi me föe ngöne la nöjei götran ne la mel. Maine tro sa athipe pala hi la badge së ngöne la itre hne së hna tro, eje hi lai laka tro pala pë hë a amekunë së laka itre hlue Keresiano së ngöne la nöjei drai.—2 Kor. 6:3, 4.
5, 6. Tro sa metrötrëne tune kaa la treipele i Iehova ngöne la ua?
5 Loi e Tro Sa Metrötrën La Treipele i Iehova: Hnene la Joxu Ka Pucatin’ Asë hna hnëkën koi së la ketre pui ne xen. (Is. 25:6; 1 Kor. 10:21) Maine tro sa wanga atrune la treipele i Iehova ngöne la ua, tro hë së a thel troa sine asë lai köni drai ne kovasio. Hane kö epuni hnëkë göi uma, me loto, me canga sipo ijine mano thei maseta? Ijije kö la traeme hna hnëkëne göi gojeny, matre troa canga traqa troa thele göhnë ngöne la hna kovasio me porotrik, me ce nyima me thithi memine la itre trejin?—Sal. 147:1.
6 Tro la metrötre së kowe la lalau i Iehova a upi së troa drenge hnyawa la porogaram me hnöthe troa porotrike menu memine la itre xan, me xen, maine troa cile agö. Jëne la hlue ka nyipici me ka inamacan, Iehova a hamën la xeni ne la ua ka nyipi ewekë koi së enehila. (Mat. 24:45) Thaa tro pi sa trian la ketre götran ne la porogaram. Loi e troa ce lapa hnene la itre kem me thin memine la itre nekö i angatr me ixatua troa kepe thangane hnyawa la icasikeu.—Deu. 31:12.
7. Nemene la hna amekötine tro sa kuca göi xeni hnaipajö, nge pine nemen?
7 Hna sipone lo koi së troa xeni ngöne la hna kovasio maine troa xometrongëne pena, matre thaa tro kö a tro troa xomi xen e trön la hnë kovasio ngöne lo ijine mano e hnaipajö. Lolo catr la aqane xötrethenge hnyawa la hna amekötine cili, hnene la itre trejin ka traqa troa kovasio lo macatre hnapan. Ketre troa madrine catre fe hne së, e hna kuca tune lai ngöne la macatre celë! (Heb. 13:17) Kola aijijë së hnene la hna amekötine cili tro sa pane porotrik me ithuecatrekeu memine la itre trejine me easë, me eköthe la caas me tingeting, lue ewekë ka atrunyi Iehova.—Sal. 133:1.
8, 9. Nemene la ketre ewekë ka aijijë së troa atrunyi Iehova?
8 Troa Cainöj Ngöne La Nöjei Ijin: Nyimutre la itre ijine tro sa atrunyi Iehova hnene la itre ukeineqë së, maine ngöne la easë a tro troa kovasio maine ngöne la easa bëek. (Heb. 13:15) Thele jë së la itre aqane tro sa cainöj, ngöne la nöjei götran easë a tro kow. Tiqa la itre mekun me itre hni së hnene la itre trenga mo ne la ua hna kapa ngöne la hna kovasio. Loi e tro sa ce thawa la itre ewekë ka loi cili memine la itre atr hne së hna iöhnyi me ngöne la nöjei ijin.—1 Pet. 3:15.
9 Easë a treqene hnyawa lai ijine troa atrunyi Iehova “ngöne la ite icasikeu.” (Sal. 26:12) Loi e tro sa caas me ce atrunyi Iehova ngöne la ijine Kovasio Ne Distrik “Loi e Troa Drengethenge Akötresie.”
[Hna eköhagen götran 4]
Nyine Amekunë Së Göi Kovasio Ne Distrik
◼ Traem Ne Icasikeu: Troa nyiqaane la porogaram e 9 h 30, ngöne la köni drai. Troa fe la itre qëhnelö e 8 h e hmakany. Itre hnepe menetr qëmekene troa nyiqaan la icasikeu, tro la perezida a nyiqaane lapa nge kola elone lo miuzik ne la Baselaia. Loi e tro asë hi së a ilapany, ene pe easa metrötrën la kola nyiqaan la icasikeu. Troa fenesi la icasikeu e 5 h 05 e heji ngöne lo lue pane drai, ame pë hë lo hnaakönin tre, 4 h 10 e hej la hawa ne nyipun.
◼ Hna Acili Loto: Ame ngöne la nöjei hnë kovasio, hna thupëne hnyawa pala hi la itre loto ngöne la itre hnë acile itre ej, nge hetrenyi la itre göhnë thatraqane la itre ka pane traqa. Troa acile ngöne la itre göhnë hna hnëkëne hë thatraqane la itre sine atr. Ene hmekuje lo itre trene pepa nge hna aijijën troa cile e cili. Pine laka thaa tru kö e itre xaa ijin la hnë acili loto, loi e troa nyialiene hnyawa la itre loto, ngo thaa ala caasi kö maine luetre e caa loto.
◼ Göi Göhnë Hnine Iuma Ne Drai: Tro hmekuje hi a ami göhnene la itre ka ce tro me easë hnine la loto ka caas, maine ka ce mele pena me easë.
◼ Itre Ahnahna: Tru catr la manie hna xom matre nyi jiane la kovasio ne distrik. Ijije hi tro sa amamane la madrine së troa hane hamë ahnahna thatraqane la huliwa e cailo fen, hnine la Uma Ne Baselaia maine ngöne la hna kovasio. Maine kola hamë chèque, loi e troa sija la hna hape “A.S.T.J.”
◼ Xeni Hnaipajö: Ka lolo catr troa xeni la itre göxeni hna hnëkën ngöne la hnë kovasio maine troa traqa fë pena, hune la troa tro trije la hnë drai troa xomi xen ngöne la ijine mano e hnaipajö. Ijije troa amë la ketre neköi ka lepany fene la icea. Thaa hna nue kö troa traqa fë ngöne la hnë asabele la itre glasiere ka tru, me itre ver, me kahaitr.
◼ Ikaho: Thaa tro kö a saan la itre ikaho maine ketre ewekë pena ngöne la tirisite me ikaho ne la iuma ne kovasio, nge thaa tro kö a ajölën la itre atren la icasikeu hnene la itre ewekë cili.
◼ Mobilis: Troa thinge itre ej.
◼ Itre Eatr Me Itre Sine Mec: Kola eetr la itre ka cilën la hnëqa hna hape Pane Ixatua, hnene laka, kola hë angatr troa wang la itre jole ka pëkö pengön. Maine kola traqa la ketre ewekë ngöne la ijine kovasio, canga wange ju lai ketre trene hnëqa easenyi së matre tro angeic a hëne nyimenyimën lo Pane Ixatua troa wai së. Tro pë hë la itre trejin atrekë hnëqane lai, a wange la nyine troa kuca. Maine ijij, tro pë hë a thuemacane lo numero i pital göi itre eatre ka tru.
◼ Göi Itre Atren La Icasikeu: Itre keme me thin, thaa tro pi kö a nue menune la itre nekö i epun, ngo loi e troa thupë angatre hnyawa, nge loi e troa xecie koi epuni laka nyudren a ujë thenge la aja i Akötresie.—Ite edomë 29:15.