Hnëqa Ka Sisitria La Troa Cainöjën La Baselaia

¹ Itre milio la itre atr ka kepe thangane o drai la aqane hame i Iehova. (Mat. 5⁠:45) Ngo ala xalaithe hi la itre ka olene kowe la Atre Ixup, jëne la huliwa ka sisitria, ene la troa cainöjën la maca ka loi ne Baselaia i Akötresie. (Mat. 24⁠:14) Tune kaa la aqane wanga atrune epuni la huliwa ka sisitria cili?

² Jëne la huliwa ne cainöj, kola atrunyi Akötresie me hamë mejiun me tingeting kowe la itre atr hna akötrën enehila hneijine së. (Heb. 13⁠:15) Ame koi itre ka dreng la maca, tre kösë mele ka epine palua la hnei angatr hna mejiune kow. (Ioane 17⁠:⁠3) Nemene la ewekë maine huliwa ka hamë manathith ka tune lai? Hnei Paulo aposetolo hna amamane la hni ne ajane i nyidrëti troa cainöj, nge kola mama ngöne la aqane xome nyidrëti la huliwa cili. Hnei nyidrëti hna xome ej ceitune me ketre trenga mo ka tru.​—Ite hu. 20⁠:​20, 21, 24; 2 Kor. 4:​1, 7.

³ Olene Jë La Hnëqa Së Ka Sisitria: Ame la ketre aqane tro sa amamane la ole së kowe la hnëqa ne cainöj, tre, ene la troa wanga atrun la elolon la huliwa së. Easë kö a catre thele troa hnëkëne la ketre aqane nyiqaane ithanata ka troa ketr la hni ne la itre ka drei së? Atreine kö së troa xome inamacanën la itre xötr ne la Tusi Hmitrötr me ithanatan memine la itre atr? Easë kö a hane kuca hnyawa la teritoar hna upi së troa cainöje ngön? Ijije kö tro sa nyiqaane etid memine la itre atr? Tune lo itre Keresiano ka mele nyipici ekö me enehila, kola uku së hnene la elolone la aqane wange së la cainöj, me aqane hnine së la hnëqa së.​—Mat. 25⁠:​14-​23.

⁴ Ame ngöne la easë a qëmeke kowe la itre jol qa ngöne laka qatre hë së, me wezipo, maine hnene la itre xaa jole pena, kola akeukawane la itre hni së troa atre laka, ka tru alamekene fe la trenge catr hne së hna kuca troa cainöj. Wesi Ula i Akötresie a qaja ka hape sisitria koi Iehova la trenge catr hne së hna kuca, ngacama thaa hna haine kö hnene la itre xan.​—Luka 21:​1-4.

⁵ Ketre jëne madrine ka tru la troa cainöj. Hna qaja hnene la ketre trejine föe ka 92 lao macatre ka hape: “Drei la madrine ka tru e tro ni a goeëne hmaca lo 80 lao macatre ne huliwa i Akötresieti ni! Maine tro hmaca ni a nyiqaan, tro hmaca hi ni a kuca lo lai huliwa cili, pine laka, ‘ka loi la ihnimi cilie hune la mel.’ ” (Sal. 63⁠:⁠3) Epi tro fe sa xome hnyawa la hnëqa së qaathei Akötresie, ene la troa cainöjën la maca ne Baselaia.

Paatr 12: Aqane Troa Eatrongëne La Itre Etid Ka Kökötr

Xatuane Jë La Itre Hnainin Troa Nyiqaane Me Xomiujine La Itre Etid

¹ Ame la kola nyiqaane cainöje trootro hnene la itre hnainin, maine jë tro angatr a nango xou troa hane nyiqaane me xomiujin la itre etid. Tro sa xatua angatre tune kaa troa hetre hni ne ajan kowe la cainöje celë ka sisitria?​—Mat. 24⁠:14; 28⁠:​19, 20.

² Nyiqaane cainöje pë hë la hnainin hna thaa bapataisone petre kö, nge nyimu hane hë angeic xomi ini qa ngöne la Ini Ne Cainöj Qaathei Akötresie. Ame la ini hnei angeic hna kapa matre troa hnëkën me cile fë la itre xötreqa, tre troa ixatua troa akökötren thei angeic la atrein ini; celë hi ka nyipi ewekë lai kowe la “ate kuci huliwa ka pë nyine ahmahman, kola thawa hnyawa la wesi ula ka nyipici.”​—2 Tim. 2:​15.

³ Inine Jë Jëne La Tulu: Hmaloi la aqane inine Iesu la itretre drei nyidrë; hna jëne la ini ka hmaloi me tulu ka lolo. Öni nyidrë: “Tro ha cei tune la nöjei ate ka inamacane memine la ate ini angat.” (Luka 6⁠:40) Nyipi ewekë fe tro epuni a xome la tulu i Iesu ngöne la epuni a cainöj. Maine troa öhnyi epuni hnene la hnainin e amamai tulu troa cainöj, tro hë angeic a trotrohnine laka troa hetre etid e hna catre iwai hmaca.

⁴ Qaja jë kowe la hnainin ka hape, ame la kola nyiqaane etid memine la ketre atr, tre thaa nyipi ewekë kö troa qaja atrune pala ha la aqane troa etid. Maine tro ju hi a amamane la aqane kuca ngöne la caas maine lue paragaraf qa hnine la itus. Troa xome la itre mekun nyine ixatua ngöne la götrane 8 me götrane 6 ne la Huliwa Ne Baselaia ne Januare 2002.

⁵ Maine ijij, hëne jë la hnainin troa ce tro me epun maine ketre trejine pena ka maca troa etid memine la itre xan. Maine jë tro angeic a hane hamë mekun ngöne la ketre paragaraf maine ketre xötre pena. Haawe, tro hë la hnainin a goeën me inine la aqane troa xomiujine hnyawa la itre etid. (Ite edomë 27⁠:17; 2 Tim. 2⁠:⁠2) Qaja aloinyi angeice jë, me ithanatan la aqane tro angeic a kökötre ngöne la götrane cili.

⁶ Maine tro sa inine la itre ka xötrei cainöj troa itretre inin la Wesi Ula i Akötresie, tro hë angatr a atrein kuca la “huliwa ka loi,” ene la troa nyiqaan me isa xomiujin la itre etid. (2 Tim. 3⁠:17) Drei la madrine ka tru e tro sa ce huliwa me angatr, troa catre hnim me könën la itre atr ka hape: “Ame la ate ajan, xome gufane jë la timi ka mel”!​—Hna ama. 22⁠:17.