Aqane Troa Nyiqaane La Itre Etid Ngöne La Itre Uma Trootro Me Jëne Telefon

1, 2. Tro sa tune kaa matre troa eköth la ketre porogaram ne etid nyine troa xatuan la itre atr ka tru jolen?

¹ Tru la jole ne la itre atr enehila. Ngo nyimutre pala kö la itre ka ajan la itre ewekë ngöne la ua. Tro sa xatua angatr tune kaa troa aejëne lai aja cili? (Mat. 5⁠:⁠3) Nyimu trejin ka etid me angatr ngöne la qene qëhnelö maine jëne telefon. Ijije epuni kö troa hane catre cainöj tune lai?

² Maine easë a ajan troa etid memine la itre atr, nyipi ewekë troa atreine nyiqaan la ketre etid ngöne la ijine ka ijij. Tune kaa, nge ekaa la hnë tro sa eatrëne lai?

3. Pine nemen matre loi e troa etid ngöne la kola xötrei iöhny, nge troa kuca tune kaa?

³ Ngöne La Qene Qëhnelö: Ame la easë a iöhnyi memine la ketre atr ka ajan troa ithanata Tusi Hmitrötr, fe ju hi kowe la ketre paragaraf hne së hna hnëkëne hë, tune lo pane paragaraf ne la ini 1 ne la boroshür Thele, nge nyiqaane jë. E jë la paragaraf, me goeën la hnying, me ithanatan la caas maine lue xötr. Ame itre xaa ijin, ijije hi troa kuca tune lai ngöne la qene qëhnelö, faifi koi treen lao menetr. Maine kola madrin hnene la atr troa porotrik, isa pui ju matre troa sisedrën hnene la caas maine lue xaa paragaraf ngöne la ketre ijin.​—Hetrenyi la itre mekune nyine ixatua ngöne la aqane troa nyiqaane mekötin la itre etid, ngöne la Huliwa Ne Baselaia ne Januare 2002, g. 6.

4. Ame la easë a iwai hmaca, tro sa nyiqaane etid tune kaa ngöne la qene qëhnelö?

⁴ Ngöne la kola iwai hmaca, ijije hi troa xom la ketre aqane nyiqaane etid ka tune lai. Drei la ketre ceitun, xome jë la boroshür Thele, me amamane hnyawa la ëje i Akötresie, jëne la ini 2, par. 1-2. Ithanatane jë ngöne la kola iwai hmaca la hna qaja hnei Tusi Hmitrötr gön la itre thiina i Akötresie ngöne itre par. 3-4. Sisedrëne jë hnene la itre par. 5-6 me iatr götrane 5, matre amamane la aqane tro la etid a ixatua troa atre Iehova. Atreine hi troa kuca asë lai ngöne la qene qëhnelö.

5, 6. (a) Pine nemene matre pi tro kö itre xaa atr troa etid jëne telefon? (b) Nemene la aqana nyiqane ithanata hne së hna xom matre troa etid jëne telefon?

⁵ Jëne Telefon: Ame itre xaa atr, ma aja i angatre kö troa etid jëne telefon, hune la troa iqëmekekeu. Drei la ketre ceitun: Ame la kola cainöje trootro hnene la ketre trejine föe, iöhnyi pe hi eahlo memine la ketre jajiny ka hnaho hë nge tru catr hnei jole i eahlo. Thaa öhne hmaca kö hnene la trejine lai föe matre kola telefone jë. Hna qaja hnene la jajinyi ka hape pë pala hi ijine i eahlo ekö troa ithanata Tusi Hmitrötr. Önine la trejin: “Hetre ewekë ka hnyipixe hnei epuni hna troa atre, ngacama 10 maine 15 menetr ne ithanata hi, a jëne telefone fe.” Kola sa hnei jajiny ka hape, “Ka loi, jëne telefon!” Ene pe hna etid pala pë hë jëne telefon.

⁶ Ajane kö la itre atr hnei epuni hna wang, troa etid jëne telefon? Ijije hi tro epuni a xome la aqane nyiqane ithanata cili, maine troa qaja ka hape: “Maine epuni a ajan, tro nyiso a ithanata jëne telefon. Hapeu, ka loi hi lai koi epun?” Maine tro sa thele troa ihmeku la porogaram ne etidi së memine la itre atr, atreine hi tro sa xatua angatr troa “ate Akötesie.”​—Ite edomë 2⁠:5; 1 Kor. 9:​23.

Troa Qeje Nemen Gön La Itre Zonal

La Tour de Garde 15 Ogas

“Thupene la ketre hulö, nyimutre la ka hnyingë pengöi mec. Ijije kö tro sa trotrohnine la mec? [Nue pi troa sa.] Kola qaja hnene la zonale celë la hna qaja hnei Tusi Hmitrötr göne la pengöne la ka mec, memine la hna ahnith hnei Akötresie, la troa amelene hmaca la itre ka mec hne së hna hnim.” E jë la Ioane 5⁠:​28, 29.

Réveillez-vous! 22 Ogas

“Atre fe hi epuni laka hna hëne la tourisme ka hape ketre maseta ka nyimu ka huliwa kow ngöne la fen? [Nue pi troa sa.] Hetrenyi la itre thangane ka loi me itre jol ka xulu qa ngöne laka kola elë la tourisme. Kola qaja hnene la zonal la eloin me engazon la tourisme enehila. Kola hamëne fe la itre eamo ka lolo kowe la itre ka ngenu e cailo fen.”

La Tour de Garde 1 Sem.

“Ame ngöne la fen enehila, tru la hna qeje inyipicikeu ngo thaa trongëne kö. Hapeu, ka lolo kö e troa nyimu atr pala hi ka tune la trejine hna qaja e celë? [E jë la Ite Edomë 17⁠:17. Nue pi troa sa.] Kola qaja hnene la zonale celë la itre manathith ka xulu qa ngöne la hna inyipicikeu itre enehmu me e hnine la fami.”

Réveillez-vous! 8 Sem.

“Maine jë hnei epuni hna haine la aqane cengöne caas la itre ewekë hna xup. [hamëne jë la ketre ceitun ngöne lai hna cinyihan.] Thaa hace kö së la easë a öhne la aqane catre isazikeu la itre atr? [Nue pi troa sa.] Kola qaja hnene la zonale celë la aqane tro Akötresie a axulune la tingeting me caas kowe la fen.” E jë la Isaia 11⁠:⁠9.