• Paatr 3: Aqane Troa Eatrongëne La Itre Etid Ka Kökötr
    Huliwa Ne Baselaia—2004 | Nofeba

    • Paatr 3: Aqane Troa Eatrongëne La Itre Etid Ka Kökötr

      Aqane Troa Xome Hnyawa La Itre Xötr Ne La Tusi Hmitrötr

      1. Pine nemen matre loi e tro sa ithanatane atrun la itre xötr ngöne la easë a etid memine la itre atr?

      1 Ame la kepin matre easë a etid memine la itre atr, tre matre troa “ini” angatr, me xatua angatr troa trotrohnin me kapa la itre ini ne la Wesi Ula i Akötresie me trongëne itre ej ngöne la mele i angatr. (Mat. 28⁠:​19, 20; 1 Thes. 2:​13) Qa ngöne lai, loi e troa eköthe la etid hune la itre xötr ne la Tusi Hmitrötr. Ame la hnapan, tre troa ixatua kowe la itre hnainin e hna amaman koi angatr la aqane troa xome la itre xötr hnine la sipu Tusi Hmitrötre i angatr. Tune kaa la aqane tro sa xome la itre xötr ne la Tusi Hmitrötr matre troa xatuane lai itre hnainine cili troa kökötr ngöne la götrane la ua?

      2. Tune kaa la aqane tro sa iën la itre xötr ne la Tusi Hmitrötr nyine troa e me ithanatan?

      2 Iëne Jë La Itre Xötr Nyine Troa e: Ame ngöne la easë a hnëkë, thele jë la aqane qejepengöne la mekun hnene la itre xötr hna hamën hnine lai ini hne së hna ce wang, nge iëne jë la itre hne së hna troa xom me ithanatan ngöne la ijine etid. Eje hi laka, ka loi e troa e la itre xötr ka nyitrepene hnyawa la itre ini hne së hna lapaune kow. Ame koi itre xötr ka hamë itre xaa ithuemacanyi nyine nyi xan, tre maine jë thaa nyipi ewekë kö troa hane e. Loi e troa wangatrune hnyawa la itre aja me aqane mele ne la itre hnainin, angatr isa ala caas.

      3. Nemene la thangane ka loi e troa xome la itre hnying, nge nemene la aqane troa xome itre ej?

      3 Xome Jë La Itre Hnying: Sipone jë kowe la itre hnainin troa qejepengön koi së la itre xötr, ngo thaa tro kö sa qejepengöne koi angatr. Troa xatua angeic ngöne la götrane cili, e hne së hna atreine hnyinge koi angeic. Maine thaa ka jole kö troa hamë ini ngöne la ketre xötr, maine jë tro hi së a thele la aqane troa eköth la mekune hnine lai paragaraf hnene la xötr. Ame ngöne la itre xaa götran, nyipi ewekë pena troa xome la itre hnying ka ijij matre tro kö la hnainin a ketre öhne la mekune hna ajan troa traqa kow. Maine easë a öhne laka nyipi ewekë troa pane qejepengön, loi e troa treqen e ase jë sa hnene la hnainin.

      4. Nemene la aqane troa qejepengöne la itre xötr hne së hna e?

      4 Thaa Tro Kö a Jol La Aqane Troa Hamë Ini: Ame la ka atreine pehna, tre caasi hi e itre xaa ijin la wene etë hnei angeic hna xom matre troa pehnan la ketre ewekë. Ceitune hi lai memine la ka atreine hamë ini, laka, thaa nyipi ewekë kö troa tru menu pala ha la itre hnëewekë matre troa qepengöne hnyawa la ketre mekun. Ijije hi tro angeic a hamën la ithuemacanyi ka hmaloi troa trotrohnin, thaa ka jole kö nge ka meköt. Ame ngöne la itre xaa ijin, tre maine jë loi e tro sa thele ithuemacanyi hnine la itre itusi ne la Keresiano, matre troa trotrohnine la ketre xötr me troa qejepengöne hnyawa ej. (2 Tim. 2:​15) Ngo loi e tro sa thupëne matre thaa tro kö a qejepengöne la nöjei aqane troa trotrohnine la nöjei xötr ne la etid. Xome hmekuje ju hi la ka ijij matre troa ce ithanatane lai mekun.

      5, 6. Tune kaa la aqane tro sa xatuan la itre hnainin troa trongëne la Wesi Ula i Akötresie ngöne la mele i angatr, ngo nemene la ewekë nyine tro sa neën?

      5 Loi e Troa Xomi Ini Ka Loi: Maine ijij, xatuane jë la hnainin troa goeën la aqane tro angeic a ketre xomi ini qa ngöne la itre xötr ne la Tusi Hmitrötr. Hanawang la ketre ceitun, ame ngöne la easë a xome la Heberu 10⁠:​24, 25 memine la ketre hnainin ka thaa hane sine pala kö la itre icasikeu i Keresiano, maine jë tro së a ce ithanatan la caa icasikeu me könë angeice kow. Ngo loi e tro sa neën troa upe iele angeic. Nue pi la Wesi Ula i Akötresie troa enijën la hni angeic troa kuca la itre ewekë ka amadrinë Iehova.​—Heb. 4:​12.

      6 Ame ngöne la easë a xome la hnëqa së ene la troa inine la itre atr, maine jë loi e tro sa kuca matre troa “denge thenge la lapaun” hnene la aqane xome hnyawa së me huliwane la itre xötr ne la Tusi Hmitrötr.​—Rom. 16⁠:⁠26.

  • Troa Qeje Nemen Gön La Itre Zonal
    Huliwa Ne Baselaia—2004 | Nofeba

    • Troa Qeje Nemen Gön La Itre Zonal

      La Tour de Garde 15 Nof.

      “Aja së asë hi tro sa egöcatr me mele aqeany. Ngo maine ijije hi, aja i nyipunieti kö troa hane mele epine palua? [Nue pi troa sa. Thupene lai, e jë la Ioane 17⁠:⁠3.] Kola ithanatan hnene la zonale celë la hna thingehnaean hnei Tusi Hmitrötr la mele ka thaa ase palua kö. Kolo mina fe a ce wange la pengöne la mele elany ngöne la kola troa eatre hnyawa lai hna thingehnaean.”

      Réveillez-vous! 22 Nof.

      “Ame ngöne lo 20 lao macatre ka ase hë, kökötre pi hë la aqane trotrohnin me thele nyin la mec, ene la SIDA. Ngo nyimutre pala kö la itre atr ka thatre pengöne hnyawa lai. [Amamane jë la itre mekun hna eköhagen, “Mythes sur le SIDA,” nge nue pi troa qeje mekun.] Kola qaja hnene la zonale celë la aqane troa hmekën me thupën hnene la itre keme me thin la itre nekö i angatr.” E jë la Deuteronomi 6:​6, 7.

      La Tour de Garde 1 Dis.

      “Ame la ketre ewekë ka aisapengönën la atr memine la öni, tre ene la atrein troa qaja la loi qa ngöne la ngazo. Ngazo pe nyimutre la itre atr ka kuca la itre ewekë ka ngazo. Pine nemen matre kola ujë tune lai? [Nue pi troa sa. Thupene lai, e jë la Ieremia 17⁠:9 maine Hna Amamane 12⁠:⁠9.] Kola qaja hnene la zonale celë la ewekë ka troa xatua së troa atre me troa kuca la loi.”

      Réveillez-vous! 8 Dis.

      “Thaa saze kö hnene la itre ewekë ka tru hna kuca ngöne la technologie, lo ewekë ka eje thene la atr, ene la ce sinee maine ce elo. Ngo öhne kö nyipunieti enehila cahu itre ewekë ka saze ngöne la mele së, matre jole hë enehila troa akökötrene hnyawa la aqane imelekeu së memine la ketre atr? [Nue pi troa sa. Thupene lai e jë la Ite Edomë 18⁠:24.] Kola qaja hnene la zonale celë la aqane tro sa thele me cile huti la itre nyipi sinee së.”