Nyipi Ewekë La Ixatua i Nyipunie

¹ “Oleti la nöjei hnei epuni hna kuca asë thatraqa hun. Hetre thangane ka loi koi huni la ixatua i nyipunie.” Celë hi mekune la ka amamane hnyawa la hni ne ole së kowe la aqane xatua së hnene la itre qatre thup Keresiano memine la itre drikona. Pine laka kolo pala hi a kökötre la organizasio i Akötresie, haawe, kolo mina fe a aja trejine trahmanyi ka macaj matre troa ixatua ngöne la itre ekalesia e cailo fene hnengödrai, laka 100 000 la etrun. Maine nyipunieti la ketre trahmanyi hna bapataisone hë, kola ajane mina fe tro nyipunie a hane ixatua.

² “Ajane” Jë: Tune kaa la aqane tro nyipunie a ajan la itre xaa hnëqa e hnine la ekalesia? (1 Tim. 3⁠:⁠1) Troa amamai tulu ka loi ngöne la nöjei götrane la mele i nyipunie. (1 Tim. 4:​12; Tito 2:​6-8; 1 Pet. 5⁠:⁠3) Troa catre tro fë la maca ka loi, me xatuane la itre xan troa hane cainöj. (2 Tim. 4⁠:⁠5) Troa hane drei hnangenyën me thele troa hane wangatrun la mele ne la itre xaa trejine me epun. (Rom. 12⁠:13) Troa ketre atr ka inine la Wesi Ula i Akötresie, nge ka thele troa akökötren la “hna ini angeic.” (Tito 1⁠:9; 1 Tim. 4:​13) Troa kuca hnyawa la itre hnëqa hna nue koi nyipunie hnene la itre qatre thup. (1 Tim. 3:​10) Maine epuni la ketre hene ne la fami, loi e ‘lolo la aqane musinëne aloine nyipunie la lapa i nyipunie.’​—1 Tim. 3:​4, 5, 12.

³ Maine kola ajan hnene la ketre trejine troa xome la götrane qa ne la drikona maine qatre thup pena, nyipi ewekë tro angeic a catre huliwa me hane hujën la mele i angeic. (1 Tim. 5:​17) Qa ngöne lai, ame la itre ka ajan la itre hnëqa cili, loi e tro angatr a hetrenyi la hni ka ipië me xatuan la itre xan. (Mat. 20⁠:​25-​28; Ioane 13:​3-5, 12-​17) Mekune hnyawa jë la aqane nue Timoteo la mele i angeic, nge thele jë troa xome la tulu cili. (Fil. 2:​20-​22) Tune la pengö i angeic, loi e tro mina fe la aqane ujë i nyipunie a aijijë nyipunie troa hane xome la itre xaa hnëqa hnine la ekalesia. (Ite hu. 16:​1, 2) Ame ngöne la epuni a eënyine la itre thiina ngöne la ua ka aijijë epuni troa xome la itre xaa hnëqa, me trongën la itre eamo ka akökötren la mele i epun ngöne la ua, ene pe “[tro ha] mama pi la tropane la huliwa i [epun] kowe la nöjei ate asë.”​—1 Tim. 4:​15.

⁴ Itre Keme Me Thin, Inine Jë La Itre Nekö i Nyipunie Troa Ixatua: Ijije hi troa inin hnene la itre nekönatr troa ixatua nge co petre kö nyudren. Ini nyudreni jë troa drenge hnyawa ngöne la itre ijine icasikeu, me troa cainöj, me troa amamai thiina ka loi hnine la Uma Ne Baselaia me ngöne la hna ini. Ini nyudreni jë troa madrin troa ixatua kuca la itre ewekë, tune la troa ce nyidrawane la Uma Ne Baselaia, me xatuane fe la itre qatr me kuca la itre xaa ewekë ju kö. Nue angatre pi troa hane isa öhne la madrine hne së hna troa kapa qa ngöne la hna ham. (Ite hu. 20⁠:35) Celë hi ini lai ka troa xatua angatr troa hane pionie, me itre drikona me itre qatre thup elany.

Paatr 4: Aqane Troa Eatrongëne La Itre Etid Ka Kökötr

Troa Inin La Itre Hnainin Troa Hnëkë

¹ Tro ha canga kökötr ngöne la götrane la ua la hnainin ka pane e la ini hna troa ce ithanatan, me sija la itre mekun ka sa la itre hnying, me mekune la aqane troa ketre qaja itre ej. Qa ngöne lai, e mama ha ka hape, kola ajan troa sisedrën la etid hnene la atr, ce hnëkëne ju me angeic la ini matre troa amamane la aqane troa hnëkë. Ka lolo catr e troa ce hnëkëne la ketre mekene itus maine ketre ini pena memine la itre atr hne së hna etidi kow.

² Troa Sija Me Amë La Itre Mekun Ezin: Qaja jë la aqane troa xome la itre mekun ka sa hmekune la itre hnying hna fejane hë. Amamane jë kowe la hnainin la itus hnei epuni hna sija hmekuje hi e hnin, la itre hnëewekë maine itre xötrehnëewekë. Ame ngöne la epone a ce ithanatan la itre mekun, maine jë tro angeic a thele troa xötrethenge la tulu i epun, ene la troa hane sija hnine la itusi angeic la itre mekun ka nyipi ewekë; celë hi ka troa xatua angeic troa sa hmekune pala hi la itre hnying. (Luka 6:​40) Thupene lai, sipo angeice jë troa ketre sipu qaja la itre mekun ka sa la itre hnying. Kolo lai a troa aijijë epuni troa atrehmekune hnyawa maine jë trotrohnine hnyawa hi angeic la itre mekun.

³ Ame mina fe la ketre aqane troa hnëkëne hnyawa la etid hnene la hnainin, tre, ene la troa xome hnyawa la itre xötr thaa hna fejan hnine la itus. (Ite hu. 17⁠:11) Xatua angeice jë troa atrehmekune laka, ame asë hi la itre xötr hna hamën hnine la itus, tre itre eje a isa sajuën la ketre mekun hnine la paragaraf. Amamane jë koi angeic la aqane troa cinyihan ezin la itre hnepe mekun hnine la itusi hna etidi ngön. Amamane hnyawa jë koi angeic la mekun, ene laka, Tusi Hmitrötr la trepen la itre ini hna hamën. Xatua angeice jë troa xome hnyawa la itre xötr ngöne la angeic a hamë mekun ngöne la ijine etid.

⁴ Troa Acaa Tro Goeën Me Wange Hmaca: Qëmekene tro la hnainin a nyiqane troa hnëkëne hnyawa la etidi angeic, ka loi e tro angeic a pane acaa tro goeën asë la ini hna troa ce ithanatan. Troa pane nango goeën la taan ka tru, me itre taan ka co, me itre ceitun. Qaja jë ka hape qëmekene troa nyipune la hnëkë i angeic, ma loi e tro hmaca a xome la itre hnepe menetr matre troa wange hmaca la itre mekune ka tru hna hamën ngöne la ini, maine jë troa xome la itre mekune hna eköhagen thatraqane lai. Tro hë angeic a lapa xom la ithuemacany, e hna anyimua wange tune lai la ini.

⁵ Maine tro sa inine la hnainin troa hnëkëne hnyawa la etidi angeic, tro ha xatua angeic troa hamën la itre mekune ka lolo hnine la itre icasikeu ne la ekalesia. Tro fe hë a xatua angeic troa majemine inine la Tusi Hmitrötr, ene pe tro hë angeic a kepe thangane ka loi elanyi pë hë thupene la hna afenesin la etidi angeic.