Paatr 6: Aqane Troa Eatrongëne La Itre Etid Ka Kökötr

Ngöne La Kola Amejën La Ketre Hnying Hnene La Hnainin

¹ E cile huti hë la etid ne la ketre atr, ka lolo kö e troa wangatrune trongëne la itre ini qa hnine la Tusi Hmitrötr, hune la troa sesë nyimenyim qa ngöne la ketre topik koi ketre. Kolo lai a xatuan la hnainin troa nyitrepene hnyawa la nyipi atrehmekun, nge troa kökötr ngöne la götrane la ua. (Kol. 1:​9, 10) Ame ngöne la itre xaa ijin, tro la itre hnainin a amejën ngöne la ijine etid la itre hnying ngöne la itre topik ka isapengön. Tune kaa la aqane troa sa itre ej?

² Loi e Troa Atreine Waiewekë: Ijije troa canga sa la itre hnying ka itretrengekeu memine la etid. Maine kola troa ithanatan e thupen hnine lai itus la ketre hnyinge ne la hnainin, maine jë tro hi a amamane koi angeic ka hape, eje e hnine la itus la itre mekune ka sa la hnyinge i angeic. Ngo maine hna amejën la ketre hnying ka thaa ihmeku kö memine la etidi së, maine kola mama pena ka hape, nyipi ewekë troa pane thele mekun, haawe, ka loi e troa ce wang thupene la etid maine ngöne pena la ketre ijin. Ame itre xaa trejin, tre angatr a cinyihan la hnying matre troa öhne hnyawa hnene la hnainin ka hape kola wangatrun la hnyinge i angeic, nge kola hmekën matre thaa tro kö a jea qa ngöne la etid.

³ Nyimutre la itre ini qa hnine la Tusi Hmitrötr hna ce wange nyimenyimën jëne la itre itus hne së hna xome matre troa etid memine la itre atr. Tune kaa e jole ju kowe la hnainin troa kapa la ketre ini, maine hnene laka kola fedre catr kowe la ketre ini ka thoi? Maine jë troa hetre thangane ka loi e troa wangatrune la itre xaa itus ka ithanatane hnyawa la hna qaja hnei Tusi Hmitrötr ngöne la topike cili. Maine thaa xecie hnyawa pala kö e kuhu hni ne la hnainin, nue pi la mekune cili matre troa ithanatan ngöne la ketre ijin, nge sisedrëne jë pe la etid. (Ioane 16⁠:12) Ame ngöne la kola kökötr thei angeic la atrehmekune ne la Tusi Hmitrötr, ene pe tro angeic a kökötre fe ngöne la götrane la ua, maine jë tro hë angeic a trotrohnine lo lai ini ne la Tusi Hmitrötr hna pane amë pe.

⁴ Loi e Troa Qahmihmi: Maine epuni a luelue ngöne la itre mekun ka sa la ketre hnying, thupëne kö wanga troa canga hamë mekun ka tria kö. (2 Tim. 2:​15; 1 Pet. 4:​11) Qaja jë ka hape, epuni a pane troa thele mekun, nge tro hmaca epuni a bëek troa sa lai hnying. Maine jë tro fe epuni a xome lai ijine cili troa inin la hnainin la aqane troa thele la itre mekun. Amamane trongëne jë koi angeic la aqane troa xome la itre itus nyine ixatua troa trotrohnine la Tusi Hmitrötr hna hamën hnene la organizasio i Iehova. Haawe, tro hë angeic a atrein troa ketre sa la itre sipu hnyinge i angeic.​—Ite hu. 17⁠:11.

Thaa Tro Kö a Mano Cainöje Koi Angatr

¹ Ame ngöne la easë a tro fë la maca ka loi, easë a ithanata memine la itre atr ka mel e tröne la teritoare së, maine ka qaja pena la ketre qene hlapa, memine la troa ithanata memine la itre ka qene hum. Ame la itre xaa hne së hna majemine porotrikë Tusi Hmitrötr memin, tre maine jë angatre hë a mele e tröne la teritoare së. Nemene la nyine tro sa kuca matre troa pexeje la hne së hna cainöje kowe la itre atr cili? Troa xome la pepa hna hape Veuillez suivre l’intérêt (S-43).

² Ame ngöne la itre xaa ijin, kola drenge hnyawa la maca ka loi hnene la itre atr, ngöne la easë a qaja la maca ngöne la sipu qene hlapa i angatr. (Ite hu. 22:​1, 2) Qa ngöne lai, ame ngöne la easë a iöhnyi memine la ketre atr ka qaja la ketre qene hlapa, loi e tro sa nyialien lai pepa ngacama thaa mama kö ka hape hetre ajan la atr troa kapa la maca ne Baselaia. Ngo maine hetrenyi la itre atr ka qaja la ketre qene hlapa, nge hna cainöje pala hi kow ngöne la qene hlapa i angatr, maine jë thaa nyipi ewekë kö troa nyialien la pepa; tro pe a nyialien maine kola mama la aja ka eje thei angatr.

³ Troa Nyialien La Pepa: Loi e troa xome la ëje ne la atr, me hnalapa i angeic, me numero ne telefone i angeic. Qaja ju fe la etrun la aja ka eje thei angeic, eu la ijine troa iwai, itus hna amë pe maine hna sipon, me qene hlapa hna trotrohnine hnyawa hnei angeic. Thupene la hna nyialien lai pepa, canga hamëne ju kowe la seketere ne la ekalesia, nge tro pë hë nyidrë a iupi fë kowe la ekalesia maine gurup ka ijij troa ixatua.

⁴ Troa Iupi Fë La Pepa: Maine thatre kö la seketere la ekalesia maine gurup ka troa kapa lai pepa, maine pë pena kö hune tusin, haawe, loi e tro nyidrë a telefon kowe la filial ka troa hamë ithuemacanyi ka ijij göi teritoar. Thaa nyipi ewekë kö troa thuemacan la atre thupën la nöj ngöne la kola troa iupi fë la pepa.

⁵ Ame ngöne la kola kapa hnene la ekalesia maine ketre gurup la pepa hna hape Veuillez suivre l’intérêt, loi e troa canga thel matre troa wange la atr. Ame ngöne la easë a kuca la hnëqa së, easë a mejiune laka tro Iehova a fe la itre hni ne la itre atr “hna hnëkëne kowe la mele ka tha ase palua kö.”​—Ite hu. 13⁠:48.