Paatr 7: Aqane Troa Eatrongëne La Itre Etid Ka Kökötr

Troa Thith Ngöne La Kola Etid

1. (a) Pine nemen matre meköti e troa nyiqaan me nyipune la etid hnene la thith? (b) Tune kaa la aqane tro sa nyiqaan la etid hnene la thith?

¹ Nyipi ewekë kowe la itre hnainin la manathith qaathei Iehova, maine angatr a ajan troa kökötr ngöne la götrane la ua. (1 Kor. 3⁠:⁠6) Qa ngöne lai, nyipi ewekë troa nyiqaan me nyipun la etid hnene la thith. Ijije hi tro sa kuca tune lai ngöne la easë a xejë la etid memine la ketre atr ka hmi. Ame koi itre xan, tre maine jë tro pë hë së a wangatrehmekune la ijine troa hane nyiqaane la etid hnene la thith. Maine jë tro sa xome la Salamo 25:​4, 5 me 1 Ioane 5:​14 matre troa xatuan la itre hnainin troa trotrohnine la kepin matre loi e troa thith, nge troa xome mina fe la Ioane 15⁠:16 matre troa qejepengön la enyipiewekën la troa thithi koi Iehova jëne Iesu Keriso.

2. Maine kola ce tro memine la ketre trejine föe hnene la ketre trejine trahmanyi maine ketre ka cainöj trahmany ka thaa bapataiso petre kö, drei la ka troa thith?

² Drei la ka troa thith ngöne la kola etid? Maine kola ce tro hnene la ketre trejin trahmany memine la ketre sör troa kuca la ketre etid, tro lai trejin trahmany a thith, nge maine trejine föe la ka troa xomiujine lai etid, loi e tro nyiidro a petr. (1 Kor. 11:​5, 10) Ame ngöne la ketre götran, maine kola ce tro memine la sör hnene la ketre ka cainöj trahmany thaa hna bapataisone petre kö, matre troa kuca la ketre etid, eje hi lai laka tro la sör a thith. Ame e cili, loi e tro fe eahlo a petr ngöne la eahlo a thith, tune lo eahlo a xomiujine la etid.

3. Nemene la itre nyine troa qaja ngöne la itre thith hne së hna kuca ngöne la ijine etid?

³ Nemene La Nyine Qaja Ngöne La Thith: Thaa tro kö a qea la itre thithi ngöne la ijine etid, loi pe troa hmaloi troa trotrohnine itre ej. Ketre, maine easë a thele la ixatua i Akötresieti ngöne la etid, me olene la nyipici hna inin, haawe ka meköti e tro fe a atrunyi Iehova ceitu me Qeqene la ini. (Is. 54⁠:13) Ijije fe tro sa xome la itre trenge ewekë ka amamane la hni ne ajane së troa xatuan la hnainin, memine la hni ne ole së kowe la organizasio hna xome hnei Iehova. (1 Thes. 1:​2, 3; 2:​7, 8) Ame la easë a sipone tro Iehova a amanathithi la trenge catr hna kuca hnene la hnainin troa trongën la hnei angeic hna inin, kolo fe hi lai a xatua angeic troa öhne la enyipiewekën la troa ‘kuca thenge la wesi ula.’​—Iako. 1:​22.

4. Nemene la itre manathith hna kapa qa ngöne la hna nyiqaane la etid me nyipune ej hnene la thith?

⁴ Nyimutre la itre manathith hna kapa jëne la thith hna kuca ngöne la ijine etid. Kola kapa la ixatua qaathei Akötresie. (Luka 11⁠:13) Eje a amamane hnyawa la ehmitrötren la troa inine la Wesi Ula i Akötresie. Pine laka kola dreng hnene la hnainin la itre thithi së, haawe, angeice a inine la aqane troa thith. (Luka 6:​40) Ketre, ame la itre thith hna kuca qa kuhu hni, nge elitrauje la ihnimi së koi Akötresie memine la hni ne ole së kowe la itre thiina ka sisitria i Nyidrë, tre celë hi ka troa xatuan la hnainin troa acatren la aqane imelekeu i angeic me Iehova.

Troa Qeje Nemen Gön La Itre Zonal

La Tour de Garde 15 Maac

“Kola qaja aloin hnene la itre atr e cailo fen la itre ini qaathei Iesu. [E jë la mekune hna qaja ngöne la götrane 3, paragaraf 1.] Ngo tune kaa la mekune i epun, ka hetre thangane ka loi kö la itre ini cili ngöne la hnedrai së, tune la ini hna hamën ngöne la xötre celë? [E jë la Mataio 5:​21, 22a. Thupene lai nue pi troa sa.] Kola ithanatan hnene la zonale celë la hnei Iesu hna inin, memine la aqane kepe thangane qa ngöne lai.”

Réveillez-vous! 22 Maac

“Nyimutre la itre atr ka ajan la itre wetr hnene la emingömingöne itre ej, ngo atre fe hi epuni laka ka nyipi ewekë catre itre ej kowe la itre mel hune la ihnadro? [Nue pi troa sa.] Kola ithanatan hnene la zonale celë la kepin matre nyipi ewekë koi së la itre wetr memine la ewekë ka traqa kowe itre ej enehila. Kolo mina fe a amamane la aqane tro la Atre Ixup a kuca matre thaa tro kö a paatre la itre eloine ka xulu qa ngöne la ihnadro.” E jë la Salamo 95⁠:⁠4.

La Tour de Garde 1 Eip.

“Hane kö epuni drenge lo hna qaja, ene laka ka isazikeu la hna qaja hnei Sias memine la hna qaja hnei Tusi Hmitrötr? [Nue pi troa sa.] Kola amamane hnene la zonale celë la aqane trongene la itre isazikeu ne la sias memine la hmi. Ngo eje mina fe a troa amamane hnyawa laka, ka ihmeku la itre hna qaja hnene la nyipi sias memine la Tusi Hmitrötr.” Amamane jë la götrane 6-7. Thupene lai e jë la Ate Cainöj 1⁠:⁠7.

Réveillez-vous! 8 Eip.

“Tune kaa la mekune i nyipunie, atreine kö la itre keme me thin troa xatuane la itre nekö i angatr matre troa neën la itre jol ka traqa ngöne la itre macatre ka jol ne angatr a thöth? [Nue pi troa sa. Thupene lai e jë la Isaia 48⁠:​17, 18.] Kola amamane hnene la zonale celë la aqane troa xatuane la itre keme me thin hnene la hna trongën la eamo qa hnine la Tusi Hmitrötr, matre troa lolo la aqane ifekeune angatre me itre nekö i angatre la itre mekun, me troa amë la itre ifego ka lolo thatraqai angatr.”