“Loi e Ewekë Pala Hi Nyipunie . . . Hna Aloine Hnei Alase”
1. Nemene la aliene la kola hape troa ‘aloine la trenge ewekë së hnei sootr’?
1 “Loi e ewekë pala hi nyipunie memine la ihnimi, hna aloine hnei [sootr], mate ate jë nyipunie la aqane troa isa sa kowe la nöjei ate.” (Kol. 4:6) Ame la troa aloine la aqane ithanata së hnei sootr, tre kola hape troa iëne la itre hnepe hnëewekë ka meköt, me ithanata amenyikeny, ke tro lai a pi drenge hnene la itre atr. Nyipi ewekë catre troa kuca tune lai ngöne la easa cainöje trootro.
2. Nemene la aqane kuca Iesu matre aijijë nyidrë troa cainöje kowe la föe Samaria?
2 Tulu i Iesu: Ame ngöne la Iesu a mano ezine la ketre tim, hnei nyidrëti hna sipu ithanata kowe la föe Samaria ka traqa jöe tim. Nyimu ijine ngöne la porotrik, eahlo a amejëne la imethinë ka eje thene la angetre Iudra me angetre Samaria. Hnei eahlo fe hna qaja amamane la lapaune i eahlo laka, ka fetra la angetre Samaria qaathei Iakobo, ngacama kola catre fë hnene la angetre Iudra ka hape, angetre Samaria a fetra qaathene la angetre ethen. Thaa hnei Iesu kö hna isi ithanata me eahlo, ngo hnei nyidrëti pe hna ithanata amenyikeny, nge hetre hni ne ajane la föe troa drei nyidrë. Ame la pune lai, hnei nyidrëti hna cainöje koi eahlo, ene pe hetre ixatua hnei eahlo hna kapa, memine fe la itre trahmanyi ne la nöje i eahlo.—Ioane 4:7-15, 39.
3. Tune kaa la aqane tro sa nyitipu Iesu ngöne la easa cainöje trootro?
3 Ame la easa cainöj, loi e tro sa lapa mekune la aja së nyine tro sa traqa kow, ene la troa “amamane la evangelia ne la ite ewekë ka loi.” (Rom. 10:15) Easa ajane troa ce thawa memine la atr la ketre mekune ka ketr la hni, nge ka ixatua qa hnine la Tusi Hmitrötr, ngo thaa easë kö a troa isi ithanata memine la itre ini hnei angeice hna sipu mejiune kow. Maine tria kö la aqane waiewekë i angeic, thaa nyipi ewekë kö tro sa canga amekötin. Hapeu, hetre mekune kö hnei angeice hna qaja, lo hne së hna kapa, maine pena qaja aloinyi angeice jë hnene la mekune hnei angeice hna ce thawa me easë? Maine jë, loi e tro sa xome la ketre xötre me hape, “Hane kö epuni hane mekune tune la?”
4. Nemene la nyine tro sa kuca e calogitre jë lai atr koi së?
4 Nemene la nyine troa kuca e calogitre jë lai atr koi së, maine kola mama laka, angeice hi a ajane troa isi ithanata? Loi e tro sa catre troa menyik, me lolo la thiina së, me aqane ithanata së. (2 Tim. 2:24, 25) Maine pë pi kö hni ne aja ne lai atr kowe la maca ne la Baselaia, loi e tro sa nue angeice cememine la hni ka menyik.—Mat. 7:6; 10:11-14.
5. Nemene la itre thangane ka loi hna kapa hnene la ketre söre hnene la hnei angeic hna sa menyikëne kowe la föe?
5 Itre Thangane Ka Loi: Ame ngöne la kola thele hnene la ketre söre troa cainöje kowe la ketre föe ka lapa easenyi angeic, elëhni jë hi eahlo, me wesitr me qaja la itre ithanata ka iakötrë. Hnene la söre hna sa me ithanata cememine la hni ka menyik, ka hape: “Menu hë ni, nge tru la hnenge hna utipi eapo, ke, ma thaa loi kö eapo enehila. Ngo, ma e ketre ijine jë pë hë.” Lue wiike thupene lai, kola fenafena la qëhnelö ne la söre hnene lai föe, me qeje menu koi angeic pine la aqane ujë i eahlo, nge eahlo mina fe a qaja la aja i eahlo troa drenge la hnene la söre hna ajane troa qaja koi eahlo. Hnene la emenyikene la aqane sa ne la sör, ene pe hetre thangane ka loi hna kapa qa ngön!—Ite edomë 15:1; 25:15.
6. Pine nemene matre nyipi ewekë catre koi së troa xome la itre aqane ithanata hna aloine ngöne la easa cainöje trootro?
6 Loi e tro sa catre troa aloine la aqane ithanata së ngöne la easa qaja la maca ka loi. Ngacama thaa pi drei së kö hnene lai atr, maine jë tro hë angeice a drenge pena ngöne la kola kuca hmaca e ketre ijine la hnalapa i angeic hnene la itre xaa Anyipici Iehova.