Ketre Tusi Qaathei Lapa Ne Xomi Meköt

Itretre Ce Anyipici Iehova Me Huni Fe:

Drei la ketre manathithi ka eje the së, ene la troa xom la ëje i Iehova, lo Atre Xupe la ihnadro memine la hnengödrai! Ketre ëje lai ka epine palua, nge ka cile hut, nge ka pëkö san ej. Iehova hi la ka nue së troa xome la ëje i Nyidrë. Hna nyiqaane hë së hnene la ëje cili ngöne lo macatre 1931. (Is. 43:10) Ketre madrine ka tru koi së troa hë së hnene la ëje hna hape, Itretre Anyipicine i Iehova.

Thaa mano kö Diabolo thele la itre aqane troa apaatrene la ëje i Akötresie. Ketre, ame la fen hna musinëne hnei angeic, tre, ketre fene lai ka methinëne la ëje i Iehova. Nge ame Babulona Atraqatr, ene lo itre hmi ka thoi ka musi e cailo fen, tre, ka xele eje ma wange la ëje i Akötresie, nge hnene ej hna köletrij la ëje i Akötresie qa hnine la itre Tusi Hmitrötr hna ujëne ngöne la itre xaa qene hlapa. Ngo ame kö Iesu, tre, hnei nyidrëti pala hi hna atrune la ëje ne la Tretretro i nyidrë; celë hi ëje, hnei nyidrëti hna qaja panëne ngöne lo tulu ne thithi hnei nyidrëti hna hamëne kowe la itretre drei nyidrë. Öni nyidrëti ka hape: “Thithi ju nyipunieti tune la, ka hape, Tetetro i anganyihunieti e kohoti hnengödrai, jiniati e hmitöte la atesiwa i enëtilai.’ ” (Mat. 6:9) Ame pë hë e thupen, nyidrëti a thithi kowe la Tretretro i nyidrëti, ka hape: “Ase hë ni amamane la atesiwa i cilie kowe la nöjei ate hnei cilieti hna nunuë nie qa la fen.” (Ioane 17:6) Xecie hnyawa ha e kuhu itre hni së enehila troa catre cainöjën e cailo fen la ëje i Iehova, pine laka, tulu i Iesu la hne së hna ajane troa xötrethenge.

Hnene la topik ne lo macatre 2009 hna hape, “anyipicine [jë] la maca ka loi,” hna ithuecatre koi së troa catre xom la huliwa ne cainöj. (Ite hu. 20:24) Thaa luelue kö së laka, hnei Iehova hna amanathithine la trenge catre hne së hna kuca ngöne la huliwa ne cainöj, ngöne lo macatre ka ase hë. Ketre huliwa ne anyipicin ka tru la hna eatrën e cailo fen, nge celë hi huliwa lai ka atrune la ëje i Iehova. Ala 7 313 173 lao atr ka cainöj, me inine la nyipici kowe la itre ka hni ka menyik, nge ka thele la itre aqane tro angatr a nyi nyine la itre jole hnei angatr hna cile kow ngöne la nöjei drai. Kola e la 18 168 323 la etrune la itre atr ka sine lo Drai Ne Amekunëne la meci Iesu; kola mama laka, itre milio pala kö la etrune la itre atr ka ajane troa hane ahlemune la ëje i Iehova, qëmekene troa apaatrene la fene celë ka ngazo.

Iehova pala kö a nue së troa catre cainöjëne la maca ka loi ne la Baselaia uti hë la drai hna sa hnei Nyidrë, nge kola aijijë së troa huliwane la nöjei aqane troa ketr la itre atr ne la teritoare së. (Mat. 24:14; Mar. 13:10) Ngöne la hna cainöje ngöne itre hnalapa trootro me e cahu gojeny, maine cainöje ngöne la nöjei ijin, maine hna cinyanyi pena, loi e tro pala hi sa catre kuca la hne së hna atrein matre troa tro fë la ëje i Iehova, me qaja trongëne la aja i Nyidrëti kowe la ka ala nyim.

Nyimutre la itre kepine ka upi së troa mekune, ka hape, thaa hmitre kö tro Iehova a awiëne la ëje i Nyidrë. (Eze. 36:23) Calemi catre hë la ijine troa ahumune la qe ne la itre ka qaja angazone la ëje i Akötresie. Drei la ketre drai ka tru elanyi kowe la itre hlue i Iehova ka mele nyipici, ene lo itre ka ahlemune la ëje i Iehova me sajuëne la musi cile i Nyidrë!

Hna mama hnyawa ngöne lo macatre 2009, ngöne la fen asë, la aqane hnimi së hnei Iehova jëne la itre Asabele Ne Distrik me Asabele e cailo fen, laka, ame la taan, tre, hna hape, “Hmeke Jë!” Ka sisitria catre la itre asabele celë ngöne la aqane trongene la hmi së; kola upi së troa atrehmekune la enyipiewekëne troa hmeke hnyawa pala hi me treqene la drai Iehova.—Mareko 13:37; 1 Thes. 5:1, 2, 4.

Nyipici laka lolo la aqane ujë i Iehova koi së; Nyidrëti a nyi aliene la itre hni së hnei madrin. Nyidrëti a ameköle së ngöne la hnënge haö ka cia loi, me ee së ngöne la itre tim ka tha enij.—Sal. 23:1, 2; 100:2, 5.

Epi xecie hnyawa e kuhu hni epuni laka, tro pala hi Iehova a amanathithi epuni ngöne la itre treu ka troa xulu, treu ne epuni a catre huliwa i Iehova!

Epi kapa hnei nyipunie la hatrene la ihnimi hun,

Itre trejine me nyipunie,

Lapa Ne Xomi Meköt Ne La Itretre Anyipicine i Iehova