Mekene Truu
Atrunyi Iehova Jë Nyipi Akötresie Ka Caas
1. Drei la nyipi Akötresie ka caas?
KOLA qaja hnei Tusi Hmitrötr ka hape, ngacama nyimutre la itre hna xome ceitun me itre haze, ngo “the shë la Akötesie ka casi, la Tetetro.” (1 Korinito 8:5, 6) Ame la “Akötesie ka cas” cili, tre Iehova, Nyidrëti lo Atre Xup la nöjei ewekë asë. (Deuteronomi 6:4; Hna Amamane 4:11) Hnei Iesu hna hë Nyidrë ka hape, “Tetetrongö, me Tetetro i nyipunieti fe.” (Ioane 20:17) Ketre hna hane qaja fe hnei Mose ekö ka hape: “Iehova la [nyipi] Akötesie ; nge pëkö kete.” (Deuteronomi 4:35) Ka draië catre kö Iehova hune la nöjei ewekë hna xome nyine troa thili kow, ene la itre idrola, maine itre atr pena hna thili kow, maine Satana lo Diabolo ka ithupëjia me Nyidrë, nge “haze ne la fen.” (2 Korinito 4:3, 4) Thaa ceitu i Nyidrëti kö memine la itre haze cili, ngo tune la aqane hë Iehova hnei Iesu, Nyidrëti hi la “nyipi Akötesieti ka cas.”—Ioane 17:3.
2. Ame ngöne la easë a atre trootro la pengö i Akötresie nemene fe la ewekë ka troa saze ngöne la aqane mele së?
2 Hetre hni ne ajan troa easenyi Akötresie hnene la itre atr, qa ngöne laka angatr a öhne la elolone la itre thiina i Akötresie, memine fe la itre hnei Nyidrëti hna kuca ha me hna troa kuca elanyi kowe la itre atr. Ngöne laka kolo pala hi a kökötr la ihnimi angatr koi Iehova, ene pe kola upi angatre fe troa atrunyi Nyidrë. Tune kaa? Ene la troa hane qeje Nyidrëti kowe la itre xaa atr. Tune la hna qaja ngöne Roma 10:10 ka hape: “Ukeineqë la ate qaja uti hë la mel.” Ame la ketre, tre, angatr a xötrethenge la tulu i Nyidrë ngöne la aqane ithanata i angatr, me ngöne la itre huliwa i angatr. Kola qaja ngöne Efeso 5:1 ka hape: “Nyi tupu Akötesieti jë nyipunie, tune la ite nekö hnimina.” Ngo eje hi lai laka, maine easë a ajan troa eatrëne hnyawa lai, nyipi ewekë troa atrepengöi Iehova hnyawa.
3. Nemene la itre thiina ka tru thei Akötresie?
3 Nyimutre la itre mekun e hnine la Tusi Hmitrötr ka amamane hnyawa la itre thiina i Akötresie ka sisitria. Foa lao thiina ka tru ka eje thei Nyidrë, ene la inamacan, meköt, men, me ihnim. ‘Thei Nyidrëti la inamacan.’ (Iobu 12:13) “Meköti asë la itre jë i nyidë.” (Deuteronomi 32:4) “Atraqate la mene i nyidrë.” (Isaia 40:26) “Akötesieti la ihnim.” (1 Ioane 4:8) Ngo nemene la ka sisitria catr ngöne lai foa lao thiina cili, a ka amamane hnyawa la pengö i Akötresie?
“Akötesieti La Ihnim”
4. Nemene la thiina i Akötresie ka nyipi ewekë catr ngöne lo Nyidrëti a xup la hnengödrai me fen memine la itre ka mele asë?
4 Tro sa ce wang la ewekë ka upi Iehova troa xup la hnengödrai memine la fen, memine fe lo itre hnei Nyidrëti hna xup ka inamacan, itre ua me itre atr. Hapeu ijije kö troa qaja ka hape, inamacan maine mene i Nyidrë? Ohea, maine nyipici laka hnei Akötresieti hna xome la lue thiina cili matre troa kuca la aja i Nyidrë, ngo ame pe thaa lue eje kö la ka upi Nyidrë troa xupe la itre ewekë. Nge thaa hnene kö laka ka meköti Nyidrë, tre, tro hë Nyidrëti a thawa la ahnahna ene la mel. Ngo hnene laka atraqatr la ihnimi Nyidrë, matre Nyidrëti a nue troa hane mele ngöne la madrin la itre xaa hna xup ka inamacan. Hnene mina fe la ihnimi hna upi Nyidrë troa eköth la mekuana i Nyidrë, ene la tro la itre atr ka idrengethenge a mele epine palua ngöne la Paradraiso. (Genese 1:28; 2:15) Ihnimi mina fe la ka upi Nyidrë troa köletrij la hnëjin, hna xeni pun hnene la itre atr qa ngöne lo hna eni wathebo hnei Adamu.
5. Thenge la Tusi Hmitrötr, nemene la thiina hna nyi atrën hnei Iehova, nge pine nemen?
5 Ngöne la nöjei thiina i Akötresieti asë, ame la ka sisitria catr, tre, ihnim. Celë hi pengö i Nyidrë, maine mele i Nyidrë. Maine nyipici laka ka nyipi ewekë la inamacan, me meköt, me men, ngo thaa hnei Tusi Hmitrötre kö hna qaja ka hape, ame la itre thiina cili tre, Nyidrëti hi. Ngo kolo pe a qaja ka hape, Nyidrëti hi la ihnim. Nyipici laka Iehova hi la ihnim. Hna eköth la ihnimi cili hnene la itre trepene meköt, ngo thaa hnene kö la itre aliene hni së. Hna nyi trepene la ihnimi Akötresie hnene la itre trepene nyipici me meköt. Celë hi pengöne ihnimi lai ka draië catr, tune la aqane amamane hnei Iehova. Ame la ihnimi celë, tre, hatrene hi la ihnimi ka pë ethan, nge kola mama lai hnene la itre huliwa hna kuca me itre wene ne la ihnimi cili.
6. Nemene la ka aijijë së troa xötrethenge la tulu i Akötresie, ngacama ka draië catre Nyidrë hui easë?
6 Jëne la thiina ka lolo cili, atreine hi tro sa xome la tulu ne la Akötresie celë. Qa ngöne laka itre atr ka ngazo së, canga mama hi la ngazo the së itre atr, maine jë tro sa mekun ka hape, thatreine jë kö tro sa xötrethenge hnyawa la tulu i Nyidrë. Ngo hana wang la ketre ceitun ngöne la etrun la ihnimi Nyidrë: Trotrohnine hi Nyidrë la itre ifego së, nge thaa Nyidrëti kö a thele the së troa pexej. Atre hi Nyidrëti laka, enehila nanyi catre së qa ngöne lo mele ka pexej. (Salamo 51:5) Celë hi kepin matre kola qaja ngöne Salamo 130:3, 4: “Ia fe Joxu, maine tro cilieti a ati hatene la ite ngazo, dei la ate troa cil ? Ngo cilieti la ate [nyipi] shenge tij.” Nyipici, Iehova la “Akötesie, ate utipine me ka ihnim, ate xomi hni ahoean, nge ka tru loi me nyipici.” (Esodo 34:6) “Ka loi Iehova, Joxu, me ate sheng.” (Salamo 86:5) Drei la ketre ithuecatr ka tru koi së itre atr ka ngazo! Keukawa e tro sa nyi hluene la Akötresie ka lolo nge kolo mina fe a mama koi së laka, ka ihnim nge Nyidrëti a senge la itre ngazo së!
7. Tune kaa la aqane amaman la ihnimi Iehova hnene la itre ewekë hnei Nyidrëti hna xup?
7 Kola mama mina fe la ihnimi Iehova jëne la itre ewekë hnei Nyidrëti hna xup. Pane mekune ju hi së la itre ewekë ka mingöming nge ka lolo hnei Iehova hna xupe nyine amadrinë së, tune la itre wetr, me itre hnaxulu, me itre hneopegejë, me itre hnagejë. Hnei Nyidrëti mina fe hna hamën la nöjei pengöne xen, thaa nyine tro hmekuje kö a ithua së ngo göi tro fe së a drem me drei ehnyapane la eisapengönen la itre göxen. Nyimutre fe la nöjei pengöne iengen ka mingöming nge ka punepune lolo hnei Iehova hna xup, ketre tune mina fe la itre öni. Ngacama thaa nyipi ewekë kö koi Nyidrë troa kuca la itre ewekë cili, ngo hnei Nyidrëti hna xupe itre ej matre nyine thue madrinen la itre atr. Nyipici laka, sine hi la loi hne së hna kapa qa ngöne la itre hnei Nyidrëti hna xup, pine laka easë pala kö a melëne la fene ka ngazo celë nge hune pala kö la ngazo the së. (Roma 8:22) Ngo ma drei jë kö elanyi lai itre hnei Nyidrëti hna troa kuca thatraqa së hnine la Paradraiso! Kola amamane hnyawa koi së hnene la atre cinyihan la Salamo ka hape: “Cilieti a shathe la iwanakoime i cilie, me amejine la ite ewekë ka mele asëjëihë.”—Salamo 145:16.
8. Nemene la tulu ne aqane ihnimi ka sisitria catr hne së hna kapa qathei Iehova?
8 Nemene la tulu ne aqane ihnimi ka sisitria catr, hna hamën hnei Iehova kowe la itre atr? Kola qeje pengöne hnene la Tusi Hmitrötr ka hape: “Hnei Akötesieti hna hnime la fene hnengödrai, matre nyidëti a hamëne la Nekö i nyidëti ka cas, mate tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.” (Ioane 3:16) Hapeu, Iehova a hnime tune lai la atr, pine la hnei angeic hna kuca la loi? Kola sa ngöne Roma 5:8 ka hape: “Akötesieti a amamane koi shë la ihnimi nyidëti, ngöne laka hna elelengë Keriso nyine hna i eëshë, nge ite ka ngazo pete kö shë.” Eje hi laka, hnei Akötresieti hna upe la Hupuna i Nyidrë ka pëkö ethan kowe la fene hnengödrai, matre troa nue la mele i nyidrë matre nyine thupene mele koi së, me itö së qa ngöne la hnëjin ne la ngazo me mec. (Mataio 20:28) Ene pe nue jëne jë hi la itre atr ka hnimi Akötresie troa kapa la mele ka thaa ase palua kö. Oleti koi Akötresieti la hna hane hnime fe la nöjei atr asë ka thele troa kuca la aja i Nyidrë, tune la hna ahnithe koi së hnene la Tusi Hmitrötr ka hape: “Tha hnei Akötesieti hna iwangate hmekunyine ite ate, ngo hna kapa hnei nyidëti la ate qoue nyidë me kuca la thina ka meköt, ngöne la nöjei nöj’ asë.”—Ite Huliwa 10:34, 35.
9. Qa ngöne laka hnei Iehova hna hamën la Hupuna i Nyidrë nyine thupene mele koi së, haawe, nemene hë la nyine tro sa thele troa kuca?
9 Hnei Iehova hna hamën la Hupuna i Nyidrë matre nyine thupene mel koi së, nge jëne tro fe së a hane hetrenyi hmaca la mele ka epine palua, haawe, matre nemene la hna acian e kuhu hni së hnene la aqane hnimi së celë hnei Iehova, matre atreine së troa xomi ujine hnyawa la mele së enehila? Loi e tro ej a akökötren la ihnimi së kowe la nyipi Akötresie, ene Iehova. Nge kolo mina fe lai a acian e kuhu itre hni së la ajan troa drei Iesu, lo qene qaja i Akötresie. “Hnei [Iesu] hna meci thatraqan’ asë, matre tha tro hmaca kö a mele koi angate kö ange ka mel, ngo loi pe koi nyidëti ate mec.” (2 Korinito 5:15) Madrin ka tru la troa xötrethenge la itre thupaca i Iesu, ke hnei nyidrëti hna amamai tulu ngöne la aqane ihnim me ihnim ipitö i Iehova! Kola mama hnyawa la hatrene lai ngöne lo hnei Iesu hna qaja kowe la itre atr ka menyike thiina kola hape: “Trohemi koi ni, nyipunieti asë ange ka huliwa me hace, nge tro ni a amanonyi nyipunie. Xomejë la nyine isilikeunge hui nyipunie me inine theng ; ke menyike ni, nge ipië la hning ; nge tro nyipunieti a öhne la hna mano thatraqane la ite u i nyipunie. Ke uqa la nyine isilikeung, nge maloe la ehnefeng.”—Mataio 11:28-30.
Amamane Jë La Ihnimi Së Kowe La Itre Xaa Atr
10. Qaja jë la itre götranen la ihnim nge aqane troa ce melën memine la itre trejine me easë Keresiano?
10 Tune kaa la aqane tro sa amaman kowe la itre trejin me easë Keresiano, ka hape, easë fe a hane hnimi angatr tune la aqane hnimi së hnei Iehova me Iesu? Hanawang la itre götran ka nyimutre nge aqane tro sa melëne la ihnimi cili: “Ihnimi la ate xome ahoeane me ka menyik ; tha ate ikucanyi kö la ihnim ; tha ate selëne kö la ihnim, nge tha ate pi tru kö, tha thina ka qali kö, tha ate thele ewekë i nyëne kö, tha ate canga elëhni kö, tha ate meku ngazo kö ; tha ate madine kö la thina ka tha meköti, ngo ate madine la nyipici ; ate juetëne la nöjei ewekë asë, ate mejiune la nöjei ewekë asë, ate xomi hnine la nöjei ewekë asë. Tha tro kö a ase la ihnim.”—1 Korinito 13:4-8; 1 Ioane 3:14-18; 4:7-12.
11. Drei la itre xaa hne së hna troa hnim, nge troa amamane tune kaa?
11 Drei fe la itre xaa hne së hna troa hnim, nge troa amamane tune kaa? Hna qaja hnei Iesu ka hape: “Qa ngöne lai, trojë nyipunie a inine la nöjei nöj’ asëjëihë, me bapataiso angate kowe la atesiwa i Tetetro, me Hupuna, me Uati Hmitöt ; ini angate jë troa trongëne la nöjei ewekë asëjëihë lo hnenge hna ahnithe koi nyipunie.” (Mataio 28:19, 20) Kolo lai a hape, loi e tro fe së a hane ce thawa la maca ka loi memine la itre atr ka thatre Iehova petre kö, ene la troa hane qaja koi angatre la fene ka hnyipixe ene lo paradraiso hna troa acil hnei Akötresie. Hnei Iesu hna amamane hnyawa ka hape, thaa tro hmekuje kö së a hnime la itre sine ce hmi me easë, ke öni nyidrë: “Maine nyipunie [hmekuje hi] a hnimi angete hnimi nyipunie, nemene la thupei nyipunie ? tha hna kuca tune lai hnei nöjei telona ? Nge maine nyipunieti a ihehe me itre tejine me nyipunie hmekuje hi, nemene la ka sisitria hnei nyipunie hna kuca ? tha hna kuca tune lai hnei itre [“atr ne la itre nöje asë,” MN ] ?”—Mataio 5:46, 47; 24:14; Galatia 6:10.
Loi e “Tro Sha Tro Ngöne La Atesiwa i Iehova”
12. Nemene la kepin matre Iehova Akötresieti hmekuje hi la hna troa hëne hnene la ëje celë?
12 Ame la ketre nyine tro sa kuca ka nyipi ewekë catr matre troa atrune la nyipi Akötresie, tre, ene la troa atre la sipu ëje i Nyidrë, Iehova, me xom troa qeje Nyidrë, me inine ej kowe la itre xaa atr. Ajan la atre cinyihan la Salamo troa qaja amamane la Atresiwa i Nyidrë kola hape: “Tro nöjei ate a ate laka cilieti la Kasisitia hmekuje hune la fene hnengödrai asëjëihë, nge Iehova la atesiwa i cilie.” (Salamo 83:18) Ame la alien la ëje i Iehova, tre kola hape “Ka Aejëne Nyidrë.” Nyidrëti la Atre Eköth la itre mekun me aejëne pala hi itre ej. Akötresieti hmekuje hi la ka ijij troa xome la ëje cili, pine laka, ame itre atr, thatre kö angatr maine jë troa ej maine thaa tro pena kö a eatr la itre mekuna i angatr. (Iakobo 4:13, 14) Iehova caasi hi la ka atreine troa qaja ka hape, troa “eatr” la trenge ewekë i Nyidrë tune la aqane ahnithe hnei Nyidrë. (Isaia 55:11) Nyimutre la itre atr ka sesëkötr ngöne la angatr a hane xötrei öhne la ëje i Akötresie e hnine la Tusi Hmitrötre i angatr, me hane atre la aliene ej. (Esodo 6:3) Ngo troa hetre thangane ka loi fe koi angatr qa ngöne la atre hmekune cili, e hnei angatr hna “tro ngöne la atesiwa i Iehova . . . epine palua.”—Mika 4:5.
13. Nemene la aliene la hna hape troa atre la atresiwa i Iehova me tro ngöne la ëje i Nyidrë?
13 Kola qaja ngöne Salamo 9:10 göne la ëje i Akötresie ka hape: “Ame angete ate la atesiwa i cilie, te, troa lapau cilie.” Thaa kolo kö a hape e atre hë së la ëje i Akötresie ene Iehova, tre, ijije hë lai troa hane qaja ka hape, easë a lapaune koi Nyidrë. Ame la troa atre la ëje i Iehova, tre ene la troa atre hnyawa la pengö i Nyidrë, me metrötrëne la musi Nyidrë, me drengethenge la itre trenge wathebo i Nyidrë, me mejiune koi Nyidrë ngöne la nöjei götrane asë. (Ite Edomë 3:5, 6) Ketre tune mina fe la troa tro ngöne la atresiwa i Iehova, kolo lai a hape, troa sa xepu koi Nyidrë, troa mama laka easë la itre hlue i Nyidrë, nge troa mele thenge la aja i Nyidrë. (Luka 10:27) Epuni kö a hane trongëne la hna qaja celë?
14. Maine nyipici laka qa së la troa huliwa i Iehova epine palua, ngo nemene fe la ketre nyine tro sa kuca?
14 Ame la tro së a nyihlue i Iehova epine palua, tre, loi e thaa hnene hmekuje kö laka kola hape hnëqa së lai. Nyimutre hë la itre macatre ne nyihlue i Iehova hnei Timoteo, ngo hnei Paulo hna ithuecatre koi angeic ka hape: “Ngo loi e majemin’ eö troa tune la thina i Akötesie.” (1 Timoteo 4:7) Ame la easë a epe catr kowe la ketre atr, tre, qa ngöne la aqane mele i angeic koi së, celë hi matre ka tru e kuhu hni së la ajan troa amaman la ole së koi angeic. Haawe ame la “thina ka ijiji Akötresie,” tre, celë hi ka upi së lai troa atrunyi Iehova me metrötrë Nyidrë. Kola amaman la etrun la ihnimi së koi Nyidrë, hnene la aqane wangatrunyi Nyidrëti hne së memine la aqane xome së la itre jë i Nyidrë. Kola upi së fe troa xatuane la nöjei atr asë matre tro angatr a hane wangatrune hnyawa la atresiwa i Akötresie. Nyipi ewekë tro sa eëne la thiina ka ijiji Akötresie ngöne la mele së, e ajane së troa qale catre koi Nyidrë, me ajan troa tro epine palua ngöne ëje i Iehova, lo nyipi Akötresie.—Salamo 37:4; 2 Peteru 3:11.
15. Tune kaa la aqane tro sa amaman ka hape, Akötresieti hmekuje hi la hne së hna nyihluen?
15 Ame la troa nyihlue i Akötresie thenge la aja i Nyidrë, tre, ene fe la troa hmi koi Nyidrë ngo thaa tro kö a lue hna hnim, pine laka Nyidrëti lo “Akötesie ka isaxolo.” (Esodo 20:5) Thatreine kö tro sa ce hnimi Akötresie memine la fene ka ngazo hna musinën hnei Satana lo haze ne la fen. (Iakobo 4:4; 1 Ioane 2:15-17) Atre hnyawa hi Iehova la pengö së isa ala caas memine la itre hne së hna ajan troa kuca. (Ieremia 17:10) Maine hetre hni ne ajane the së troa kuca la itre huliwa ka meköt, öhne hi Nyidrëti lai, nge tro hë Nyidrë a xatua së troa xomihnin ahoean la itre itupath ka traqa koi së ngöne la nöjei drai. Qa ngöne laka Nyidrëti a xatua së hnene la uati hmitrötre i Nyidrë ka catr, haawe, tro Nyidrëti a aijijë së troa hun qa ngöne la ngazo ka jilapan enehila la fene celë. (2 Korinito 4:7) Tro fe hë Nyidrëti a xatua së troa acatren hnyawa la mejiune së, ene la troa mele epine palua ngöne la paradraiso e celë fen. Drei la ketre ewekë ka sisitria elany! Loi e eje e kuhu hni së la ajan troa olen la ewekë cili, me nyihluene la Akötresie ka caas ene Iehova cememine la hni ne ajan, Nyidrëti lo ka aijijë së troa hane kapa la mele ka thaa ase palua kö.
16. Nemene la hnei nyipunieti hna ajan troa kuca, cememin la itre xaa atr, itre milio la etrun?
16 Nyimutre la itre atr itre milio la etrun e cailo fen, ka kapa madrin la ihë ne la atre cinyihan la tusi Salamo kola hape: “Ce me ini ju troa atrunyi Iehova ; nge tro sha cengöne adraiëne la atesiwa i nyidë.” (Salamo 34:3) Iehova a könë nyipunie troa hane atrunyi Nyidrë cememine lai itre atr ka ala nyim ne la nöjei nöj asë, angatre pala hi a mana catr.
Revizio
• Nemene la pengö i Iehova? Nemene la itre manathith hne së hna kapa e tro sa trotrohnine hnyawa la itre thiina i Nyidrë?
• Tune kaa la aqane tro sa xatuan la itre xaa atr troa inin la nyipici göi Akötresie?
• Nemene la aqane troa trotrohnin lo hna qaja ka hape, troa atre Iehova me tro ngöne la atresiwa i Nyidrë?
[Iatr ne la götran 14]
Hnene laka atraqatr la ihnimi Iehova matre Nyidrëti a ‘saath la iwanakoime i Nyidrë me amejine la itre ewekë ka mele asëjëihë’