Mekene Sikisitrin
Loi e “Tro Nyipunie a Ihnimikeu Cat”
1. Nemene la hna hain hnene la itre atr ka xötrei traqa troa hane sin la itre icasikeu ne la Itretre Anyipici Iehova?
AME ngöne la kola xötrei traqa hnene la itre atr troa hane sin la itre icasikeu ne la Itretre Anyipici Iehova, canga mama hi koi angatr la ihnim ka ej thene la itre atren la icasikeu nge angatr a hain. Angatr a öhne la ihnimi cili qaane la kola kepe angatr nge uti hë la aqane atreine ce mele hnyawa ne la nöjei pengön atren. Kola wangatrehmekune mina fe la ihnimi cili hnene la itre atr hne së hna könën kowe lo itre ijine kovasio së. Hnene la ketre atr ka kuci zonal hna cinyihan gön la ketre kovasio ka hape: ‘Pëkö ka kuci dorog maine ka iji goroke pena. Pëkö ka sue menu me icatrë. Pëkö ipenyi menu. Pëkö iqaqa. Pëkö ihnyiman la itre trenge ithahnata ka ngazo me qeje ka sis. Pëkö so ne sixa. Pëkö atrekënö. Pëkö ka kuië pepa menu me itre xaa ewekë ka adrone la hune ihaö. Hane petre hi la ketre icasikeu ka ketrepengöne catr.’ Celë hi itre hatrene la ihnim, ene lo ihnim ka “tha thina ka qali kö, tha ate thele ewekë i nyëne kö.”—1 Korinito 13:4-8.
2. (a) Kola tro la itre drai nge nemene la ewekë ka troa mama göne la aqane ihnimi së? (b) Nemene pengöne ihnimi la nyine tro sa eën matre troa xome la tulu i Keriso?
2 Kola wangatrehmekune la itre nyipi Keresiano qa ngöne la aqane ihnimekeu i angatr. (Ioane 13:35) Ame ngöne la easë a kökötre trootro ngöne la götrane la ua, haawe, easë mina fe a inin troa melën me amamane hnyawa la ihnim. Hna thithi fë hnei Paulo troa “cia atraqate pala kö” la ihnimi ne la itre trejine me angeic. (Filipi 1:9) Hna amamane hnei Ioane aposetolo ka hape, loi e troa mama la ihnimi së hnene la aqane huujëne së la mele së. Hnei nyidrëti hna cinyihane ka hape: “Hnene hi la hne shë hna ate hmekune la ihnim, ke hnei nyidëti hna hamëne la mele i nyidë thatraqai shë ; nge kete qâ shë troa hamëne la mele shë thatraqane la ite tejin.” (1 Ioane 3:16; Ioane 15:12, 13) Hapeu, tro fe kö së a hane nue la mele së kowe la itre trejine me easë? Eje hi laka maine jë thaa tro kö së a meci pine la ketre trejin, ngo uti hë ekaa la etrune la ixatua hne së hna troa hamën, ngacama ajolë së ju hë?
3. (a) Tune kaa la aqane tro sa amamane hnyawa la ihnimi së? (b) Pine nemen matre nyipi ewekë tro sa catre ihnimekeu enehila?
3 Nyipici maine easë a kuca la itre huliwa pine laka hna upi së hnene la aja së troa huujën la mele së, ngo nyipi ewekë tro mina fe la ihnimi trejin a eje e kuhu itre hni së. Kola xatua së hnene la Wesi Ula ka hape: “Ihnimikeune ju tune la aqane ihnimi tejin ; pi pa troa atrune la kete.” (Roma 12:10) Hetre itre atr hne së hna amamane kow la ihnimi cili. Ngo hapeu, ijije pala kö tro sa ethe atrun la ihnimi cili kowe la itre xan? Pine laka easenyi catre hë matre nyipune pi hë la fene celë, nyipi ewekë catr tro sa epe catre kowe la itre trejine me easë Keresiano. Kola qaja hnei Tusi Hmitrötr ka hape: “Easenyi hë la pune la nöjei ewekë asëjëihë. . . . Nge hune la nöjei ewekë asëjëihë la tro nyipunie a ihnimikeu cat ; ke tro ha he la ite ngazo ka nyimute hnene la ihnim.”—1 Peteru 4:7, 8.
Ngöne La Kola Traqa La Itre Jol
4. (a) Pine nemen matre fetra mina jë hi la itre jol thene la itre atren la ekalesia? (b) Maine xele kö së e itre xaa ijin ma trongën la itre eamo qa hnine la Tusi Hmitrötr, ngo nemene la thangane ka loi hne së hna troa kapa e tro sa trongëne itre ej?
4 Eje hi laka, qa ngöne laka itre atr ka ngazo së, hne së hna kuca ngöne la itre xaa ijin la itre ewekë ka akötrën la itre trejine me easë. Nge ketre nyimu ijin me aqane akötrë së mina fe hnei angatr. (1 Ioane 1:8) Nemene la nyine troa kuca maine kola traqa koi së la ewekë cili? Kola hamëne hnei Tusi Hmitrötr la itre ini nyine tro sa trongën. Ngo loi e tro sa atre hnyawa laka, thaa ka ihmeku kö la itre ini cili e itre xaa ijin memine la itre aja së qa ngöne laka itre atr ka ngazo së. (Roma 7:21-23) Ngo maine tro sa xötrethenge hnyawa la itre eamo qa hnine la Tusi Hmitrötr, easë hi lai a amamane ka hape, hetrenyi së la ajane troa amadri Iehova. Nge atraqatre catre fe la ihnimi së kowe la atre lapa easenyi së.
5. Maine ketre atr a akötrë së, pine nemen matre thaa tro pi kö së a iatëkeun?
5 E akötrëne hë ketre atr, ame ju hi la pane ewekë ka mama koi angeic, tre, ene la troa iatëkeun. Ngo e tro ha tune lai, eje hi lai laka hunë hë la ngazo. Maine nyipici laka ijije la wameuc kowe lai atr cili, haawe loi e troa nue koi Akötresie troa nyithupene koi angeic. (Ite Edomë 24:29; Roma 12:17-21) Ame itre xan, tre, thaa pi tro hmaca kö angatr a hane ithanata me igoeë memine la itre ka thele iwesitrë. Ngo thaa tro pi kö së a ujë tune lai kowe la itre hlue i Akötresie ka tu së, ke kösë kolo hi a kepe së hnei Akötresie qa ngöne laka, easë a hnime la itre trejine me easë. (1 Ioane 4:20) Haawe hnei Paulo hna cinyihane ka hape: “Loi e ixomi hninekeune me inuekeune nyipunie, maine hetre gele i ketre ate koi kete ; hna nue nyipunie hnei [“Iehova,” MN ], kete tro nyipunie a tun.” (Kolose 3:13) Ijije kö tro nyipunieti a hane kuca tune lai?
6. (a) Tro sa aija nue la ngazo ne la trejine me easë? (b) Nemene la nyine tro sa trotrohnin matre tro sa atreine cile kowe la ngazo hna kuca koi së hnene la ketre atr?
6 E maine kolo pala hi a ngazo koi epuni hnene la ketre atr, thaa kolo kö lo itre ngazo ka tru nyine iupetrije qa hnine la ekalesia? Eje hi, ame göne la itre hnepe tria së ka co, hnei Peteru hna ithuecatr troa inuekeun la itre ngazo së “uti ngöne la luengemen.” Ngo hnei Iesu hna qaja ka hape: “Tha öninge kö koi ’ö troa uti ngöne la luengemen ; ngo loi pe troa uti kowe la köniate nge luepi la o luengemen.” Ame e cili, nyidrëti a amamane hnyawa la etrune la gufa së koi Akötresie, a thatreine kö troa aceitunën memine la hnepe gufa ne la ketre atr koi së. (Mataio 18:21-35) Nyimu aqane easë a tria xajawa i Akötresie, ame ngöne la ite xaa ijin, tre thaa atrehmekune kö së laka ase hë së tria hnene la aqane ujë së, me aqane ithanata së, me mekune së maine pena thaa kuca kö së la qa së. (Roma 3:23) Ngo ame pe tre Iehova pala hi a senge la itre ngazo së. (Salamo 103:10-14; 130:3, 4) Nyidrëti mina fe a upi së troa iqejemenukeu. (Mataio 6:14, 15; Efeso 4:1-3) Haawe, tro hë së a amaman ngöne la mele së la ihnim laka “tha ate meku ngazo kö.”—1 Korinito 13:4, 5; 1 Peteru 3:8, 9.
7. Nemene la nyine troa kuca maine kola wesitre koi së hnene la ketre atr?
7 Ame ngöne la itre xaa ijin, tre, easë a öhne laka kola wesitre koi së hnene la ketre trejin, ngo ame koi së tre pëkö ewekë ka ngazo hne së hna kuca koi angeic. Atreine hi tro sa thele troa ‘he ej hnene la ihnim,’ tune la ithuecatr hna hamën ngöne 1 Peteru 4:8. Maine pena tre, ijije tro hi së lai a sipu tro troa ithanata me angeic me thele troa iloi me angeic.—Mataio 5:23, 24.
8. Maine kola athixötrë së hnene la aqane ujë ne la ketre trejine me easë, nemene la nyine tro sa kuca?
8 Nge maine tro la aqane ujë ne la ketre trejin a athixötrë nyipunie memine la itre xaa trejin, nemene la nyine tro epuni a kuca? Ma ka loi jë pena e tro nyipunieti a pane ithanatane lai me angeic? Maine tro nyipunie a ifekeun me angeic lai jol ka traqa koi nyipunie cememine la hni ka menyik, eje hi lai laka, troa kepe thangane ka loi qa ngöne la aqane ujë cili. Ngo qëmekene lai, pane thele jë pe ka hape: ‘Hetre ewekë jë kö hnei angeice hna kuca nge hna wathebone hnei Tusi Hmitrötr? Maine ame jë laka traqa pi lai jol, tre, hnene laka isa aqane wai ewekë, qa ngöne laka isa aqane hetru së kö me ini së ekö?’ Wange kö e atë menune pi hui ketre la mekun hne së hi hna sile qa ngöne la itre sipu aqane waiewekë së. (Iakobo 4:11, 12) Ame Iehova, tre thaa ka iwangatrehmekunyi atre kö Nyidrë, ngo Nyidrëti a kapa la nöjei atr asë, me nue ijine koi angatr troa kökötr ngöne la götrane la ua.
9. (a) Drei la ka troa waipengöne hnyawa la itre huliwa ka sis hna kuca hnine la ekalesia? (b) Ngöne nemene ngazo la tro la atr hna akötrën a troa canga tro troa pane wange lai trejine ka thiina ka ngazo koi angeic, nge nemene la kepin matre angeic a ujë tune lai?
9 Maine tro la ketre atren la ekalesia a kuca la ketre huliwa ka sis, maine kola kuci ngazo, loi e troa canga waipengöne hnyawa la ewekë cili. Drei la ka troa waipengöne lai? Tro la itre qatre thup. (Iakobo 5:14, 15) Ngo maine kola iwesitrë la lue trejin pi mani, maine hna ixöjetrij, haawe, loi e tro la trejin hna akötrën a tupath troa pane ithanatan la ewekë cili hmekuje hi memine lai trejine ka thiina ka ngazo. (Mataio 18:15) Maine thaa drei angeice kö, haawe, tro ha trongëne lo itre hna amekötine ngöne Mataio 18:16, 17. Tro la ihnimi së kowe la trejine ka akötrë së, memine la ajan troa ‘iloi’ me angeic, a xatua së troa tro fë thenge la itre mekun me thele troa ketr la hni i angeic.—Ite Edomë 16:23.
10. Nemene la ka troa xatua së troa hetrenyi la aqane waiewekë ka loi ngöne la kola traqa la itre jole koi së?
10 Maine kola fetra la ketre jol, maine ka tru maine co pena hi, ngo troa hetre ixatua koi së e hne së hna catre thele troa atrehmekune la mekuana i Iehova ngöne la ewekë cili. Thaa hna kapa kö hnei Akötresie la nöjei pengöne ngazo hna kuca, nge troa traqa la ijine tro Nyidrëti a upetrij qa ngöne la organizasio i Nyidrë la itre atr ka thaa ietrane kö la itre huliwa ka sis hnei angatre hna kuca. Ngo, thaa tro kö së a thëthëhmine laka, maine thaa ka sisi kö la itre huliwa hne së hna kuca, ngo itre ka ngazo asë hi së nge nyipi ewekë catre koi së la xomihni ahoeany memine la ihnimi ipitö i Akötresie. Haawe, Iehova a hamën la tulu nyine tro sa trongën ngöne la kola kuca la ngazo koi së hnene la itre xan. Maine hetre utipine the së, nge easë a nue la menu hna kuca hnene la itre xane koi së, easë hi lai a xötrethenge la tulu ne ihnimi Iehova.—Efeso 5:1, 2.
Thele Jë La Itre Aqane Troa “Atrun” La Ihnimi Së Kowe La Itre Xan
11. Pine nemen matre hnei Paulo hna ithuecatr kowe la itretre Korinito troa “atrun” la aqane ihnimi angatr?
11 Itre treu ne ce huliwa Paulo aposetolo memine la ekalesia ne Korinito ka qene Heleni matre troa acatren la lapaune i angatr. Hnei nyidrëti hna catre huliwa matre troa xatuan la itre trejine ngöne la traone cili, nge atraqatr la ihnimi nyidrëti koi angatr. Ngo hetrenyi thei angatr la itre trejin, ka paatre kö thei angatr la thiina ka menyik. Angatre a xöjetriji nyidrë. Hnei Paulo hna ithuecatre koi angatr troa “atrune” la aqane tro angatr a amamane la ihnimi angatr. (2 Korinito 6:11-13; 12:15) Ka lolo catr tro asë hi së a mekune hnyawa la aqane tro sa amamane la ihnimi së kowe la itre xan, nge tro mina fe së a thele la aqane tro sa atrune me akökötren la aqane ihnimi cili.—1 Ioane 3:14.
12. Tune kaa la aqane troa kökötre la ihnimi së kowe la nöjei atrene la ekalesia?
12 Hapeu ma ka jole koi së e troa easenyine la itre xaa trejine me easë hnine la ekalesia? Maine jë atreine hi tro sa elë sasaithe lai e tro së a atreine itrotrohni, ene la tro së a mekun ka hape, thaa ceitune kö la nöjei atr, nge thaa qanyi së kö troa amekötine la mele i ketre. Loi pe e tro sa thele la itre thiina ka loi thei angatr, me amë fe itre ej e kuhu hni së, nge eje hi lai laka, tro hë së a epe catre koi angatr. Eje hi lai laka, tro ha kökötre catre la ihnimi së koi angatr.—Luka 6:32, 33, 36.
13. Tune kaa la aqane tro sa atrun, ngöne la easë a amamane la ihnimi së kowe la itre atren la ekalesia?
13 Maine jë hna nyi ifegone hi la itre hne së hna atreine troa kuca kowe la itre xaa atr. Maine jë thatreine kö tro sa ibozu memine la nöjei atr ngöne la nöjei icasikeu. Maine jë thaa ijije kö troa könëne asë la itre trejin troa ce xeni me easë. Ngo tune kaa, atreine kö tro sa xome la itre hnepe menetr matre troa atrepengöne hnyawa la ketre atren la ekalesia së? Tune kaa matre sipone fe së ngöne la itre xaa ijin kowe la ketre trejin hne së hna thatre hnyawa kö, matre troa ce cainöje me angeic?
14. E nyipine la itre Keresiano hne së hna thatre, tune kaa la aqane tro sa catre ihnimikeu?
14 Lolo catre la itre asabele ke, itre ijine easë hi lai a hane thele troa atrune la ihnimi së. Itre thauzane la etrune la itre trejine ka icasikeu. Ngacama thatreine kö tro sa ibozu me angatr asë, ngo isa qanyi easë hi lai troa amamane ka hape, trije ju pë hë la itre lolo thatraqa së, ngo loi e pane jë la ihnimi së koi angatr. Ame la itre ijine kola pane mano akawane lo lai itre icasikeu, loi e tro sa isa thele troa hane easenyine me porotrik memine la itre atr ezi së. Troa traqa la ijine tro la itre atr asë e celë fene hnengödrai, a itre trejine trahmanyi me föe ka caasi troa thili kowe la Akötresie ka caas nge Tretretro së asë. Drei la madrine së elanyi troa atre la itre trejine asë! Tro la etrune la ihnimi së koi angatr a upi së troa huliwa tune lai. Tune kaa matre nyiqaane ujë tune lai hnei nyipunie enehila?
Revizio
• Maine kola fetra la itre jol thene la lue Keresiano, tune kaa la aqane tro nyidroti a thele troa iloi, nge pine nemen?
• Ame ngöne la easë a kökötre trootro ngöne la götrane la ua, nemene mina fe la itre aqane troa kökötre trootro la ihnimi së?
• Tune kaa la aqane tro sa amamane la etrune la ihnimi së, a thaa kowe hmekuje kö la itre sipu enehmu së ngo kowe mina fe la itre xaa atr?
[Iatr ne la götran 148]
Nyimu aqane tro kö së a amamane la ihnimi së, maine ngöne fe la itre ijine icasikeu