Mekene Semidrin
Loi e Mama La Aqane Mele Nyipici Së Ngöne La Hnalapa
1. Nemene la thangane la itre hna amekötin e hnine la Wesi Ula thene la itre trefën?
IEHOVA la atrekë ewekën la faipoipo, nge ame la Wesi Ula i Nyidrë tre, celë hi ewekë ka sisitria atre qatrenge la itre trenge meköt nyine tro xome trongëne la itre hnepe lapa. Nyimutre la itre atr ka melën la Wesi Ula cili, haawe, kola tro loi nge hetre thangane ka loi la faipoipo i angatr. Ame itre xan tre, lolo catr la aqane ujë i angatr, itre ka ce lapa trefën angatr ekö ngo thaa hna faipoipo kö, ngo hnei angatr hna thele troa cile ngöne la mus. Ame itre xan, tre thaa nyixetë hmaca kö. Ame itre trahmanyi ka isi nge ka qanangazon lo itre föi angatr me itre nekönatr, angatre hë enehila a inine troa menyike me lolo la aqane ujë kowe la lapa i angatr.
2. Nemene la itre nyine troa kuca ka nyipi ewekë catr kowe la mele ne la hnepe lapa Keresiano?
2 Nyimutre la itre nyine troa kuca ka nyipi ewekë catr ngöne la mele ne la hnepe lapa ne la itre Keresiano, ene la troa wange hnyawa la aqane troa cile huti la faipoipo, memine la aqane troa aeatrëne hnyawa la itre hnëqa e hnine la fami, memine fe la aqane troa ce mele memine la itre atren. (Efeso 5:33–6:4) Ketre ewekë kö la troa atre la hna qaja hnei Tusi Hmitrötr ngöne la pengöne la mele ne fami, nge ketre kö lai troa trongëne la itre eamo hna hamën, lue ewekë lai ka isapengön. Pëkö ka ajane e easë troa tune la itre atr hnei Iesu hna qaja angazon, pine la hnei angatr hna atrian la itre hna amekötin hnei Akötresie. Angatr a mekune menune ka hape, e catre hë kuci huliwa i hmi ijije ju hë lai. (Mataio 15:4-9) Thaa ajane kö së troa amamane ka hape, itre ka catre hmi së koi Akötresie, ngo ka gufa pë hë ngöne la hnalapa së. Ka loi pe la troa mama pala hi the së la thiina ka ijiji Akötresie, ke celë hi “mo ka tru alameken.”—1 Timoteo 5:4; 6:6; 2 Timoteo 3:5.
Troa Uti Eu La Faipoipo?
3. (a) Nemene la ewekë ka traqa kowe la itre faipoipo ka nyimutre, ngo nemene la nyine tro sa catre kuca? (b) Jëne la Tusi Hmitrötr, sa jë la itre hnying hna hamën thupene la itre paragaraf.
3 Kola mama trootro laka thaa cile huti hmaca kö la itre faipoipo enehila. Thaa qea ju kö la itre macatre thupene la hna faipoipo nge itriji hmaca ha la itre trefën, kolo hmaca pena ha a ikötresae me itre xan. Ketre, thaa sesëkötre hmaca kö së la easë a drenge laka, isa lapa ha lo itre ka xötrei ikötresae. Ngacama kola ujë tune lai hnene la itre atr ka lapa xötreithi së, ngo thaa tro kö a thëthëhmine laka hnëqa së la troa amadrinë Iehova. Qa ngöne lai, loi e tro së a pane goeëne cahu itre hnying memine la itre xötr, matre troa wang la hna qaja hnene la Wesi Ula i Akötresie matre cile huti ju la faipoipo.
Ame ngöne la kola ikötresae la trahmanyi memine la föe, hapeu uti hë eu la tro nyidroti a ce mel? (Mareko 10:6-9; Roma 7:2, 3)
Nemene hmekuje hi la kepin hna kapa hnei Akötresie ka aijijën la lue trefën troa sei hna cil me faipoipo hmaca pena ha me ketre? (Mataio 5:31, 32; 19:3-9)
Nemene la hnei Iehova hna mekune göne lo itre trefën ka sei hna cil nge itria kö memine la hna amekötin hnene la Wesi Ula i Nyidrë? (Malaki 2:13-16)
Hapeu hna kapa kö hnei Tusi Hmitrötr la isa lapa ne la lue trefën matre troa nyi nyine la itre jol ka traqa koi nyidro? (1 Korinito 7:10-13)
Nemene la itre ewekë ka troa aijijën la lue trefën troa isa lapa? (Salamo 11:5; Luka 4:8; 1 Timoteo 5:8)
4. Pine nemene matre kola cile huti la itre xaa faipoipo?
4 Ame la itre xaa faipoipo, tre ka tro loi hnyawa itre ej, nge ka cile hut. Pine nemen? Pine laka hna pane treqene troa hetrenyi la itre nyipi mekun, nge ketre, loi e troa xome la ketre atr ka cepunikë la itre aja me easë, nge ka atreine ifekeune la itre hni me ce wai mekun. Nge ame la ewekë ka sisitria catr, tre, ene la troa iën la ketre atr ka hnimi Iehova me metrötrëne hnyawa la Wesi Ula i Nyidrë nge ka xome eje matre troa nyi nyin la itre jol hna troa cile kow. (Salamo 119:97, 104; 2 Timoteo 3:16, 17) Loi e thaa tro kö a mekune hnei ketre ka hape, e ngazo hë la aqane ce mele i nyidro tre, ka loi e troa isa lapa maine sei hna cil pena. Thaa tro kö angeic a thele kepin qa ngön la itre hnepe ngazo ne la föi angeic, matre nyi jë i angeic troa kötrene la itre sipu hnëqa i angeic. Ohea, loi pe troa cile kowe la itre jol me thele la itre nyin ka lolo.
5. (a) Tune kaa la pengöne la mele nyipici koi Iehova e hnine la faipoipo? (b) Ngacama easë a cile kowe la icilekeu, nemene la itre manathith hne së hna kapa qa ngöne la hne së hna mele nyipici kowe la itre trepene meköt i Iehova?
5 Kola qaja hnei Satana ka hape maine troa traqa koi së la itre akötr, canga tro hi së a nue trije la itre jë i Iehova. (Iobu 2:4, 5; Ite Edomë 27:11) Ngo nyimutre la Itretre Anyipici Iehova ka akötr qa ngöne laka ka icilekeu la itre föi angatr, ngo thaa hnei angatre kö hna nue trije lo itre hnei angatr hna sisinyi ekö. Angatr a catre mele nyipici koi Iehova me trongëne la itre hnei Nyidrëti hna amekötin. (Mataio 5:37) Ame itre xan ka catre cile kowe la itupath, ame hë thupene la itre macatre ne icilekeu, angatr a madrin la kola hane ce me angatr hnene la föi angatr troa nyihlue i Iehova! (1 Peteru 3:1, 2) Ame koi itre Keresiano trene föe hmunë ka thaa hmi kö nge ka thaa hane thele pi kö troa saze, maine itre xane pena hna tro trij pine laka angatr a nyihlue i Iehova, atre hnyawa kö angatr laka tro angatr a kepe manathith qa ngöne la hnei angatr hna mele nyipici koi Iehova hnine la hnalapa.—Salamo 55:22; 145:16.
Kola Isa Xomi Götrane Qan
6. Nemene la trepene meköti nyine tro sa metrötrën matre troa mele ka loi e hnine la faipoipo?
6 Eje hi lai laka, ame la troa mele ka loi hnine la faipoipo, tre thaa qa ngöne hmekuje kö la hna ce mel. Nyipi ewekë tro fe la itre trefën a isa metrötrën la trepene meköti hna hamën hnei Akötresieti göi mus e hnine la hnepe lapa. Ketre, matre thaa tro kö a hetrenyi la gomegom nge troa mele ka tingeting e hnine la hnalapa. Kola qaja ngöne 1 Korinito 11:3, ka hape: “Keriso la he ne la nöjei trahmany ; nge trahmanyi la he i fö ; nge Akötesieti la he i Keriso.”
7. Tune kaa la aqane troa cilën la musi e hnine la hnepe lapa?
7 Canga wangatrehmekune hi epuni cahu ewekë hna pane amexeje ngöne la xötre celë? Eje hi laka, ame asë hi la itre trahmany, tre Keriso la he i angatr, nge loi e tro angatr a drengethenge nyidrë. Kolo hi lai a hape, tro la trahmanyi a xome la itre thiina i Keriso matre troa cilën la musi cili. Kola drengethenge Iehova hnei Keriso, me hnime catrëne hnyawa la ekalesia, me hamën la itre hna ajan hnene ej. (1 Timoteo 3:15) Ketre, hnei nyidrëti hna “hamë nyidëti kö thatraqan’ ej.” Thaa ka pi draië kö Iesu maine ka isi pena nyidrë, ngo “ka menyike [nyidrë] me ipië la hni i [nyidrë].” Ame la itre atr ka lapa fene la musi nyidrë, tre angatr a “öhne la hna mano thatraqane la ite u i [angatr].” Ame la trahmanyi ka ujë tune lai kowe la itre atren la hnepe lapa i angeic, tre angeice hi lai a amamane ka hape angeic a ipië koi Keriso. Haawe, tro hë la föe Keresiano a öhne la manathith me lolo qa ngöne la hna ce huliwa memine la föi angeic me drengethenge la ka musi hui nyiidro.—Efeso 5:25-33; Mataio 11:28, 29; Ite Edomë 31:10, 28.
8. (a) Pine nemen matre ame ngöne la itre xaa hnalapa ne la itre keresiano tre angatre a huliwa gufa? (b) Nemene la nyine troa kuca maine easë a cile kowe la jole cili?
8 Ngo eje hi lai laka troa traqa la itre jol. Maine jë qëmekene troa trongëne la itre trepene meköti ne la Tusi Hmitrötr, hetrenyi la itre atren la hnepe lapa ka xele ma wang e troa musinë angatr. Ngacama tro ju hë së lai a ithanata hnyawa me angatr cememine la hni ka menyik me thiina ka lolo, ngo thaa tro jë kö angatr a dreng. Easë a atre hnyawa la hna qaja hnei Tusi Hmitrötr kola hape, troa trije la “iwesitë, me elëhni, me kakaeo, me nyi tru.” (Efeso 4:31) Ngo nemene kö la nyine troa kuca maine kola mama laka ma loi pë hë troa icatrë matre troa drei së? Ame Iesu tre thaa hnei nyidrëti kö hna xötrethenge la aqane ujë ne la itre atr ka thele isi me iqaqa, ngo hnei nyidrëti pala hi hna mejiune kowe la Tretretro i Nyidrë. (1 Peteru 2:22, 23) Qa ngöne lai, ame ngöne la kola traqa la itre jole ka tru hnine la hnalapa, tre amamane jë koi Iehova la aqane mele nyipici nyipunie koi Nyidrë, nge sipo ixatua jë koi Nyidrë jëne la thith, ngo the xome kö la itre aqane ujë ne fen.—Ite Edomë 3:5-7.
9. Nemene la hna inine troa kuca hnene la itre trahmanyi Keresiano ka nyimutre hune la troa eetre lapa?
9 Troa hetre thangane ka loi kowe la mele së la itre eamo qa hnine la Tusi Hmitrötr, e hne së hna xomihni ahoeanyi me catre thele troa trongëne itre ej, ngacama thaa canga mama petre kö koi së la itre eloine ngöne la mele së. Nyimutre la itre trahmany ka öhne laka kola lolo la mele ne trefëne i angatr, qa ngöne la hnei angatr hna isa trotrohnine la aqane mele i Keriso memine la ekalesia. Ame la itre atren la ekalesia, tre, thaa itre atr ka pexeje kö angatr. Ngo ame pe, tre, Iesu a hnime la ekalesia, me hamëne la tulu ka lolo thatraqane lai, me xome la Tusi Hmitrötr matre nyine tulu ne mele ka loi kowe la ekalesia matre tro ej a kökötre lolo. Hnei Nyidëti fe hna nue la mele i nyidrë kowe ej. (1 Peteru 2:21) Nyimutre la itre trahmanyi Keresiano ka xome la tulu i Iesu matre tro angatr a nyi hen ka loi ne la hnepe lapa i angatr, nge matre atreine angatr hamë ixatua cememine la ihnim matre lolo la aqane melen la hnepe lapa i angatr. Ka nyipi lolo kö la aqane ujë cili hune la troa eetre lapa maine troa xele ma ithanata pena.
10. (a) Tune kaa la aqane tro la trahmanyi maine föe (ngacama itre Keresiano) a ajolën la mele ne la itre atren la hnepe lapa? (b) Nemene la nyine troa kuca matre troa kökötre lolo la mel e hnine la fami?
10 Nemene la nyine troa kuca maine thaa sikusikune kö hnene la trahmanyi troa hnime la itre atren la hnepe lapa sine la madra i angeic, maine thaa ketre thele pena kö troa ce ithanatane la itre mekun qa hnine la Tusi Hmitrötr e hnine la fami, maine troa ce hnëkëne pena la itre xaa huliwa? Maine pena nemene la nyine troa kuca maine thaa ixatua kö la föe, nge thaa drengethenge kö la musi hna acile hnei Akötresie e hnine la hnepe lapa? Kola tro loi la mele ne la itre Keresiano pine laka, hnei angatr hna ce ithanatan la itre jol e hnine la hnepe lapa ce memine la hni ka metrötr. (Genese 21:10-12; Ite Edomë 15:22) Ngo ngacama thaa traqa kö kowe la itre hne së hna mejiune kow, eje hi laka, ijiji së asë hi troa kuca matre lolo la mel e hnine la hnepe lapa; troa lolo la aqane trongene la fami e hne së hna isa eëne la itre wene ne la ua ngöne la mele së, me amamane hnyawa la ihnimi së kowe la itre xaa atren la hnepe lapa. (Galatia 5:22, 23) Tro sa kökötr e hne së hna kuca la hne së hna atrein, ngo thaa tro kö a nue hmekuje la itre xan troa kuca la itre huliwa nge tro pe hi së a goe; celë hi aqane tro së lai a mele nyipici koi Akötresie.—Kolose 3:18-21.
Troa Öhne Ekaa La Itre Mekune Ka Sa La Itre Hnying
11, 12. Nemene la hnei Iehova hna hamë së matre troa kökötre lolo la mele ne la hnepe lapa së?
11 Nyimutre la itre atr ka hamë eamo ngöne la itre ejolene me pengöne la hnepe lapa. Ngo ame easë, tre atre hi së laka eje e hnine la Wesi Ula i Akötresie la itre eamo ka sisitria, nge easë a olene koi Iehova la hnei Nyidrëti hna xatua së troa trongëne itre ej jëne la organizasio i Nyidrë e celë fen. Hapeu, epuni kö a kepe thangane hnyawa qa ngöne la ixatua cili?—Salamo 119:129, 130; Mika 4:2.
12 Ketre ewekë la troa sin la itre icasikeu ne la ekalesia, ngo tune kaa, hane kö nyipunie ami ijin troa ce inine la Tusi Hmitrötr memine la hnepe lapa i nyipunie? Celë hi ketre jëne ka lolo lai tro la itre atren la hnepe lapa a caas hnine la hmi i Iehova. Lolo catr la mele i angatr qa ngöne la hnei angatr hna ketre thele ini qa hnine la Wesi Ula i Akötresie thatraqane la sipu mele i angatr.—Deuteronomi 11:18-21.
13. (a) Maine hetrenyi the së la itre hnying ngöne la pengöne la hnepe lapa, ekaa la hnë tro së a thele ixatua? (b) Nemene la hna troa amamane hnene la itre mekune asë hne së hna troa axeciën?
13 Maine jë hetre itre hnyinge i nyipunie göne la aqane mele ngöne la hnepe lapa. Ketre ceitun, tune kaa la pengöne göi troa tuluthe la aqane troa hnaho? Hapeu, hetre nyipi kepine kö troa thi upune? Maine kola amamane hnene la ketre nekönatr ka hape, thaa nyipin hmaca kö nyën la itre ewekë ngöne la götrane la ua, hapeue pe la aqane tro nyën a xötrethenge la itre hna amekötine hnene la hmi ka eje hnine la hnepe lapa? Nyimutre la itre hnying ka tune la, hna ithanatan hnine la itre itusi hna hamën hnene la Itretre Anyipici Iehova. Maine easë a ajan troa atre la itre mekun ka sa la itre hnyinge cili, loi e tro sa inin troa thele ewekë hnine la itre itus ka xatua së troa trotrohnin la Tusi Hmitrötr, maine jëne la itre Index, ene lo itre itus nyine ixatua ithel. Maine pëkö thei epuni la itre itus hnei epuni hna ajan, wange ju hnine la hna ami itus ne la Uma Ne Baselaia. Maine pena tre goeëne ju hnine la ordinatöre i nyipunie. Ijije mina tro nyipunie a ce ithanatan la itre hnyinge i nyipunie memine la itre Keresiano trahmanyi me föe ka macaj. Ngo thaa tro pi kö a mekune ka hape atreine hi troa sa hnyawa asë la nöjei hnyinge i epun. Ame ngöne la itre xaa ijin, tre isa qanyi epuni kö troa axeciën la mekun, maine epuni isa ala caas maine thene pena la lue trefën. Thupene lai, axeciëne jë la mekun ka amamane hnyawa ka hape, epuni a mele nyipici koi Akötresie qëmeke i nöjei atr, ngo e hnine mina fe la hnalapa i epun.—Roma 14:19; Efeso 5:10.
Revizio
• Nemene la pengöne la mele nyipici koi Iehova ngöne la aqane tro sa isa nyipici kowe la föi easë?
• Maine kola akötrë së hnene la itre jol e hnine la fami, nemene la ka troa xatua së troa kuca la aja i Akötresie?
• Maine thaa hane kö la itre xaa atrene la hnepe lapa kuca la qa i angatr, nemene la aqane tro sa thel troa kökötre lolo la mele ne la hnepe lapa së?
[Iatr ne la götran 155]
Loi e tro la he ne la fami a xome la itre thiina i Iesu
[Iatr ne la götran 157]
Kola acaasin la hnepe lapa hnene la hna inine pala hi la Tusi Hmitrötr