Mekene Sikis
Xatuane Jë La Nekö i Epuni Thöth Matre Tro Loi La Aqane Tru i Nyën
1, 2. Nemene la itre jole memine la itre madrine hna troa kapa ngöne la itre ijine thöth?
ISA pengöne kö la kola ce mele memine la ketre thöth, hune la troa ce mele memine la nekönatre ka faifi maine trene lao macatren. Ketre hetre itre itupathi kö me itre jol, hna cile kow hmekuje hnene la itre thöth, ngo atreine hi tro angatre a madrine me hetre pune ka loi kowe la mele i angatr. Kola amamane hnene la itre tulu hna amë pe hnei Iosefa, me Davita, me Iosea, me Timoteo, laka, atreine fe tro la itre nekötrahmanyi me neköjajinyi a hane kuca la itre hnëqa i angatr, me thele troa lolo la aqane imelekeu i angatre me Iehova. (Genese 37:2-11; 1 Samuela 16:11-13; 2 Ite Joxu 22:3-7; Ite Huliwa 16:1, 2) Nyimutre la itre thöthi enehila, ka hane melëne fe la aqane ujë cili. Ma atre jë fe hi epuni la itre xane e angatr.
2 Ngo eje hi laka, ame koi itre xan, ke, ame la kola thöthi la atr, ijine angeice hi lai a iahlë menu. Canga mama hi la itre ijine loi me itre ijine ngazo ngöne la mele ne la thöth. Ma troa thele hnene la itre thöthi trahmanyi me jajinyi troa mele caas, nge ma angatre a drenge e kuhu hni angatre laka, kola hnöthe la mele i angatre hnene la itre keme me thine i angatr. Ngo ame pe, thatre pengöne hnyawa petre kö la itre thöthi cili la aqane troa mel, itre wangadrapa petre kö angatr, nge troa nyipi ewekë koi angatre la ihnimi memine la ixatua ne la itre keme me thin. Nyipici, troa itre ijine madrine la itre macatre ne kola thöth, ngo tro fe itre eje a ithuejolë— a thaa koi keme me thine hmekuje kö, ngo koi itre thöthi fe. Nemene la aqane troa xatuane la itre thöthi ngöne la itre macatre cili?
3. Tro la itre keme me thine a hamëne tuneka kowe la itre nekö i angatre la itre ewekë nyine loi kowe la mele i angatr?
3 Atreine hi tro la itre keme me thine ka trongëne la itre hna amekötine qa hnine la Tusi hmitrötr, a hamëne kowe la itre thöth la ewekë ka sisitria nyine loi koi angatr, matre atreine angatre troa cile kowe lo itre jol, me kökötre matre traqa hnyawa kowe la atr ka macaj. Kola wangatrehmekune ngöne la nöjei götrane asë me ngöne la nöjei hneijin, laka, hna amanathithine hnyawa la itre keme me thine memine la itre nekö i angatre thöth, e hna ce trongëne la itre trepene meköti qa hnine la Tusi Hmitrötr.— Salamo 119:1.
INYIPICIKEU JU NGE IFEKEUNE HNYAWA JË LA ITRE MEKUN
4. Pine nemene matre nyipi ewekë troa ifekeune la itre mekune ngöne la itre macatre ne kola thöth?
4 Tusi Hmitrötre a qaja ka hape: “Tha nyipi ewekë la ite mekun e tha hna ithahnatan.” (Ite Edomë 15:22) Maine nyipici laka, nyipi ewekë kowe la itre nekönatre ngöne la angatre a co, la troa ce ithahnatane me angatre la itre mekun, ka sisitria catre pala kö lai ngöne la itre macatre ne thöth— pine laka, co hi la traeme ne kola lapa hnalapa, ngo tru catre kö e trön, maine memine la itre sine ce ini, maine memine pena la itre sine ce elo. Maine pëkö ijine hna pane ce ithahnata hnei keme me thine me haa kuku—maine pëkö inyipicikeu, maine thaa ifekeune hnyawa kö angatre la itre mekune i angatr—eje hi laka, tro hë la itre thöthi a mele tune la itre trehnyiwa hnine la uma. Haawe, tuneka la aqane troa kuca matre ifekeune jë la itre mekun?
5. Nemene la ka xatuane la itre thöth, matre tro angatre a fe la itre mekune i angatre kowe la itre keme me thine i angatr?
5 Loi e tro asë hi la itre keme me thin, me itre thöth, a mekune hnyawa la nyine tro angatre a isa kuca ngöne la götrane cili. Nyipici laka, thaa ceitune kö lo angatre a co memine hë enehila la angatre hë a thöth, jole trootro hë troa pane porotrike memine la itre keme me thin. Ngo mekune hnyawa kö laka, “E pëkö mus, troa ngazo la nöj; ngo kola lapa hnyawa hnene la ite atesi ka ala nyimu.” (Ite Edomë 11:14) Thatraqane asë hi la itre atr la trenge ewekë celë, itre ka co me itre ka tru. Ame la itre thöthi ka wangatrehmekune la ewekë cili, angatre a trotrohnine hnyawa laka, nyipi ewekë catre troa hetre ka tro xomi angatr, pine laka, kola tru trootro la itre jol, nge thatreine kö angatre troa cile caasi kow. Ketre, loi e tro fe angatre a kapa la mekune laka, ijije la itre keme me thine i angatre ka hmi troa ihaji, pine laka, atrepengönë hë angatre la mel, nge hnei angatre pala hi hna amamane ngöne la itre macatre laka, ka ihnimi angatr. Qa ngöne lai, ame la itre thöthi ka inamacan, thaa tro jë kö angatre a trotrije la itre keme me thine i angatr.
6. Nemene aqane tro la itre keme me thine ka inamacane me ka ihnim, a ujë ngöne la angatre a troa ifekeune la itre mekune memine la itre nekö i angatre thöth?
6 Nyipi ewekë tro la itre keme me thine a tupathe ngacama tru la jol, troa easenyine la thöthi ngöne la kola mama laka, hetre aja i angeice troa ithahnata, celë hi aqane tro lai a ahlëne la ajane troa ifekeune la itre mekun. Maine epuni la ketre keme me thin, ke, loi e tro epuni a atre hnyawa laka, troa atreine ifemekunekeu, e hna pane nyiqaane qa thei epun. Ma thaa ewekë ka hmaloi kö lai. Kola qaja hnei Tusi Hmitrötre ka hape, hetre “ijine lapa thaupu, me ijine ewekë.” (Ate Cainöj 3:7) Maine troa ajane hnene la thöthi troa porotrik, haawe, loi e tro pena epuni a hane drei angeic. Ngöne la ijine cili, ke, hnei epuni jë hna mekune troa kuca la sipu etidi epun, maine troa pane mano, maine troa nyihnyawane xötreithi la uma. Ngo maine kola ajane hnene la nekö i epuni troa ithahnata me epun, the wai ejolene kö troa saze la porogarame i epun, ngo pane drei angeice ju pe. Loi e troa kuca tune lai, wanga thaa hmala hmaca pi angeice troa porotrik. Mekune ju lo tulu i Iesu. Ngöne la ketre ijin, hnei nyidrë hna mekune troa pane mano. Ngo ame la itre atr a traqa troa lapa xötreithi nyidrë, pë ju kö mano ngo nyidrëti a canga mejë jë me nyiqaane troa ini angatr. (Mareko 6:30-34) Alanyimu la itre thöthi ka öhne laka, pekö hneimeke ne la itre keme me thin, ngöne laka tru catre hnei jole i angatr, ngo nyipi ewekë koi angatre troa hetrenyi la mejiune laka, thaa nanyi kö la itre keme me thine e traqa ju angatre aja ixatua. Qa ngöne lai, loi e tro së a thele troa drenge hnyawa me trotrohnine la itre nekö së.
7. Nemene la nyine tro la itre keme me thine a thupëne me neën?
7 Tupathe jë troa mekune hmaca lo pengö i epuni ekö ngöne lo epuni a thöth, nge ihnyimane jë la itre xaa hnepe ijine cili! Nyipi ewekë kowe la itre keme me thine troa ce madrine memine la itre nekö i angatr. Nemene la hna kuca hnene la itre keme me thine ngöne la itre ijine angatre a mano? Maine hnei angatre pala hi hna kuca caasine la itre ewekë ngöne la ijine angatre a mano, tro ha canga wangatrehmekune lai hnene la itre nekö i angatr. Maine tro la itre thöthi a mekune ka hape, tru kö la hna wangatrunyi angatre hnene la itre sine ce elo i angatre ngöne la hna ini, hune la itre keme me thine i angatr, tro ha traqa koi angatre la itre jole ka tru.
NEMENE LA NYINE TROA IQAJAKEUN
8. Nemene la aqane troa inine la itre nekönatre matre tro angatre a hetre ajane troa mele nyipici me catre huliwa, me thiina ka loi?
8 Maine thaa ase pala kö itre keme me thine traane ngöne la hni ne la itre nekö i angatre la ajane troa mele nyipici me troa huliwa catr, loi e tro angatre a canga sikusikune troa traane lai e thöthi petre kö nyudren. (1 Thesalonika 4:11; 2 Thesalonika 3:10) Ketre loi e tro fe a xecie koi angatr, laka, itre nekö i angatre a trotrohnine la enyipiewekëne la troa pë gele i angatre ngöne la aqane mel, nge troa wië la thiina. (Ite Edomë 20:11) Maine tro la itre keme me thine a amamai tulu ngöne la itre götrane cili, ke, thaa jole kö koi angatre troa ifekeune la itre mekun. Tune la itre trahmanyi ka thaa hmi kö, laka, atreine hi troa “ahmalanyi angate hnene la ite ifënekö i angatr, ngo tha hnei wesi ula,” itre thöthi fe, atreine hi tro angatre a inine la itre trepene meköti ka lolo, jëne la aqane ujë ne la itre keme me thine i angatr. (Wange ju 1 Peteru 3:1.) Ngo eje hi laka, thaa ijije hmekuje kö la tulu, pine laka, nyimutre catre la itre thiina ka ngazo hna goeëne hnene la itre nekönatr, ketre, kola mana fe la nöjei aqane mekune nyine iamenu e tröne la hnalapa. Nyipi ewekë tro la itre keme me thine ka thele loi koi kuku, a porotrike memine la itre nekö i angatre thöth, matre troa atre la itre mekune qangöne la hnei nyudrene hna goeëne me dreng.— Ite Edomë 20:5.
9, 10. Pine nemene matre, nyipi ewekë tro la itre keme me thine a inine la itre nekö i angatre la pengöne la götrane gaa hmitrötre ne la ngönetrei, nge nemene la aqane tro angatre a qeje pengöne lai?
9 Eje hnyawa fe ngöne la kola troa ithahnatane la pengöne la götrane gaa hmitrötrene la ngönetrei. Itre keme me thin, hapeu, hetrenyi pala kö thei epuni la hmahma troa ce ithahnatane memine la itre nekö i epun, la götrane cili? Maine eje hi, ke, loi e tro epuni a catre troa kuca la hnëqa i epun, wanga tro pena la nekö i epuni elanyi a inine troa atrepengöne lai, qa thei ketre atr pena ha. Maine thaa tro kö epuni a qejepengöne hnyawa koi angatr, thaa nyine qaja jë kö elanyi la itre ithuemacanyi hmo hnei angatre hna troa kapa? Ame hnine la Tusi Hmitrötre ke, thaa hnei Iehova kö hna juetrëne la itre mekune i Nyidrë ngöne la kola qaja la pengöne la gaa hmitrötre ne la ngönetrei, qa ngöne lai, loi e tro la itre keme thine a xome la tulu cili.— Ite Edomë 4:1-4; 5:1-21.
10 Eloine pe, hetrenyi e hnine la Tusi Hmitrötre la itre eamo ka troa ee së hnyawa göne la pengöne la götrane gaa hmitrötre ne la ngönetrei, nge nyimutre la itre ithuemacanyi nyine ixatua koi së hna hamëne hnei Watchtower Society, nyine amamane laka, thatraqane fe la hnedrai së enehila la itre eamo cili. Hapeu matre thaa trongëne pe la ixatua cili? Tuneka matre ce wange ju pena memine la nekö i epuni trahmanyi maine jajiny, lo itus, Les jeunes s’interrogent— Réponses pratiques, ngöne lo götrane hna hape, “La sexualité et la moralité?” Tro epuni a madrine me sesëkötre la itre thangane ka loi hna troa kapa.
11. Nemene la jëne ka loi hna troa inine hnene la itre keme me thine kowe la itre nekö i angatr, ngöne la aqane troa nyihlue i Iehova?
11 Nemene la taane mekune ka nyipi ewekë catr, nyine troa ithahnatane hnene la itre keme me thine memine la itre nekö i angatr? Hnei Paulo aposetolo hna qejepengöne lai ngöne la nyidrë a cinyihane ka hape: “Hiane jë la [itre neköi epuni] ngöne la ini memine la ihaji [i Iehova NW].” (Efeso 6:4) Nyipi ewekë tro la itre nekönatr, a atrepengöi Iehova hnyawa. Troa akökötrene la ihnimi angatre koi Nyidrë, matre hetrenyi angatre la ajane troa hane nyihlue i Nyidrë. Ketre, sisitria fe la ini hna troa kapa, jëne la tulu hna hamëne hnene la itre keme me thin. Maine tro la itre thöthi a öhne laka, itre keme me thine i angatre a hnimi Akötresie ‘hnene la hni angatre ka pexej, me u i angatre ka pexej, me mekune i angatre ka pexej’, nge hetre thangane catre lai kowe la mele i angatr; haawe, tro fe hë la itre nekönatre a hane xötrethenge la tulu hna amë pe. (Mataio 22:37) Ketre mina fe, maine tro la itre thöthi a öhne ka hape, thaa ka pi aja mo ne fene kö la keme me thin, nge ka amë panëne angatre la Baselaia i Akötresie, caasi hë e cili la mekune la itre thöthi me itre keme me thine i nyudren.— Ate Cainöj 7:12; Mataio 6:31-33.
12, 13. Nemene la itre mekune nyine troa hneheen, maine kola ajane troa tro loi la etid ne la fami?
12 Ketre ixatua ka tru kowe la mele ne la itre thöthi ngöne la ua, la troa inine la Tusi Hmitrötre memine la fami ngöne la nöjei wiik. (Salamo 119:33, 34; Ite Edomë 4:20-23) Nge nyipi ewekë troa eatrëne pala hi la etidi cili. (Salamo 1:1-3) Loi e tro la itre fami a kuca panëne pala hi la porogarame thatraqane la etid, nge pine ju pë hë la itre xaa huliwa. Ketre, troa hetre thangane ka lolo la ini Tusi Hmitrötre ne la fami, e hetre hni ka ajane la itre atren. Hna qaja hnene la ketre keme ka hape: “Troa hetre thangane la etid, e tro la ka cilëmekene eje a thele jëne matre eje la imetrötrekeu me ce madrine ngöne la ijine kola ini tus— loi e thaa tro kö a catre menu la aqane tro fë la ini, ngo ketre thaa tro kö a hmalohmaloe catre pala ha, wanga pë pena pi ehmitrötrene ej. Thaa ewekë ka hmaloi kö la troa atreine thele meköt, nge nyipi ewekë tro pala hi a amekötine la aqane mekune la itre thöth. Maine pëkö thangane lai pane etid maine hnaluene pena, the kucakuca kö ngo catre jë nge goeëne jë pe la ijine kolo hmaca a troa ini tus.” Hna qaja fe hnene lai keme ka hape, ngöne la nyidrë a lapaa thithi tune la hna majemine e kola nyiqaane la etid, caa ewekë ka sisitria hnei nyidrë hna sipone koi Iehova, ene la troa xatuane la itre nöjei ka sine la etid, matre isa hetrenyi angatre la aqane waiewekë ka loi.— Salamo 119:66.
13 Thaa tro kö la itre keme me thine ka lapaune a wange sixane la hnëqa i angatr, ene la troa kuca la etid ne la fami. Nyipici laka, thaa hna majemine kö hnene la itre xaa keme me thine troa hamë ini, nge troa jole koi angatre troa thele la itre aqane troa nyi thangane la ini tusi ngöne la fami. Ngo maine epuni a hnime la itre nekö i epuni thöth, “hnene la huliwa me nyipici,” haawe, tro hë epuni a ajane troa xatua angatre hnene la hni ka ipië me nyipici troa kökötre ngöne la ua. (1 Ioane 3:18) Ketre, ma tro angatre a nyihneulili e itre xaa ijin, ngo loi pe, tro hë angatre a drenge hnyawa e kuhu itre hni angatre laka, epuni a ajane catrëne tro angatre a madrin.
14. Nemene la aqane troa trongëne la Deuteronomi 11:18, 19 ngöne la kola edromëne la itre ewekë ne la ua kowe la itre thöth?
14 Ngo eje hi laka, thaa hna jëne etid ne fami hmekuje kö la troa ifekeune la itre mekune ka nyipi ewekë thatraqane la mele ngöne la ua. Hapeu, mekune hi epuni lo wathebo hna hamëne hnei Iehova kowe la itre keme me thin? Hnei Nyidrëti hna qaja ka hape: “Nge amë ju la ite tenge ewekë celë e kuhu ite hni nyipunie me ite u i nyipunie, nge otheju it’eje nune hatene ngöne la ite ime i nyipunie, nge tro it’ej’ a nyine otene la göpadi akawane la ite lue meke i nyipunie. Nge tro nyipunie a inin’it’eje kowe la ite nekö i nyipunie, kola ithahnatan’it’eje e lapa eö hnine la uma i’ö, me tro e kuhu gojeny, nge eö a meköl, me mejë hmaca.” (Deuteronomi 11:18, 19; wange ju fe la Deuteronomi 6:6, 7.) Thaa kolo kö lai a hape, tro la itre keme me thine a cainöje lapa kowe la itre nekö i angatr. Ngo loi e tro pala hi la hene la fami trene ihnim, a hmekëne me thupëne la itre ijine troa eköthe hnyawa pala hi la itre aqane mekune ne la fami i angeic, ngöne la götrane ne la ua.
IHAJI ME METRÖTR
15, 16. (a) Nemene la ihaji? (b) Drei la atrekë hnëqane la troa hamëne la ihaji, nge qa i drei la troa atre hnyawa, ka hape, maine hna wangatrune hnyawa kö?
15 Ame la ihaji ke, celë hi ini nyine iameköti, nge jëne tro lai a ifekeune fe la itre mekun. Eje ngöne la ihaji la mekune ne troa iameköti, ngo thaa tro kö a canga hule kowe la hna kootr— ngacama ngöne la itre xaa ijin, ke nyipi ewekë troa ikootrë. Kola mama laka, nyipi ewekë troa hajine la itre nekönatre e co petre kö angatr, nge ngöne hë la angatre a thöth, loi e troa thele la itre xaa aqane ihaji, ma troa nyimutre catre hune lo kola co. Kola jelenyipicine lai hnene la itre thöthi ka hetrenyi hë la inamacan.
16 Kola qaja hnei Tusi Hmitrötre ka hape: “Ame la hmo, te kola methinëne la hna inine hnei keme i nyën; ngo ame la ate kapa la ihaji, te, maca mek.” (Ite Edomë 15:5) Sisitria la ini hne së hna xome qa ngöne la trepene meköti celë. Eje a upi së troa hamëne la ihaji. Thatreine kö tro la thöthi a ‘kapa la ihaji,’ e thaa hna hamëne kö ej. Hna hamëne hnei Iehova kowe la itre keme me thine la hnëqa ne troa hamë ihaji, nge pane qa i kem troa aeatrëne lai. Ngo nyipici fe laka, ka loi e tro la itre thöthi a kapa la ihaji. Maine tro angeice a drengethenge la nyipi ihaji qa thene la keme me thine i angeic, tro ha tru hnei hna ini hna xome qa ngön, nge tro fe ha co la itre ngazo hna kuca. (Ite Edomë 1: 8) Kola qaja hnei Tusi Hmitrötre ka hape: “Troa pë ewekë me hmahma la ate sixelene la hna inin; ngo troa atrune la ate denge la ihaji.”— Ite Edomë 13:18.
17. Nemene la aqane tro la itre keme me thine a tuluthe la ihaji hnei angatre hna troa hamën?
17 Nyipi ewekë tro la itre keme me thin, a atreine tuluthe la aqane tro angatre a hajine la itre nekö i angatre thöth. Thaa loi kö e troa catrehnine la aqane hamë ihaji, wanga aelëhnine jë la itre kuku maine ananazijëne pena la mejiune i nyudren. (Kolose 3:21) Ketre, thaa tro kö angatre a hnöthe troa hajine la itre nekönatr, wanga triane pi nyudrene la ini ka sisitria. Akötre la pune kowe la atre wangacone me wangahmalohmaloeëne la hnëqa i angeic. Ite Edomë 29:17 a qaja ka hape: “Hajinejë la nekö i’ö, nge tro eö a lapa hnyawa, me madi la hni’ö.” Ngo kola e ngöne la xötre 21 ka hape: “Ame la ate nekö hnimëne la hlue i angeice qan’e nekönat, tro pena nyën’e [elanyi a pë ole NW].” Ngacama kola qeje hlue hnene la xötr, ngo nyine thatraqane fe la itre thöthi lai e hnine la fami.
18. Hatrene nemene la ihaji, nge nemene la hna troa neëne hnene la itre keme me thine maine tro angatre a hamëne la ihaji hna tuluth?
18 Eje hi laka, kola mama la enyipicine la ihnimine la keme me thine kowe la nekö i nyidro, qa ngöne la aqane hamëne i nyidro la ihaji ka loi. (Heberu 12:6, 11) Maine ka hnaho epun, öhne hi epuni la ejolene la troa hamëne pala hi la ihaji hna tuluthe hnyawa. Ma tro epuni a mekune ka hape, loi e troa nue la thöthi ka pi hune troa kuca la aja i angeic, matre hetrenyi la tingetinge e hnine la fami. Ngo troa hetre ethane la aqane mekune cili, pine laka, pë hmaca kö atreine troa wenë elanyi la kuku.— Ite Edomë 29:15; Galatia 6:9.
HULIWA ME ELO
19, 20. Nemene la aqane tro la itre keme me thine a waipengöne la itre nyine madrine ne la itre nekö i angatre thöth?
19 Ngöne lo itre hneijine ekö, hna majemine hnene la itre nekönatre troa ixatua ngöne la hnalapa, maine troa tro helep. Ame enehila, tru catre la itre thöthi ka troagö menu ne pë jol. Celë hi matre, kola canga sesë hnene la itre ka thele mani troa kuca me hnëkëne la itre ewekë ka nyimutre catr, thatraqane la itre hnepe ijine pë jole cili. Maine hnei epuni hna nyixane lai hnene laka, fene a thaipiëne la itre trepene meköti qa hnine la Tusi Hmitrötre göi thiina ka loi, haawe, ame la pune lai ke, ngazo.
20 Qa ngöne lai, loi e qanyine la itre keme me thine a inamacane ngöne la aqane troa iëne me axeciëne la itre nyine amadrinëne ka ijij. Tro pala hi a mekune hnyawa laka, kola tru trootro la thöth. Kola tro la itre macatre, nge troa atraqatre trootro la ajane i angeice troa xomi angeice ceitu me itre ka tru. Qa ngöne lai, thaa tro kö lue trefëne a othe menune pala ha la aja ne la itre thöthi ngöne la angatre a tru trootro, göi itre nyine madrin— nge maine itre nyine madrine lai ka akökötrenyi angatre ngöne la ua, loi e troa wangatrune itre ej, ke jëne tro hi lai a amamane la aqane kökötre trootro i angatr, nge matre macaje pi angatre ngöne la ua. Ngöne la itre xaa ijin, ma tro la thöthi a iëne menune la ketre pengöne miuzike ka ngazo, maine itre sine ce elo, me itre xaa ewekë ju kö. Maine troa traqa la ewekë cili, nyipi ewekë troa ce ithahnatane lai me angeic, matre atreine troa thupëne la aqane troa waiewekë hnyawa ngöne la itre drai ka troa xulu.
21. Tuneka la aqane thupëne elanyi la thöth, e hna tuluthe hnyawa la etrune traeme ne troa madrin?
21 Ije traeme nyine tro së a xome thatraqane la itre nyine madrin? Ngöne la itre xaa nöj, kola upe la itre thöthi troa kapa la mekune laka, pëkö atre troa sewe angatre troa kuca lapaane la itre nyine madrin. Celë hi matre, ngöne la porogarame ne la ketre thöth, ke, pë hë hnen la itre xaa huliwa, ase jë hi “kuca la ketre nyine madrin” matre ketre jë pena, nge tune pala hi. Qa ne la itre keme me thine troa inine la itre nekö i angatr, troa hane xomi ijine troa kuca la itre xaa huliwa, maine troa etide me fami, me ketre ini tus, troa hane porotrike memine la itre atr ka macaje ngöne la ua, troa sine la itre icasikeu ne la itre keresiano, nge tro fe a hane ixatua ngöne la hnalapa. Cele hi aqane troa neëne la itre “aciacine la mele celë”, wanga troa thahe la Wesiula i Akötresie.— Luka 8:11-15.
22. Nemene la ka troa nyi nyiköne la itre nyine madrin, matre thaa tro kö itre eje a ahacene caasine la ketre götrane la mele ne la thöth?
22 Hna qaja hnei Solomona joxu, ka hape: “Ate hë ni laka pëkö loi angat, loi pe troa madine me kuca la loi e mele pete kö; nge kete laka e xeni la ate me ij, me madine la loi ngöne la nöjei huliwa i angeic’asë celë hi ahnahna i Akötresie.” (Ate Cainöj 3:12, 13) Nyipici, hetre göhnene fe la madrine ngöne la mele hna tuluthe hnyawa. Ngo ketre tune fe la troa catre huliwa, nyipi ewekë fe eje ngöne la mel. Nyimutre catre la itre thöthi enehila ka thatre kö la madrine hna troa kapa e hna catre huliwa, maine pena paatre kö la sipu mejiun, lo hne së hna kapa e troa qëmeke kowe la ketre jol, me cile kow. Ame itre xan, thaa hna hamë ixatua kö koi angatre troa akökötrene la atreine i angatr, maine troa inine pena la ketre metie nyine loi thatraqane la mele i angatr. E cili hi la jole ka tru kowe la itre keme me thin. Hapeu epuni fe kö a hane thele nyine loi kowe la nekö i epun, jëne la itre ewekë cili? Maine tro epuni a atreine inine hnyawa la nekö i epuni thöthi troa wangatrune me hetrenyi la ajane troa catre huliwa, haawe, tro hë angeice a hetrenyi la ketre aqane waiewekë ka lolo, jëne manathithi kowe la mele i angeic.
QA NGÖNE THÖTHI UTI HË E THUPËTRESIJI HË
23. Tuneka la aqane tro la itre keme me thine a xatuane la itre nekö i angatre thöth?
23 Maine troa hetre jole i epuni memine la nekö i epuni thöth, ngo loi pe: “Tha tro kö a ase la ihnim.” (1 Korinito 13:8) The cile hnö kö troa amamane la ihnimi epuni koi angeic. Ketre isa hnyinge ju epuni ka hape, ‘Eni kö a hane qaja aloine la neköng, hnene laka, hnei angeice hna ketre cile kowe la itre jol, maine ketre cile catre kowe la itre itupath? Eni kö a hane xölehuje la itre ijine troa fe la ihniming, me amamane koi angeice laka, ka tru angeice koi ni?’ Ngacama troa isazikeu la itre mekun, ngo maine drenge hnene la itre thöthi laka, atraqatre la ihnimi epuni koi angatr, tro fe hë angatre a hane amamane la ihnimi angatre koi epun.
24. Nemene la trepene meköti qa hnine la Tusi Hmitrötr, ka aejëne la trenge nyipici, göne la troa hetrune la itre nekönatr, ngo nemene pe la nyine troa mekune hnyawa pala hi?
24 Nge pine laka, kola troa tru trootro la itre nekönatr, tro hë angatre a ketre iëne la itre nyine tro angatre a kuca ngöne la mele i angatr. Nge ngöne la itre xaa ijin, ma thaa tro kö la itre keme me thine a kapa la itre mekune cili. Hapeu, ngöne la kola mekune hnene la neköne laka, thaa tro hë angeice a hane nyihlue i Iehova Akötresie? Thaa tro kö a sesëkötr, atreine hi troa traqa la ewekë cili. Celë fe hi aqane ujëne la itre angela i Iehova lai, ngöne laka, hnei angatre hna thipetrije la itre hna amekötine hnei Nyidrë me icilekeu. (Genese 6:2; Iuda 6) Thaa itre ordinatöre kö la itre nekönatr, matre troa porogaramë angatre thenge la aja së. Hna nue angatre troa kuca la itre hnei angatre hna ajan, thaa hna xomaconyi angatre kö, ketre, angatre kö a troa isa kepe thangane la itre huliwa hnei angatre hna kuca qëmeke i Iehova. Ngo kola qaja ngöne Ite Edomë 22:6 la trenge nyipici göi aqane troa ujë, hna hape: “Inine jë la nekönate thenge la jë i nyën; nge e qatë hë tha tro kö nyën’a jea qa ngön.”
25. Nemene la aqane ka sisitria, jëne tro la itre keme me thine a amamane la ole i angatre koi Iehova, pine la hnëqa hnei Nyidrëti hna aijijë angatre kow, ene la troa hiane la itre nekönatr?
25 Qa ngöne lai, hnime ju la itre nekö i epun. Catre jë troa hia angatre thenge la itre trepene meköti qa hnine la Tusi Hmitrötr. Amamai tulu ka loi jë fe, ngöne la aqane troa melëne la thiina ka ijiji Akötresie. Haawe, tro hë epuni a aijijëne hnyawa la itre nekö i epuni troa kökötre trootro matre atreine troa isa xomi hnëqa, nge tro fe hë angatre a hane xoue Akötresie. Celë hi nyipi aqane tro la itre keme me thine lai, a olene hnyawa koi Iehova, la hnei Nyidrëti hna hamëne koi angatre itre trefëne la hnëqa ne keme me thin.
NEMENE LA AQANE TRO LA ITRE TREPENE MEKÖTI CELË QA HNINE LA TUSI HMITRÖTRE A XATUANE . . .LA ITRE KEME ME THIN TROA HIANE LA ITRE THÖTH?
Nyipi ewekë troa ifekeune la itre mekun.— Ite Edomë 15:22.
Loi e tro së a wangatrune hnyawa pala hi la Wesiula i Akötresie.— Salamo 1:1, 2.
Ame la atr maca mek, ke, angeice a drenge la ihaji.— Ite Edomë 15: 5.
Isa hetre göhnene asë hi la huliwa memine la elo.— Ate Cainöj 3:12, 13.
[Iatr ne la götran 67]
Loi e tro epuni a thele troa drenge la itre nekö i epuni thöth, ngöne la ijine angatre a ajane troa porotrik
[Iatr ne la götran 69]
Nyipi ewekë catre kowe la fami, la troa inine pala hi la Tusi Hmitrötr
[Iatr ne la götran 70]
Amamane jë la ihnimi me madrine i epun, kowe la itre nekö i epun