Mekene Fotriin
Trotrohnine Jë La Mele Ne Qatr
1, 2. (a) Nemene la itre ewekë ka saze ngöne la kola easenyi trootro troa qatr? (b) Tuneka la aqane öhnyi madrinene la itre qatr ngöne la itre hneijine i Tusi Hmitrötr?
NYIMUTRE catre la itre ewekë ka saze la mele ne la atr, ngöne la angeice a qatre trootro. Kola ipië trootro la mele së. Ngöne la easë a thuluëne la qëmeke së, easë a öhne laka fitrefitre trootro hë la ikupeine ne la göpatri së, nge kolo fe ha nyiqaane cia pene qia la ihe së—nge kolo fe hë a troa paapa la nyipine he së. Ketre, easë fe hë a lapaa canga thëthëhmi. Ngöne la kola faipoipo la itre kuku nge kola traqa la itre api hmunë, kola saze e cili la itre aqane imelekeu. Ame itre xan, tro angatre a saze la aqane mel, pine laka, reterete hë angatr.
2 Nyipici laka, troa ketre itupathi ka tru la kola traqa kowe la itre macatre ne qatre trootro. (Ate Cainöj 12:1-8) Pane goeëne ju la pengöne la itre hlue i Iehova ngöne la itre hneijine ne la Tusi Hmitrötr. Ngacama hna nyipune la mele i angatre hnei mec, ngo hnei angatre hna hetrenyi la inamacane memine la trotrohnin, lue ewekë ka aijijë angatre troa hetrenyi la madrine troa melëne la mele ne qatr. (Genese 25:8; 35:29; Iobu 12:12; 42:17) Hna jëne nemene matre, tro loi me madrine angatre ngöne la angatre a qatre trootro? Eje hi laka, hna jëne la aqane melëne angatre la itre trepene meköti hne së hna öhne enehila, a hna cinyihane e hnine la Tusi Hmitrötr.—Salamo 119:105; 2 Timoteo 3: 16, 17.
3. Nemene la eamo hna hamëne hnei Paulo aposetolo kowe la itre trahmanyi me föe ka qatre hë?
3 Jëne la tusi nyidrë koi Tito, hnei Paulo aposetolo hna hamëne la itre ithuemacanyi kowe la itre qatr. Hnei nyidrë hna cinyihane ka hape: “Qâ nöjei qate troa hmek, me metöt, me ate mekun, me pë ethane ngöne la lapaun, me ihnim, me xomi hni. Kete tune la nöjei qate fö, troa thina ka ijiji Akötesie, tha itete ixöjetij, tha itete iji waina atrunyi kö, ngo itete inine la nöjei ewekë ka loi.” (Tito 2:2, 3) Maine tro epuni a wangatrune la itre trenge ewekë celë, atreine hi tro epuni a cile kowe la itre itupathi ngöne la epuni a qatre trootro.
TROTROHNINE JU LA PI MELE CAASI NE LA ITRE NEKÖ I EPUN
4, 5. Tuneka la aqane ujë ne la itre keme me thin, ngöne la kola trotrije la hnalapa hnene la itre nekö i angatr, nge nemene la aqane tro angatre a atreine melëne pe la aqane mele ka hnyipixe?
4 Nyipi ewekë troa atreine melëne la itre ijine ka saze la aqane mele ne la atr. Drei la ewekë ka mama hnyawa ngöne la kola tro qa thei keme me thine hnene la itre nekönatre ka tru hë, nge thupene lai angatre a faipoipo ju! Ame kowe la itre keme me thine ka alanyim, ke, celë hi pane ewekë lai ka amekunë angatre laka, angatre hë a qatre trootro. Maine troa madrine la itre keme me thine ngöne la kola tru trootro la itre nekönatr, ngo angatre fe a isa hnyingëne thele ka hape, maine jë hnei angatre kö hna kuca asë la hnei angatre hna atrein, troa hnëkë nyudrene hnyawa troa ketre mel. Ketre ma troa tru la hna mekune la itre nekonatr, ngöne laka kösë troa pa aliene la uma.
5 Trotrohnine hi së la aqane ujë ne la itre keme me thin, laka tro pala hi angatre a hnengazone la mele ne la itre nekö i angatr, ngacama paatre hë nyudrene qa ngöne la hnalapa. Hna qaja hnene la ketre thine ka hape: “Lapa hnyawa la hning, e tro angatre a thuemacanyi ni ka hape, egöcatre hi angatr—celë hi sipu madrinenge lai.” Hna qaja fe hnene la ketre keme ka hape: “Hace catre pi hë nyiho, ngöne la ijine kola trotrije la hnalapa hnene la nekö i nyio jajiny. Eahuni a öhne laka, kösë lo hetrenyi la ketre ewekë ka paatre me ka ahacene la fami, ke, hne huni pala hi hna ce kuca la itre ewekë.” Tuneka la aqane cile la itre keme me thine kowe la ejolene laka, paatre hë la itre nekö i angatre ngöne la hnalapa? Hetrenyi la itre xaa aqane troa kuca, ene la troa hnime me xatuane pena la itre xaa atr.
6. Nemene la ka aijijëne la itre fami troa atreine waiewekë ngöne la aqane tro angatre a imelekeu e hnine la fami?
6 Kola saze la hnëqa ne la itre keme me thin, ngöne la kola faipoipo la itre nekö i angatr. Kola qaja ngöne Genese 2:24 ka hape: “Tro la trahmanyi a nue la keme me thine i angeic, me fede kowe la fö’i angeic; nge tro nyidoti a ca ngönetei.” Maine tro la itre keme me thine a wangatrehmekune hnyawa la itre trepene meköti hna hamëne hnei Akötresie göi hnëqa i hene fami, me caasi ngöne la hnalapa, tro ha xatua angatre troa hetrenyi la aqane troa waiewekë ka loi.—1 Korinito 11:3; 14:33, 40.
7. Nemene la thiina ka loi hna xome hnene la kem, ngöne la kola faipoipo la itre nekö i nyidrë jajinyi me trotrije la hnalapa?
7 Thupene la hna ikötresae la lue nekö i nyidro jajiny, me tro qa ngöne la hnalapa, hna drenge e cili hnene la lue trefëne laka, kösë lo kola pë aliene la mele i nyidro. Ma ngöne la xötrei, tro la keme a nango wesitramenyine la lue trahmanyi ka xome la lue nekö i nyidrë jajiny. Ngo ame pe la nyidrë a pane mekune hnyawa lo trepene meköti göi mus e hnine la fami, haawe, nyidrë a trotrohnine hnyawa laka, isa qanyine hë la lue trahmanyi isa thupëne la lue hnalapa i nyidro. Celë hi matre, ngöne la kola thele ihaji thei nyidrë hnene la lue nekö i nyidrë jajiny, ke, hnei nyidrë hna pane hnyingëne koi nyidro la hna mekune hnene la lue trahmanyi nyidro, nge thupene lai, hnei nyidrë hna hane hamë ixatua, e ijij. Hetre thangane ka loi, pine laka, kolo ha xome ceitu nyidrë hnene la lue trahmanyi kösë ketre enehmu me hane kapa hnyawa fe la itre eamo qa thei nyidrë.
8, 9. Nemene la aqane tro la itre keme me thine a atreine trotrohnine la pi mele caasi ne la itre la itre nekö i angatre ka tru hë?
8 Ngo hapeu, e pëkö hna kuca hnene la itre ka xötrei faipoipo ka isazikeu memine la Tusi Hmitrötr, nge xele kö angatre ma xötrethenge la itre ewekë hnene la itre keme me thine hna mekune ka hape, ka sisitria? Hna qaja hnene la ketre trefëne trene kuku ka ikötresae hë, ka hape: “Nyiho pala hi a xatua nyidro troa thele la aqane wai ewekë i Iehova, nge maine thaa caasi kö la mekune i nyiho me nyidro, ngo nyiho a kapa la aja i nyidro me hane hamë ixatua me ithuecatre koi nyidro.”
9 Ngöne la itre xaa götrane e Azia, nyimutre catre la itre thine ka hacene laka, kola troa uke qa thei angatre la itre nekönatre trahmany. Ngo maine tro pe angatre a metrötrëne la emekötine la musi hnine la fami, tro ha nango co kötre la itre ihmönyinyi i angatre memine la itre ifapi angatr. Kola öhne hnene la ketre keresiano föe laka, “ketre aqane ole ka tru” la kola tro la hanekö i eahlo trahmanyi ka tru hë, qa ngöne la hnalapa. Eahlo a madrine troa goeëne la atreine i angatre troa isa elemekene la itre sipu fami i angatr. Troa hetre thangane ka lolo kowe la mele ne la keme me thine ka qatre trootro, ngöne laka, pëkö sesew ngöne la ngönetrei me ngöne la mekune i nyidro.
ACATRENE JË LA ITRE OTRENE FAIPOIPO I EPUN
10, 11. Nemene la eamo qa hnine la Tusi Hmitrötre ka troa xatuane la itre atr, troa neëne la itre itupathi ka traqa kowe la itre thupëtresije me föe hmae?
10 Nyimutre la itre pengöne aqane ujë ne la itre atr, ngöne la angatre a thupëtresiji me föe hmae. Nyimutre la itre trahmanyi ka thele troa heetre kösë hmaca lo itre thöth. Ketre thaa lapa hnyawa kö la mekunene la itre föe ka alanyim, pine laka, saze hë la pengöne la ngönetrei angatr; paatre palua ha thei angatre lo meci ne föe, nge thaa tro hmaca kö a tune ekö lo. Ketre ngazo pi hë la thiina ne la itre xaa ka traqa hë kowe la itre macatre cili, ngöne laka, angatre a ihanyi memine la itre thöth trahmanyi maine jajiny, matre troa thele troa zalu la itre fö i angatr. Loi e troa “wië la itre mekune [NW]” ne la itre qatre me qatre föe ka nyihlue i Akötresie, ene la troa lepe trije la itre aja ka ngazo. (1 Peteru 4:7) Ketre tune mina fe la itre föe ka macaj, angatre a catre troa thupëne la faipoipo, hnene laka, tru la ihnimi angatre kowe la fö i angatr, nge aja i angatre fe troa amadrinë Iehova.
11 Hna cinyihane hnei Lemuela joxu jëne la ua, la aqane atrune la “föe loi thina” ka kuca la loi kowe la fö i nyidro “nge tha ngazo kö ite drai ne mele nyido asë.” Loi e tro la keresiano trahmanyi a wangatrune la aqane catre la föe i angeic, troa cile kowe la itre ijine ngazo ka traqa ngöne la mele i eahlo. Tro la ihnimi nyidrë a iupi troa ‘atrunyi eahlo.’—Ite Edomë 31:10, 12, 28.
12. Tuneka la aqane tro la lue trefëne a ce mele hnyawa, nge kolo pala hi a tro la itre macatre?
12 Ngöne lo lai itre ijine ihetru, hnei epone asë hi hna pane amë pe la itre aja i epon, nge kola pane nyipiewekëne la itre aja ne la itre nekönatr. Ame hë ngöne la angatre a tro qa ngöne la hnalapa, e cili, epuni a ujë hmaca jë pe kowe la mele ne trefëne i epun. Kola qaja hnene la ketre trahmanyi ka hape: “Ngöne la kola tro qa celë hnalapa la nekönge jajiny, eni a nyiqaane ju troa easenyi catre kowe la föeng.” Kola qaja fe hnene la ketre ka hape: “Nyiho a igoeë me thupëne e tithe ju la ketre e nyiho hnei mec, nge nyiho a iamekunë pala hi troa enijëne la ngönetrei.” Nge hnene laka, thaa ajane kö nyidro troa lapa caas, haawe, nyidro a könëne la itre xaa atrene la ekalesia me amamane la ihnimi trehnyiwa i nyidro. Nyipici laka, jëne manathithi la troa hane wangatrune la itre xaa atr. Nge ketre, nyine amadrinë Iehova fe lai.—Filipi 2:4; Heberu 13:2, 16.
13. Nemene la thangane hna kapa hnene la lue trefëne ka qatre trootro, maine tro nyidroti a ifekeune hnyawa la itre mekun, me inyipicikeu?
13 Thaa tro kö a nue la ketre ewekë troa aiananyi epuni koi fö i epun. Thaa tro kö a ijuetrënekeune la itre mekun, loi e troa fe amamane hnyawa itre ej. (Ite Edomë 17:27) Kola qaja hnene la ketre trahmanyi ka hape: “Nyiho a itrotrohni hnyawa hnene laka, thaa hnei nyiho kö hna isa wai melen, ngo nyiho pe a iwangatruny.” Caasi fe la mekunene la föe i nyidrë, eahlo a qaja ka hape: “Ngöne laka nyiho hë a qatre trootro, hetre madrine i nyiho troa ce iji tri, me ce porotrik, me ce huliwa.” Maine tro epuni a mele nyipici, thatreine kö troa xecixecie la itre otrene la faipoipo i epun, ngo tro pe a nyiecatrene itre ej, matre atreine troa qemëke kowe la itre icilekeu i Satana, lo atre akaqane la itre faipoipo.
NYIPIEWEKËNE JË FE LA ITRE API I EPUN
14. Nemene la ixatua hna hane hamëne hnene la qaqa i Timoteo, ka aijijëne la api hmunë troa ketre keresiano?
14 “Itrapetre” ne la itre qatr la itre api i angatr. (Ite Edomë 17:6) Ketre madrine ka tru la troa pane ce lapa memine la itre api hmunë—ketre, nyine iaegöcatreny me iakeukawany. Tusi Hmitrötre a qaja aloinyi Lois, ketre qaqa hmunë, me nekö i eahlo jajiny, Eunika la ëjen, hnei nyidro hna ce thawa la lapaune i nyidro memine la neköne nge api hmunë, ene Timoteo. Kola tru atre hnene la nekönatre celë, laka, ame la hna wangatrune hnene la thine me qaqa hmunë, ke, ene la nyipici ne la Tusi Hmitrötr.—2 Timoteo 1:5; 3:14, 15.
15. Nemene la ewekë ka ijije nyine troa hane kuca hnene la itre qaqa hmunë kowe la itre api i angatr, ngo nemene la nyine tro angatre a neën?
15 Qa ngöne lai, celë hi sipu götrane lai, ka aijijëne la itre qaqa hmunë troa hane hamëne la ketre ixatua ka ijij. Itre qaqa hmunë, ase hë epuni hane hamëne kowe la itre nekö i epuni la hnei epuni hna atre, ngöne lo itre aja i Iehova. Enehila ijije fe tro epuni a hane kuca tune lai kowe la itre xötre thupen! Nyimutre la itre nekönatre ka madrine troa drenge la itre qaqa i angatre a qaja la itre isitoare ne la Tusi Hmitrötr. Eje hi laka, thaa epuni kö a troa thapa la hnëqa ne la kem, ene la troa inine la itre nekö i angeice la nyipici qa hnine la Tusi Hmitrötr. (Deuteronomi 6:7) Atreine hi tro epuni a ixatua troa hamëne lai ini. Nge tune la atre cinyihane la salamo, ma epuni fe a hane thithi ka hape: “Nge dei fe la, Akötesieti fe, the nue ni kö e qatë hë ni, me qia ha ni, pane tro ni a amamane la themie i cilie kowe la xöte celë, memine la mene i cilie koi ange ka troa traqa.”—Salamo 71:18; 78:5, 6.
16. Nemene la aqane tro la itre qaqa hmunë a neëne wanga zö i angatre jë la itre ikucanyi e hnine la fami i angatr?
16 Ame pe la engazone ke, itre xaa qaqa hmunë a xeexe menune pala ha la itre api i angatre matre, qaane iwesitrë i angatre lai memine la itre nekö i angatre ka tru hë. Ngo eje hi laka, hnene la aqane menyike i epuni kowe la itre api i epun, ma nango hmaloi hi koi angatre troa qaja amamane koi epuni la itre jole ka eje thei angatr, nge ma cile hnö angatre qëmekene la itre keme me thine i angatr. Ame ngöne la itre xaa ijine ke, kola ajane hnene la itre api hmunë tro la itre qaqa i angatre a ceme angatre troa icilekeu memine la itre keme me thine i angatr. Nemene la nyine troa kuca e cili? Loi e troa inamacane me xatuane la itre api i epuni troa fe la hni angatre kowe la itre keme me thine i angatr. Qeje pengöne ju koi angatre laka, celë hi ka troa amadrinë Iehova lai. (Efeso 6:1-3) Maine ijij, sipo angatre jë tro epuni a tro qëmeke i angatre troa wange la keme me thine i angatr, matre troa hnëkëne la traqa i angatr. Nyipici ju kowe la itre api i epun, ngöne la epuni a troa qaja la itre hnei epuni hna inine ngöne la itre macatre ka ase hë. Atreine hi tro angatre a kepe thangane ka loi, e hnei epuni hna mele nyipici, me qaja pala hi la trenge nyipici.
LOI E TROA ATREINE MELE THENGE LA MACATRE
17. Nemene la hna ajane catrëne troa kuca hnene la atre cinyihane la salamo, nyine troa xötrethenge hnene la itre keresiano ka qatre hë?
17 Kola tro la itre macatre, nge epuni a öhne laka, thatreine hë epuni troa enije tune e cili lo, me kuca asë la nöjei hnei epuni hna ajan. Tune ka la aqane tro la ketre atr a melëne la itre ijine angeice a qatre trootro? Ngöne la hni, maine jë epuni a mekune ka hape, 30 lao macatre i epun, ngo ame pe la epuni a thulu, thaa kolo hmaca kö lo epuni ekö. The thixötre menu kö. Hna sipo iele Iehova hnene la atre cinyihane la salamo, ka hape: “The nue tiji ni kö ngöne la ijine qat; nge the nue ni kö e pate la egöcateng.” Loi e troa xecie la mekune i epun, ene la troa xötrethenge la aqane catre ne la atre cinyihane la salamo. Hnei nyidrë hna qaja ka hape: “Tro pala kö ni a lapaune me atrunyi cilie o drai.”—Salamo 71:9, 14.
18. Nemene la aqane tro la keresiano ka macaje a anyipiewekëne me huliwane hnyawa la reterete i nyidrë?
18 Nyimutre catre la itre ka canga hnëkë hë troa akökötrene la aqane tro angatre a atrunyi Iehova, thupene la hna fenesi hna huliwa i maseta. Hna qaja hnene la ketre keme ka reterete hë enehila ka hape: “Hnenge petre kö hna canga hnëkëne la nyine tro ni a kuca, ngöne la kola afenesine elanyi la ini hnene la nekönge jajiny. Ase hë ni mekune e kuhu hninge laka, tro ni a xejë la huliwa ne cainöje trootro, kösë ketre pionie hut, nge eni a troa salemëne ju fe la ewekëng, matre ijije koi ni troa nyihlue i Iehova. Eni a thithi ju me sipo Akötresieti troa köja gojenyi ni.” Maine epuni a easenyi trootro kowe la itre macatre ne fenesi hna huliwa i maseta, thele jë la keukawa ngöne la trenge ewekë ne la Atre ixupi ka draië, hna hape: “Nge ini hi uti hë qatë hë nyipunie, nge tro ni a xepe trogëne uti hë qia ha.”—Isaia 46:4.
19. Nemene la ihaji hna hamëne kowe la itre atr ka qatre trootro?
19 Thaa ewekë ka hmaloi kö la troa atreine mel, ngöne la kola fenesi hna huliwa i maseta. Hnei Paulo aposetolo hna eamone la itre qatre troa “hmek.” Qa ngöne lai, loi e tro angatre a atreine xomehnöthe la itre aja i angatr, thaa tro kö a kei thenge la ajane troa thele la gaa hmeleke thatraqane la mel. Ma ame hë ngöne la kola reteret, kola mama laka, nyipi ewekë catre hë troa hnëkëne hnyawa la itre nyine troa kuca, me troa atreine xötrethenge fe itre ej. Loi e troa hetre nyine tro pala hi a kuca, nge, “cate jë troa huliwa i Joxu pala hi, ke ate hë nyipunie laka thaa gufa kö la huliwa i nyipunie kowe la joxu.” (1 Korinito 15:58) Kuca jë la itre xaa huliwa nyine ixatua fe kowe la itre xan. (2 Korinito 6:13) Nyimutre la itre keresiano ka huliwa tune lai ngöne la angatre a catre cainöjëne la maca ka loi, ngacama kola uti ipië trootro la mele i angatr. Pine laka, epuni a qatre trootro, loi e tro epuni a “pë ethane ngöne la lapaun, me ihnim, me xomihni.”—Tito 2:2.
CILE CATRE JË E MECI JU LA FÖE I EPUN
20, 21. (a) Ngöne la fene enehila hneijine së, nemene la ka aisalapane la lue trefën? (b) Tuneka la aqane hamëne Ana la ketre tulu ka loi, thatraqane la itre föe me trahmanyi hna meci trij?
20 Ewekë ka hace ngo ka traqa fe ngöne la hneijine së enehila, ene laka, kola aisalapane la lue trefëne hnene laka, hna meci hnene la ketre e nyidro. Atre hi la itre föe hna meci trije laka, kola meköle enehila la itre hnei angatre hna hnim, nge angatre a mejiune laka, tro hmaca angatre a iöhny. (Ioane 11:11, 25) Ngo thaa tro jë kö a paatre la hace cili. Nemene la aqane tro la trefëne ka mele pe, a cile kowe la akötre cili?a
21 Loi e tro së a mekune hmaca la hna kuca hnene la ketre atr hna qaja hnei Tusi Hmitrötr, celë hi ka troa xatua së lai. Hna meci triji Ana, thupene la sevene lao macatre ne faipoipo, nge ngöne la easë a goeëne la mele i eahlo, 84 la etrune la macatre i eahlo. Ngo eje hi laka, hnei eahlo hna treije latresi pine la meci ne la fö i eahlo. Nemene la aqane ahmaloeë eahlo qa ngöne la akötre cili? Hnei eahlo hna nyihlue i Iehova Akötresie ngöne la ēnē, lai me jidr. (Luka 2:36-38) Kola mama hnyawa laka, ame la aqane catre Ana troa huliwa i Akötresie, ke, celë hi ketre nyin ka tru thatraqane la hace i angeic, memine laka ketre sine föe ka lapa caasi pë hë.
22. Nemene la aqane cile kowe la ejolene la mele caasi pe, hnene la itre sine föe memine la itre trahmanyi hna meci trij?
22 Kola qaja hnene la ketre föe ka 72 lao macatre, nge sine föe pë hë thupene la trene lao macatre, ka hape: “Ame la itupathe ka tru koi ni ke, ene laka, pëkö hnenge hna troa ithahnata kow. Ka itrotrohni catre la föeng, atreine nyidrë troa hane drenge la itre xaa mekun. Nyiho a porotrikëne la ekalesia, memine la pengö i nyiho ngöne la huliwa ne cainöje i keresiano.” Kola qaja hnene la ketre sine föe ka hape: “Maine nyipici laka, troa nyimu drai matre paatre pi la itre xaa eatr, ngo eni a öhne hnyawa laka, troa meu la eatr e hna huliwane hnyawa la itre drai cili. Epuni ngöne la ketre göhnë ka sisitria, ka aijijë epuni troa xatuane la itre xan.” Kola kapa fe la mekune cili hnene la ketre sine föe ka 67 hë lao macatre, öni eahlo: “Ame la ketre aqane ka sisitria troa cile kowe la meci ne la föe hmunë, ke, ene la troa ketre hane akeukawane fe la itre xaa atr, hnene la itre ithuecatre ka hetre thangan.”
HNA WANGATRUNE HNEI IEHOVA LA ITRE IJINE KOLA QATR
23, 24. Nemene la ixatua ka tru nyine akeukawane la itre föe me trahmanyi ka qatre hë, tune lo itre hna meci trij?
23 Ngacama meci a iananyi së memine la föe së hne së hna hnim, ngo ka mele nyipici pala hi Iehova nge pëkö trengathoi thei Nyidrë. Hnei Davita hna nyimane ngöne la angeice a qatr ka hape: “Casi la ewekë hnenge hna sipo Iehova, nge tro pala kö ni a thel’ej; laka mate lapa ju ni ngöne la ene i Iehova nöjei drai asë ne mele ni, troa goeëne la lolo i Iehova, me hnyingëne ngöne la ene i Nyidrë.”—Salamo 27:4.
24 Paulo aposetolo a hamë ithuecatre me hape: “Metötëne ju la nöjei sine föe itre nyipi sine föe.” (1 Timoteo 5:3) Hetre ini ka mama qa ngöne la hna amekötine celë, ene laka, loi e tro la ekalesia a xatuane la ketre trejine sine föe, ka pëkö sipu fami e hnine la organizasio. Eje hi laka, ame la aliene la hna amekötine celë, hna hape, “metötën” ke kola nyitrepene fe la mekune göi troa wangatrunyi nyudren. Drei la ithuecatre nyine akeukawane la la itre föe me trahmanyi hna meci trij ka nyihlue i Akötresie, ngöne la angatre a atre laka, Iehova a troa hane wangatrunyi angatre me sajuë angatr!—Iakobo 1:27.
25. Nemene la ewekë hna mejiune kow hnene la itre qatr?
25 Kola qaja hnene la Wesi ula i Akötresie, ka hape: “Ame la elolone la ite qate, te, iqia.” Nge celë fe “korona ka lolo la iqia e hna öhne ngöne la jëne ka meköt.” (Ite Edomë 16:31; 20:29) Qa ngöne lai, ngacama ka faipoipo epuni maine epuni pë hë a mele caasi pe, catre jë pe troa amë panëne pala hi la huliwa i Iehova ngöne la mele i epun. Tro hë epuni a hetrenyi enehila la ketre ëje ka lolo xajawa i Akötresie, memine la mejiune troa mele epine palua elanyi ngöne la fene gaa troa pë akötre qa ngöne laka kola qatre trootro.—Salamo 37:3-5; Isaia 65:20.
[Ithueamacany]
a Maine epuni a aja ithuemacanyi ngöne la topike celë, goeëne ju la boroshüre E Meci Hë La Atr Hne Së Hna Hnim, hna cinyihane hnei Watchtower Bible and Tract Society of New York, Inc.
NEMENE LA AQANE TRO LA ITRE TREPENE MEKÖTI CELË QA HNINE LA TUSI HMITRÖTRE A XATUANE . . . LA ITRE TREFËNE NGÖNE LA ANGATRE A QATRE TROOTRO?
“Korona” ne la itre qatr, la itre api angatr.—Ite Edomë 17:6.
Atreine hi tro la itre ka qatre hë, troa thele la xaa ijine ka ijije troa nyihlue i Iehova.—Salamo 71:9, 14.
Hna xatuane la itre qatre troa “hmek ngöne la lapaun.”—Tito 2:2.
Ngacama troa hace catre la itre föe me trahmanyi hna meci trij, ngo atreine hi tro angatre a öhne e hnine la Tusi Hmitrötre la itre ixatua ka troa akeukawanyi angatr.—Ioane 11:11, 25.
Iehova a hane wangatrune fe la itre qatre me qatre föe ka catre lapaun.—Ite Edomë 16:31.
[Iatr ne la götran 166]
Ngöne la epuni a qatre trootro, ifekeune ju la ihnimi epun