Mekene Thötriin

Maine Kolo Ha Troa Isa Lapa La Lue Trefën

1, 2. Ngöne la kola traqa la ketre jole ka tru hnine la faipoipo, nemene la nyine troa hnyingëne thel?

AME lo macatre 1988, hnene la ketre föe ne Italia Lusi la ëje i nyidro, hna pane kucakuca.a Hna isa lapa hnei nyidro, thupene la trene lao macatre. Nyimutre pi hë la itre ijine eahlo a thele troa iloi hmaca memine la trahmanyi eahlo, ngo thaa ie pi kö. Celë hi matre eahlo a isa lapa ju me nyidrë, pine laka, thaa ihmeku kö nyidro; enehila lue nekönatre jajinyi pëhë nyine tro eahlo a hetrune caasin. Ame la Lusi a mekune hmaca la itre macatre ka paatre hë, nyidro a qaja ka hape: “Ame e kuhu hninge ke, pë hmaca kö ka atreine troa iakeu nyiho.”

² Maine kola hane traqa fe la itre jole kowe la faipoipo i epun, ma tro epuni e cili a hane trotrohni Lusi. Ma troa gomegome la faipoipo i epun, matre epuni a isa hnying, maine atreine jë pala kö troa cilaxome la faipoipo i epun. Maine jole lai ka traqa koi epun, ma loi e tro epuni a wangatrune la hnyinge celë, hna hape: Hapeu, hnenge kö hna xötrethenge la nöjei eamo ka loi asë hna hamëne hnei Akötresie hnine la Tusi Hmitrötr, jëne manathithi kowe la mele ne trefën?​— Salamo 119:105.

3. Maine kola elë catre la sei hna cile enehila, ngo nemene la hna öhne ngöne la aqane mekune ne la itre atr ka alanyim, itre ka itriji hë memine fe la itre fami i angatr?

³ Ngöne la kola catrehnine la itre jole ka eje thene la trahmanyi me föe, ame la nyin ka canga mama cile nge hna mekune ka hape, ka hmaloi, ke, ene la troa isa lapa. Ngo ngöne la itre nöje ka nyimutre, gaa tru fami ka kaqa, kola öhne laka, alanyimu catre la itre föe me trahmanyi ka itrij ka ietrane hmaca la aqane ujë i angatr, kola mekune ka hape, loi kö ekö thaa tro kö a isa lapa. Alanyimu kö angatre itre ka hetrenyi la mele ka kucakuca ngöne la ngönetrei, memine fe ngöne la mekun, hune lo itre trefëne ka catre cilaxome la faipoipo i angatr. Thaa ka pë ethane kö la itriji ne la lue trefëne kowe la mele ne la itre nekönatr, nge itre macatre ne tro nyudrene a akötre fë la hace cili. Troa akötre fe la itre keme me thin, memine la itre sine ce elo ne la lue trefëne ka sei hna cil. Nge nemene fe la mekune i Akötresie kowe la ewekë cili, Nyidrë, Atre acile la faipoipo?

4. Nemene la aqane troa cile kowe la itre jole e hnine la faipoipo?

⁴ Tune lo hne së hna wange hë ngöne lo itre mekene hnapan, ame la aja i Akötresie ke, ene laka, tro la faipoipo a cile hut. (Genese 2:24) Pine nemene kö la kola kaqa la itre faipoipo? Eje hi laka, thaa hna acaa tro isa lapa kö la itre trefën. Hna pane nyiqaane mama pala hi la itre hatrene ka ngazo nyine hmekën. Maine ka pë pengöne la itre jole ngöne la qaan, ngo atreine hi tro itre eje a kökötre trootro uti hë la thatreine troa cile kow. Ngo maine hna thele ixatua qa hnine la Tusi Hmitrötr, matre troa cile kowe la itre jole cili, eje hi laka, troa nyimu trefëne ka neëne la mekune troa isa lapa.

LOI E TROA ATREINE WAI EWEKË

5. Nemene la ketre aqane mele hna troa qëmeke kow hnene la itre xaa faipoipo?

⁵ Ame la ketre jëne matre traqa pi la itre jole e hnine la fami, ke qa ngöne la ketre ewekë hna mejiune menune kow hnene la lue trefën, maine ketre e nyidro. Nyimutre la itre ewekë ka hamë mejiune maine itre ewekë pena hna puje hnihnin, a ka iananyi catre memine la itre ewekë hna troa melën, kola xulu qa ngöne la hna e itusi ne kuci ihanyi, itre zonale hna piine hnene la ka alanyim, itre porogarame ne televizio, me itre film ne sinema. Ame ngöne la kola öhne laka, thaa eatre kö lo itre hna mejiune kow, ene pe kucakuca ju hi pine laka, ase hë hnihnin, pë hë madrin, kösë haitre hë la mel. Matre tuneka la aqane tro la lue atr ka ngazo, a hetrenyi la madrine e hnine la faipoipo? Loi e troa hetrenyi la trengecatre matre atreine troa lolo la aqane troa ce mel.

6. (a) Nemene la mekune hna tuluthe hna hamëne hnei Tusi Hmitrötr? (b) Nemene la itre kepine matre kola iwesitrë hnine la fami?

⁶ Tusi Hmitrötre a hamëne la itre ixatua ka hetre thangane kowe la mele ne la atr. Eje a qaja amamane la itre madrine ne la faipoipo, ngo kolo fe a ithuemacanyi koi ange ka ikötresai laka, “tro ha hete aköte i ngönetei la ite ka tune lai.” (1 Korinito 7:28) Tune la hne së hna öhne hë, pëkö trefëne ka pexej, matre canga kei hi nyidroti kowe la ngazo. Isa pengöne kö la mekune memine la itre aliene la hni ne la itre trefën, ketre tune mina fe la aqane hetru angatr. Ngöne la itre xaa ijin, kola isazikeu la mekune ne la itre trefën, maine hnei mani, maine pi itre nekönatr, maine pi itre ifë ie hmunë. Ketre, kolo mina fe a traqa la itre iwesitrë hnine la faipoipo, hnene laka, pëkö traeme ne la lue trefëne troa ce kuca la itre xaa huliwa, maine pena isaikeu nyidro göi aqane melëne la pengö i lue trefën, ene la ce meköle trefën.b Kola aja traeme troa wangatrune la itre ewekë cili, ngo catre jë! Alanyimu la itre trefëne ka atrepengöne la aqane troa cile kowe la itre jole celë, nge angatre a ce kapa la itre nyin ka lolo.

ITHAHNATANE JË LA EISAPENGÖ SË

7, 8. Maine hna akötrëne la itre trefëne maine thaa itrotrohni pena kö nyidro, nemene la aqane ujë ka ihmeku memine la Tusi Hmitrötr, nyine tro nyidro a melën?

⁷ Alanyimu la itre atr ka thatreine xomihni, ngöne la angatre a ithahnatane la itre ewekë ka akötrë angatr, maine hnene la hna thaa itrotrohni, maine hnene pena la ketre ngazo. Thaa tro pi kö a qaja ka hape: “Thaa trotrohni ni kö hnei eö,” wanga tro la ketre e nyidro a elëhni me atrune menune lai jol. Nyimutre la itre xaa ka troa qaja fe ka hape: “Eö a meku eö hi,” maine, “Thaa hnimi ni kö hnei eö.” Ame ngöne la itre xaa ijin, ke kola lapa thaupe la ketre, wanga jele jë la trengehni ketre.

⁸ Ame la gojenyi ka sistria nyine troa xötrethenge ke, ene la troa wangatrune la eamo qa hnine la Tusi Hmitrötr, lo hna hape, “Elëhnijë, ngo the ngazo kö; ngo the lö kö la jö hune la iwestë i nyipunie.” (Efeso 4:26) Hna pane hnyingëne kowe la lue trefëne ka traqa ha kowe la hnaa 60 lao macatre ne ce mele trefën, la kepine matre tro loi la aqane ce mele trefëne nyidro. Hna qaja hnene la trahmanyi ka hape: “Hnei nyiho hna inine laka, thaa tro jë kö nyiho a meköl, nge thaa hna pane iloi kö maine ngöne la itre xaa hnepe ikucany, ngacama ka co hi.”

9. (a) Nemene la hna wangatrehmekune hnine la Tusi Hmitrötr, kösë ketre götrane ka sisitria catre ngöne la kola ifekeune la itre mekun? (b) Nemene la ka nyipi ewekë hna troa kuca ngöne la itre xaa ijin, hnene la itre trefën, ngacama troa hetre trengecatre memine la ipië?

⁹ Maine thaa itrotrohni ithahnata kö la lue trefën, nyipi ewekë tro nyidro a isa “canga deng, me hnöthe troa ewekë, me hmite troa elëhni.” (Iakobo 1:19) Thupene la hna pane drenge hnyawa la ketre e ithahnata, loi e tro asë hi la lue trefëne a iqejemenukeu. (Iakobo 5:16) Qaja ju ngöne la hni ka menyike ka hape, “menu hë ni la aqane ithahnata angazonyi ni koi eö,” celë hi aqane troa amamane la ipië memine la trenge catre ka eje the së. Ketre aqane troa cile lai kowe la itre isazikeu hnine la fami, ka troa hetre thangane catre kowe la lue trefën; thaa ngöne hmekuje kö la itre jole ka traqa koi nyidro, ngo ngöne fe laka, nyidroti a akökötrene la ihnimikeu i nyidro memine la caasi nyidro, celë hi itre jëne troa hamëne me acatrene la ajane troa ce mele madrin.

IHAMËNEKEUNE JË LA EWEKË NE LA FAIPOIPO

10. Nemene la nyine ithupë hna hamëne hnei Paulo kowe la itre keresiano ne Korinito, nyine tro fe a trongëne hnene la itre keresiano ne la hnedrai së enehila?

¹⁰ Ngöne lo Paulo a cinyanyi koi angetre Korinito, hnei nyidrë hna upi angatre troa faipoipo, ‘wanga kuci ngazo’ jë angatr. (1 Korinito 7:2) Kola ngazo la fene enehila, ngazo catre kö eje hune lo itre ewekë ka eje ekö ngöne la traone e Korinito. Nyimutre la itre ewekë ngöne la fene ka aciane la itre aja ne ngönetrei, jëne hi lai troa kuci ngazo; ene la itre aqane heetre ka ngazo, maine itre isitoare ka troa hetre ethane kowe la itre atr, a hna cinyihane hnine la itre zonale me hnine la itre itus, maine hna amamane ngöne televizio, me ngöne itre filme ne sinema. Hnei Paulo aposetolo hna qaja kowe la itretre Korinito ka mele mina fe ngöne la ketre hneijine ka tune la, ka hape: “Loi e troa faipoipo, hune la hededei.”​— 1 Korinito 7:9.

11, 12. (a) Nemene la ewekë nyine tro la lue trefëne a ihamënekeun, nge nemene la aqane tro nyidroti a ihamënekeune lai? (b) Nemene la aqane troa cile kowe la jole thene la lue trefën, maine thaa ijiji ketre kö troa hamëne la ewekë ne la faipoipo, a ngöne hi la hnepe ijine ka co?

¹¹ Qa ngöne lai, Tusi Hmitrötre a qaja kowe la itre keresiano trahmanyi ka faipoipo hë, ka hape: “Qâne la trahmanyi troa hamëne la ka ijije kowe la fö’i angeic; nge tune la föe kowe la trahmany.” (1 Korinito 7:3) Maine jë epuni a öhne laka, sisitria kö la troa ham​— hune la troa sipo. Troa hetre madrine hna kapa qa ngöne la hna ce meköle trefën, e hnene la lue trefëne hna iwangatrunyi me itheleloikeu. Hanawange la ketre ceitun, Tusi Hmitrötre a upe la itre trahmanyi tro angatre a ce mele memine la itre föe i angatr, “thenge la [atrehmekun NW].” (1 Peteru 3:7) Nge tro kö a mama hnyawa lai, ngöne la kola troa hamëne me kapa la itre ewekë ne la faipoipo. Maine ngazo la aqane ujë ne la trahmanyi kowe la föe i angeic, göi ce meköle trefën, tro ha goeëne angazone hnei föe la götrane cili, ketre götrane ka nyipi ewekë ngöne la mele ne trefën.

¹² Hetrenyi la itre ijin, kola pane thaa ihamënekeune hnene la itre trefëne la itre ewekë ne la faipoipo. Kola mama hnyawa thene la föe ngöne la itre xaa hnepe ijine ngöne la treu, maine pena ngöne laka nyidro a kucakuca. (Wange ju la Levitiko 18:19.) Troa traqa fe tune lai kowe la trahmany, maine hnene laka, kola xulu la ketre jole ka tru koi angeice ngöne la hna huliwa, matre kucakuca catre la mekune i angeic. Tro la lue trefëne a atreine qëmeke kowe la itre hnepe ijine ka jole cili, e hnei nyidroti hna ifekeune hnyawa la itre mekune i nyidro, ngöne la kepine matre kola cipane troa hamëne koi ketre la ewekë ne faipoipo; ketre, loi e tro fe nyidro a “ce hni.” (1 Korinito 7:5) Celë hi ketre aqane tro lai a canga thuemacane la ketre trefën, wanga traqa pi la itre xaa mekune ka ngazo thei angeic. Ngo troa kei kowe la itupathi elany, e hnene la föe hna thë troa cipane la edrö i fö i nyidro, maine tro pena trahmanyi a pë ihnimi ngöne la aqane ce meköle angeice me föe hmunë. Eje hi laka, maine troa mele tune lai hnene la lue trefën, jëne tro hi lai a afetrane la itre jole e hnine la faipoipo.

13. Nemene la aqane tro la itre keresiano a thupën, matre thaa tro kö a hetre ethane la itre mekune i angatr?

¹³ Tune la nöjei keresiano asë, loi e tro fe la itretre nyihlue i Akötresie a hmekëne la itre nyinyithina ka sis, ka troa aciane thene la itre atr la aja ne kuci ngazo, nge thaa thiina ne atr kö. (Kolose 3:5) Ketre loi e tro fe angatre a thupëne la itre mekune i angatre me itre thiina i angatr, ngöne la aqane tro angatre a ce mele memine la itre xaa atr, föe maine trahmany. Hnei Iesu hna ithuemacanyi ka hape: “Ame la ate goeëne la fö’i ket’ ate me meciu nyido, ase hë angeice kuci ngazo me nyido e kuhu hni.” (Mataio 5:28) Atreine hi tro la itre trefëne a neëne la kola tupathi angatre troa nyixetë, e hnei angatre hna xötrethenge la eamo qa hnine la Tusi Hmitrötr, göi ce meköle trefën. Tro hë angatre a caasi me madrine troa ce mele e hnine la faipoipo, me nyitrengamone la ce meköle trefëne, kösë ahnahna hna hamëne hnene la atre acile la faipoipo, ene Iehova.​—Ite Edomë 5: 15-19.

ITRE KEPINE QA HNINE LA TUSI HMITRÖTRE TROA SEI HNA CIL

14. Nemene la ewekë ka fetra ngöne la itre xaa ijin? Pine nemen?

¹⁴ Eloine pe, atreine hi troa cile kowe la itre xaa jole ka fetra thene la itre keresiano ka faipoipo. Ngo ame itre xaa ijin, thatreine kö troa senge la itre jole cili. Nyimutre la itre faipoipo hna thupatën, pine laka, ka ngazo la itre atr, nge ngazo la fene ka meköle e hune la ihnatrapaime i Satana. (1 Ioane 5:19) Nemene la aqane tro la itre keresiano a qëmeke kowe la ehacene la aqane mele cili?

15. (a) Nemene sipu trepene meköti hna hamëne hnei Tusi Hmitrötr, ka aijijëne la sei hna cil, me aijijëne troa faipoipo hmaca? (b) Pine nemene matre, xele ju kö la itre xaa trefëne ma sei hna cile memine la itre hnei angatre hna faipoipo memine ka nyixetë?

¹⁵ Tune lo hna amamane ngöne la mekene 2 ne la itusi celë, kuci ngazo hmekuje hi lo trepene meköti qa hnine la Tusi Hmitrötr, ka aijijëne la atr troa sei hna cil, me faipoipo hmaca.c (Mataio 19: 9) Maine mama hnyawa fe hë koi epuni laka nyipici, hna nyixetë triji epuni hnene la fö i epun, tro ha jole catre koi epuni troa axeciëne la mekune celë hna hape: Hapeu, aja i epuni pala kö troa mele hnine la faipoipo, maine tro hë epone a sei hna cil? Pëkö hna amekötine kowe la ewekë cili. Nyimutre la itre keresiano ka kapa hnene la hni ka pexeje la qeje menu ne la trefëne ka tria nge ka ietra, celë hi matre catre ju kö la faipoipo, nge tro loi hnyawa hë ej. Ame itre xan, thaa sei hna cile ju kö ke kola mekune la itre nekönatr.

16. (a) Nemene la itre xaa ewekë ka troa upe la itre xaa trefëne troa sei hna cile memine la itre fö i angatre ka ngazo thiina? (b) Maine tro la ketre trefëne hna akötrëne a mekune troa sei hna cil, maine tro pala hi a ce lapa, pine nemene matre thaa tro kö ketre a qaja angazone la mekune hnei angeice hna axeciën?

¹⁶ Ketre, troa hetre thangane ka ngazo hna troa menuëne hnene la atr ka tria, ene la troa hnaho maine troa hetrenyi pena la ketre mec (pokes). Maine pena kola ajane hnene la itre nekönatre troa thupë angatr, qa ngöne laka, kola qanangazo angatre hnene la keme maine thine i angatr. Qa ngöne lai, kola mama hnyawa laka, loi e troa wangatrune la itre ewekë cili, qëmekene troa mekune troa sei hna cil. Ngo maine atre hë epuni laka, hna nyixetë triji epuni hnene la fö i epun, nge epuni hmaca ha ce meköle trefëne me angeic, haawe, epuni hi lai a amamane ka hape, epuni a kapa la qeje menu i angeic, nge thaa aja i epuni kö troa isa lapa. Paatre hë lo lai kepine troa sei hna cil hna qaja hnei Tusi Hmitrötr, ka iaijijë hmaca troa faipoipo. Thaa tro kö ketre atr a lö hnine menune pena ha la jole ka eje thei epun, maine upi epuni troa kuca la ketre ewekë, ketre, thaa tro kö la ketre atr a qaja angazone la mekune hnei epuni hna axeciën. Epuni hmekuje kö a troa xeni thangane la itre huliwa me aqane ujë i epun. “Ke tro nöjei ate asë a isa thue ehnefen.”​— Galatia 6:5.

ITRE KEPINE TROA ISA LAPA

17. Maine thaa hna nyixetë kö, haawe, nemene la itre ifego hna amë hnei Tusi Hmitrötre göi isa lapa, maine sei hna cile pena?

¹⁷ Hapeu, hetrenyi kö la itre xaa ewekë ka troa aijijëne la lue trefëne troa isa lapa maine troa sei hna cile pena, nge thaa hna nyixetë kö hnene la ketre e nyidro? Eje hi, ngo ame ngöne la götrane celë, thatreine kö tro la keresiano a thele troa faipoipo hmaca. (Mataio 5:32) Hetre hnei Tusi Hmitrötre hna amekötine göne la pengöne la aqane isa lapa celë, laka, tro la ka trotriji föe hmunë a “lapa caasi maine iloi me trahmanyi nyidro.” (1 Korinito 7:11) Nemene la itre xaa aqane mele ka iakötrë pala ha, matre kola mama laka, ma loi e troa pane isa lapa?

18, 19. Nemene la itre xaa akötre ka tru ka upe la ketre trefëne troa isa lapa, maine troa sei hna cil, ngacama thaa ijiji angeice hmaca kö troa faipoipo?

¹⁸ Eje hi laka, ma troa pë ewekë la fami, hnene laka, pëkö hnënyengöne ne la trahmany, nge tru la itre hnei angeice hna majemine kuca ka ngazo.d Ma angeice a lapaa aluzine ngöne itre hna elo, la manie thatraqane la fami, maine pena, troa xomi kahaitre maine doroge lapaa, pine laka, thatreine hë inue memine lai itre hna majemine cili. Kola qaja hnei Tusi Hmitrötre ka hape: “Maine kete ate a tha thupëne hnyawa la . . . lapa ka ca hae me angeic, angeic’a kelikelëne la lapaun, nge atraqate la ngazo i angeice hune la ate tha lapaune kö.” (1 Timoteo 5:8) Maine tro la trahmanyi a xele ma saze, nge angeice fe hë lapaa nyithupene la itre hnei angeice hna majemine kuca ka ngazo hnene la manie ne la föe i angeic, qanyi föe kö, ngo meköti koi nyidro troa sei hna cile ngöne mus, ke kola ajane troa thupëne la mele i nyidro me itre nekönatr.

¹⁹ Ma troa traqa kowe lai, e ka isi catre pala ha la ketre, nge kola xouene elanyi e hetre ethane ju kowe la ngönetrei nge traqa pi la tria jia. Ketre, maine tro la ketre trefëne a upe ielene la fö i angeice troa sasaithe la itre wathebo i Akötresie, atreine hi tro la trefëne hna akötrëne a isa lapa, ngo ngöne hmekuje hi la kola wangatrehmekune laka, kola troa angazone la mele ngöne la ua. Maine jë tro la trefëne hna ajolëne melen, a mekune ka hape, ame hmekuje hi la aqane troa “denge thenge Akötesie hune la at” ke, ene la troa sei hna cile ngöne mus.​— Ite Huliwa 5:29.

20. (a) Maine kola troa kaqa la fami, nemene la nyine troa kuca hnene la itre enehmu memine la itre qatre thup, nge nemene fe la nyine tro angatre a neëne catrën? (b) Nemene la nyine tro la itre ka faipoipo a thupën, ngöne la angatre a troa trongëne la hna amekötine hnei Tusi Hmitrötre göi isa lapa, me sei hna cil?

²⁰ Ngöne asë hi la nöjei iangazo ka tru hnine la faipoipo, thaa tro pi kö ketre atr a ukune la trefëne hna qanangazon, troa isa lapa maine tro pena a ce mel. Eje hi laka, atreine hi tro la itre xaa enehmu ka macaj, memine la itre qatre thupe a hamë ixatua me itre eamo qa hnine la Tusi Hmitrötr, ngo thatre asë kö angatre la nöjei pengöne ewekë ka eje thene la lue trefën. Iehova hmekuje hi la ka atreine atrepengöne hnyawa lai. Celë hi matre, thaa kolo kö a metrötrëne hnene la föe la faipoipo, lo huliwa hna acile hnei Akötresie, e nyidro a thele la itre kepine ka pë pengöne matre troa isa lapa. Ngo maine troa thatreine ce mele trefën, pine laka, ngazo la aqane akötrëne la mel, haawe, thaa tro kö ketre a xöjetrije la trefën, pine la mekune i angeice troa isa lapa. “Ke tro asë hë sha ce cile qëmekene la ita ne amekötine i Akötresie.”​— Roma 14:10.

HNA IEAKEUNE HMACA LA LUE XAA KA ISA LAPA

21. Nemene la hna melëne hnene la ketre atr nyine amamane laka, hetre thangane catre la itre eamo ne la Tusi Hmitrötre göi faipoipo?

²¹ Ase hë së wange la pengö i Lusi ngöne lo xötrei, köni macatre thupene la hna isa lapa memine la fö i nyidro, hnei eahlo hna nyiqaane inine la Tusi Hmitrötre memine la itre Temoë i Iehova. Eahlo a qaja ka hape, “Eni a sesëkötr, laka, Tusi Hmitrötre a hamëne hnyawa la itre nyin ka ijije thatraqane la jole ka eje theng. Thupene petre hi la caa wiike ne ini tus, eni a canga thele ju troa iloi memine la föeng. Enehila, ijije hi tro eni a qaja ka hape, atre kö Iehova la aqane troa amelene la itre faipoipo ka öhnyi jol, pine laka, jëne la itre ini qa thei Nyidrë, hetre ixatua hna troa kapa hnene la itre trefën, ngöne la aqane tro föe me trahmanyi a imetrötrekeu. Trengathoi la hna qaja hnene la itre xaa atr, ka hape, ka aisalapa fami la itre Temoë i Iehova. Ngöne la pengö i eni, ce mekunenge memine la itre ka qaja ka hape, hetrenyi la caasi ngöne la itre fami Temoë i Iehova.” Hnei Lusi hna inine troa trongëne la itre trepene meköti qa hnine la Tusi Hmitrötre ngöne la mele i angeic.

22. Nemene la ewekë nyine tro la nöjei ka faipoipo asë a lapaune kow?

²² Thaa Lusi hmekuje kö la ka öhnyi loi ngöne la mele i angeic. Thaa ehnefe kö la faipoipo, ngo tro eje a ketre manathith. Celë hi matre, hnei Iehova hna hamëne la qeqe ne eamo ka sisitria thatraqane la faipoipo, ketre hna cinyihane ka pëkö san​— la Wesiula i Nyidrë ka sisitria. Atreine hi la Tusi Hmitrötre troa “ainamacanëne la ite wangadrapa.” (Salamo 19:7-11) Hnene eje hna amelene hmaca la itre faipoipo ka nyimutre, a kolo ha troa isalapa, me aloine fe la itre xan, ka melëne la itre xaa jole ka tru. Epi tro la nöjei ka faipoipo asë a mejiune atraqatre kowe la itre eamo hna hamëne hnei Iehova Akötresie nyine ixatua thatraqai angatr. Ka hetre thangane ka loi catre itre ej!

[Ithueamacany]

NEMENE LA AQANE TRO LA ITRE TREPENE MEKÖTI CELË QA HNINE LA TUSI HMITRÖTRE A XATUANE . . .LA FAIPOIPO I EPUNI MATRE THAA TRO KÖ EJE A KAQA?

Thaa madrine hmekuje kö la hne së hna kapa qa ngöne la faipoipo, ngo itre akötre fe.​— Ite Edomë 5:18, 19; 1 Korinito 7:28.

Loi e troa canga apaatrene la itre iwesitrë.​— Efeso 4:26.

Ngöne la kola troa ithahnatane la itre xaa mekun, nyipi ewekë catre kö la troa drenge hune la troa ithahnata.​— Iakobo 1:19.

Loi e troa ihamënekeune la itre ewekë ne faipoipo thenge la hni ka ajan, memine la hni ka menyik.​— 1 Korinito 7:3-5.

[Iatr ne la götran 154]

Troa canga senge la itre jol. The nue kö troa lö la jö, nge epuni pala hi a lapa fë elëhni