Troa Xome La Ita Ne Thup Celë e 15 Nofeba Me Wiike Cili

“Casi Hi La Mekene i Nyipunie, Ene Keriso”

“The tro kö a hë nyipunie . . . ite meken; ke casi hi la mekene i nyipunie, ene Keriso.”—MAT. 23:9, 10.

1. Drei la hna atrehmekune me kapa hnene la Itretre Anyipici Iehova nyine mekene i angatr, nge pine nemen?

HETRENYI la itre atr hna acile troa nyi mekene la itre hmi e cailo fen, tune la paap ne Roma, me itre he ne hmi ne la itre nöj ngöne la götrane ahië ne la fen, me itre xane ju kö. Ngo ame Itretre Anyipici Iehova, tre, pë fe kö atr hnei angatr hna xome me acile matre nyine mekene i angatr. Thaa itretre drei atre kö angatr maine xötrethenge pena la ketre. Ka ihmeku la aqane ujë celë memine la hna perofetane hnei Iehova göne la Hupuna, hna hape: “Hana wang, ase hë ni acilë nyidë nyine ate anyipicine kowe la nöj ; nge mekene me ate musi kowe la nöj.” (Is. 55:4) Pëkö ketre mekene hna ajane hnene la itre Keresiano hna iën me hnene la “ite xaa mamoe”; angatr a kapa hmekuje la mekene hnei Iehova hna hamë angatr. (Ioane 10:16) Angatre fe a hane cengöne kapa la trenge ewekë i Iesu, hna hape: “Casi hi la mekene i nyipunie, ene Keriso.”—Mat. 23:10.

Ketre Angela a Nyi Joxu i Isaraela

2, 3. Nemene la hnëqa hna catre kuca ekö hnene la Hupuna i Akötresie e Israel?

² Nyimu macatre qëmekene tro Iehova a eköthe la ekalesia i Keresiano, hnei Nyidrëti hna pane jëne la ketre angela matre troa mekene i Isaraela nöje i Nyidrë. Thupene lo hna thepe Isaraela qa Aigupito, hnei Nyidrëti hna qaja koi angatr, ka hape: “Hana wang, ini a upe la angela troa tro qëmeke i ’ö troa thupë eö e kuhu gojeny, me tro sai eö kowe la hnë hnenge hna hnëkën. Wai nyidëti kö, me denge thenge la aqane ewekë i nyidë, the tro kö a aelëhni nyidë ; ke tha tro kö nyidëti a nue tije la ite hnei ’ö hna shashaith ; ke e kuhu hni nyidë la ëjeng.” (Eso. 23:20, 21) Canga tro hi sa trotrohnine laka ame la angela cili, ka xome la ‘ëje i Iehova e kuhu hni nyidrë,’ tre, kolo hi a qaja lo Hupuna i Nyidrë ka cas.

³ Ame la ëje ne la Hupuna i Akötresie ngöne lo qëmekene troa hnaho nyidrëti e celë fen ceitu me atr, tre, Mikaela. Ame ngöne la tusi Daniela, hna hë Mikaela, ka hape, ‘joxu ne la nöje i [Daniela],’ ene Isaraela. (Dan. 10:21) Kola amamane hnei Iuda ketre atre dreng, ka hape, hnei Mikaela hna löhnine pala hi ekö la itre huliwa i Isaraela qëmekene lo hnedrai i Daniela. Thupene lo hna meci hnei Mose, hnei Satana hna xome la ngönetrei nyidrë matre troa nyi pengönën me thele troa ketre sipu kepe thangane qa ngön; hnei angeic hna iaöne la itretre Isaraela matre tro angatr a nyi idrolan. Ngo hnei Mikaela hna canga sesë me kuca matre thaa tro kö a kei kowe la ewekë cili. Kola qaja hnei Iuda, ka hape: “Mikaela angela ka sisitia, kola isa cate me diabolo, me kola ikelikelëne la ngönetei Mose, tha cate hnine troa jele ngazo nyën, ngo hna hape, Qâ i Joxu kö troa shewe eö.’ ” (Iuda 9) Thupene jë hi lai, qëmekene troa lepi Ieriko, kola mama hnyawa laka Mikaela hi lo “tane ishi Iehova,” ka tro troa ithuecatre koi Iosua me ahnithe koi angeic, ka hape, ce Akötresieti me angeic. (E jë la Iosua 5:13-15.) Ame ngöne la kola thele hnene la ketre joxu demoni troa sawa la ketre angela troa tro fë la maca ka nyipi ewekë catre koi perofeta Daniela, ene pe jöeë pi hi lo angela ka sisitria, ene Mikaela, troa xatuane lo lai angela ka ithuemacany.—Dan. 10:5-7, 12-14.

Kola Traqa Lo Mekene Hna Thingehnaeane Hë

4. Nemene la hna perofetane göne la traqa ne la Mesia?

⁴ Qëmekene troa traqa la jole cili, hnei Iehova hna upe la angela i Nyidrë, Gaberiela la ëjen, matre troa upi Daniela perofeta troa perofetane la traqa ne la “Mesia Joxu.” (Dan. 9:21-25)a Hna eatre hnyawa la hna perofetane cili ngöne lo macatre 29 M.K., ngöne lo kola bapataiso Iesu. Hnene la uati hmitrötr hna të hui Iesu, ene pe mama pi hi laka nyidrëti la Atre Hna Iën, ene Keriso, la Mesia. (Mat. 3:13-17; Ioane 1:29-34; Gal. 4:4) Haawe, pine laka nyidrëti la Mesia, ene pe nyidrëti hmekuje hi la Mekene së ka sisitria.

5. Hnei Iesu hna amamane tune kaa, laka, nyidrëti la Mekene së ngöne lo nyidrëti a cainöj e celë fen?

⁵ Ame ngöne lo Iesu a nyiqaane cainöj e celë fen, hnei nyidrëti hna amamane hnyawa laka, nyidrëti hi la “Mesia Joxu.” Thaa hmitre kö, nge nyidrëti ha icasikeune la itretre drei nyidrë, me kuca la pane iamamanyikeu. (Ioane 1:35–2:11) Hnene la itretre drei Iesu hna xötrethenge nyidrë, me trongëne la nöjei nöj matre troa cainöjëne la maca ka loi ne la Baselaia. (Luka 8:1) Hnei nyidrëti hna ini angatr la aqane troa cainöj, me amamai tulu ka lolo ngöne la aqane troa elemekene la huliwa ne cainöj me inine la itre atr. (Luka 9:1-6) Ame enehila, loi e tro la itre qatre thupe Keresiano a xome hnyawa la tulu i Iesu ngöne la götrane cili.

6. Hnei Keriso hna amamane tune kaa, laka, nyidrëti hi la Atre Thupë mamoe me Mekene së?

⁶ Hnei Iesu mina fe hna amamane la ketre götrane la aqane musi nyidrë, hnene la hna aceitunë nyidrëti kö memine la ketre atre thupë mamoe ka ihnim. Ame la itretre thupë mamoe ngöne la itre götran e kohië, tre, angatre la itre ka elemekene la itre mamoe i angatr. Hnei W. M. Thomson hna cinyihane ngöne la itusi nyidrë, La terre et le Livre (qene Papale), ka hape: “Kola tro pa hnene la atre thupë mamoe matre troa köja gojeny kowe la itre mamoe, me hane amamane mina fe kowe itre ej, laka, celë hi la jëne ka loi me ka sisitria thatraqane la mele ne itre ej. . . . Nyidrëti a xome la sine tö i nyidrë matre troa elemekene me engëne la itre mamoe i nyidrë kowe la itre götrane hnë tro itre ej a xen, me thupëne itre ej qa ngöne la itre ithupëjia.” Hnei Iesu hna amamane laka, nyidrëti hi la nyipi Atre Thupë mamoe me Mekene së, hnene la hna qaja, ka hape: “Ini la ate thupëne aloine la ite mamoe; ame la ate thupëne aloine la ite mamoe, angeic’ a hamëne la mele i angeice nyine göline la nöjei mamoe. Dengë hë la ite mamoenge la aqane ewekëng, nge ate hmekunyi angate kö ni, nge angat’ a xöte thenge ni.” (Ioane 10:11, 27) Hnei Iesu hna eatrëne hnyawa la trenge ewekë i nyidrë me meci thatraqane la itre mamoe i nyidrë, ngo thupene lai, hnei Iehova hna “adraië [nyidrë] nyine Joxu me Ate amelen.”—Ite hu. 5:31; Heb. 13:20.

Atre Thupëne La Ekalesia Ne Keresiano

7. Hna jëne nemene la Keriso a thupëne la ekalesia i Keresiano?

⁷ Qëmekene tro Iesu a elë hnengödrai eë nge thupene la mele hmaca i nyidrë, tre, hnei nyidrëti hna qaja kowe la itretre dreng, ka hape: “Ase hë hamë ni la nöjei musi asë e hnengödrai me celë fen.” (Mat. 28:18) Hnei Iehova hna hamë Iesu la uati hmitrötr matre troa thuecatre kowe la itretre drei nyidrë e hnine la nyipici. (Ioane 15:26) Hnei Iesu hna nenge la ua cili hune la itre pane Keresiano ngöne lo Penetekos 33 M.K. (Ite hu. 2:33) Hnene la hna nenge la uati hmitrötre cili, ene pe cile jë hi la ekalesia ne Keresiano. Hnei Iehova hna acile la Hupuna i Nyidrë matre troa musinëne qa koho hnengödrai la ekalesia e celë fen. (E jë la Efeso 1:22; Kolose 1:13, 18.) Ame enehila, Iesu a eatrongëne la ekalesia ne Keresinao jëne la uati hmitrötre i Iehova, nge “kola denge thenge” nyidrë hnene la itre angela asë.”—1 Pet. 3:22.

8. Hnei Keriso hna jëne drei matre troa elemekene la itretre drei nyidrë ekö ngöne lo hneijine i nyidrë, nge drei la hnei nyidrë hna xome enehila?

⁸ Ketre, hnei Keriso mina fe hna hamën jëne la uati hmitrötr, la “itre atr nyine ahnahna,” itre xan, “nyine thupe me ini” hnine la ekalesia. (Efe. 4:8, MN, 11) Hnei Paulo aposetolo hna ithuecatre kowe la itre qatre thup Keresiano, ka hape: “Qa ngöne lai, wai nyipunieti kö, memine la hnënge mamoe asë hnei Uati Hmitöte hna acilë nyipunie nyine itete thup, troa hiane la ekalesia i Akötesie.” (Ite hu. 20:28) Ame lo kola nyiqane acile lo ekalesia i Keresiano, tre, ame asë hi la itre qatre thup, tre, itre hna ië angatr asë hi hnei uati hmitrötr. Ame la itre aposetolo me itre qatre thup ne la ekalesia ne Ierusalema, tre, angatr a sine la lapa ne xomi meköt. Hnei Keriso hna xome la lapa cili matre troa elemekene lo gurup ne la itre “tejine” me nyidrë hna iën ekö e celë fen. (Heb. 2:11; Ite hu. 16:4, 5) Ame ngöne la hneijin ne la pun, hnei Keriso hna ahnithe kowe la “hlue ka nyipici me ka inamacan” la “nöjei ewekë i nyidëti asë”, ene lo itre aja ne la Baselaia e celë fen. Hna nyihatren la “hlue” cili hnene la Lapa Ne Xomi Meköt, ene lo gurup ne la itre Keresiano hna iën. (Mat. 24:45-47) Kola atrehmekune hnene la itre hna iën memine la itre xaa mamoe laka, maine tro angatr a xötrethenge la ka elemeken enehila, ene la Lapa Ne Xomi Meköt enehila, tre, kösë angatre hi lai a xötrethenge Keriso Mekene i angatr.

Keriso a Nyiqaane La Huliwa Ne Cainöj

9, 10. Nemene la aqane elemekene Keriso la itre ewekë matre troa thawa trongëne la maca ka loi ne la Baselaia?

⁹ Hnei Iesu hna sipu xejë me elemekene la huliwa ne cainöj e cailo fen memine la huliwa ne troa hamë ini. Hnei nyidrëti hna acile la ketre hna amekötin, ene laka troa tro fë la maca ka loi ne la Baselaia kowe la nöjei atr asë e cailo fen. Ame ngöne la ijine nyidrëti a cainöj, hnei nyidrëti hna inine la itre aposetolo me hape: “The trongëne kö la jë i angete ethen ; nge the lö kö kowe la kete lapa i angete Samaria ; ngo loi e trojë kowe la nöjei mamoe ka pate ngöne la lapa i Isaraela. Nge troja cainöj, me hape, Eashenyi hë la baselaia ne hnengödrai. ” (Mat. 10:5-7) Hnei angatr hna pane catre cainöje kowe la Itretre Iudra me itre ka saen troa hane xome la hmi cili, thupene lo Penetekos 33 M.K.—Ite hu. 2:4, 5, 10, 11; 5:42; 6:7.

¹⁰ Thupene lai, hnei Iesu hna jëne la uati hmitrötr matre troa hane cainöjëne mina fe la Baselaia kowe la itre atr ne Samaria me itre xaa atr ju kö, laka, thaa Itretre Iudra kö. (Ite hu. 8:5, 6, 14-17; 10:19-22, 44, 45) Traqa ha la ijine troa hane tro fë la maca ka loi kowe la itre nöj, ene pe Iesu a ketre sipu ithuecatre jë koi Saulo ne Taraso matre tro angeic a hane Keresiano. Hnei Iesu hna amekötine fe kowe la atre drei nyidrë, ene Anania, ka hape: “Cilejë ; trojë kowe la gojenyi Meköti la ëjen, me hnyingëne jë ngöne la uma i Iuda la ate Saulo la ëjen, ate Taraso ; . . . Trojë eö ; ke, hna ië angeice nyine inegenge troa kapa trongëne la ëjenge kowe la nöjei ethen, me nöjei joxu, me ite nekö i Isaraela.” (Ite hu. 9:3-6, 10, 11, 15) Ame la “ate” cili, tre, hna hë nyidrëti pëhë thupen, ka hape, Paulo aposetolo.—1 Tim. 2:7.

11. Nemene la aqane huliwane Iesu la uati hmitrötr matre troa cainöjëne la maca ka loi?

¹¹ Ame hë la kola traqa la ijine troa cainöje kowe la itre nöj laka ame la itre atren, tre, thaa angetre Iudra kö, ene pe, kola kapa hnei Paulo la ixatua qaa koho nge kola eatrongë nyidrë matre troa xome la huliwa ne mesinare e Asia me Erop. Kola qaja hnei Luka ngöne la tusi Ite Huliwa, ka hape: “Angat [Itre Perofeta Keresiano me itre ka hamë ini ne la ekalesia ne Suria Anetioka] a nyi hlue koi joxu, me tha xen, ame hna ulatine hnei Uati Hmitöt, ka hape, Acilë Banaba me Saulo jë koi ni thatraqane la huliwa hnenge hna hë nyidoti kow. Nge ase hë angate tha xeni me thithi me ati ime hui nyido, angate pë hë a upi nyidoti pi.” (Ite hu. 13:2, 3) Hnei Iesu hna ketre sipu ië Saulo ne Taraso matre ‘inege” i nyidrë ka tro xom me tro fë la ëje i Iesu kowe la itre nöj; qa ngöne lai, ketre ewekë lai ka hnyipixe hna kuca ngöne la huliwa ne cainöj, ka xulu qaathei Keriso lo Mekene la ekalesia. Hnei Iesu hna xome la uati hmitrötr matre troa elemekene la huliwa ka mama cile hnyawa, ngöne lo hnaaluene tronge i Paulo ceitu me mesinare. Kola qaja hnei Tusi Hmitrötr, ka hape, hnei Iesu hna xome la “ua” matre troa eatrongë Paulo memine la itre sine ce huliwa i nyidrë ngöne la angatr a iëne la ijin me götran hnei angatr hna troa tro kow, nge kola mama mina fe e jidr la ketre hatrene ka upi angatr troa tro kowe la götran e Erop.—E jë la Ite Huliwa 16:6-10.

Iesu La Ka Elemekene La Ekalesia i Nyidrë

12, 13. Tune kaa la aqane amamane hnene la tusi Hna Amamane, ka hape, Keriso a thupëne hnyawa la isa aqane trongene la itre ekalesia?

¹² Ame ekö ngöne lo hneijine i Iesu, hnei nyidrëti hna thupëne hnyawa la aqane trongene la itre ewekë hnine la ekalesia ne la itretre dreng hna iën. Atre hnyawa kö nyidrëti la pengöne la isa ekalesia ekö ngöne la götrane la ua. Kola mama hnyawa lai ngöne la easa e la tusi Hna Amamane mekene 2 me 3. Hnei nyidrëti hna e trongëne la sevene lao ekalesia, itre ej asë ngöne la götran e Asia. (Hna ama. 1:11) Thaa sihngödri kö koi së laka, ame mina fe la itre xaa ekalesia ngöne la ijine cili, tre, ketre thaa trehnyiwa kö itre ej koi nyidrë, atre hnyawa fe nyidrë la pengöi nyudren ngöne la götrane la ua.—E jë la Hna Amamane 2:23.

¹³ Hnei Iesu hna qaja aloine la itre xaa ekalesia hnene la aqane xomihni ahoeane la itre atren, me cile huti la lapaun ngöne la kola tupathi angatr, me mele nyipici kowe la trenge ewekë i nyidrë, me hnene la hna kötrene la itre atr ka iamenumenu. (Hna ama. 2:2, 9, 13, 19; 3:8) Ame ngöne la ketre götran, hnei nyidrëti hna hamë eamo kowe la itre ekalesia ka nyimutre pine laka, hna nanazije lo ihnimi angatr hnapan, me wanga acone la kuci idrola me kuci ngazo, me wanga ahmalohmaloeëne la itre wapicine hmi. (Hna ama. 2:4, 14, 15, 20; 3:15, 16) Kola mama laka Iesu la ketre qatre thupe ka ihnim ngöne lo nyidrëti a hamë ihaji ka catr; öni nyidrë: “Ini a hajine me thaucëne la ite hnenge hna hnim ; qa ngöne lai catejë me ietraju.” (Hna ama. 3:19) Ngacama nyidrëti hë e koho hnengödrai, ngo hnei Iesu hna elemekene la itre ekalesia ne la itretre drei nyidrë e celë fen, hna jëne la uati hmitrötre i nyidrë. Ame hë ngöne la pune la itre maca hnei nyidrëti hna hamëne kowe la itre ekalesia cili, hnei nyidrëti hna qaja, ka hape: “Ame la tene hnangenyë, dengeju la hna ulatine hnei Ua kowe la ite ekalesia.”—Hna ama. 3:22.

14-16. (a) Nemene la aqane amamane Iesu laka nyidrëti la Meken ka catr ne la nöje i Iehova e celë fen? (b) Nemene hë la thangane la hnei Iesu hna “ce” memine la itretre drei nyidrë “ngöne la nöjei drai asëjëihë uti hë la pune la fene hnengödrai”? (c) Nemene la hne së hna troa ce wange ngöne la hna cinyihane ka troa xulu?

¹⁴ Hne së hë lo hna ce wange laka ame Mikaela (Iesu), tre, ketre angela angeic ekö ka catr nge Mekene la nöje Isaraela. Thupene lai, easa trotrohnine laka, Iesu la ketre Mekene ka catr nge atre thupë mamoe ka hnime lo itretre drei nyidrëti ekö ngöne lo hneijine i nyidrë. Ame ekö, ngöne lo nyidrëti a cainöj e celë fen, hnei nyidrëti hna elemekene la huliwa ne cainöj. Nge thupene la hna amele nyidrëti hmaca, nyidrëti pala hi a hnehengazone catrëne la aqane cainöjëne la maca ka loi ne la Baselaia.

¹⁵ Jëne la uati hmitrötr, Iesu a eköthe trongëne me tro xome hnyawa la huliwa ne cainöj uti hë la cane la fene hnengödrai. Qëmekene tro nyidrëti a elë hnengödrai eë, hnei Iesu hna qaja kowe la itretre drei nyidrëti, ka hape: “Tro nyipunie a hete mene e hlepëtipi la Uati Hmitöte koi nyipunie ; nge tro nyipunie a anyipici ni e Ierusalema, me Iuda asë, me Samaria, nge uti hë la cane la fene hnengödrai.” (Ite hu.1:8; e jë la 1 Peteru 1:12.) Qa ngöne laka hnei Keriso hna elemekene la huliwa ne cainöj ngöne la hneijine i nyidrë, ene pe atraqatre catre la thangane la huliwa.—Kol. 1:23.

¹⁶ Ngo hnei Iesu fe hna ketre sipu amamane, ka hape, troa kökötre trootro la huliwa cili uti hë la hneijin ne la pun. Thupene la hnei nyidrëti hna upe la itretre drei nyidrë troa cainöj me inine la itre atr ngöne la nöjei nöj asë, hnei Iesu hna ahnithe koi angatr, ka hape: “Eni a ce me nyipunie ngöne la nöjei drai asëjëihë uti hë la pune la fene hnengödrai.” (Mat. 28:19, 20) Pine laka, ase hë acili joxu nyidrë ngöne lo macatre 1914, haawe, nyipici “ce” nyidrëti hnyawa ha memine lo itretre drei nyidrë, nge nyidrëti pala hi la Mekene i angatr. Tro pë hë sa ce ithanatane e wiike hnapin la etrune la huliwa hnei nyidrëti hna kuca qaane lo 1914.

[Ithueamacany]

Troa Pane Amexeje Hmaca

• Nemene la aqane amamane hnene la Hupuna i Akötresie, ka hape, ketre mekene ka catre angeic ekö e Isaraela?

• Hna jëne nemene la Keriso a elemekene la ekalesia i nyidrëti e celë fen?

• Tune kaa la aqane eköthe trongëne Keriso la maca ka loi?

• Nemene la ka amamane, ka hape, Keriso a thupëne hnyawa me hnehengazone la isa aqane trongene la itre ekalesia ngöne la götrane la ua?