Meken 22

Foa Lao Atre Dreng Hna Hëne Hnei Iesu

PINE laka hna thele troa humuthi Iesu e Nazareta lo nöje i nyidrë, haawe, nyidrëti a kötre pi qaa cili, me tro pena Kaperenauma eë, ezine la hnagejë e Galilaia. Celë hi aqane aeatrëne lai, la ewekë hna perofetane hë hnei Isaia, ene laka, tro la itre atr ne Galilaia ka mele ezine la hnagejë a öhne la ketre lai ka tru.

Ame ngöne la Iesu a tro fë trongëne la lai ne la Baselaia, nyidëti a öhne la foa lao atre drei nyidrë. Angatre hi lo itre ka hane xötrethenge nyidrëti trootro, ngo qaane lo angatre a ce bëeke hmaca me nyidrë qaa Iudra, haawe, angatre hmaca ha a kuca lo huliwa i angatre ekö, ene la troa nyi i. Eje hi laka, Iesu a thele angatr, pine laka, ijine tro hë angatre a ce huliwa huti me nyidrë, ketre, kola troa ini angatre matre, tro pë hë angatre a xome sisedrëne la huliwa ne cainöje thupei nyidrë.

Iesu a xötrë ngöne gejë trootro, nge nyidrë a öhnyi Simona Peteru me itre sinecetro i angeic, angatre a nyihnyawane la itre ieötre i angatr, haawe, nyidrëti a tro meköti pi koi angatr. Nyidrëti a të jë hune la bootre i Peteru, me sipo angeice troa nango ananyine la ngönëtë. Ame hë la angatre a nango manij, Iesu a lapa me nyiqaane troa inine la itre atr ka ilapanyi pe ngöne la hunëtë.

Thupene lai, Iesu a qaja koi Peteru ka hape: “Eapi kowe la ga ju, nge nuepi la ite eöte i nyipunie thatraqane la shisha.”

Öni Peteru e sa ka hape, “Joxu, huliwa pi hë huni ngöne la jidi asë, nge pëkö hne huni hna xom; ngo ngöne la tenge ewekë i cilie tro ni a nue la ite eöt.”

Nge ase hë nue la itre eötr, angatre pë hë a thaeone jë la shisha, ame hna kaqa pi la ite eötre i angatr. Haawe, angatre a haleane jë la itre sine i angatre ngöne la ketre he matre troa hane ixatua. Canga tiqa hi la lue he hnei i, matre kolo ha troa lö lue ej. Nge öhne hë Simona Peteru, angeice a kei kowe la lue watingöneca i Iesu, me hape: “Joxu fe, jötëtijë cilieti qa la theng, ke ate ka ngazo ni.”

Öni Iesu e sa koi angeice ka hape, “The xou kö; qanehila tro eö a xölehuje it’ at.”

Iesu a hëne jë fe la trejine me Peteru, ene Anederea. Nyidrëti a hë nyidroti me hape, “Xöte thenge ni jë, nge tro ni a celohmë nyipo nyine axena at.” Ketre tui Iakobo me Ioane lue nekö i Zebedaio, thaa hnei nyidroti kö hna drei simine la hë i Iesu, ngo nyidroti a canga nue pe la he me xötrethenge Iesu. Celë hi matre, angatre hi lai ala foa, itretre pane drei Iesu, me xötrethenge nyidrë. Luka 5:1-11; Mataio 4:13-22; Mareko 1:16-20; Isaia 9:1, 2.

▪ Pine nemene matre Iesu a hëne la itretre drenge troa xötrethenge nyidrë, nge drei la itretre drenge cili?

▪ Nemene la iamamanyikeu hna xouene hnei Peteru?

▪ Nemene nyi ie la hnei Iesu hna iupi troa kuca?