Meken 25

Iesu a Utipine La Ketre Lepera

AME ngöne la Iesu a tro kanothe la itre lapa e Galilaia cememine lo foa lao atre drei nyidrë, kola hlemu ngöne la nöje la itre ewekë ka lolo hnei nyidrëti hna kuca. Celë hi matre hna hane drenge fe lai ngöne la ketre traon, hnene la ketre trahmanyi ka lepera. Kola qeje angeice hnene la droketre, ene Luka, ka hape, “sihngödipi hë hnei lepera.” Nge ame hë la kola ngazo catre la meci cili, haawe, ae trootro pi hi la itre götrane la ngönetrei. Celë hi matre ka ngazo catre la mele ne la ka lepera celë.

Ame la Iesu a traqa ngöne la traon, kola tro pi koi nyidrë la atr ka lepera. Hna amekötine hnene la Trenge Wathebo i Akötresie, laka, tro asë hi la itre lepera a thuemacane me uune ka hape, “Pui ngazo hë ni, pui ngazo hë ni,” matre, thaa tro kö la itre xaa atr a easenyi angatre nge ixötrekeu jë la meci angatr. Haawe, kola kei qeipië ju la lepera, me sipone iele Iesu ka hape: “Joxue, maine enëtilai a hanengëtin, pucatine enëtilai troa ajinia nie.”

Eje hi laka, atraqatre pi hë la mejiune ne la lepera koi Iesu! Ngo drei kö la akötre thei angeic, pine la engazone la meci ka eje thei angeic! Nemene la hnei Iesu hna troa kuca? Maine epuni ju fe a öhne lai, nemene fe la hnei epuni hna troa hane kuca? Tru la utipine i Iesu koi angeic, matre nyidrëti a li ime me ketr la trahmany, me qaja ka hape: “Ini a ajan, loi hë eö.” Ame hna canga paatre pi la lepera thei nyën.

Hapeu aja i epuni kö troa hane musinë epun, hnene la ketre joxu ka tune lai, ka tru ihnimin? Nyine axeciëne koi së la aqane kuca i Iesu kowe la lepera, laka, tro nyidrëti a aeatrëne la hna perofetane celë, ngöne la ijine nyidrëti a troa mus, hna hape: “Tro nyidëti a hnime la ate ka aköte me ate pë ewekë, nge tro nyidëti a amelene la ite u ne la ange pë ewekë.” Nyipici, tro Iesu aeatrëne la ewekë ka eje ngöne la hni nyidrë, ene la troa xatuane asë la nöjei atr ka akötr.

Nyimutre catre hë la itretre Iudra hna ketr hnene la huliwa ne cainöje i Iesu, qëmekene la troa aloine la lepera. Ngo Iesu a aeatrëne la hna perofetane hnei Isaia, ngöne laka, nyidrë a qaja kowe la atr hna aloine ka hape: “The qaja kö koi kete ate.” Nyidrëti a qaja koi angeice ka hape: “Troja amamai’ ö kowe la ate huj, me nyi hujëne la hna aloinyi’ ö, tune lo hnei Mose hna ahnith, nyine anyipicine koi angat.”

Ngo hnene laka, tru pala ha la madrine ne la atr, matre thatreine kö angeice troa lapa fë la iamamanyikeu cili. Haawe, angeice a tro pi me ithuemacanyine la ewekë hna kuca koi angeic; hnene laka tru catre pi hë hnei atr ka thele troa iöhnyi me Iesu, haawe, nango jole hë tro nyidrë a lö amamanyi ngöne la traon. Celë hi matre nyidrëti a tro pi kowe la itre götrane thaa hna lapane kö, nge itre atr a traqa itronyi qa ngöne la nöjei götrane troa drei nyidrë, nge matre troa amele angatre qa ngöne la itre sine meci angatr. Luka 5:12-16; Mareko 1:40-45; Mataio 8:2-4; Levitiko 13:45; 14:10-13; Salamo 72:13; Isaia 42:1, 2.

▪ Nemene la aqane tithe la atr hnei lepera, nge nemene la nyine troa ithuemacanyine matre thaa tro kö a ixötrekeu la mec?

▪ Nemene la hna sipone hnene la lepera koi Iesu, nge nemene la ini hne së hna kapa qa ngöne la aqane ujë i Iesu?

▪ Nemene la ka amamane laka, thaa hna drei Iesu kö hnene la lepera, nge nemene la itre thangane lai?