Meken 46

Hnei Nyidroti Hna Ketr La Ixetre i Iesu

KOLA traqa itronyi hmaca la itre atr ngöne la hnangöni troa kepe Iesu, ngöne la angatre a drenge e Kaperenauma laka, bëeke hmaca ha nyidrëti qaa Dekapoli. Drenge jë hë la itre atr laka, hnei nyidrëti hna aupune la janacas, me aloine la itre hna adremonin. Celë hi matre, ame ngöne la nyidrëti a uti qa hune la he, haawe, kola cile xötreithi nyidrë hnene la itre atr; angatre a ajane me treqene hnyawa la ewekë hnei nyidrëti hna troa kuca.

Ala nyimu la itre tane la sunago ka pi ajane troa iöhnyi me Iesu, Iairo la ëjene la ketre. Angeice a kei ngöne la lue fenie i Iesu, me xëwe koi nyidrë ka hape: “Kolo ha troa meci enehila la nekönge jajiny. Ngo ithuëtijë fe troa atë la iwanakothemie i enëtilai hui nyën, nge tro nyën’ a mel.” Atraqatre la ihnimi Iairo kowe la nekönatr, pine laka, nekö i nyidrëti hi lai ka caas, nge 12 petre hi la macatre i nyën.

Iesu a xötrethenge Iairo me tro kowe la hnalapa i angeic, nge kola ce tro me nyidro hnene la itre atr. Angatre a inyinyapenyi me madrine atraqatr, pine laka, kolo ha qanamacane la ketre iamamanyikeu. Ngo caa föe pe kö e nyipi angatr, nyidroti a hnehengazone la meci nyidro.

Truelofe hë lao macatre ne lapa fë nyidroti la mec, ene lo meci itre föe, laka ka neni pala hi la hni nyidro. Pë hë manie i nyidroti hna nyithupene la nöjei droketre hnei nyidro hna wange matre troa aloine la mec. Ngo thaa ie kö; kolo jë pe ka hape ngazo catre jë la mec.

Easë a trotrohnine hnyawa laka, troa kucakuca catre hnei nyidro, nge ketre, ketre meci lai ka ngazo nge hna hmahman. Eje hi laka, jole e troa iqajakeune la meci cili. Ketre, hna amekötine hnene la Trenge Wathebo hna hamëne koi Mose, laka, ka pui ngazo la ketre föe ka neni madran, nge maine troa ketri nyidro, maine itre hna heetre i nyidroti pena ka si madra, haawe loi e tro la atr celë a sie, nge thaa tro kö a easenyi angeic, ke pui ngazo angeice uti hë la kola jidrijidr.

Hna hane drenge hnene la föe cili la itre iamamanyikeu hna kuca hnei Iesu, nge enehila eahlo petre hi a hane öhnyi nyidrë. Pine la meci ka eje thei nyidro, haawe, nyidroti a tro aconyi e nyipine la ka ala nyim, me qaja e kuhu hni nyidroti ka hape: “Maine tro ni a kete hi la ixete i nyidë, tro ni a mel.” Celë hi hnei nyidroti lai hna kuca, ame hna canga kötë ju la madra i nyidro!

“Dei la ate kete la ixeteng?” Kola sesëkötre la föe la nyidroti a drenge la Iesu a hnyinge tune lai! Hnei nyidrëti hna atre tune kaa? Öni Peteru ka hape, ‘Ate ini fe, Cilieti a xajawatine la ka ala nyimu kola ipepetenyi me cilie, nge cilieti a hape, “Dei la ate kete ni?”’

Iesu a thele la föe hnine la ka ala nyim, me qaja ka hape: “Hetete kete ni, ke wangate hmekune kö ni laka, löhë la mene qa theng.” Nyipici, ketre pengöne kö la aqane ketri nyidrë celë, ngöne laka, tru la trenge catre i nyidrë hna xome troa aloine la meci ne la föe.

Ame la kola öhne hnene la föe laka, thaa sihngödre kö nyidroti kowe la nöjei atr, haawe, nyidroti a ipië ju ngöne la fenie i Iesu, nge kola xou me hmengöhmengön. Nyidroti a qaja amamane jë kowe la nöjei atr la meci nyidro, memine la aqane aloine ej.

Tru la hnei Iesu hna mekune la aqane nyipici ne la föe, ketre atraqatre fe la ihnimi ipitö i nyidrëti koi nyidro, öni nyidrëti jë hi ka hape: “Neköng! melë hë nyipo hnene la lapaune i nyipo. Tro jë memine la manathith.” Drei la madrine së laka, hnei Akötresieti hna iëne troa musinëne la ihnadro, la ketre atr ka menyike me ka ihnimi ipitö, nge hnehengazone la akötre ne la itre atr, nge ka atreine troa xatua angatr! Mataio 9:18-22; Mareko 5:21-34; Luka 8:40-48; Levitiko 15:25-27.

▪ Drei lae Iairo, nge pine nemene matre angeice a tro troa wai Iesu?

▪ Nemene la hna kukehnine hnene la ketre föe, nge pine nemene matre jole koi nyidroti troa sipo ixatua thei Iesu?

▪ Tune kaa la aqane aloine la meci ne la föe, nge nemene la aqane ithuecatre Iesu koi nyidro?