Meken 83
Kola Könë Iesu Hnene La Ketre Faresaio
KOLA kepe Iesu hnene la ketre faresaio ka hlemu, thupene la hnei nyidrëti hna aloine la ketre atr ka meci fë la thimöl. Nyidrëti a öhne laka kola iëne la itre göhnë ka mama hnene la itre atr hna könën, celë hi matre nyidrëti a hamëne ju la ketre ini ka amamane la enyipi ewekëne la troa ipië.
Öni nyidrëti ka hape: “E hna könë eö hnei kete ate kowe la faipoipo, the tro kö a lapa ngöne la maca ne lapa, wanga hete ate ka sisitia hui ’ö hna könën; nge traqa ha angeic’ ate ce könë nyipo a qaja koi ’ö, ka hape, nuejë thatraqane la ate celë; nge eö a qane troa hmahma me lapa min.”
Iesu a hamë eamo ka hape: “E könë eö, troja lapa ngöne la min, mate e traqa ha angeic’ ate könë eö, tro angeic’ a qaja koi ’ö, ka hape, Sinenge fe, trojë kowe la maca ne lapa; ame hna mingömingöpi eö qëmeke i angete ce lapa me eö.” Nge nyidrëti a nyipune ka hape: “Tro ha acone la ate atrunyi angeice kö; nge tro pena ha atrune la ate aconyi angeice kö.”
Thupene lai, Iesu a ithahnata kowe la faresaio ka könë nyidrë, me amamane koi angeice la aqane troa ihë troa kapa la xen, ene la ihë ka tru alamekene koi Akötresie. Ame hnei nyidrëti hna ulatine ka hape: “E tro eö a sha hutehute me nyi nyipi shainyi pena, the könëne kö la ite sine i ’ö, me ite tejine me eö, me lapa ka cahae me eö, me ite tena mo ka eashenyi koi ’ö, wanga könë eö hmaca pi hnei angat, ame hna hedöthi ’ö pi. Nge e tro eö a nyikein, könënejë la ite pë ewekë me ite ka pate sine itei, me ite geny, me ite timek; nge tro ha manathithi eö; ke tha ’teine kö angate troa hedöthi ’ö.”
Haawe, e troa hëne la itre ka pë ewekë troa hane xen, ke, tro lai a hamë madrin, pine laka Iesu a qeje pengöne kowe la ka ikönë ka hape “tro ha hedöthi ’ö ngöne la ijine mele hmaca itete thina ka meköt.” Jëne la aqane qeje pengöne la pui ne xeni celë, haawe kola qaja la ketre pengöne pui ne xen hna troa kapa hnene la ketre hna könën, kola hape koi nyidrë: “Manathithi angeice ka tro ha hane xeni ngöne la baselaia i Akötesie.” Ngo Iesu a troa amamane jëne la ketre ceitune ka hape, thaa wangatrune asë kö hnene la itre hna könëne la enyipi ewekëne la ijine madrine cili.
Iesu a ulatine jë ka hape: “Hna nue la nyikeine atraqate hnei kete ate, nge ala nyimu la hna könën; nge nyidëti a upe la hlue i nyidë ngöne la ijine xeni troa qaja koi ange hna pane könën, ka hape, Trojë fe, ke ase hë hnëkëne la nöjei ewekë. Nge angat’ asëjëihë a qane troa isa qeje jolen; önine la kete koi angeic, ka hape, Ase hë ni itöne la kete hnepa dro, nge loi e tro ni a wang’ ej, nge ini a hape koi nyipëti ma hnenge pë hë. Nge önine la kete, Ase hë ni itöne la ite boloke ka tripi la o penin, nge ini ha tro troa tupath’ it’ ej, nge ini a hape koi nyipëti ma hnenge pë hë. Nge önine la kete, Ase hë ni faipoipo, qa ngöne lai tha ’teine kö ni troa tro.”
Drei la itre kepine ka pë pengön! Hna majemine lo, troa pane wange la hnepa dro maine öni pena, nge thupene lai kola itön. Celë hi matre, thaa nyipi ewekë hmaca kö kowe la ka itö troa hnehengazone troa canga wange la ewekë hnei angeice hë hna itön. Ketre mina fe, ame la faipoipo, thaa kepine ka tru kö lai matre ijije troa thipe trije la hna ikönë ka tru alien. Ngöne la kola drenge la itre hna petrengëne celë, ene pe kola elëhni hnene la tixene uma me qaja kowe la hlue i angeice ka hape:
“Canga trojë pena kowe la ite gojenyi memine la ite hnangenu ngöne la lapa, nge thengejë e kolemi la ange pë ewekë, me ite ka pate sine itei, me ite timek, me ite geny. Nge ame hnei hlue hna qaja, ka hape, Joxu fe, ase hë kuca tune lo hnei cilieti hna ahnith, nge hete göhnë pete kö. Nge önine la joxu kowe la hlue, ka hape, Trojë kowe la ite gojëcin, me ite fenahag, me iele angate jë e kolemi, mate tiqajë la umang. . . . Tha tro kö la ange hna pane könën’ a hane wene la nyikeineng.”
Nemene la aliene la ceitune celë? Ame la “tixene uma,” ka ikönë troa ce xen, ke, kola nyihatrenyi Iehova Akötresie; ame la “hlue,” ka tro fë la ikönë, ke, Iesu Keriso; nge ame la “nyikeine atraqatr ne hej,” ke, kola aijijëne la itre atr troa hane itre atrene la Baselaia e koho hnengödrai.
Hna pane könëne la itre hene hmi angetre Iudra ngöne lo ijine i Iesu, troa hane itre atrene la Baselaia, ngo hna thipe trije lai hnei angatr. Haawe, hna kuca la hnaaluene ikönë, kowe la itre atr hna xele ma wang, itre aminatre ne la nöje Iudra, qaane lo penetekos ne macatre 33. Ngo, thaa eatrëne kö la 144 000 lao göhnë hna hnëkëne hë ngöne la Baselaia i Akötresie e hnengödrai hnene la itre ka kapa la hna ikönë. Celë hi matre, ngöne la macatre 36, köni macatre nge sin thupen, ke, hna kuca la hnaakönine me hnapine ikönë kowe la angetre ethen, nge hna sisedrëne la icasikeu cili uti hë la hneijine së. Luka 14:1-24.
▪ Nemene la ini göi ipië hnei Iesu hna hamën?
▪ Tune kaa la aqane tro la ketre atr a nyikein, me ikönë, nge ka tru aliene qëmekei Akötresie, nge pine nemene matre tro angeice a madrin?
▪ Pine nemene matre ijije troa qaja ka hape, itre hna könëne a qaja la itre kepine ka pëkö pengön?
▪ Nemene la aliene koi Iesu la ceitune “nyikein atraqat ne hej”?