Meken 127

Hna Kelemi Iesu e Drai Ka Tru, Nge e Sabath Pë Hë Aliene La Hua

HNAIPAJÖ heji ne drai ka tru hë, nge kola troa xejë la 15 Nisan, drai sabath ngöne la kola lö la jö. Iesu a thipi hune la sinöe, meci hë nyidrë, nge ame lo lue atrekënö ezi nyidrëti ke, mele petre kö nyidro. Hna hëne la hnaipajö ne drai ka tru ka hape, drai ne hnëkë, pine laka, ame ngöne la ijine cili, kola hnëkëne hnei angetre Iudra la xen, me canga afenesine la itre huliwa ka ijije troa umuthe qëmekene la drai sabath.

Kola troa nyiqaane la drai hmitrötr, ngo thaa ketre sabathi menu kö (ene la hnaasevenene drai ne la wiik), celë fe ketre sabathi ka lue pengön, maine sabathi “ka tru” pena. Hna hëne tune lai la 15 Nisan, pine laka, celë hi pane drai ngöne la sevene lao drai ne pui ne xeni areto tha hna levenëne kö (ene laka, ketre sabathi pala hi, ngacama kola eatre ngöne la ketre drai ne la wiik), kola ihmeku memine lo sabathi ka eje ngöne la nöjei wiik.

Hna amekötine hnene la Wathebo i Akötresie, laka, thaa tro kö a athipe la atr hune la sinöe, ngöne la jidri ka pexej. Celë hi matre kola sipone hnei angetre Iudra troa lepe xecie la itre lue ca ne la itre hna athip, matre canga meci pi angatr. Celë ewekë lai hna kuca hnene la itre sooc, kowe la lue atrekënö. Ngo, thaa hna tune fe kö lai koi Iesu, pine laka, meci hë nyidrë. Kola eatrëne la hna cinyihane ka hape: “Tha tro kö a xecie la kete jungë i nyidë.”

Kola thine hnei jo la wengesisila i Iesu hnene la ketre sooc, matre troa xecie hnyawa koi angatre ka hape, meci hnyawa ha nyidrë. Eatre hë la wenethëhmi Iesu, ene pe neni pi la madra me tim. Kola öhne lai hnei Ioane aposetolo, nge tro pë hë angeice a amamane laka, kola eatrëne la hna qaja hnene la ketre hna cinyihane ka hape: “Tro angat’ a goeë nyidëti lo hnei angate hna thin.”

Hna öhne fe hnei Iosefa, atre Arimathea nge ketre atr ka hlemu thene la itretre isenyin, lo kola humuthi Iesu. Thaa hnei nyidrëti kö hna ce jëne mekune memine lo itretre isenyine ka saene troa humuthi Iesu. Eje hi laka, Iosefa la ketre atre drei Iesu, ngacama hnei angeice pala hi hna juetrëne lai, ke kola xoue atr. Ngo enehila, angeice a acatrei hni me tro koi Pilato troa sipone la ngönetrei Iesu. Pilato a pane hëne jë lo keneturio ka thup, me hnyingëne maine meci hnyawa ha Iesu, nge thupene lai, angeice a nue pi koi Iosefa la ngönetrei Iesu.

Iosefa a xome la ngönalë i Iesu me atuthe eje hnene la maano lino ka wië, qëmekene troa kelemi nyidrë. Hna xatua angeice hnei Nikodemo, ketre atre isenyin. Ketre tui Nikodemo fe, thaa hna hane kö qaja amamane la lapaune i angeice koi Iesu, wanga troa luuzi la göhnë i angeic. Ngo enehila, angeice a tro fë la muro hna ithuenyiköne me aloe, ma kösë caa hadredre lao litara ne Roma (33 kilo), celë hi ketre ewekë ka tru thupene catr. Hna ce atu maano linone la ngönalë i Iesu memine la itre ka pui loi, tune lo qene nöje i angetre Iudra e troa kele wezipo.

Thupene lai, hna amë la ngönalë i Iesu hnei Iosefa hnine la ketre ngönemenyi ka hnyipixe hna thë hnine la git, ngöne la ketre hnepe hlapa gaa thaa nanyi kö qa ngöne la götrane hna athipi Iesu ngön. Angatre a uligötrane jë la ketre etë ka tru kowe la qene la hua. Pine laka, kola ajane troa kelemi Iesu qëmekene la drai hmitrötr, haawe, hna canga hnëkëne la ngönalë i nyidrë. Maine jë hnei Maria Magadalena, me Maria thine i Iakobo, angetre hane hnëkëne la ngönalë i Iesu, hna canga tro kowe la itre hnalapa i angatre troa hnëkëne la itre ka punepune me itre oel. Angatre a mekune troa bëeke hmaca thupene la drai hmitrötr, matre troa nyihnyawane la ngönalë i Iesu, matre thaa tro kö eje a canga hnyiqetr.

Elanyi hë, ene la mecixen (Sabath), kola tro hnene la itre tane i angetre huj me itre faresaio koi Pilato me qaja koi angeice ka hape: “Joxu, eëhuni a hnine la hna qaja hnene la ate amenune cili, nge mele pete kö, ka hape, Thupene la köni drai tro ni a mele hmaca jë. Qa ngöne lai, ahnithe ju mate troa acatene la hua uti hë la drai hnaakönin, wanga traqa pi la angete dei nyën’ e jidi troa ënö nyën, me hape kowe la nöj, Mele hmaca ha nyëne qa hna mec; ame hna tru la menu hnapine hune la hnapan.”

Öni Pilato koi angatre ka hape: “Hetenyi kö nyipunie la itete thup; tro jë, qâ i nyipunieti kö troa acatene hnyawa.” Haawe, angatre a tro me goeëne maine hna thinge hnyawa pala hi la ulane la hua, nge angatre fe a amë la itre sooce ne Roma troa thup.

Thupene la sabath, ngöne la kaqa ne lai ne la drai hnapan, hna tro pi hnei Maria Magadalena me kete Maria, lo thine i Iakobo, me Salome, Ioana me itre xaa föe ju kö, troa nyihnyawane la ngönetrei Iesu. E kuhu gojeny, angatre a ihnyingënekeune ka hape: “Tro dei a uligötrane la etë thatraqai shë qa ngöne la qe ne la hua?” Ngo ame la angatre a traqa ngöne la hua, angatre a öhne laka, hna traqa la ketre sa, nge ase hë kötrëne la etë, hna uligötrëne hnene la angela i Iehova. Paatre hë la itretre thup, nge pë hë aliene la hua! Mataio 27:57–28:2; Mareko 15:42–16:4; Luka 23:50–24:3, 10; Ioane 19:14, 31–20:1; 12:42; Levitiko 23:5-7; Deuteronomi 21:22, 23; Salamo 34:20; Zakaria 12:10.

▪ Pine nemene matre kola hëne la drai ka tru ka hape, drai ne hnëkë, nge nemene la aliene la hna hape, sabathi “ka tru”?

▪ Nemene la itre trenge ewekë hna cinyihan, ka eatre göne la ngönalë i Iesu?

▪ Nemene fe la hna hane kuca hnei Iosefa me Nikodemo, ngöne la kola troa kelemi Iesu, nge nemene la aqane imelekeu i nyidro me Iesu?

▪ Nemene la sipo ne la itretre huje koi Pilato, nge nemene la aqane sa la sipo i angatr?

▪ Nemene la ewekë ka traqa ngöne hmahmakanyi ne sabath?