Itre Itus Ka Nyitrepene La Mel Me Huliwa Ne Cainöj Pepa Nyine Huliwan
2-8 EIPEREM
ITRE TRENGAMO QA HNINE LA WESI ULA | MATAIO 26
“Ewekë Ka Ceitun Me Ka Isapengön Ne La Paseka Memine La Drai Ne Amekunën”
(Mataio 26:17-20) Ngöne la drai hnapane la pui ne xeni areto tha hna levenëne kö, ame hna tropi koi Iesu hnei angete deng, me hape, E ka la nöi cilieti hna ajane e tro huni a hnëkëne thatraqai cilie, mate troa xötrönëti la paseka? 18 Öni nyidëti, ka hape, Trojë nyipunie kowe la lapa, koi kete ate, me hape koi angeic, Önine la ate ini, Eashenyi hë la ijineng; nge tro ni a ce paseka me angete dei ni thei ’ö. 19 Ame hnei angete denge hna kuca tune lo hnei Iesu hna eawatine koi angat, me hnëkëne la paseka. 20 Nge hejiheji hë, ame hnei nyidëti hna ce lapa memine la ala luako.
nwtsty media
Pui Ne Xeni Ne La Paseka
Hane hi la itre xen hna hnëkën thatraqane la pui ne xeni ne la Paseka: (1) mamoe hna atron (tha hna axeciëne kö la itre jun); (2) areto hna tha levenëne kö; me (3) itre sinöe ka haitr. (Eso. 12:5, 8; Num. 9:11) Tune la hna qaja ngöne la Mishna, ame la itre sinöe ka haitr tre, kola qaja la nöjei pengöne uke sil ka haitr, tune la drönagoze, me hapice, me endive maine haetraqa pena. Itre xeni lai ka amekunëne lo ijine kola thahluëne la angetre Isaraela e Aigupito. Hnei Iesu hna xome la falawa hna tha levenëne kö, matre troa nyihatrene la ngönetrei nyidrë ka pë ethan. (Mat. 26:26) Ketre, hnei Paulo aposetolo hna hë Iesu ka hape, “paseka shë.” (1 Kor. 5:7) Ame fe la ketre hna hnëkëne thatraqane la pui ne xeni ne la Paseka tre, (4) waina. Hnei Iesu hna xome la waina, matre troa nyihatrene la madra i nyidrë hna huujën.—Mat. 26:27, 28.
(Mataio 26:26) Nge angate pete hi a xötrönë, Iesu a xome la areto, me olen, me thupathupa, me hamë angete deng, me hape, Xomejë, xeniju, dei la ngöneteing.
nwtsty Ithuemacany göi Mataio 26:26
drei: Ijije hi troa ujëne la hnaewekë qene Heleni, e·stinʹ ka hape, “kola qaja; kola nyihatren; kola amaman.” Trotrohnine hi la ange aposetolo la hnaewekë celë ke, ce angatre hi me Iesu nge hna amë qëmeke i angatr la falawa hna tha levenëne kö. Haawe, tha kolo kö a qaja e celë la sipu ngönetrei Iesu. Ketre, hna qaja la hnaewekë celë qene Heleni ngöne Mataio 12:7, nge hna ujën ngöne la itre xa Tusi Hmitrötr ka hape, “dei.”
(Mataio 26:27, 28) Nge nyidëti a xome la inege, me olen, me hamë angat, me hape, Ijijë nyipunie asë, 28 ke celë hi madrange ne isisinyikeu hna nenge thatraqane la ka ala nyimu, nyine shenge la ngazo.
nwtsty Ithuemacany göi Mataio 26:28
madra ne isisinyikeu: Hnene la meci Iesu hna aejëne la isisinyikeu ka hnyipixe, hna kuca hnei Iehova memine la itre hna iën. (Heb. 8:10) Casi hi la hnaewekë hnei Iesu hna xom me Mose, lo ketre Atre Ialoinekeun, ngöne lo ijine kola acil la isisinyikeu ne la Wathebo, memine la angetre Isaraela fene la wetr e Sinai. (Eso. 24:8; Heb. 9:19-21) Hnene la madra ne la itre bolok me itre gootr hna aejëne la isisinyikeu ne la Wathebo. Ketre tune mina fe, kola aejëne la isisinyikeu ka hnyipixe hna kuca hnei Iehova memine la itre hna iën, hnene la madra i Iesu. Hna anyipicine lai lo Penetekos macatre 33 M.K.—Heb. 9:14, 15.
Troa Sine Thel La Itre Mekune Ka Sisitria
(Mataio 26:17) Ngöne la drai hnapane la pui ne xeni areto tha hna levenëne kö, ame hna tropi koi Iesu hnei angete deng, me hape, E ka la nöi cilieti hna ajane e tro huni a hnëkëne thatraqai cilie, mate troa xötrönëti la paseka?
nwtsty Ithuemacany göi Mataio 26:17
Ngöne la drai hnapane la pui ne xeni areto tha hna levenëne kö: Kola nyiqane la Pui Ne Xeni Areto Tha Hna Levenëne Kö lo 15 Nisan, thupene la Paseka (14 Nisan), nge hna atrune koi sevene lao drai. Ngo ame ngöne la ijine i Iesu, hna atrune koi 8 lao drai la “Pui Ne Xeni Areto Tha Hna Levenëne Kö,” pine laka ka itrongëpi hi memine la drai ne la Paseka. (Luka 22:1) Ame la hnaewekë, “ngöne la drai hnapan,” tre, kolo hi a qaja la drai eidr. (Ka isapengöne memine la hna qaja ngöne Ioane 1:15, 30. Ame la hnaewekë qene Heleni “hnapan” [proʹtos] tre, kola hape, “pa.” Ceitune hi memine la kola hape, “hna pa.”) Haawe, hnene la angetre drei Iesu hna hnyinge koi nyidrë lo 13 Nisan. Celë hi matre hnei angatre hna hnëkëne la Paseka ngöne la drai cili. Ngo ame la kola “hejihej,” me nyiqane la 14 Nisan, angatre hi lai a atrune la Paseka.—Mar. 14:16, 17.
(Mataio 26:39) Ame hnei nyidëti hna tro kowe la ga easheny, me kei qe ipië, me hmeti, ka hape, Kakati fe, maine pucatine patepi qa thenge la inege celë; ngo tha eje kö la ajang, loi pe la aja i cilie.
nwtsty Ithuemacany göi Mataio 26:39
patrepi . . . la inege celë: Ame e hnine la Tusi Hmitrötr, hna xom la hnaewekë, “inege,” matre troa qaja la aja i Akötresie, maine pena la “ketre hnëqa hna athip” kowe la ketre atr. Hace catre Iesu ke, xele kö nyidrë e troa qajangazo Akötresie. Hna jelë Iesu ka hape, atre iuku troa icilekeu me Akötresie, nge kola troa humuthi nyidrë. Haawe, celë hi matre thithi jë nyidrë koi Akötresie troa apatrene qaathei nyidrë la “inege” cili.
E Tusi Hmitrötr
(Mataio 26:1-19) Ase hë Iesu umuthe la nöjei wesi ula asë cili, nyidëti a ulatine koi angete dei nyidëti, ka hape: 2 “Ate hë nyipunieti laka ciköni la paseka, nge tro ha wanaxoeëne la Nekö i ate mate asatauron.” 3 Ame hna icasikeujë la ite tane i angete huj, me angete cinyihany, me ite qate ne la nöj, kowe la uma ne la tane i angete huj, Kaiafa la ëjen, 4 me kola iemane troa xölehuji Iesu hnene la tenge iaö, mate troa humuth. 5 Öni angat, ka hape, The hnene kö ngöne la pui ne xen, wanga gomegome la nöj. 6 Iesu e Bethania, ngöne la uma i Simona lepera, 7 ame hna traqa koi nyidëti la kete föe ka hete ge alabasa tenge muro ka tru alameken, me nenge hune la kohiëje i nyidë, e kolo pete kö a munë. 8 Nge öhnë hë hnei angete deng, ame hnei angate hna jingenekën, me hape, Nyine ue la troa angazone tune lai? 9 Maine hna itön, te, tru la thupene nyine hamë ange pë ewekë. 10 Iesu a ate hmekuatin, ame hnei nyidëti hna ulatine koi angat, ka hape, Nemene lae nyipunie laka jojezine la fö? nga loi la hnei nyidoti hna kuca koi ni. 11 Qa ngöne laka celë pala kö thei nyipunie la ange pë ewekë; ngo tha tro kö ni a lapa pala e celë thei nyipunie. 12 Ke ame la hna nenge hnei nyido la muro celë kowe la iteing, te, hna kuca nyine iping’ e troa kelemi ni. 13 Nyipici ini a qaja koi nyipunie, ame e cailo fene la hna troa cainöjëne la maca ka loi celë ngön, te, tro fe a amamane la hna kuca hnei nyidoti la nyine mekune koi nyido. 14 Ame hnene la kete ne la ala luako, Iuda Isakariota la ëjen, hna tro kowe la ite tane i angete huj, 15 me hape, Nemene la ewekë tro nyipunieti a hamë ni mate tro ni a wanaxoeë angeice koi nyipunie? Ame hnei angate hna hamë angeice la nöjei mani ka caate nge luepi. 16 Nge qane lai angeic’ a thele jëne troa wanaxoeë nyidë. 17 Ngöne la drai hnapane la pui ne xeni areto tha hna levenëne kö, ame hna tropi koi Iesu hnei angete deng, me hape, E ka la nöi cilieti hna ajane e tro huni a hnëkëne thatraqai cilie, mate troa xötrönëti la paseka? 18 Öni nyidëti, ka hape, Trojë nyipunie kowe la lapa, koi kete ate, me hape koi angeic, Önine la ate ini, Eashenyi hë la ijineng; nge tro ni a ce paseka me angete dei ni thei ’ö. 19 Ame hnei angete denge hna kuca tune lo hnei Iesu hna eawatine koi angat, me hnëkëne la paseka.
9-15 EIPEREM
ITRE TRENGAMO QA HNINE LA WESI ULA | MATAIO 27-28
“Inine Jë La Nöjei Atr—Kepin, Ekaa Me Aqane Troa Kuca”
(Mataio 28:18) Nge Iesu a jötëti me ulatine koi angat, ka hape, Ase hë hamë ni la nöjei musi asë e hnengödrai me celë fen.
w04 1/7 8 par. 4
‘Tro Jë Nyipunie a Inine La Nöjei Atr’
4 Iesu la hene la ekalesia. Qane lo macatre 1914, Iesu la Joxu ne la Baselaia hna nyipi acile hnei Akötresie. (Kol. 1:13; Hna ama. 11:15) Ketre, nyidrëti la angela ka sisitria, matre nyidrëti a elemeken la trongene isi Iehova e koho hnengödrai, ene la itre milio lao angela. (1 Thes. 4:16; 1 Pet. 3:22; Hna ama. 19:14-16) Hnene la Tretretro i nyidrëti hna nue koi nyidrë troa apatrene la “ite joxu asëjëihë, me itete mus, me ite mene asëjëihë,” itre ka icilekeu memine la itre trepene meköti Iehova. (1 Kor. 15:24-26; Efe. 1:20-23) Tha Iesu hmekuje kö a musi kowe la itre ka mel. Ngo hna hë nyidrëti fe ka hape, “ate hnyingëne la ite ka mele me ite ka mec.” Hnei Akötresieti hna hamë Iesu la men troa amelene hmaca la itre ka meci hë. (Ite hu. 10:42; Ioane 5:26-28) Celë hi matre, nyipiewekë catr troa drengethenge me metrötrëne la hna amekötin hnei Iesu ka hape, troa ‘inine la nöjei nöj’ asëjëihë.’
(Mataio 28:19) Qa ngöne lai, tro jë nyipunie a inine la nöjei nöj’ asëjëihë, me bapataiso angate kowe la atesiwa i Tetetro, me Hupuna, me [u]ati [h]mitöt.
nwtsty Ithuemacany göi Mataio 28:19
inine: Ame la hnaewekë qene Heleni hna hape, ma·the·teuʹo, tre, kola hape, “troa inine” la itre atr. (Wange ju fe la Mat. 13:52 lo kola hape, “hna inin.”) Ame la itre hnaewekë hna hape, “bapataiso” me “inin” tre, kola amamane la itre nyine troa kuca matre troa ‘inine la itre atr.’
nöjei nöj’ asëjëihë: Maine tro sa ujën mekötin, tre, tro lai a hape, “nöjei nöj.” Ngo ame e celë tre, kola qaja la itre atr ka qa ngöne la nöjei nöj. Ame la qene Heleni ne la hnaewekë, “angate” lo kola hape, troa bapataiso angatr, tre, kolo hi a qaja la itre atr, ngo tha itre “nöje” kö. Ka hnyipixe la hna amekötin celë laka, troa inine la “nöjei nöj’ asëjëihë.” Tusi Hmitrötr a qaja ka hape, qëmekene tro Iesu a traqa troa cainöj, hna kapa hnyawa la angetre ethen e Isaraela, e angatr a traqa troa nyihlue i Iehova. (1 Ite jo. 8:41-43) Ngo jëne la hna amekötine celë, Iesu a upe la itretre drei nyidrë troa akökötrene la huliwa ne cainöje i angatr, me hane ketr la itre xa atr. Haawe, loi e troa catre cainöj me inine la itre atr ngöne la itre xa nöj.—Mat. 10:1, 5-7; Hna ama. 7:9.
(Mataio 28:20) Ini angate jë troa trongëne la nöjei ewekë asëjëihë lo hnenge hna ahnithe koi nyipunie; nge hana wang ini a ce me nyipunie ngöne la nöjei drai asëjëihë uti hë la pune la fene hnengödrai.
nwtsty Ithuemacany göi Mataio 28:20
ini angatre jë: Ame la qene Heleni ne la hnaewekë hna hape, “inin,” tre, kola qaja la troa hamë ini me qejepengöne la itre ewekë, me amamane la itre mekun ka tru, me itre nyine anyipicin. Ame la troa ini angatr troa trongëne la itre hna amekötin hnei Iesu, tre, ketre ewekë lai nyine tro palahi a kuca. Kola qaja la troa ini angatr la itre ini qaathei Iesu, me trongën itre ej, me xötrethenge la tulu i nyidrë.—Ioane 13:17; Efe. 4:21; 1 Pet. 2:21.
Troa Sine Thel La Itre Mekune Ka Sisitria
(Mataio 27:51) Nge hanawang, hna kuie luëne pi la mano thingene la ēnē qa koho uti hë kuhu; me eni enije la fen, me kaqa la ite git.
nwtsty Ithuemacany göi Mataio 27:51
maano: Ame la imaano celë ka mingöminge catr, tre, ej a thawa la hnahag hna hape, Ka Nyipi Hmitötr memine la hnahag hna hape, Hmitrötr. Thenge la hna qaja hnene la angetre Iuda, 18 m la eqeane la imaano, me 9 m la eisaisan, me 7,4 cm la ehmekönine ej. Hnei Iehova hna kuie luëne la imaano, matre troa amamane la trenge elëhni Nyidrë kowe la itre ka humuthe la Hupuna i Nyidrë. Ngo Nyidrëti fe a amamane laka, ijije hë tro sa hane mel e hnine la Paradraiso.—Heb. 10:19, 20.
ēnē: Ame la hnaewekë celë qene Heleni hna hape, na·osʹ, tre, kola qaja la götrane ka sisitria ne la ēnē laka, lue hnahag, ene la Ka Nyipi Hmitötr me Hmitrötr.
(Mataio 28:7) Nge canga tro nyimenyimejë, me qaja koi angete dei nyidë, ka hape, Mele hmaca ha nyidëti qa hna mec; nge hana wang, nyidëti a tro pa Galilaia eë, tropi nyipunieti pe hi; tro nyipunieti a iöhnyi me nyidëti e cili; hawe, ase hë ni qaja koi nyipunie.
nwtsty Ithuemacany göi Mataio 28:7
qaja koi angetre drei nyidrë ka hape, mele hmaca ha nyidrë: Ame la itre föe celë tre, angatre hi la ka pane atre ka hape, mele hmaca ha Iesu. Nge ketre, hna upi angatr troa thuemacane la itre xa angetre dreng. (Mat. 28:2, 5, 7) Ame kowe la angetre Iuda ekö, tha ka nyipiewekë kö la itre mekuna ne la itre föe ngöne la hnakotr. Ngo ame pe, hnene la angela i Iehova hna wangatrunyi angatr, me ahnithe koi angatr la ketre hnëqa ka tru.
E Tusi Hmitrötr
(Mataio 27:38-54) Ame hnei angate hna asataurone me nyidëti la lue ate kë ‘nö, kete ngöne la götrane maca, nge kete ngöne la götrane mi. 39 Ame hnene la nöjei ate hna gojenyi fene la satauro hna qaqa nyidë, me hagei, 40 me hape, We, hmunë ate troa kenithe la ënë, me acile hmaca ngöne la köni drai, amele hmunë jë kö; maine Nekö i Akötesie hmunë, te, utipi qa ngöne la satauro. 41 Kete tune fe la ite tane i angete huje me angete cinyihany, me ite qate kola amakökö nyidë, me hape, 42 Hnei nyëne hna amele ite xan, ngo tha ‘teine pena kö amele nyëne fe. Maine nyëne la Joxu i angete Isaraela, loi e utipi enehila qa ngöne la satauro, nge tro sha lapau nyën. 43 Hnei nyëne hna lapaune koi Akötesie; loi e tro anganyidëti a amele nyën’ enehila maine anganyidëti a aja nyën; ke ase hë nyëne qaja, ka hape, Ini la Nekö i Akötesie. 44 Nge ame la lue ate kë ’nö, lo hna asataurone ce me nyidë kola hane ëte koi nyidë. 45 Ame hna melöhlemipi la nöj’asë qan’ e hnaipajö uti hë hnaipajöhej. 46 Nge e hnaipajöheji Iesu a wexönieti cat, ka hape, Eli, Eli, lama sabakethani? dei la pengön, Akötesingö, Akötesingö, hna uë cilieti laka juengë nie? 47 Ite xan’ a icilenyi e cili kola deng’ a qaja, ka hape, Nyën’ a hë Elia. 48 Nge kete e angat’ a canga nyenyap, me xome la idrawa me hetie ngöne la vinega, me atë ngöne pune la hainyi, me thue ime i nyidë. 49 Önine la thelen, ka hape, Loi kö, tro sha wange maine tro Elia a traqa troa amele nyën. 50 Nge ase hë Iesu wexönieti cate hmaca, nyidëti a nuepi la ua. 51 Nge hanawang, hna kuie luëne pi la mano thingene la ënë qa koho uti hë kuhu; me enienije la fen, me kaqa la ite git; 52 nge hnene la nöjei hua hna ngangapi, nge kösaue la nöjei ngönetei ne la nöjei ate ka hmitöte itete meköle hna mele hmaca, 53 me mejë qa ngöne la ite hua thupene la hnei nyidëti hna mele hmaca, me löjë kowe la lapa hmitöt, me mamapi kowe la nöjei ate ka kösau. 54 Nge ame la keneturio me angate fe thei angeice lo angete thupë Iesu a öhne la sha, memine la nöjei ewekë hna kuca, ame hnei angate hna qou atraqat, me hape, Nyipici Hupuna i Akötesie anganyidëti la.
16-22 EIPEREM
ITRE TRENGAMO QA HNINE LA WESI ULA | MAREKO 1-2
“Ase Hë Nue Tije Pi La Nöjei Ngazo i ’ö”
(Mareko 2:3-5) Nge angat’ a tro fë koi nyidëti la ate ka hape genyi, hna xututh hnei ala eke. 4 Nge tha’teine kö angate troa eashenyi nyidë ke pepetë hë, ame hnei angate hna fe la hune uma lo nyidëti en, nge ase hë angate thë, angate pë hë a nue la göhnë nge ate ka genyi a meköle hun. 5 Xajawatinë hë Iesu la lapaune i angat, nyidëti a ulatine kowe la ka hape genyi, ka hape, Nekönge fe, ase hë nue tije pi la nöjei ngazo i ’ö.
“Ase Hë Nue Tije Pi La Nöjei Ngazo i ’ö”
Ame ngöne lo ijine Iesu a hamë ini e hnine la ketre uma ka tiqa hnei atr, xulu pi hi la foa lao trahmany, kola xututh la ketre atr ka geny. Aja i angatr tro Iesu a aloine la meci angeic. Ngo pine laka kola ipepetrenyi la itre atr, thatreine kö angatr troa “eashenyi nyidë.” (Mar. 2:4) Hleuhleu catre angatr. Angatr a elë jë me fe la hune uma. Thupene lai, angatr pë hë a autine la göhnë hna meköle ngön hnene lai atr ka geny, e hnine la uma.
Hapeu, hnei Iesu kö hna wesitr? Ohea! Hnei nyidrëti hna haine la aqane lapaune i angatr, nge öni nyidrë kowe la atr ka geny: “Ase hë nue tije la nöjei ngazo i ’ö.” (Mat. 9:2) Ngo hapeu, Iesu kö a nuetrije la itre ngazo? Hnene la itretre cinyihan me itretre Faresaio hna jelethoi Iesu me hape: “Ka ue la ate qaja tune lai? Dei la ka ateine troa nue tije la ngazo, nga Akötesieti hi?”—Mar. 2:7.
Atre hnyawa hi Iesu la mekuna i angatr, matre öni nyidrëti jë hi, ka hape: “Hna uë nyipunieti laka nyi uliline la ite ewekë cili e kuhu ite hni nyipunie? Nemene la ka hape maloe? troa hape kowe la ate ka genyi, Ase hë nue tije la nöjei ngazo i ’ö, me troa hape pena, Cilejë, xomejë la göhne i ’ö, nge trojë?” (Mar. 2:8, 9) Eje hi, ijije hi tro Iesu a nue la itre ngazo ne la itre atr ke, nyidrëti a troa huujëne la mele i nyidrë.
(Mareko 2:6-12) Nge ite xa ate cinyihanyi a lapa e cili, me nyi ulili e kuhu ite hni angat, ka hape, 7 Ka ue la ate qaja tune lai? Dei la ka ateine troa nue tije la ngazo, nga Akötesieti hi? 8 Nge canga mamapi koi Iesu e kuhu hni nyidë la hnei angate hna nyi ulili tune lai e kuhu ite hni angat, ame hnei nyidëti hna ulatine koi angat, ka hape, hna uë nyipunieti laka nyi uliline la ite ewekë cili e kuhu ite hni nyipunie? 9 Nemene la ka hape maloe? troa hape kowe la ate ka genyi, Ase hë nue tije la nöjei ngazo i ’ö, me troa hape pena, Cilejë, xomejë la göhne i ’ö, nge trojë? 10 Ngo mate atejë nyipunie laka, tene mene la Nekö i ate e celë fene troa nue tije la nöjei ngazo, (nyidëti a ulatine kowe la ate ka genyi, ka hape,) 11 ini a qaja koi ’ö, Cilejë, xomejë fe la göhne i ’ö, nge trojë kowe la uma i ’ö. 12 Ame hnei angeice hna cile me xome la göhnë, me löpi qëmeke i angat’ asë, mate haine angat’ asë, me atrunyi Akötesie, ka hape, Tha öhne kö shë la thina ka tune la.
nwtsty Ithuemacany göi Mareko 2:9
la ka hape maloe: Ka hmaloi hi troa qaja ka hape, ase hë së nue la ngazo i ketre ke, tha ketre ewekë kö lai ka mama. Ngo ketre iamamanyikeu e troa upe la ketre atr ka geny troa cile . . . me tro. Celë hi lai hna kuca hnei Iesu, matre troa anyipicine kowe la nöjei atr laka, atreine hi nyidrëti troa nue la ngazo i ketre. Kola qaja ngöne la itre xötre celë me ngöne fe la xötre Isa. 33:24 laka, itre atr ka ngazo së matre easa wezipo.
Troa Sine Thel La Itre Mekune Ka Sisitria
(Mareko 1:11) ame hna xulupi la aqane ula qa hnengödrai, kola hape, Nyipëti la Nekönge hniminang, ini a madri nyipë.
nwtsty Ithuemacany göi Mareko 1:11
hna xulupi la aqane ula qa hnengödrai: Ame ngöne la itre Evangelia, akönia ithanata meköti Iehova kowe la itre atr. Nge celë hi pane ijine Nyidrëti a ithanata meköti qa koho hnengödrai.—Ioane 12:28.
Nyipëti la Neköng: Ame lo Iesu e koho hnengödrai, hna hë nyidrë ka hape, Hupuna i Akötresie. (Ioane 3:16) Ngo qane lo kola hnaho nyidrëti e celë fen, hna hë Iesu ka hape, “nekö i Akötesie.” Nge celë hi aqane hë Adamu ekö, lo atr ka pexej pala kö angeic. (Luka 1:35; 3:38) Ngo, hetre ketre ewekë kö hna pi qaja hnei Akötresieti la Nyidrëti a hë Iesu tune lai. Jëne la uati hmitrötr, hnei Akötresieti hna hë Iesu tune lai matre troa amamane laka, Iesu hi la Neköi Nyidrëti hna troa “hnahone hmaca,” a tro hnengödrai eë. Nge nyidrëti hi la hna iën hnei uati hmitrötr, matre troa Joxu me Atre Huuj Ka Sisitria.—Wange ju fe la Ioane 3:3-6; 6:51; Luka 1:31-33; Heb. 2:17; 5:1, 4-10; 7:1-3.
ini a madri nyipë: Maine “Ka tru nyipëti koi ni; madrine catre ni koi nyipë.” Hna qaja fe la hnaewekë celë ngöne Mat. 12:18 me Isa. 42:1, lo kola qejepengöne la Mesia hna thingehnaean, ene Keriso. Nge hna mama hnyawa laka, Iesu hi la Mesia hna thingehnaean, ngöne lo kola sië nyidrë hnei uati hmitrötr. Ketre, ase hë Akötresieti qaja amamane ka hape, Iesu hi la Neköi Nyidrë.
(Mareko 2:27, 28) Öni nyidëti koi angat, ka hape, Hna kuca la sabathi thatraqane la ate, ngo tha hna kuca kö la ate thatraqane la sabath; 28 ke Nekö i ate la Joxu ne la sabath.
nwtsty Ithuemacany göi Mareko 2:28
Joxu ne la Sabath: Hnei Iesu hna xom la hnaewekë celë matre troa ketre sipu qeje nyidrë (Mat. 12:8; Luka 6:5). Kolo hi lai a amamane ka hape, ame la Sabath, tre, kolo drai ne tro nyidrëti a kuca la huliwa ne la Keme i nyidrë e koho hnengödrai. (Wange ju fe la Ioane 5:19; 10:37, 38.) Ame ngöne la Sabath, hnei Iesu hna kuca la itre xa iamamanyikeu ka tru, tune la troa nyinyine la itre mec. (Luka 13:10-13; Ioane 5:5-9; 9:1-14) Kolo hi lai a nyihatrene la itre hna troa kuca hnei Iesu ngöne la ijine tro nyidrëti a Joxu ne la Baselaia. Nge ame la ijine cili, tre, kösë ketre ijine mano, tune la sabath.—Heb. 10:1.
E Tusi Hmitrötr
(Mareko 1:1-15) Dei la qane la maca ka loi Iesu Keriso Hupuna i Akötesie; 2 tune lo hna cinyihane hnei Isaia perofeta, ka hape, “Hana wang, ini a upe la macange qëmeke i ’ö mate troa nyidrawane la jë i ’ö. 3 “Aqane ewekë ne la ate hë ngöne la hnapapa, ka hape, Nyihnyawanejë la kala i Joxu, amekötinejë la ite gojëcine i anganyidë.” 4 Traqa ha Ioane ate bapataiso ngöne la hnapapa, me cainöjëne la bapataiso ne ietra, mate nue tije pi la nöjei ngazo. 5 Ame hna tropi koi angeice la nöje Iuda asë, me angete Ierusalama asë, ame hna bapataiso angate hnei angeice ngöne la hneopegejë Ioridano, kola isa amamane la nöjei ngazo i angat. 6 Nge pene kamela la ixete i Ioane, nge hna oteëne la sine kupeine öni, nge ame la sipu a i angeice, te, sipa me hani ne hnit. 7 Nge angeic’ a cainöjën, ka hape, Kola tropi hutrönge la ka mene hung, tha ijiji ni kö troa thile a shenge la hna sife la lue tengene hnatrapaca i nyidë. 8 Ini a bapataiso nyipunie hnei tim; ngo tro anganyidëti a bapataiso nyipunie hnei [u]ati [h]mitöt. 9 Nge ngöne la ijine cili, Iesu a jötëti qa Nazareta e Galilaia, ame hna bapataisone hnei Ioane e Ioridano. 10 Nge anganyidëti pete hi a elë qa ngöne la tim, ame hnei anganyidëti hna xajawatine la hnengödrai hna thawa, memine la [u]a kola sheshë hui anganyidë kösë piny; 11 ame hna xulupi la aqane ula qa hnengödrai, kola hape, Nyipëti la Nekönge hniminang, ini a madri nyipë. 12 Ame hna canga upi anganyidëti hnene la [u]a kowe la hnapapa. 13 Luate la o pui anganyidëti ngöne la hnapapa, kola tupathe hnei Satana; ce anganyidëti me ite öni ka ihej; nge ite angela a nyi hlue i anganyidë. 14 Thupene la hna othi Ioane, Iesu a ithuëti Galilaia eë, kola cainöjëne la maca ka loi Akötesie, ka hape, 15 Eatë hë la hmekun, nge eashenyi hë la baselaia i Akötesie; ietraju nyipunie, me kapa la maca ka loi.
23-29 EIPEREM
ITRE TRENGAMO QA HNINE LA WESI ULA | MAREKO 3-4
“Tro Kö a Aloine La Meci Ne La Ketre Atr e Sabath?”
(Mareko 3:1, 2) Ame hnei nyidëti hna lö hmaca jë kowe la sunago, nge ej’ e cili la ate fite im; 2 ame hnei angate hna thupë nyidë, hape u, maine tro nyidëti a aloinyi nyëne ngöne la sabath mate tro angat’ a nyi ewekë nyidë.
Nemene La Hna Nue Troa Kuca e Sabath?
Ame e ketre Sabath, hnei Iesu hna lö ngöne la ketre sunago e Galilaia. E cili, hnei nyidrëti hna öhne la ketre trahmanyi ka genyi wanakoim. (Luka 6:6) Kola goeëtili Iesu hnene la itretre cinyihan me itre Faresaio. Pine nemen? Kola mama la mekuna i angatr ngöne la angatr a hnying ka hape: “Hmitöte troa iamele ngöne la sabath?”—Mat. 12:10.
Ame kowe la itre hene ne hmi angetre Iuda, tro hmekuje hi a amelene la ketre atr e Sabath, e easenyi hë tro angeic a mec. Hna wathebone troa xatuane la ketre atr hna ela wacan e Sabath, maine atuthe pena la eatrene la ketre atr. Haawe, kola mama hnyawa laka, ame la kola hnying koi Iesu hnene la itretre cinyihan me itre Faresaio, tre, hetre ketre mekuna i angatre kö. Tha ka nyipiewekë kö koi angatr la atr ka akötr, angatre pe a thel troa jelengazo Iesu.
(Mareko 3:3, 4) Öni nyidëti kowe la ate fite ime, ka hape, Cilejë ngöne nyipin. 4 Ame hnei nyidëti hna ulatin, ka hape, Hape u, ijije troa kuca la loi ngöne la sabath, maine troa kuca la ngazo? troa amelen, maine troa amecin? Ame hna lapa thaupu pi angat.
Nemene La Hna Nue Troa Kuca e Sabath?
Ame pe, atre hnyawa hi Iesu la mekuna i angatr. Atre hi nyidrëti laka, ka tria la aqane trotrohnine i angatr la wathebo göne la troa tha huliwa e Sabath. (Eso. 20:8-10) Ase hë jelengazo nyidrëti ekö, pine la itre huliwa ka lolo hnei nyidrëti hna kuca. Ngo ame e celë, Iesu a qaja kowe la trahmanyi ka genyi wanakoim ka hape: “Cilejë ngöne nyipin.”—Mar. 3:3.
(Mareko 3:5) Ame hnei nyidëti hna goegoeën’ elëhni angat, me aköte pine la xeti la ite hni angat; öni nyidëti kowe la ate, ka hape, Shathepi la ime i ’ö. Nge angeic’ a shath, ame hna loi hmaca pi a ime i angeic.
nwtsty Ithuemacany göi Mareko 3:5
elëhni angatr, me akötr: Mareko hmekuje hi la ka cinyihan me qejepengöne la aqane ujë i Iesu, ngöne lo nyidrëti a öhne la aqane xeti la hni ne la itre hene ne hmi ngöne lo ijin cili. (Mat. 12:13; Luka 6:10) Ngo ma Peteru hi lo ka pane qejepengöne la aqane ujë i Iesu.—Wange ju la “Nyine Nyiqane La Tusi Mareko.”
Troa Sine Thel La Itre Mekune Ka Sisitria
(Mareko 3:29) Ngo ame la ate nyi tru kowe la [u]ati [h]mitöte, te, tha tro kö a nue tij, tro pala kö a të hui nyëne la hulö epine palua.
nwtsty Ithuemacany göi Mareko 3:29
atre nyi tru kowe la uati hmitötr: Ame la troa nyi tru, tre, kola qaja la troa thaipiën, maine qaqan, maine tha metrötrë Akötresie memine la itre huliwa i Nyidrë. Qaathei Akötresieti hi la uati hmitrötr. Matre, e tro sa icilekeu maine wangesixan la mene ej, ke, easë hi lai a nyi tru koi Akötresie. Tune la hna qaja ngöne Mat. 12:24, 28 me Mar. 3:22, öhne hnyawa hi la itre hene ne hmi angetre Iuda laka, qaathei Akötresieti hi la mene i Iesu ke, hnei nyidrëti hna kuca la itre iamamanyikeu. Ngo, öni angatre pena ka hape, qaathei Satana Diabolo la mene i nyidrë.
të hui nyëne la hulö epine palua: Kola qaja la ewekë hna kuca hnene la ketre atr, ngo atre hi ka hape, ka ngazo. Tha tro kö lai a nue la ngazo i angeic ke, pëkö huuj ka ijije troa seng la ngazo cili.—Wange ju la Ithuemacany göne ka xötre celë hna hape, atre nyi tru kowe la uati hmitötr.
(Mareko 4:26-29) Nge öni nyidëti, ka hape, Ceitune la baselaia i Akötesie memine la ate kukuiëne la ite wene kowe la hnadro, 27 me meköle e jidi me hlë e lai, ame hna ciajë la zine me hoeajë, ngo tha ’te kö angeice la pengön. 28 Nge hnadro a aciane la xeni hnei nyëne kö, pai zin, mate engepi, ame hna pexejejë la wen, 29 nge macajë hë la wen, ame hna canga iupijë troa huj, ke ijine menuë hë.
Trotrohnine Kö Epuni La Hna Cinyihan?
6 Nemene la ini nyine tro sa xome qa ngöne la ceitune celë? Ame la hnapan, tre, loi e tro sa atrehmekune laka, thatreine kö tro sa anyimenyimëne la aqane troa kökötre la lapaunene la atr. Ngacama easa kuca asë la hne së hna atreine matre xatua angeic, ngo tha tro pi kö sa uku angeic troa xomi bapataiso. Loi e tro sa atre ka hape, angeice casi hi la ka ijije troa mekune troa nyihlue i Iehova, ke tro kö Nyidrëti a kapa la mekune e ka qa kuhu hni.—Salamo 51:12; 54:6; 110:3.
7 Ame la hnaaluene ini tre, nyine xatua së e traqa ju së kucakuca, hnene laka, tha canga öhne kö së la thangane la hne së hna huliwa, ene la hna ini Tusi memine la itre atr. Loi e tro sa atreine itreqe. (Iakobo 5:7, 8) Maine jë ase hë së kuca asë la hne së hna atreine matre troa xatuane la hnainin, ngo tha kökötre pe la nyipici e kuhu hni angeic, tha kolo kö lai a hape thatreine kö së hamë ini. Iehova a akökötrene la itre itine nyipici thene hmekuje hi la itre atr ka hni ka ipië nge ka ajane troa saze. (Mataio 13:23) Haawe, tha tro pi kö sa jelengazone la aqane cainöje së pine hi laka, tha tru menu kö hnei atr hne së hna xatuane troa xomi bapataiso. Tha Iehova kö a wangatrune la huliwa së, ke tru hnei atr hne së hna ini tus kow ka kapa la nyipici. Nyidrëti pe a wangatrune la trenge catr hne së hna nu.—E jë la Luka 10:17-20; 1 Korinito 3:8.
8 Ame la hnaakönin; thatreine kö së öhne la itre ewekë ka saze thene la atr. Tune la lue trefëne ka ini Tusi Hmitrötr memine la ketre mesinare me qaja la aja i nyidro troa hane nyiqaane cainöj. Hnene la trejine hna amexeje koi nyidro ka hape, tro nyidroti a pane nuetrije la sixa. Sesëkötre ju hi angeic la nyidroti a qaja ka hape, nyimu treu hë ne nue nyidro la sixa. Atre hnyawa hë nyidro ka hape, ngacama tro nyidroti a ufi sixa juetrë, ngo tha sihngödri kö lai koi Iehova, nge ka xele Nyidrëti ma wange la ka mele hnihni. Matre ame koi nyidro, tre, troa iën, troa ufi sixa qëmekene la mesinare maine troa nuetrije hnyawa la sixa. Maine nyipici laka, tha öhne kö la mesinare la etrune la itre trenge catre hna kuca hnene la lue trefëne cili, ngo ame pe, hnene laka kolo pala hi a kökötre la ihnimi nyidro koi Iehova, celë hi ka upi nyidro troa xomi mekune ka loi.
E Tusi Hmitrötr
(Mareko 3:1-19a) Ame hnei nyidëti hna lö hmaca jë kowe la sunago, nge ej’ e cili la ate fite im; 2 ame hnei angate hna thupë nyidë, hape u, maine tro nyidëti a aloinyi nyëne ngöne la sabath mate tro angat’ a nyi ewekë nyidë. 3 Öni nyidëti kowe la ate fite ime, ka hape, Cilejë ngöne nyipin. 4 Ame hnei nyidëti hna ulatin, ka hape, Hape u, ijije troa kuca la loi ngöne la sabath, maine troa kuca la ngazo? troa amelen, maine troa amecin? Ame hna lapa thaupu pi angat. 5 Ame hnei nyidëti hna goegoeën’ elëhni angat, me aköte pine la xeti la ite hni angat; öni nyidëti kowe la ate, ka hape, Shathepi la ime i ’ö. Nge angeic’ a shath, ame hna loi hmaca pi la ime i angeic. 6 Ame hna löpi angete faresaio, me canga ithanata me angete Herodiane mate troa humuthi nyidë. 7 Ame hnei Iesu hna ce jötëti qa lai me angete dei nyidëti kowe hneopegejë, nge ala nyimu cat’ a xöte thenge nyidë qa Galilaia, me Iuda, 8 me Ierusalema, me Idumea, me Ioridano nge kohië, me angete eashenge Turo me Sidona, ala nyimu cat, dengë hë angate la hnei nyidëti hna kuca, ame hna tropi koi nyidë. 9 Nge nyidëti a qaja koi angete dei nyidë mate troa nyi he ka co troa teqe nyidë, ke kösaue la nöjei ate, wanga tro angat’ a ipepetenyi me nyidë; 10 ke ala nyimu la hnei nyidëti hna aloin, celë hi mate ipepetenyipi la nöjei tene meci thei nyidëti, troa kete nyidë. 11 Nge öhnyi nyidëti hë hnene la nöjei u ka ngazo, angate pë hë a keiju koi nyidë me hë, ka hape, Cilieti la Hupuna i Akötesie. 12 Nge nyidëti a shawa catë angat, ke wanga trojë angat’ a amamai nyidë. 13 Nge nyidëti a elëne la wet, me hëne la ite hnei nyidëti hna ajan, ame hna tropi angate koi nyidë. 14 Ame hnei nyidëti hna acilëne la ala luako nyine troa ce me nyidë, mate tro nyidëti a upi angate troa canöj, 15 me hete mene troa aloine la nöjei meci, me helëne la nöjei demoni. 16 Nge hnei nyidëti hna ati ëje i Simona, Peteru; 17 me Iakobo i Zebedaio, me Ioane tejine me Iakobo, nge hnei nyidëti hna ati ëje i nyido Boanerege, pengön, Lue nekö i hedeng; 18 me Anederea, me Filipo, me Batolomaio, me Mataio, me Toma, me Iakobo i Alefaio, me Thadaio, me Simona ate Kanana, 19 me Iuda Isakariota, ate wanaxoeë nyidë.
MELE NE KERESIANO
“Ame La Ate Hete Hnangenyë Nyine Deng, Dengeju”
nwtsty Ithuemacany göi Mareko 4:9
Ame la atr hetre hnangenyë nyine dreng, drengeju angeic: Qëmekene tro Iesu a hamëne la ceitune göne lo atre eëny, öni nyidrë: “Dengeju.” (Mar. 4:3) Nge e thupen, hnei nyidrëti hna amexej hmaca kowe la itretre drei nyidrë troa dreng. Kolo hi lai a amamane ka hape, nyipiewekë catr tro angatr a drenge hnyawan la eamo qaathei Iesu. Ketre, hna qaja fe la hnaewekë celë ngöne Mat. 11:15; 13:9, 43; Mar. 4:23; Luka 8:8; 14:35; Hna ama. 2:7, 11, 17, 29; 3:6, 13, 22; 13:9.
30 EIPEREM KOI 6 MEI
ITRE TRENGAMO QA HNINE LA WESI ULA | MAREKO 5-6
“Atreine Hi Iesu Amelene Hmaca La Itre Sinee Së Ka Mec”
(Mareko 5:38) Nge traqa ha angate kowe la uma ne la tane la sunago, me öhnyi angat’ a iluilu, me teije latesi atraqat.
(Mareko 5:39-41) Nge nyidëti a löjë me ulatine koi angat, ka hape, Hna uë nyipunieti laka iluilu, me iteijeny? tha meci kö la nekönat; ngo nyën a meköl. 40 Nge angat a hnyima sai nyidë. Ngo ase hi nyidëti helë angat’ asë, nyidëti pë hë a thenge la keme me thine ne nekönat, me angete ce me nyidë, me löjë kowe la hnei nekönate hna meköl. 41 Nyidëti a xome la iwanakoime ne la nekönat, me hape koi nyën, Talitha kumi; pengön, Jajinyi fe, ini a qaja koi ’ö, cilejë.
nwtsty Ithuemacany göi Mareko 5:39
tha meci kö . . . ; ngo nyën a meköl: Hna majemine aceitunën e hnine la Tusi Hmitrötr, la mec memine la kola meköl. (Sal. 13:3; Ioane 11:11-14; Ite hu. 7:60; 1 Kor. 7:39; 15:51; 1 Thes. 4:13) Iesu a troa amelene hmaca lai nekönatr. Ngo nyidrëti a ithanata tune lai matre troa amamane laka, ijije hi troa amelene hmaca la itre atr ka meci hë, tune la kola ahlën la ketre atr qa hna meköl. Ame la mene i Iesu ka troa amelene hmaca la neköjajiny, tre, ka qaathene la Keme i nyidrë, “lo ate amelene hmaca jë la ite ka mec, me ulatine la ite ewekë ka pë, kösë celë hë.”—Rom. 4:17.
(Mareko 5:42) Ame hna canga cilejë la jajinyi, me tro ke luako la o macate i nyën; ame hnei angate hna canga haine atraqat.
Mele Hmaca Ha La Neköjajiny!
Hnei Iesu hna upe la itre atr hnei nyidrë hna aloin, matre tha tro kö a qaja la itre hnei nyidrëti hna kuca koi angatr. Nge celë hi lai hnei nyidrëti hna qaja fe kowe la kem me thine ne lai nekönatr. Ngo tru catre la madrine nyidro, ame hnei nyidroti me itre xan hna qaja “kowe la nöje asë cili.” (Mat. 9:26) Hapeu, tha tro jë kö epuni a madrin la kola troa amelene hmaca la ketre sinee i epuni elany? Celë hi hnaaluene iamamanyikeu i Iesu hna cinyihan e hnine la Tusi Hmitrötr.
Troa Sine Thel La Itre Mekune Ka Sisitria
(Mareko 5:19, 20) Ngo tha nangë angeice kö hnei nyidë, ngo öni nyidëti pe koi angeic, ka hape, Trojë kowe la hnalapa i ’ö, me ite sine i ’ö, me amamane koi angate la ite ewekë atraqate hnei joxu hna kuca koi ’ö, me hna hnimi ’ö. 20 Nge angeic’ a tro, me qane cainöj e Dekapoli la ite ewekë atraqate hnei Iesu hna kuca koi angeic; ame hnei angate asë hna hain.
nwtsty Ithuemacany göi Mareko 5:19
amamane koi angatr: Hnei Iesu palahi hna amekötin ka hape, tha tro kö a qaja la itre iamamanyikeu i nyidrë. (Mar. 1:44; 3:12; 7:36) Ngo ame pena e celë, Iesu a upe lai atr troa qaja kowe la itre sinee i angeic la ewekë ka traqa. Eje hi laka, hna upi nyidrëti troa canga tro, nge tha hna pane cainöje kö e cili. Ketre, aja i nyidrëti fe troa apatrene la itre trengathoi ne la itre atr, göne lo itre puaka ka mec.
(Mareko 6:11) Nge ame angete tha kepe nyipunie me tha dei nyipunie, e tro nyipunie qa lai, jumepi la dro ne la ite hnatrapaca i nyipunie nyine hatene koi angat.
nwtsty Ithuemacany göi Mareko 6:11
jume la dro ne la itre hnatrapaca i nyipunie: Nyine amamane ka hape, tha zö ne kö la itretre drei Iesu e Akötresieti a amekötine la itre atr. Hna qaja fe la mekun celë ngöne Mat. 10:14 me Luka 9:5. Öni Mareko me Luka, matre nyine hatrene koi angatr. Celë hi hna kuca hnei Paulo me Banaba, lo nyidroti e Anetioka e Pisidia. (Ite hu. 13:51) Ketre, hnei Paulo fe hna hane ujë tun lo nyidrëti e Korinito. Hnei nyidrëti hna jumejume la ixetre i nyidrë me hape: “Tro ha tithe la ite he i nyipunie la madra i nyipunie; gufa pë hë ni.” (Ite hu. 18:6) Maine jë, itre aqane ujë hna majemine kuca hnene la itretre dreng. Qëmekene tro la angetre Iuda a lö hmaca ngöne la nöj, angatr a pane jumejume la dro ka ngazo ne la itre butre i angatr. Ngo tha celë kö lai aliene lo hna amekötin hnei Iesu.
E Tusi Hmitrötr
(Mareko 6:1-13) Ame hnei nyidëti hna tropi qa lai, me traqa kowe la zi nyidë nge angete dei nyidëti a xöte theng nyidë. 2 Nge e sabathi nyidëti a qan troa ini hnine la sunago, ala nyimu angete deng’ a hain, me hape, Qa ka la ite ewekë celë the angeice la? nge nemene la inamacane hna hamëne koi angeic, memin la ite huliwa ka mene ka tune lai hna kuca hnei lue ime i angeic? 3 Tha kolo kö lo ate tratrau la, lo nekö i Maria, lo tejine me Iakobo, me Iose, me Iuda, me Simona? nge hape u, tha celë kö the shë la ite xa i angeic? Ame hnei angate hna jingenekë pi nyidë. 4 Nge öni Iesu koi angat, ka hape, Tha pë hlemu kö la perofeta, ngo cili kö e zi angeic, me thene la ite sine i angeic, me ngöne la lapai angeic. 5 Nge tha ’teine kö nyidëti kuca la kete huliwa ka men’ e cili. Ngo celë hmekuje hi lo ati ime nyidëti hune la ite xa tene mec, me amele angat. 6 Nge nyidëti a haine pine la tha lapaune angat; ame hnei nyidëti hna tro agöne la ite lapa kola ini. 7 Nge nyidëti a hëne la ka ala luako, me qane troa upi angate isa ala lue, me hamë angate la musi hune la ite u ka ngazo; 8 me ahnithe koi angat, ka hape, The xome kö kete ewekë thatraqane la tro, ngo sine tö hmekuje hi; pëkö kemej, pëkö wateng, nge kete pëkö mani hnine la tengen; 9 ngo nyi lue tengene hnatrapaca; nge the isa lue ixete kö. 10 Öni nyidëti koi angat, ka hape, Ame la uma hnei nyipunie hna troa lö kow, lapaju e cili uti hë la tro hmaca qa lai. 11 Nge ame angete tha kepe nyipunie me tha dei nyipunie, e tro nyipunie qa lai, jumepi la dro ne la ite hnatrapaca i nyipunie nyine hatene koi angat. Nyipici ini a qaja koi nyipunie, tro kö a maloe koi Sodoma me Gomora ngöne la drai ne amekötine hune la lapa cili. 12 Ame hnei angate hna tro me cainöjëne laka qa i ite ate troa ietra. 13 Nge kösaue la nöjei demoni hnei angate hna helën, nge ala nyimu la ite tene meci hna fi wakacun, me amelen.