Watchtower ONLINE LIBRARY
Ita Ne Thup
ONLINE LIBRARY
Drehu
  • TUSI HMITRÖTR
  • ITRE ITUS
  • ITRE ICASIKEU
  • mwbr18 Mei götrane 1-8
  • Itre Itus Ka Nyitrepene La Mel Me Huliwa Ne Cainöj Pepa Nyine Huliwan

Aucune vidéo disponible pour cette sélection.

Désolé, il y a eu une erreur lors du chargement de la vidéo.

  • Itre Itus Ka Nyitrepene La Mel Me Huliwa Ne Cainöj Pepa Nyine Huliwan
  • Itre Itus Ka Nyitrepene La Mel Me Huliwa Ne Cainöj Pepa Nyine Huliwan—2018
  • Sous-titres
  • 7-13 MEI
  • ITRE TRENGAMO QA HNINE LA WESI ULA | MAREKO 7-8
  • ‘Thue Jë La Ehnefe i Nyipunie Me Xötrethenge Ni Jë’
  • nwtsty Ithuemacany göi Mareko 8:34
  • w92 1/8 17 par. 14
  • Aqane Troa Nyenyape Kowe La Mel
  • w08 15/10 25-26 par. 3-4
  • Nemene La Hnei Nyipunieti Hna Troa Hamën Matre Troa Mele Epine Palua?
  • jy 143 par. 4
  • Drei La Nekö i Atr?
  • Troa Sine Thel La Itre Mekune Ka Sisitria
  • w16.08 32 par. 1-4
  • Itre Hnyinge Ne La Itre Ka e
  • Pine nemene matre itre ithupëjia me Iesu a qeje gele i nyidrë pine tha köla im?
  • w00 15/2 17-18 par. 9-11
  • Hapeu, Hetrenyi Kö Së La “Mekuana i Keriso”?
  • E Tusi Hmitrötr
  • 14-20 MEI
  • ITRE TRENGAMO QA HNINE LA WESI ULA | MAREKO 9-10
  • “Hna Acatrene La Lapaun Hnene La Hna Meköl Goeën”
  • w05 15/1 12 par. 9-10
  • Keriso—Atre Eatrëne La Itre Hna Perofetan
  • w05 15/1 12 par. 11
  • Keriso—Atre Eatrëne La Itre Hna Perofetan
  • nwtsty Ithuemacany göi Mareko 9:7
  • Troa Sine Thel La Itre Mekune Ka Sisitria
  • w08 15/2 30 par. 8
  • Itre Mekun Ka Tru Qa Hnine La Tusi Mareko
  • nwtsty Ithuemacany göi Mareko 10:17, 18
  • E Tusi Hmitrötr
  • MELE NE KERESIANO
  • “Hnei Akötresie Hna Iothekeun . . .”
  • nwtsty Ithuemacany göi Mareko 10:4
  • nwtsty Ithuemacany göi Mareko 10:11
  • 21-27 MEI
  • ITRE TRENGAMO QA HNINE LA WESI ULA | MAREKO 11-12
  • “Tru Catre Kö La Hnei Eahlo Hna Hamën”
  • nwtsty Ithuemacany göi Mareko 12:41, 42
  • w97 15/10 16-17 par. 16-17
  • Ka Tru Koi Iehova La Huliwa Hna Kuca Cememine La Hni Ka Pexej
  • w97 15/10 17 par. 17
  • Ka Tru Koi Iehova La Huliwa Hna Kuca Cememine La Hni Ka Pexej
  • w87 1/12 30 par. 1
  • Hapeu, Epuni Kö a Huuj Ngöne La Epuni a Kuië Ahnahna?
  • cl 185 par. 15
  • Inamacane Qa Hnine La “Wesi Ula i Akötresie”
  • Troa Sine Thel La Itre Mekune Ka Sisitria
  • nwtsty Ithuemacany göi Mareko 11:17
  • jy 244 par. 7
  • Tulu Ne Lapaun Hna Hamën Hnene La Hmejieng
  • E Tusi Hmitrötr
  • 28 MEI KOI 3 JUUN
  • ITRE TRENGAMO QA HNINE LA WESI ULA | MAREKO 13-14
  • “Thupëne Kö Wanga Kei Pi Së Kowe La Xoue Atr”
  • ia 200 par. 14
  • Hna Ini Angeic Troa Nue La Ngazo i Ketre
  • it-2 619 par. 6
  • Peteru
  • Troa Sine Thel La Itre Mekune Ka Sisitria
  • w08 15/2 30 par. 6
  • Itre Mekun Ka Tru Qa Hnine La Tusi Mareko
  • jy 287 par. 4
  • Hna Tro Sai Iesu Koi Ana Me Kaiafa
  • E Tusi Hmitrötr
Itre Itus Ka Nyitrepene La Mel Me Huliwa Ne Cainöj Pepa Nyine Huliwan—2018
mwbr18 Mei götrane 1-8

Itre Itus Ka Nyitrepene La Mel Me Huliwa Ne Cainöj Pepa Nyine Huliwan

7-13 MEI

ITRE TRENGAMO QA HNINE LA WESI ULA | MAREKO 7-8

‘Thue Jë La Ehnefe i Nyipunie Me Xötrethenge Ni Jë’

(Mareko 8:34) Nge nyidrëti a hëne la ka ala nyimu ce me angetre drei nyidrë, me hape koi angatr, Maine hetre atre ajane troa xötre thenge ni, loi e tro angeic’ a xele angeice kö, me xome la satauro i angeic, me xötre thenge ni fë.

nwtsty Ithuemacany göi Mareko 8:34

loi e tro angeic a xele angeice kö: Maine “nuetrij la itre aja i angeic asë.” Kolo lai a hape, tro la atr a ketre sipu xele angeice kö, matre troa kuca la aja i Akötresie. Ame la aliene la xötrehnaewekë celë ngöne la qene Heleni, tre, “tha tro hmaca kö angeic a kuca la aja i angeic.” Ka ihmeku hi memine la hna qaja e celë ke, tro angeic a nue la itre sipu aja i angeic, me itre mekun hnei angeic hna thele troa eatrën, me mele i angeic ka loi. (2 Kor. 5:14, 15) Celë fe hi lai la hnaewekë hna xom hnei Mareko, ngöne lo angeic a qejepengöne lo ijine Peteru a kelikelë Iesu.—Mar. 14:30, 31, 72.

w92 1/8 17 par. 14

Aqane Troa Nyenyape Kowe La Mel

14 Öni Iesu kowe la ka ala nyimu me kowe la itretre drei nyidrë, “Maine hete ate ajane troa xöte thenge ni, loi e tro angeic’ a xele angeice kö (maine, “nuetrij la itre aja i angeic,” Charles B. Williams) me xome la satauro i angeic, me xöte thenge ni fë.” (Mareko 8:34) Maine easa ajane troa kapa la ihë celë, nyipiewekë tro sa hnëkë hnyawa matre tro “palahi” sa xötrethenge Iesu. Tha hnene kö laka, hne së hna hnëkë hnyawa, matre easa atreine xötrethenge Iesu. Ame itre xa ijin, thatre una ju hi së, nge ame lo lai itre trengecatre hne së hna kuca, tre, gufa asë, nge luzi fe hë la mel ka tha ase palua kö. Celë hi matre, nyipiewekë troa xomi ijin matre troa akökötrene la lapaune së ke, e tha hmeke kö së, ijije hi troa canga nanazij!

(Mareko 8:35-37) Ke ame la atre pi amelene la mele i angeic, tre, tro ha patr, ngo ame la atre nue la mele i angeice pi ni memine la evangelia, tre, tro ha amelene lai. 36 Ke nemene la thangane kowe la atr e tro nyën’ a hetrenyi la fene hnengödrai asë, nge ngazo pe la mele i nyën? 37 Nge nemene la ewekë tro la atr a hamëne nyine itöne la mele i nyën?

w08 15/10 25-26 par. 3-4

Nemene La Hnei Nyipunieti Hna Troa Hamën Matre Troa Mele Epine Palua?

3 Ame pala hi ngöne la ijine cili, hnei Iesu hna hnying; luetre la lue hnyinge ka troa upe la itretre dreng troa sine thele lue ej. Öni nyidrë, ka hape: “Nemene la thangane kowe la ate e tro nyën’ a hetenyi la fene hnengödrai asë, nge ngazo pe la mele i nyën?” nge “Nemene la ewekë tro la ate a hamëne nyine itöne la mele i nyën?” (Mareko 8:36, 37) Thaa jole kö koi së itre atr troa sa la pane hnying. E meci hë la atr, pëkö thangane lai koi angeice troa hetrenyi la fene hnengödrai asë. Easa öhne la enyipiewekëne la itre mo ngöne la easa mel, ke, kola huliwane itre ej. Ame pë hë la hnaaluene hnyinge i Iesu, hna hape: “Nemene la ewekë tro la ate a hamëne nyine itöne la mele i nyën?” tre, kola amekunë së lo itre trenge ithanata i Satana ngöne lo hneijine i Iobu; kolo hi lo hna hape: “Ite ewekë asë hna hetenyi hnene la ate tro angeic’ a hamëne hnane la mele i angeic.” (Iobu 2:4) Ame kowe la itre ka thaa nyi hlue i Iehova kö, tre, nyipici hi la hnei Satana hna qaja. Tro angatr a kuca asë la nöjei ewekë, uti fe hë la troa eni wathebo matre tro pala hi angatr a mel. Ngo isapengöne kö lai memine la aqane waiewekë ne la itre Keresiano.

4 Atre hi së laka, thaa Iesu kö lo a traqa e celë fen matre troa hamë së la mele ka pexej, me itre mo, me mele ka cile huti ngöne la fene ce. Nyidrëti a traqa matre troa aijijë së troa mele palua ngöne la fene ka hnyipixe; eje hi lo lai hne së hna wanga atrun, ene la mele ka thaa ase palua kö. (Ioane 3:16) Trotrohnine hi la Keresiano la aliene lo pane hnyinge i Iesu, ka hape, “Nemene la thangane kowe la at e tro nyën’ a hetenyi la fene hnengödrai asë, nge ngazo pe la mele i nyën?” Tro angeic a sa, ka hape, pë fe kö thangan. (1 Ioane 2:15-17) Ame la ka troa xatua së troa sa la hnaaluene hnyinge i Iesu, tre, ene la tro sa pane isa hnying, ka hape, ‘Nemene la hnenge hna ajane troa nue me huujëne enehila, nge ka troa aijijë ni troa mele ngöne la fene ka hnyipixe?’ Troa mama la aqane sa së la hnyinge celë ngöne la aqane mele së, nge celë hi lai ka troa amamane la ecatrene la mejiune së.—Wange ju la Ioane 12:25.

(Mareko 8:38) Ame la atr a hmahma göi ni me trenge ewekënge ngöne la xötre celë ka kuci ngazo me ka hape ngazo, tro pena ha la Nekö i atr a hmahma göi nyën’ e ce traqa angeice memine la itre angela ka hape hmitrötre ngöne la lolo ne la keme i angeic.

jy 143 par. 4

Drei La Nekö i Atr?

Eje hi, nyipiewekë tro la itretre drei Iesu a isa catr me isa huujën la mele i angatr, matre troa hane kepe angatr hnei Iesu. Öni Iesu: “Ame la ate a hmahma göi ni me tenge ewekënge ngöne la xöte celë ka kuci ngazo me ka hape ngazo, tro pena ha la Nekö i ate a hmahma göi nyën’ e ce traqa angeice memine la ite angela ka hape hmitöte ngöne la lolo ne la keme i angeic.” (Mareko 8:38) Ame la Iesu a troa traqa ke, tro nyidrëti lai a isa hamëne kowe la “nöjei ate asëjëihë la ka ijije kowe la nöjei huliwa i angat.”—Mataio 16:27.

Troa Sine Thel La Itre Mekune Ka Sisitria

(Mareko 7:5-8) Ame hnei angetre faresaio me angetre cinyihanyi hna hnyingë nyidrëti, ka hape, Hna uëne laka tha xötre thenge angetre drei nyipëti la thina i ange qatr, laka xeni fë la itre ime ka hmitrötr? 6 Nge nyidrëti a ulatine koi angatr ka hape, Loi la hnei Isaia hna perofetane göi nyipunie itretre thoi, ene la hna cinyihan, ka hape, “Ame la nöje celë, tre, kola atrunyi ni hnene la ukeineqë, ngo iananyi me ini la itre hni angatr. 7 Huliwapi hë angatr’ a hmi koi ni, ngo ini pe la nöjei wathebo i atr.” 8 Ke ase hë nyipunie nue trije la wathebo i Akötresie, matre xome pe la thina i atr, ene troa hnea la itre inege ne tulu, me itre inege; nge kösaue la itre xa ewekë ka tune lai hnei nyipunie hna kuca.

w16.08 32 par. 1-4

Itre Hnyinge Ne La Itre Ka e

Pine nemene matre itre ithupëjia me Iesu a qeje gele i nyidrë pine tha köla im?

▪ Ketre ewekë lai hnene la itre ithupëjia me Iesu hna xome matre troa qeje gele i nyidrë me itretre dreng. Hnene lo Trenge Wathebo i Mose ekö hna amekötine la itre ewekë ka troa adrone la atr. Kola qaja la itre ewekë ka neni qa ngöne la ngönetrei, memine la lepera, maine hnene la hna ketr la ketre atr maine öni ka mec. Ngo hnene eje mina fe hna qaja la nyine tro la atr a kuca matre hmitrötre hmaca pi angeic. Kola qaja la troa tro fë huuj, me si, me thathan hnei tim.—Levitiko mekene 11-15; Numera mekene 19.

Ngazo pe, hnene la itre hene ne hmi, itre rabi, hna nyiköne la Wathebo i Mose hnene la itre sipu mekuna i angatr. Hna qaja ka hape, angatr ekö a nyixan atrune la itre ewekë ka troa adrone la atr, me aqane tro ej a xötre koi ketre. Hnei angatre mina fe hna amekötine la itre jia ne huliwa ka ijij, memine la itre nyine troa kuca hnene la atr matre loi hmaca pi angeic.

Önine la itre ithupëjia koi Iesu: ‘Hna uëne laka tha xötrethenge kö angetre drei nyipëti la thiina i ange qatr, laka angatr a xeni fë la itre ime ka dro?’ (Mareko 7:5) Tha itre faresaio kö e cili a qaja la troa porop, ene la troa köla ime qëmekene troa xen. Angatre pe a qaja la ketre wathebo hnei angatre hna acile laka, qëmekene tro la atr a xen, loi e troa pane nenge la tim hune la lue ime i angeic. Kösë ketre aqane hmi pena ha lai. Hna qaja mina fe ka hape, hnene la itre rabi hna “majemine isi pi ithanata göi itre inege nyine huliwane la ijine cili, memine la tim hna troa iën, memine la atre ka troa kuca lai, memine fe la etrune la itre wanakoime nyine troa nei timi kow.”

Matre nemene la aqane sa i Iesu koi angatr, angetre sasaithi tulu? Öni nyidrëti koi angatr: “Hnei Isaia hna perofetane göi nyipunie itete thoi, ene la hna cinyihan, ka hape, ‘Ame la nöje celë, te, kola atrunyi ni hnene la ukeineqë, ngo iananyi me ini [Iehova] la ite hni angat. Huliwapi hë angat’ a hmi koi ni, ngo inine pe la nöjei wathebo i ate.’ Ke ase hë nyipunie nue tije la wathebo i Akötesie, mate xome pe la thina i ate.”—Mareko 7:6-8.

(Mareko 7:32-35) Ame hnei angatre hna tro fë pi koi nyidrë la ka simihnangenyë me tretreqë; angatr’ a xëwe koi nyidrë troa ati ime hui angeic. 33 Nge nyidrëti a e angeice pi qa thene la ala nyimu, me nue la lue hene wanakoime kowe la lue hnangenyë i angeic, me hnyijuën, me ketr la sesepeneqe i angeic; 34 nge nyidrëti a galajë hnengödrai ië, me simano, me ulatine koi angeic, ka hape, Efatha, pengön, Fepi. 35 Ame hna laipi la lue hnangenyë i angeic, me kala la thenyi ne la sesepeneqe angeic, ame hnei angeice hna ewekë meköti.

w00 15/2 17-18 par. 9-11

Hapeu, Hetrenyi Kö Së La “Mekuana i Keriso”?

9 Ka simi hnangenyë la trahmany nge thatreine kö angeic ithanata. Maine jë, drenge hi Iesu laka, angeic a xou me hmahma. Ngacama, tha aqane kuca i nyidrëti kö lai, ngo hnei Iesu hna xomacone lai trahmany qaathene la ka ala nyimu. Thupene lai, Iesu a qene hum kowe lai trahmany matre amamane koi angeic la hnei nyidrëti hna troa kuca. Nyidrëti a “nue la lue hene wanakoime kowe la lue hnangenyë i angeic, me hnyijuën, me kete la sesepeneqe i angeic.” (Mareko 7:33) Thupene lai, Iesu a gala draië jë me simano. Kösë, nyidrëti hi lai a qaja kowe lai trahmany ka hape: ‘Ame la hnenge hna troa kuca koi nyipë ke, qaathene la mene i Akötresie.’ Öni Iesu jë hi: “Fepi.” (Mareko 7:34) E cili, drenge hë nge ithanata hë lai trahmany.

10 Eje hi, ka tru koi Iesu la itre xan! Ka tru koi nyidrëti la itre aliene hni angatr, nge celë hi ka uku nyidrë troa xatua angatr. Pine laka, itre Keresiano easë, nyipiewekë tro sa hetrenyi la mekuana i Keriso ngöne la götrane celë. Öni Tusi Hmitrötr: “Ce hni ju nyipunie asëjëihë, me ihnimikeuju, me hnimi tejin, me feje hnin, me hni ka ipië.” (1 Peteru 3:8) Haawe, loi e tro sa wangatrune la itre aliene hni ne la itre xan, ngöne la aqane ithanata së me aqane ujë së.

11 Easa wangatrune la itre aliene hni itre xan e hnine la ekalesia, ngöne la easa atrunyi angatr. Ketre, ame la hne së hna ajane troa kuca koi së hnei itre xan ke, loi e tro sa kuca koi angatr. (Mataio 7:12) Celë hi matre, loi e tro sa thupëne la aqane ithanata së. (Kolose 4:6) Tha tro kö sa thëthëhmine laka, ‘Hetete ewekë kösë hna thine hnei taua.’ (Ite Edomë 12:18) Nge tune kaa fe e hnine la fami? Ame la lue trefëne ka ihnim tre, nyidroti a isa wangatrune la aliene hni ketre. (Efeso 5:33) Tha tro kö nyidroti a iqajakeun la itre trengewekë ka akötr, me ijelë me ithanata angazony ke, hetre ethan kowe la mele i nyidro lue trefën. Ketre, hnëqa ne la keme me thin ka ihnim troa wangatrune la aliene hni ne la nekö i nyidro. Ame la nyidroti a hajine la nekönatr, tha nyidroti kö a ahmahmanyi nyën, nyidroti pe a metrötrë nyën. (Kolose 3:21) Ame la easa wangatrune la itre xan, easë hi lai a amamane laka, hetrenyi së la mekuana i Keriso.

E Tusi Hmitrötr

(Mareko 7:1-15) Nge hna icasikeu koi nyidrëti la angetre faresaio me itre xa’ ate cinyihane hna tro qa Ierusalema; 2 nge angat’ a goeëne la itre xan’ e angetre drei nyidrë a xeni fë la itre ime ka hmitrötr, ene tha hna köla ime kö, ame hnei angatre hna jele menu angatr. 3 Ke tha xeni kö angetre faresaio me angetre Iuda e tha pane köla ime hnyawa, kola xome la thina i ange qatr; 4 nge qa i angatre hnaitö, tre, tha xeni kö e tha pane sie; nge nyimu ewekë hnei angatre hna kapa me xom, ene troa hnea la itre inege, me itre sine inege me itre inege kopa, me itre göhnë. 5 Ame hnei angetre faresaio me angetre cinyihanyi hna hnyinge nyidrëti, ka hape Hna uëne laka tha xötre thenge angetre drei nyipëti la thina i ange qatr, laka xeni fë la itre ime ka hmitrötr? 6 Nge nyidrëti a ulatine koi angatr ka hape, Loi la hnei Isaia hna perofetane göi nyipunie itretre thoi, ene la hna cinyihan, ka hape, “Ame la nöje celë, tre, kola atrunyi ni hnene la ukeineqë, ngo iananyi me ini la itre hni angatr. 7 Huliwapi hë angatr’ a hmi koi ni, ngo ini pe la nöjei wathebo i atr.” 8 Ke ase hë nyipunie nue trije la wathebo i Akötresie, matre xome pe la thina i atr, ene troa hnea la itre inege ne tulu, me itre inege; nge kösaue la itre xa ewekë ka tune lai hnei nyipunie hna kuca. 9 Öni nyidrëti koi angatr, ka hape, Loi koi nyipunie lo hna apatrene la wathebo i Akötresie troa trongëne la thina i nyipunie. 10 Ke öni Mose, ka hape, “Metrötrëneju la keme i ’ö me thine ’ö;” nge, “Ame la atre qaja angazone la keme me thin, tro ha humuthi angeic.” 11 Ngo öni nyipunie, ka hape, Ame la atre qaja kowe la keme me thin, ka hape, Ame la ite ewekënge nyine xomexatuan nyipo, te, Korabana, (pengön, ahnahna,) 12 nge tha nue angeice hmaca kö troa kuca ketre ewekë thatraqane la keme i angeice me thine i angeic; 13 celë hi kola apatrene la wesi ula i Akötresie hnene la thina i nyipunie hna pune qaja; nge nyimu ewekë ka tune lai hnei nyipunie hna kuca. 14 Nge nyidrëti a hëne la ka ala nyimu, me ulatine koi angatr, ka hape, Drei ni ju hnei nyipunie asë, me trotrohnin; 15 pëkö ewekë qa tröne la atr a lö e kuhu hni angeice ka atreine troa angazo angeic; ngo itre ka löpi qa thei angeice la itre nyine angazone la atr.

14-20 MEI

ITRE TRENGAMO QA HNINE LA WESI ULA | MAREKO 9-10

“Hna Acatrene La Lapaun Hnene La Hna Meköl Goeën”

(Mareko 9:1) Öni nyidrëti koi angatr, ka hape, Nyipici ini a qaja koi nyipunie, ame la itre xane ka cil’ e celë, tre, tha tro kö a pane meci uti hë e öhnë hë angatre la baselaia i Akötresie a traqa ha memine la men.

w05 15/1 12 par. 9-10

Keriso—Atre Eatrëne La Itre Hna Perofetan

9 Ca macatre hë ne amamane Iesu laka, nyidrëti hi la Mesia. Ase hë atrune la Paseka ne la macatre 32 M.K. Maine jë, hnene la icilekeu me pi aja mo me itre jole ne la mel, matre ala nyimu la itre ka xele ma drei Iesu. Ame itre xan, kucakuca catr angatr ke, tha kapa kö Iesu lo angatr a pi acili nyidrëti a joxu. Ame lo itre hene ne hmi a tupathi Iesu, xele nyidrëti troa atrunyi nyidrëti kö, matre tha kuci iamamanyikeu ju kö nyidrë. (Mataio 12:38, 39) Maine jë, nyimutre la itre ka tha trotrohnine la aqane ujë i Iesu. Ketre, ase hë Iesu nyiqane qaja kowe la itretre drei nyidrë la ketre ewekë hnei angatr hna tha trotrohnin. Öni nyidrë ka hape, ‘Tro nyidrëti a tro Ierusalema eë, me xomi hnine la nöjei ewekë ka kösaue qa thene la itre qatr, me itre tane i angetre huj, me angetre cinyihany, nge troa humuthi” nyidrë.—Mataio 16:21-23.

10 Naen maine treen pe hi la itre treu, matre traqa pi la ijine tro ‘[Iesu] a nue la fene celë a tro kowe la Tretretro.’ (Ioane 13:1) Tru catre la hnei Iesu hna hnehengazone la itretre dreng ka mele nyipici. Celë hi matre nyidrëti a thingehnaeane koi angatr troa kuca la ketre iamamanyikeu e koho hnengödrai. Kolo ewekë hnei nyidrëti hna xele ma kuca kowe la angetre Iuda ka tha idrei. Öni nyidrë, “Nyipici ini a qaja koi nyipunie, ame la ite xane ka cil’ e celë, te, tha tro kö a mec, uti hë e öhnë hë angate la Nekö i ate kola traqa ngöne la baselaia i angeic.” (Mataio 16:28) Tha Iesu kö a qaja e celë ka hape, tro la itre xa ka drei nyidrëti a mel uti hë 1914, ngöne lo ijine kola troa acile la Baselaia. Nyidrëti pe e celë a qaja ka hape, tro nyidrëti a aijijëne la köni atre drei nyidrë troa meköl goeëne la elolo i nyidrë ngöne la Baselaia hna troa acil elany. Ame la hna meköl goeëne celë tre, ketre iamamanyikeu.

(Mareko 9:2-6) Thupene la itre drai ka cangemen, Iesu a jötëti sai Peteru me Iakobo, me Ioane, me e angatre kowe la wetr ka hoea me ga pa atr; ame hna ketre pengöne pi nyidrë qëmeke i angatr; 3 ame hna hadrehadreu la itre ixetre i nyidrë, nge wiëwië catr, tune la kiona, matre tha’treine kö la atreine moli troa awiëne tune lai. 4 Nge Elia me Mose a mama koi angatr, a ce ithanata me Iesu. 5 Nge öni Peteru koi Iesu, ka hape, Rabi jiniati, nyishëti e jötitëtia munëti e celë; jötëti nyihunieti a ahmënengëtine la itre uma ne heta ka hape könitre, thatraxajai enëtilai la ketre, nge thatraqai Mose la ketre, nge thatraqai Elia la ketre.” 6 Ke tha ’tre kö angeice la nyine qaja, ke angatr’ a qou atraqatr.

w05 15/1 12 par. 11

Keriso—Atre Eatrëne La Itre Hna Perofetan

11 Thupene la 6 lao drai, Iesu a tro sai Peteru, Iakobo me Ioane hune la ketre wetr ka draië, maine jë, hune la wetre Heremona. E cili, Iesu “a kete pengöne . . . qëmeke i angat, nge hadehadeu la [iqëmeke] i nyidë tune la jö; nge wiëwië hë la ite ixete i nyidëti tune la lai.” Kola öhnyi Mose fe me Elia perofeta, nge nyidroti a ithanata koi Iesu. Maine jë, e jidri la kola traqa la ewekë celë, matre kösë ka nyipici hi koi angatr. Celë hi matre, mekune jë hi Peteru troa acil la köni uma mano thatraqai Iesu, Mose me Elia. Peteru petre kö a ithanata, nge traqa pi la ketre iaw ka hadrehadreu a juetrë angatr, nge drenge jë hi angatr la kola ithanata qa hnine la iaw, me hape: “Dei la Nekönge hniminang, ini a madi nyidë; dei nyidëti ju nyipunie.”—Mataio 17:1-6.

(Mareko 9:7) Nge hna he angatre hnei iawe, maine hna xulupi la aqane ula qa hnine la iawe, kola hape, Drei la Nekönge hniminang, drei nyidrëti ju.

nwtsty Ithuemacany göi Mareko 9:7

aqane ula: Celë hi hnaaluene ijine Iehova a ithanata meköti kowe la itre atr, ngöne la itre Evangelia.

Troa Sine Thel La Itre Mekune Ka Sisitria

(Mareko 10:6-9) Ngo ngöne ekö la hna qane xupe la nöjei ewekë, hnei nyidrëti hna celohmë nyidro trahmanyi me fö. 7 “Qa ngöne hi lai, tro la trahmanyi a nue la keme me thine i angeic, me fedre kowe la fö’ i angeic; 8 nge tro nyidroti a ca ngönetrei; “celë hi matre tha ala lue hmaca kö, ngo ca ngönetrei hë. 9 Qa ngöne lai, ame la hnei Akötresie hna isilekeun, the tro kö a senge hnei atr.

w08 15/2 30 par. 8

Itre Mekun Ka Tru Qa Hnine La Tusi Mareko

10:6-9. Akötresieti a ajane tro la lue trefën a ce lapa. Celë hi matre, tha tro kö nyidroti a canga mekun troa sei hna cil. Loi e tro pe nyidroti a trongëne la itre trepene meköti ne la Tusi Hmitrötr, matre troa cile kow la itre jol ka traqa ngöne la mele ne trefën.—Mat. 19:4-6.

(Mareko 10:17, 18) Nge nyidrëti a ithuëti e kuhu gojeny, ame hna nyenyapepi la ketre atr me sa watingöneca koi nyidrë, me hnyingë nyidrëti, ka hape, Atre ini fe ka loi, nemene la qange troa kuca matre hetrenyijë ni la mele ka tha ase palua kö? 18 Nge Iesu a ulatine koi angeic, ka hape, Ue lae eö a jele ka loi ni? pëkö ka loi, ngo Akötresie casi hi.

nwtsty Ithuemacany göi Mareko 10:17, 18

Atre ini ka loi: Hnene la trahmanyi hna hë Iesu ka hape, “Atre ini ka loi,” matre troa atrune me adraië nyidrë. Celë hi aja ne lo itre hene ne hmi. Ngacama meköti hi troa hë Iesu ka hape, “Ate ini” me “Joxu” (Ioane 13:13), ngo nyidrëti a pane atrune la Tretretro i nyidrë.

Pëkö ka loi, ngo Akötresie casi hi: Ame e celë, Iesu a amamane laka, Iehova la tulu ka sisitria nge ka loi, nge Nyidrëti hi la ka ijije troa amekötin la loi me ngazo. Ame la Adamu me Eva a thadrei Iehova me xen lo sinöe ne atrehmekune la loi me ngazo ke, nyidroti hi lai a xome la hnëqa i Akötresie. Tha celë kö lai aqane ujë i Iesu. Hnei nyidrëti hna nue kowe la Tretretro i nyidrë troa amekötin la loi me ngazo, e hnine la Wesi Ula i Nyidrë.—Mar. 10:19.

E Tusi Hmitrötr

(Mareko 9:1-13) Öni nyidrëti koi angatr, ka hape, Nyipici ini a qaja koi nyipunie, ame la itre xane ka cil’ e celë, tre, tha tro kö a pane meci uti hë e öhnë hë angatre la baselaia i Akötresie a traqa ha memine la men. 2 Thupene la itre drai ka cangemen, Iesu a jötrëti sai Peteru me Iakobo, me Ioane, me e angatre kowe la wetr ka hoea me ga pa atr; ame hna ketre pengöne pi nyidrë qëmeke i angatr; 3 ame hna hadrehadreu la itre ixetre i nyidrë, nge wiëwië catr, tune la kiona, matre tha’treine kö la atreine moli troa awiëne tune lai. 4 Nge Elia me Mose a mama koi angatr, a ce ithanata me Iesu. 5 Nge öni Peteru koi Iesu, ka hape, Rabi jiniati, nyishëti e jötitëtia munëti e celë; jötrëti nyihunieti a ahmënengëtine la itre uma ne heta ka hape könitre, thatraxajai enëtilai la ketre, nge thatraqai Mose la ketre, nge thatraqai Elia la ketre. 6 Ke tha ’tre kö angeice la nyine qaja, ke angatr’ a qou atraqatr. 7 Nge hna he angatre hnei iawe, maine hna xulupi la aqane ula qa hnine la iawe, kola hape, Drei la Nekönge hniminang, drei nyidrëti ju. 8 Nge angatr’ a canga goeëne xötreith, ngo pa hmaca pe hna öhn, ngo Iesu hmekuje pe hi thei angatr. 9 Angatr’ a utipi qa hune la wetr, ame hnei nyidrëti hna eawatine koi angatre matre tha tro kö angatr’ a amamane la hnei angatre hna öhn, pane mele hmaca ha la Nekö i atre qa hna mec. 10 Ame hnei angatre hna xome hutine la trenge cili, me ithanatanekeun, ka hape, Nemene la pengöne la troa mele hmaca qa hna mec. 11 Nge angatr’ a hnyingë nyidrëti, ka hape, Hape ue la hna qaja hnei angetre cinyihany, ka hape, Jötëtia hlepëti pa i Elia? 12 Nge öni nyidrëti koi angatr, ka hape, Troa traqa pa i Elia troa ahmadradrane la nöjei ewekë asë, tune la hna cinyihane göi Nekö i atr, laka tro angeic’ a akötr atraqatr, nge troa jele tha nyipi ewekën. 13 Ngo ini a qaja koi nyipunie laka, traqa ha Elia, nge ase hë angatre kuca koi angeice la aja i angatr, tune la hna cinyihane göi angeic.

MELE NE KERESIANO

“Hnei Akötresie Hna Iothekeun . . .”

nwtsty Ithuemacany göi Mareko 10:4

tusi ne triji fö: Wange ju la Ithuemacany göi Mataio 19:7.

nwtsty Ithuemacany göi Mareko 10:11

trije la föe i angeic: Maine “helëne la föe i angeic.” Tro sa trotrohnine la trengewekë i Iesu hna cinyihan hnei Mareko, jëne la hna qaja ngöne Mataio 19:9, ka hape, “nge tha ka kuci ngazo kö.” Ame e celë, Mareko a qaja ka hape, maine tro la ketre atr a trije la föe i angeic ngo tha hna “kuci ngazo” pe (hnaewekë qene Heleni, por·neiʹa) haawe, angeice hi lai a nyixetë.

angazo nyidro: Ame e celë, Iesu a thipetrije la ini hna hamën hnene la itre keme ne hmi laka, angatr a nue la trahmany troa trije la föi angeic ‘pine la nojei kepin asë.’ (Mat. 19:3, 9) Tha trotrohnine hnyawa kö la angetre Iuda la aliene la troa nyixetëtriji föe. Ame kowe la itre keme ne hmi, thatreine kö troa nyixetë hnene la trahmany, ngo itre föe hmekuje hi la ka nyixetë. Hnei Iesu hna amamane ka hape, ceitui nyidroti hi, loi e tro nyidroti a inyipicikeu. Nyidrëti hi lai a wangatrune la itre föe.

21-27 MEI

ITRE TRENGAMO QA HNINE LA WESI ULA | MAREKO 11-12

“Tru Catre Kö La Hnei Eahlo Hna Hamën”

(Mareko 12:41, 42) Nge nyidrëti a munëti hmekune la trenge ne mani, me xajawatine la hna kuië mani kowe la trengene hnene la ka ala nyimu; nge ala nyimu la itre trena mo a kuiën’ atrun. 42 Ame hna traqapi la ketre sine föe la ewekë, me kuiëne la lue mani ka co, celë hi kodran.

nwtsty Ithuemacany göi Mareko 12:41, 42

trengen: Kola qaja hnene la itre itus qene Iuda ka hekö ka hape, ame la itre hnë kuie manie maine itre trengene manie ka co, tre, kösë itre trutru maine itre jon, ka hetre ga xulu ka co e koho hun. Itre atr a kuië nyimu pengöne ahnahna. Casi hi la hnaewekë qene Heleni hna xom e celë memine lo hna qaja ngöne Ioane 8:20, lo hna ujën ka hape, “hna ami mani.” Ame la hnaewekë celë, tre, kola qaja la ketre götran e hnine la Hnahage Ne La Itre Föe. (Wange ju la Mekene 15 ne la neköi itus, Ixatua Göi Ini Tusi Hmitrötr.) Tune la hna qaja ngöne la itre xa itusi ekö, hna amë la 13 lao trengene manie ngöne la hnahag celë. Easa mekun laka, maine jë, hetre ketre hnë kuië manie ka tru e hnine la ēnē, nge hna amë fe e hnin ej la manie hna kuiëne ngöne la itre trengene manie ka co.

lue mani ka co: Lit., “lue lepta, maine ca kodran.” Ame la hnaewekë “lepta” tre, kolo hnaewekë qene Heleni hna xom matre troa qaja la nyimu le·ptonʹ. Celë hi manie ka co catr nge tha ka hace kö, hna huliwan hnene la angetre Isaraela. Ceitune hi la 1 lepton memine la 128 denari. Ame pena la hnaewekë qene Heleni ko·dranʹtes (hna ujën qa ngöne la qene Latë quadrans) tre, kola qaja la ketre manie i angetre Roma hna kuca hnei kopa. Ceitune hi la 64 lao kodran memine la 1 denari. Ame e celë, Mareko a xome la manie i angetre Roma, matre troa amamane la etrune la manie hna huliwane hnene la angetre Iuda.—Wange ju la Mekene 18 ne la neköi itus, Ixatua Göi Ini Tusi Hmitrötr.

(Mareko 12:43) Nge nyidrëti a hëne la angetre drei nyidrë, me ulatine koi angatr, ka hape, Nyipici ini a qaja koi nyipunie, tru la hna kuiëne kowe la trenge ne mani hnene la sine fö celë ka pë ewekë, hui angatr’ asë angetre kuiën.

w97 15/10 16-17 par. 16-17

Ka Tru Koi Iehova La Huliwa Hna Kuca Cememine La Hni Ka Pexej

16 Itre drai thupen, e 11 Nisan, Iesu e hnine la ēnē. Itretre cinyihan me itre Faresaio a qejegelene la musi Iesu, me tupathi nyidrë jëne la itre hnying göi hotr, me mele hmaca, me itre xa ewekë ju kö. Nyidrëti a upezöne la itretre cinyihan me itre Faresaio pine la nöjei ewekë hna kuca, tune la troa “xom’ alöne la ite uma ne la nöjei sine fö.” (Mareko 12:40) Thupene lai, Iesu a tro kowe la Hnahag Ne La Itre Föe. Tune lo hna majemin hnene la angetre Iuda, hetre 13 lao trengene manie hna amë e cili. Nyidrëti a lapa goeëne la itre ka kuië ahnahna. Tru la itre trenamo ka traqa, nge kösë angatr a pi nyi ka loi me pi mama. (Wange ju fe la Mataio 6:2.) Öhne ju hi Iesu la ketre föe. Maine jë, ame koi itre xan, tha ka nyipiewekë kö eahlo nge ka pë pengöne la ahnahna i eahlo. Ngo, öhn asë hi Iesu la itre aliene hni, matre atre hi nyidrëti laka, “kete sine föe” eahlo, nge goi atre fe hi nyidrëti la etrune la manie hnei eahlo hna kuiën laka, “lue mani ka co, celë hi kodane.”—Mareko 12:41, 42.

17 E cili, Iesu a hëne jë la itretre drei nyidrë matre troa hamëne la ketre ini koi angatr. Öni Iesu, ‘tru kö la hnei eahlo hna kuiën, hui angatr asë.’ Nyidrëti a qaja ka hape, tru catre kö la hnei eahlo hna hamën, hune la nöjei mo asë hna traqa fë hnene la itre atr. Hnei eahlo hna “kuiën asë” la hnei eahlo hna hetreny. Kola mama ngöne la aqane ujë i eahlo laka, tru catr la hnei eahlo hna mejiune koi Iehova. Haawe, loi e tro sa xötrethenge la tulu ne la atr laka, ngacama co hi la hna hamën, ngo hna hamëne pe hnene la hni ka pexej. Celë hi lai ka nyipiewekë koi Akötresie!—Mareko 12:43, 44; Iakobo 1:27.

(Mareko 12:44) Ke hnei angatr’ asë hna isa kuiëne qa ngöne la tiqa angatr; ngo hnei nyidroti ka pë ewekë hna kuiën asë la nune mele i nyidro.

w97 15/10 17 par. 17

Ka Tru Koi Iehova La Huliwa Hna Kuca Cememine La Hni Ka Pexej

17 E cili, Iesu a hëne jë la itretre drei nyidrë matre troa hamëne la ketre ini koi angatr. Öni Iesu, ‘tru kö la hnei eahlo hna kuiën, hui angatr asë.’ Nyidrëti a qaja ka hape, tru catre kö la hnei eahlo hna hamën, hune la nöjei mo asë hna traqa fë hnene la itre atr. Hnei eahlo hna “kuiën asë” la hnei eahlo hna hetreny. Kola mama ngöne la aqane ujë i eahlo laka, tru catr la hnei eahlo hna mejiune koi Iehova. Haawe, loi e tro sa xötrethenge la tulu ne la atr laka, ngacama co hi la hna hamën, ngo hna hamëne pe hnene la hni ka pexej. Celë hi lai ka nyipiewekë koi Akötresie!—Mareko 12:43, 44; Iakobo 1:27.

w87 1/12 30 par. 1

Hapeu, Epuni Kö a Huuj Ngöne La Epuni a Kuië Ahnahna?

Nyimutre la itre ini nyine tro sa xome qa ngöne la ceitune celë. Ngo hetre ketre ini kö ka sisitria. Nyipici laka, ijiji së asë hi troa sajuëne la nyipi hmi me kuië ahnahna. Ngo ame la ka sisitria catre kö koi Akötresie, tre, tro sa kuië ahnahna qa kuhu hni së, ngo tha tro kö sa hamëne la itre munën. Hapeu, easë kö a hamë Akötresieti la itre ewekë ka tru alameken, maine munëne pena?

cl 185 par. 15

Inamacane Qa Hnine La “Wesi Ula i Akötresie”

15 Pine nemene matre, kolo hi a qaja hnei Tusi Hmitrötr la tulu ne la sine föe, ngo alanyimu pe la itre ka traqa troa kuië ahnahna? Jëne la ceitune celë, Iehova a ini së ka hape, Akötresieti ka hetre hni ne ole Nyidrë. Madrine catre Nyidrë troa kapa la itre ahnahna hne së hna kuca cememine la hni ka pexej. Tha Nyidrëti kö a goeëne ceitune la ahnahna së me itre xan. Eje hi, nyine haine la aqane ini së hnei Iehova!

Troa Sine Thel La Itre Mekune Ka Sisitria

(Mareko 11:17) Nge nyidrëti a ini angatr, ka hape, Hape u, tha hna cinyihane laka, Tro ha qaja la umange uma ne thithi thatraqane la nöjei nöje asë? ngo nyipunie a celohmën’ eje nyine ngönemenyi ne la itre atre kë ’nö.

nwtsty Ithuemacany göi Mareko 11:17

uma ne thith thatraqane la nöjei nöj asë: Ame thene la köni atre cinyihan la Evangelia, nge ka amexej la hna qaja ngöne Isaia 56:7, Mareko hmekuje hi la ka hape, “thatraqane la nöjei nöje asë [itre atr].” (Mat. 21:13; Luka 19:46) Hna kuca la ēnē e Ierusalema, matre tro la angetre Isaraela me itre trenyiwa ka xoue Akötresie, a nyihlue me thithi koi Iehova. (1 Ite jo. 8:41-43) Haawe, meköti koi Iesu troa jelengazone la angetre Iuda ka salem e hnine la ēnē, me ka huliwan ej ceitu me nyine ngönemenyi ne la itre atrekënö. Hnene la itre thiina i angatre cili, matre sixele hë la itre atr troa traqa troa atrunyi Iehova me easenyi Nyidrë, ngöne la uma ne thith.

(Mareko 11:27, 28) Nge angatr’ a hmaca Ierusalema eë; nge nyidrëti a tro agö hnine la eneti hmitrötr, ame hna traqapi koi nyidrë la itre tane i angetre huj, me angetre cinyihany, me itre qatr, 28 me qaja koi nyidrëti, ka hape, Hnene la musi drei hnei nyipëti hna kuca la nöjei ewekë cili? nge hnei drei hna hamë nyipë la musi cili matre kuca la itre ewekë cili?

jy 244 par. 7

Tulu Ne Lapaun Hna Hamën Hnene La Hmejieng

Tha hmitre kö matre traqa pi Iesu me itretre drei nyidrë e Ierusalema. Tune la hna majemin, Iesu a tro kowe la ēnē matre troa hamë ini. Maine jë, drenge hi la itre tane i angetre huuj me itre qatre ne la nöj, lo hna kuca hnei Iesu kowe la itre ka salem. Celë hi matre öni angatre jë: “Hnene la musi dei hnei nyipëti hna kuca la nöjei ewekë cili? nge hnei dei hna hamë nyipë la musi cili mate kuca la ite ewekë cili?”—Mareko 11:28.

E Tusi Hmitrötr

(Mareko 12:13-​27) Nge angatr a upe koi nyidrëti itre xa atre faresaio, me angetre Herodiane troa thupë thejine la itre wesi ula i nyidrë. 14 Nge traqa ha, öni angatre koi nyidrëti, ka hape, Atre ini fe, atre hë huni laka nyipici cilie, nge tha hlehle kö cilie e atre; ke tha mekune kö cilie la qëmeke ne la atr, nge atre inine anyipicine la kala i Akötresie; ijije troa hotre koi Kaisara, hape u, trije kö? 15 Tro huni a hamën, tha tro kö huni a hamën, hape u? Ngo nyidrëti a atre hmekuatine la trenge iaö i angatr, me ulatine koi angatr, ka hape, Ue lae nyipunie a tupathi ni? Awepi la denari, matre wangejë ni. 16 Ame hnei angatre hna hamën. Öni nyidrëti koi angatr, ka hape, Qëmeke i drei la, memine la hna cinyihan? Öni angatre koi nyidrëti, ka hape, Kaisara. 17 Nge nyidrëti ’a ulatine koi angatr, ka hape, Hamënejë koi Kaisara la itre ewekë i Kaisara, nge koi Akötresie la itre ewekë i Akötresie. Ame hnei angatre hna hai nyidrë. 18 Ame hna tropi koi nyidrëti la angetre sadukaio, itretre hape, pëkö troa mele hmaca; angatr’ a hnyingë nyidrëti, ka hape, 19 Atre ini fe, hnei Mose hna cinyihane koi shë, ka hape, Maine meci hë la ketre trejine me ketre atr, nge meci trije la fö’ i angeic, nge pëkö kuku, tre, qanyine la trejine me angeice troa xome la fö’ i angeice troa nyi matrane la trejin me angeic. 20 Ala luengemene la itre trejin, ame hna faipoipojë la haetra, ame hna mecipi, nge pëkö matran. 21 Ame hna xomi angeice jë hnene la hnaaluen, ame hna meci pi, nge pëkö matran; nge tune fe hnene la hnaakönin. 22 Nge pëkö matra ne la ala luengemen; nge thupe i angatr’ asë ame hna mecipi fe la fö. 23 Tro angeic’ a fö’ i drei e angatre ngöne la mele hmaca? ke asesë kö xomi angeice hnene la ala luengemene nyine fö i angatr. 24 Nge Iesu a ulatine koi angatr, ka hape, Hape u, tha menu kö nyipunie ngöne laka tha’tre kö nyipunie la hna cinyihane memine la mene i Akötresie? 25 Ke e tro angatr’ a mele hmaca qa hna mec, tre, tha tro kö a hetre fö, me ihamë fö, ngo tro angatr’ a tune la nöjei angela e hnengödrai. 26 Nge ame ngöne la itre ka mec, ene lo itre ka troa mele hmaca, te, hape u, tha hna e kö hnei nyipunie ngöne la tusi Mose, laka hnei Akötresie hna ulatine koi angeice ngöne la sinöe ka ithiny, ka hape, “Ini la Akötresi Aberahama, me Akötresi Isaaka, me Akötresi Iakobo”? 27 Tha Akötresi itre ka meci kö anganyidrë, ngo loi pe itre ka mel; atraqatre la menu i nyipunie.

28 MEI KOI 3 JUUN

ITRE TRENGAMO QA HNINE LA WESI ULA | MAREKO 13-14

“Thupëne Kö Wanga Kei Pi Së Kowe La Xoue Atr”

(Mareko 14:29) Ngo öni Peteru koi nyidrëti, ka hape, Maine tro angatr’ asëjëihë a jingenekë enëtilai, tre, tha hanejë kö ni.

(Mareko 14:31) Nge angeic’ a qaja catrën, ka hape, Ngaca ma ce meciju ni me cilie, tre, tha trojë kö ni a kelikelë cilie. Tune mina hi la hna qaja hnei angatr’ asë.

(Mareko 14:50) Ame hnei angatr’ asë hna nue nyidrëti pe me kötr.

(Mareko 14:47) Nge ketre e angetre icilenyi a uthepi la taua, me lepe la hlue ne la tane i angetre huj, me thupa la inengenyë i angeic.

(Mareko 14:54) Ame hnei Peteru hna tro sisihnepeje kowe la uma ne la tane i angetre huj, me ce lapa me itre hlue, kola hane hleng.

(Mareko 14:66-72) Nge Peteru a lapa e kuhu elesitr, ame hna tropi la ketre jajinyi hlue ne la tane i angetre huj; 67 nge öhnyi Peteru hë hnei nyëne kola hleng, nyën’ a goeë angeic, me hape, Eö hi lo ketre atre ce me Iesu atre Nazareta. 68 Nge angeic’ a kelikelë, me hape, Tha ’tre kö ni, nge tha wangatre hmekune kö ni la hnei eö hna qaja. Nge angeic’ a lö pi kowe la poretiko; ame hna kukahleke la trotro. 69 Ame hna öhnyi angeice hmaca hnene la jajinyi hlue, me qane troa qaja kowe la icilenyi, ka hape, Nyëne hi la ketre e nyudren. 70 Ame hnei angeice hna kelikelë hmaca. Nge tha hmitre kö, ame hnene la icilenyi hna qaja hmaca koi Peteru, ka hape, Nyipici eö la sine i nyudren; ke atre Galilaia eö. 71 Ame hnei angeic hna qan troa ëji me sisiny, ka hape, Tha ’tre kö ni la atre celë lo hnei nyipunie hna qaja. 72 Nge canga a lu’ a kukahleke la trotro. Ame hnei Peteru hna mekune la wesi ula hnei Iesu hna ulatine koi angeic, ka hape, Tro eö a köni a kelikelë ni, nge tha a lu’ a kukahleke petre kö la trotro. Nge angeic’ a mekune me treij.

ia 200 par. 14

Hna Ini Angeic Troa Nue La Ngazo i Ketre

14 Peteru a traqa kowe la ketre uma ka tru e Ierusalema. Kolo hnalapa i Kaiafa, lo tane i angetre huj. Ka tru nyidrë nge trenamo. Hna xup la itre uma cili e xötreith la ketre götrane ka tru, nge hetre qënehlö qëmeken. Hna sewe Peteru troa lö hnine la hnalapa. Ngo hna alö Ioane ke, atre angeic hi hnene la atre huj ka tru. Tro pi hi Ioane a sipone la atre thupë qëhnelö troa hane alö Peteru. Lö jë hi Peteru, ngo tha xötrethenge Ioane ju kö angeic, goi tha pi wange fe angeice la atre huj ka tru. Angeic a ce lapa memine la itre hlue e kuhu trön. Angatr a hleng, nge angeic a goeëne la itre atr ka silitrengathoi Iesu, matre troa ameköti nyidrë ngöne la hnakotr.—Mareko 14:54-57; Ioane 18:15, 16, 18.

it-2 619 par. 6

Peteru

Hnene la ketre atre dreng hna alö Peteru e hnine la hnalapa ne la atre huj ka tru. (Ioane 18:15, 16) Tha hnei angeice kö hna pane zae, ngo hnei angeice pe hna tro troa hane hleng. Ame la angeic a easenyi kowe la itre ka hleng, wangatrehmekunyi angeice ju hi hnei angatr laka, angeice hi lo ka ce tro me Iesu. Ketre, hnene la aqane ithanata i angeic, matre canga mama ju hi koi angatr ka hape, ketre atre Galilaia angeic. Angatr a jelengazo Peteru, ngo angeic a akönia kelikelë Iesu, uti fe hë la sisinyi angeic. Ame hna alua kukahleke la trotro, nge Iesu a ‘xei, me goeë Peteru.’ Lö pi hi Peteru a treije hleuhleu. (Mat. 26:69-75; Mar. 14:66-72; Luka 22:54-62; Ioane 18:17, 18) Ngo ame pe, nyipici ju kö lo hna qaja hnei Iesu koi Peteru, nge tha meci kö la lapaune i Peteru.—Luka 22:31, 32.

Troa Sine Thel La Itre Mekune Ka Sisitria

(Mareko 14:51, 52) Ame hna xötre thenge nyidrëti hnei ketre thupëtresij, hna otreëne hi la sine mano lino; ame hna xölehuji angeice hnene la itre thupëtresij; 52 ngo hnei angeice hna nue trije la sine mano lino, me kötre pë ixetre e angatr.

w08 15/2 30 par. 6

Itre Mekun Ka Tru Qa Hnine La Tusi Mareko

14:51, 52—Drei lo thupëtresij ka “köte pë ixete”? Mareko hmekuje hi la ka qejepengöne lai, matre ijije tro sa qaja ka hape, angeice hi a ketre sipu qeje angeice kö.

(Mareko 14:60-62) Ame hna cilejë la tane i angetre huje ngöne nyipin, me hnyingë Iesu, ka hape, Pëkö nyine sa i ’ö? nemene la hnei angatre hna nyi ewekë eö? 61 Ngo pëkö meje i nyidrë, nge tha sa kö. Ame hna hnyingë nyidrëti hmaca hnene la tane i angetre huj, me hape koi nyidrë, Keriso eö, Hupunëti ne la Hnaqaja aloin? 62 Öni Iesu, ka hape, ini hi; nge tro nyipunie a goeëne la Nekö i atr kola lapa ngöne la götrane maca ne la mene kola ce tro memine la itre iawe ne hnengödrai.

jy 287 par. 4

Hna Tro Sai Iesu Koi Ana Me Kaiafa

Atre hi Kaiafa ka hape, canga tro hi la angetre Iuda a elëhni e tro ketre atr a qaja ka hape, Nekö i Akötresieti angeic. Ame hi lo Iesu a qaja ka hape, Akötresieti la Keme i nyidrë, thele jë hi la angetre Iuda troa humuthi nyidrë. Ame koi angatr, Iesu a “acei tunë nyidë me Akötesie.” (Ioane 5:17, 18; 10:31-39) Kaiafa a thele troa iaö Iesu me hnying koi nyidrë ka hape: “Ini a isisinyikeu me eö göi Akötesie ka mel, mate tro eö a qaja koi hun, ka hape, eö la Keriso Hupuna i Akötesie, hape u?” (Mataio 26:63) Nyipici laka, ase hë Iesu qaja ka hape, nyidrëti hi la Nekö i Akötresie. (Ioane 3:18; 5:25; 11:4) Ngo maine tha tro kö nyidrëti a sa ngöne lo ijine cili, tro hë angatr a mekun laka, nyidrëti a hnihni me thoi ka hape, tha Nekö i Akötresieti kö nyidrë, nge tha nyidrëti kö la Keriso. Haawe, öni Iesu jë hi: “Ini hi; nge tro nyipunie a goeëne la Nekö i ate kola lapa ngöne la götrane maca ne la mene kola ce tro memine la ite iawe ne hnengödrai.”—Mareko 14:62.

E Tusi Hmitrötr

(Mareko 14:43-​59) Nge nyidrëti petre hi a ulati, ene pe canga traqapi Iuda, sine la ala luako; nge ce angeice memine la ka ala nyimu kola aje taua, me jia qa thene la itre tane i angetre huj, me angetre cinyihany, me itre qatr. 44 Nge angeic’ atre wanaxoeë nyidrë a qaja koi angatre la hatren, ka hape, Ame la hnenge hna troa idremi memin, tre, eje hi, xölehuji angeice ju, me ea catrën: 45 Nge traqa angeic, angeic’ a cange tro koi nyidrë, me hape, Rabi, me dremi nyidrë. 46 Ame hnei angatre hna li ime koi nyidrë, me ixölehujikeu nyidrë. 47 Nge ketre e angetre icilenyi a uthepi la taua, me lepe la hlue ne la tane i angetre huj, me thupa la inengenyë i angeic. 48 Ame hnei Iesu hna ulatine koi angatr, ka hape, Nyipunieti a traqa fë la itre taua me jia kösë koi atre kë ’nö e troa xomi ni? 49 Hnenge hna ce me nyipunie ngöne la ene o drai kola ihaji, nge tha hna ixölehujikeu ni kö hnei nyipunie ngo ijije troa aeatrene la hna cinyihan. 50 Ame hnei angatr’ asë hna nue nyidrëti pe me kötr. 51 Ame hna xötre thenge nyidrëti hnei ketre thupëtresij, hna otreëne hi la sine mano lino; ame hna xölehuji angeice hnene la itre thupëtresij; 52 ngo hnei angeice hna nue trije la sine mano lino, me kötre pë ixetre e angatr. 53 Ame hnei angatre hna e Iesu kowe la tane i angetre huj; nge hna icasikeu koi angeice la nöjei tane i angetre huj, me itre qatr, me angetre cinyihany. 54 Ame hnei Peteru hna tro sisihnepeje kowe la uma ne la tane i angetre huj, me ce lapa me itre hlue, kola hane hleng. 55 Ame hnei itre tane i angetre huj, me angetre ishenyine hna thele atre anyipicine göi nyidrë troa humuthi nyidrë; ngo pë pe hna öhn. 56 Ke ala nyimu la itretre atë la thoi göi nyidrë, ngo tha ca jëne kö la hnei angatre hna qaja. 57 Ame hna cilejë itre xane me atë la thoi göi nyidrë, ka hape, 58 Drengë hë huni la hnei nyëne hna qaja, ka hape, Tro ni a kenithe la eneti celë hna kuca hnei itre lue im, nge ngöne la köni drai tro ni a acile la ketre ka tha hna kuca hnei itre lue im. 59 Ngo tha ca jëne pala kö la hnei angatre hna qaja.

    Itre Itus Qene Drehu (1997-2025)
    Tha Connecter
    Connecter
    • Drehu
    • Iupi fë
    • Hna ajan
    • Copyright © 2025 Watch Tower Bible and Tract Society of Pennsylvania
    • Itre Hna Amekötin
    • Pengöne La Ka Thele Ithuemacany
    • Hna amekötin
    • JW.ORG
    • Connecter
    Iupi fë