MEKENE 58
Mele Nyipici Jë Koi Iehova!
Tha tro kö la keresiano a nue la ketre ewekë maine ketre atr troa angazone la imelekeu i angeic me Iehova. Ma celë fe hi aja i epun! Ka nyipiewekë catre koi Iehova la tro epuni a mele nyipici koi Nyidrë. (E jë la 1 Aqane lapa ite Joxu 28:9.) Nemene la itre ewekë ka troa ajolë epun troa mele nyipici koi Iehova? Nge nemene la nyine tro epuni a kuca?
1. Tro la itre xan a ajeanyi së tune kaa qaathei Iehova?
Ame la itre xaa atr, angatr a ajane matre tha tro hmaca kö sa nyihlue i Iehova. Ame la itre xan ke, kolo itre ka trotriji Iehova, me silitrengathoi la organizasio i Nyidrë me icilekeu memine la nyipici. Matre angatr a thel troa thë la lapaune së. Ame la itre xan ke, kolo itre hene ne hmi. Angatr a qaja la itre trengathoi, matre ajeane la itre keresiano ka tha hmek. Celë hi matre, tha tro pi kö sa ithanata memine la itre ka icilekeu, me drenge la hnei angatr hna qaja, jëne la itre itus, me itre blogs, me Ëternet, me itre video, me itre xaa ewekë ju kö. Öni Iesu kowe la itre ka thele troa thë la imelekeu së me Iehova ka hape: “Nue angatre pi, ke itre tane ka timeke lai! Nge maine tro la timek a amamai gojenyi kowe la ketre timek, tro hë nyidroti lai a ce kei kowe la hnaop.”—Mataio 15:14.
2. Tro sa amamane tune kaa ngöne la mele së ka hape, easa nyipici koi Iehova hmekuj?
Hnene la ihnimi së koi Iehova, matre tha easë hmaca kö a sine la hmi ka thoi. Tro lai a mama ngöne la aqane ië huliwa së, me itre hne së hna kuca e nöjei drai. Ketre, tro fe sa nuetrij la itre asosiasio, me organizasio ka cilëgöline la hmi ka thoi. Öni Iehova koi së göi Babulona Atraqatr ka hape: “Lötriji angeic pi nöjeng.”—Hna Amaman 18:2, 4.
TROA CE ITHANATAN
Tro sa ce wang la itre ewekë ka troa ananazijëne la imelekeu së me Iehova, me aqane tro sa lötriji Babulona Atraqatr.
3. The drenge pi kö la itre atr ka hamë ini ka thoi
Nemene la aqane tro sa ujë kowe la itre atr, ka qajangazone la organizasio i Iehova? E jë la Ite Edomë 14:15, nge ce ithanatane jë cahu hnying:
Pine nemene matre, tha tro kö sa jelenyipicine la nöjei ewekë hne së hna dreng?
E jë la 2 Ioane 9-11, nge ce ithanatane jë cahu itre hnying:
Tune kaa la aqane tro sa ujë kowe la itre ka icilekeu?
Ame la itre ka icilekeu, ke thatre angatre kö së, ngo troa löthi së tune kaa hnene la itre mekuna i angatr?
Nemene la aqane goeë së hnei Iehova, e tro sa dreng la itre ka qajangazo Nyidrë memine la organizasio?
4. E traqa ju ketre trejin kuca la ewekë ka ngazo
Maine atre hi së ka hape, hnene la ketre trejin ne la ekalesia hna kuca la ngazo, nemene la hnëqa së? Hane hi la ketre Wathebo hnei Iehova hna hamëne kowe la angetre Isaraela. E jë la Levitiko 5:1.
Maine atre hi së ka hape, hnene la ketre trejin ne la ekalesia hna kuca la ngazo, kola qaja hnene la Wathebo ka hape, loi e tro sa qaja kowe la itre qatre thup. Ngo qëmeken, tro sa pane upi angeic troa wange la itre qatre thup. E cili, tro kö angeic a ketre sipu qaja la ngazo i angeic koi angatr. Ngo e tha kuca kö angeic, tro la ihnimi së koi Iehova a upi së, troa thuemacane la itre qatre thup. Ame ngöne la götrane cili, tune kaa la aqane tro sa amamane la ihnimi së . . .
koi Iehova?
kowe la atr ka kuca la ngazo?
kowe la itre atrene la ekalesia?
E traqa ju kuca la ewekë ka ngazo hnene la ketre trejin, xatua angeic jë!
5. Iananyi pi me Babulona Atraqatr
E jë la Luka 4:8 me Hna Amaman 18:4, 5, nge ce ithanatane jë cahu itre hnying:
Tune kaa, eni palakö a kuca la itre xaa huliwa ne la hmi ka thoi?
Eni kö ngöne la ketre organizasio ka ce huliwa memine la ketre hmi?
Ame la huliwang, eje kö a xatuane la hmi ka thoi?
Hetre ketre ewekë kö ngöne la meleng ka amamane ka hape, tha ase kö ni nue hnyawane la hmi ka thoi?
Maine eje hi, nemene la nyine tro ni a canga kuca?
Tro la ihnimi epuni koi Iehova, me mekuthetheu i epuni ka loi, a upi epun troa iëne hnyawane la itre mekune ka loi.
E sipo epuni jë hnene la ketre asosiasio ne la hmi ka thoi troa kuië mani, tro epuni a kuci nemen?
HNE SË HNA MAJEMINE DRENG: “Kaloi e tro sa atre la itre hna qaja hnene la itre ka icilekeu me Iehova, matre tro sa atreine sa koi angatr.”
Ame koi epun, mekune kaloi kö lai? Pine nemen?
HANE HI LA HNE SË HNA CE WANG
Maine easa ajan troa mele nyipici koi Iehova, tha tro pi kö sa ce tro lapa memine la itre ka thele troa iaö së.
Nyine Amekunën
Hnauëne laka tha tro kö sa dreng la hna qaja hnene la itre ka iamenumenu?
Nemene la nyine tro sa kuca, e drenge hë së ka hape, hnene la ketre trejin hna kuca la ketre ngazo ka tru?
Tro la keresiano a amamane tune kaa ka hape, ase hë angeic trotrij la hmi ka thoi?
ITRE XAA NYINE WANG
Nemene la aqane tro sa ujë e qajangazone jë la itre Temoë Iehova?
“Tune Kaa La Itre Ithuemacany Hna Kapa?” (Ita Ne Thup Ogas 2018)
Maine ame la huliwa së ke, ka lö hnine la hmi ka thoi, nemene la nyine tro sa kuca?
“Catre Jë Huliwa Ngöne La Pune La ‘Itre Drai Tixenuë’” (Ita Ne Thup Okotropa 2019, paragaraf 16-18)
Nemene la hna kuca hnene la itre ka icilekeu matre thë la lapaune së?
Ame ngöne la hna melën, “Je recherchais Dieu depuis mon enfance” ketre hene ne hmi qa Zapo a nuetrije la hmi nyidrë.