Itre Hnyinge Ne La Itre Ka e

Kola qaja ngöne Ite Edomë 24:16: “Troa a [sevene] la o kei la ate ka meköt, me mejë hmaca.” Hapeu, kolo kö lai a qaja la ketre atr ka anyimua kei nge hna nue la itre ngazo i angeic hnei Akötresie?

Waea, tha celë kö la aliene la xötr. Ame la ka anyimua kei ke, kola qaja la atr ka cil kowe la nöjei pengöne jol. Angeic a mejë hmaca ke, atreine hi angeic troa xomihnine la itre jole cili.

Tro hmaca sa ce wang la xötr: “Ate ka ngazo fe, the lapa thupëne la hnalapa ne la ate ka meköt; the apatene la hne i angeic. Ke troa a [sevene] la o kei la ate ka meköt, me mejë hmaca, ngo tro pe la ite ka menu a thixöte hnene la ngazo. E kei la ithupëjia me eö, the madine kö, nge e thixöte nyën, the aciaci kö la hni ’ö.”—Ite edomë 24:15-17.

Itre xan a mekun göne la xötre 16 laka, kola qaja la ketre atr ka kuca la ngazo, me ietra e thupen, matre lolo hmaca la aqane imelekeu i angeic me Akötresie. Celë hi lai hna qaja hnene la lue hene ne hmi e Agele. Öni nyidro ka hape: “Celë hi aqane trotrohnine la xötr hnene la itre hnamiatr ekö me enehila.” Ame koi nyidro, “ijije hi tro la ketre atr a kuca la itre ewekë ka ngazo. Ngo loi e tro palahi angeic a acatrene la ihnimi angeic koi Akötresie me mejë hmaca thupene la hna ietra.” Canga tro hi a kapa la mekun celë hnene la atr ka xele ma isi memine la itre aja ka ngazo. Ame koi angeic, ngacama anyimua tria angeic, ngo tro palahi Akötresieti a nue la itre ngazo i angeic.

Ngo tha celë kö la aliene la xötre 16.

Nyimutre la itre aliene la hnaewekë qene Heberu hna hape, “kei” ngöne la xötre 16 me 17. Maine jë, kola kei tune la ketre atr a kei qa koho ne hene uma, maine ngöne la kola mala la wene etë e kuhu hnadro. (Deu. 22:4, 8; Amosa 9:9) Ngo hetre ketre aqane huliwane la hnaewekë celë. Kola qaja ngöne Salamo 37:23, 24: “Hna acile hutine hnei Iehova la ite hna feke ca hnene la ate; nge nyidëti a madine la jë i angeic. Maine tro angeic’ a kei, te, tha tro kö a kei ngazo; ke Iehova la ate ea la ime i angeic.”—Ite edomë 11:5; 13:17; 17:20.

Ngo öni porofesör Edward Plumptre: “Ame la hnaewekë “kei” qene Heberu ke, tha hna xome hi matre troa qaja la kola kei kowe la ngazo.” Celë hi matre, hnene la ketre ka ithel hna qaja göne la xötre 16, ka hape: “Tha tro kö a qanangazone la itre hlue i Akötresie ke, tro palahi angatr a cile catr. Tha ceitu i angatre kö memine la itre atr ka ngazo!”

Eje hi, ame ngöne Ite Edomë 24:16, tha kolo kö a qaja la atr ka kei kowe la ngazo. Kolo pe a qaja la atr ka cile kowe la nöjei pengöne jol. Ame ngöne la fene celë ka ngazo, kola tithi hnei mec la atr ka meköt, me icilekeu me angeic hnei mus. Ngo thenge la xötre celë, tro kö Iehova a xatua angeic troa cile catr. Tha öhne kö epuni laka, ka lolo palahi la mele ne la itre hlue i Akötresie? Pine nemen? Pine laka, “Iehova la ate sajuë ange ka troa kei asë, me acili ameköti angete wewë asë.”—Sal. 41:1-3; 145:14-19.

Tune la hna qaja ngöne la xötre 17, tha madrine kö la “ate ka meköt” ngöne la kola traqa la itre jol koi itre xan. Ngo kolo pe a ithuecatre koi angeic laka, “troa loi koi angete qoue Akötesie.”—Ate cai. 8:11-13; Iobu 31:3-6; Sal. 27:5, 6.