Nemene La Aqane Tro Sa Hnëkë Kowe La Drai Ne Amekunën?

Qaane la macatre celë, hetre ijine së troa hnëkëne hnyawa la Drai Ne Amekunëne la meci Iesu. Maine easa atrune la Drai Ne Amekunën e nyipine wiik, pëkö icasikeu Mel Me Huliwa Ne Cainöj Ne La Keresiano. Nge, maine kola traqa e pune wiik, pëkö cainöj, me ini Ita Ne Thup. Hapeu, tro kö epuni a huliwane hnyawane la itre hnepe ijine cili? Tune la aqane kuca la itre pane keresiano, hetre hna amekötine göne la itre ijine ka tru. (Luka 22:7-13; km 3/15 1) Ngo, loi e tro asë hi së a isa hnëkëne la hni së. Nemene la nyine tro sa kuca?

• Mekune jë la enyipiewekëne troa sine la icasikeu cili.​—1Kor 11:23-26

• Thithi jë, nge waipengöne jë la aqane imelekeu i epun me Iehova.​—1Kor 11:27-29; 2Kor 13:5

• E jë, nge lapa mekune jë la itre ithuemacanyi qa hnine la Tusi Hmitrötr ka qaja la Drai Ne Amekunën.​—Ioane 3:16; 15:13

Alanyimu la itre trejin ka e, me lapa mekune la itre xötre hna hnëkën thatraqane la Drai Ne Amekunën ka mama ngöne la Topik Ne La Drai. Ame itre xan, angatr a e la itre xötr ka mama ngöne la tableau ka mama e cahu. Nge, itre xan a goeëne hmaca la itre Ita Ne Thup ka qaja la Drai Ne Amekunën, memine la etrune la ihnimi Iehova me Iesu koi së. Tha nyipiewekë kö la hnei epuni hna iëne troa inin, ngo loi e tro epuni a easenyi catr koi Iehova me Iesu.