AME ngöne lo ijine Iesu a cainöj e celë fen, tre, hnei nyidrëti hna amamane laka, nyidrëti la “ate thupëne aloine la ite mamoe.” (Ioane 10:11) Hnene la hnei nyidrëti hna öhne la ka alanyimu a xötrethenge nyidrë, ame hnei “nyidëti [hna] utipi angat, ke kucakuca ha angat, me isa ije hë, tune la nöjei mamoe ka pa ate thupën.” (Mat. 9:36) Mama cile hnyawa koi Peteru me itre xa aposetolo la aqane hnime Iesu la itre atr. Drei la eisapengöi Iesu memine la itretre thupë mamoeë angetre Isaraela, itretre wangesixane la itre mamoe! Isa ije hë nyudreni me mecijin, ke tha hna ithua i nyudreni kö. (Ezek. 34:7, 8) Hna ketr la itre aposetolo hnene la aqane hamë ini, me aqane mekune Iesu la itre mamoe uti hë la nue nyidrë la mele i nyidrë koi nyudren. Celë hi aqane ini angatr hnei nyidrë troa xatuane la itre ka lapaun troa bëeke koi Iehova, ‘Atre thupëne . . . la itre u i angatr.’—1 Pet. 2:25.

² Ame ngöne la ketre ijine Iesu a ithanata koi Peteru, hnei nyidrë hna amamane hnyawane la enyipiewekëne troa thuane me thupëne la itre mamoe. (Ioane 21:15-17) Hna ketri Peteru catr hnene la itre ithanata i Iesu, matre, ame hë e thupen, hnei angeice hna ithuecatre kowe la itre qatre thup ne lo itre ekalesia ekö. Öni angeic: “Ithu ane jë la hnënge mamoe i Akötesie thei nyipunie, me thupën, the göi mus, ngo loi e göi aja kö, thenge Akötesie; nge tha göi hete mo, ngo loi pe göi hni ka ajan; kete, the qene joxune la ite qâ i nyipunie, ngo loi nyine tulu ne la hnënge mamoe.” (1 Pet. 5:1-3) Ame lai itre trengewekë i Peteru, tre, thatraqane mina fe la itretre thupëne la ekalesia enehila. Angatr a nyitipu Iesu, ene la troa huliwa cememine la hni ka ajane me ka madrin, matre nyine tulu ka loi kowe la itre mamoe, me tro pa ngöne la huliwa i Akötresie.—Heb. 13:7.

³ Epi tro sa hetre hni ne ole kowe la itre qatre thup ne la ekalesia hna acile hnene la uati hmitrötr. Nyimutre la itre manathithi hne së hna kapa qa ngöne la hnei angatr hna catre huliwa. Angatr a hamë ithuecatre me nyipiewekëne la itre hna isa ajane hnene la itre atrene asë la ekalesia. E nöjei wiik, angatr a catre iujine la itre icasikeu ne la ekalesia; e cili hi la kola ithuane la itre ka lapaun. (Rom. 12:8) Angatr a catre thupëne matre tro palahi a lolo la mele ne la itre mamoe. Angatr a thupë nyudreni qa ngöne la itre ewekë ka hetre ethanyine koi angatr, tune la itre atr ka iangazo. (Is. 32:2; Tito 1:9-11) Hnene la aqane tro pa angatr ngöne la huliwa ne cainöj, ene pe kola xatua së matre tro palahi sa cainöjëne la maca ka loi e nöjei treu. (Heb. 13:15-17) Ame la itre atr celë tre, itre “ahnahna kowe la nöjei ate,” nge jëne angatr, Iehova a eköthe hnyawa la ekalesia.—Efe. 4:8, 11, 12.

ITRE HNA AMEKÖTIN THATRAQANE LA ITRE KA TROA QATRE THUP

⁴ Maine kola ajane troa thupëne hnyawa la ekalesia, loi e tro la itre hna acile troa qatre thup a trongëne hnyawa la itre hna amekötin göi angatr hnene la Wesi Ula i Akötresie. Maine ka trongëne angatr la itre hna amekötin asë cili, haawe, ijije hë troa qaja ka hape, hnei “[u]ati [h]mitöte hna acilë [angatr] nyine itete thup.” (Ite hu. 20:28) Nyipici laka, ka draië la itre trepene meköti ne la Tusi Hmitrötr nyine tro la itre qatre thup a trongën, ke, ketre hnëqa ka tru la hnei angatr hna xom. Ngo ijije troa trongëne la itre trepene meköti ka draië cili, hnene la itre keresiano trahmanyi ka hnimi Iehova hnyawa, nge ka hetre hni ne ajan troa huliwa koi Nyidrë. Loi e troa mama kowe la nöjei atr asë laka, ame la itre qatre thup, tre, itre atr ka trongëne la itre hna amekötin hnei Tusi Hmitrötr ngöne la nöjei drai ne la mele i angatr.

⁵ Hnei Paulo aposetolo hna qaja ngöne la pane tusi angeice koi Timoteo me koi Tito, la itre hna amekötine kowe la itre qatre thup. Easa e ngöne 1 Timoteo 3:1-7, ka hape: “Maine kete ate a ajane la qâ ne la [atre thup], angeic’ a ajane la huliwa ka loi. Nge ijije la [atre thup] troa pë gelen, me ca fö, ate hmek, [me atre wai mekun], ate thina ka loi, ate hnimi tenyiwa, ate ateine ini; ate tha iji waina atrun, ate tha ishi kö; ate tha pi hete mo; loi e [atreine tulu ewekë], tha ate iwatratra kö, tha ate aja mani kö; ate musinëne aloine la lapa i angeic, ame hna denge thenge la nöjei nekö i angeice memine la metöte asëjëihë; (ke maine tha’ teine la ate troa musinëne la lapa i angeice kö, tro angeic’ a thupëne tune ka la ekalesia i Akötesie?) tha ate xötei hmi kö, wanga pi tru, ame hna malapi angeice kowe la hnëjine i diabolo. Loi e hlemu loi angeice koi angat’ e kuhu ; wanga qaja angazo angeice me kei kowe la ihnö i diabolo.”

⁶ Hnei Paulo hna cinyianyi koi Tito ka hape: “Qa ngöne lai hnenge hna ami’ö e Kerete, mate tro eö a apexejene la nöjei ewekë tha hna umuthe pete kö, me acilë ite [qatre thup] ngöne la nöjei lapa, tune la hnenge hna ahnithe koi ’ö; e hete kete ka pë ethan, ka ca föen, ka hete ite kuku ka lapaun, ka tha hlemu ngazo me ena. Ke ijije la [atre thup maine qatre thup] a pë ethan, tune la hlue i Akötesie ; tha ka iele kö, nge ka tha canga iwesitrë, nge tha ate iji waina atrun, nge tha ate ishi kö, nge tha ate pi hete mo ; ngo ate hnimi tenyiwa, nge ate ajane la ka loi, ate mekun, me thina meköt, me thina ka [“nyipici,” MN], ate xome hnöthi angeice kö; ate xome catëne la wesi ula ka nyipici, thenge la hna ini angeic, mate ateine angeice troa ihaji me eamone la ite ka tha idei hnene la ihaji ka pë ethan.”—Tito 1:5-9.

⁷ Ngacama kösë tha ka hmaloi kö la itre hna amekötine hnei Tusi Hmitrötr, ngo tha tro kö lai a sawa la itre keresiano trahmanyi troa xome la hnëqa ne qatre thup. Maine tro la itre qatre thup a amamai tulu ngöne la aqane troa melëne la itre thiina ka lolo, haawe, tro hë angatr a ithuecatre kowe la itre xa atrene la ekalesia troa nyitipu angatr. Celë hi lai hna qaja hnei Paulo aposetolo ngöne lo nyidrëti a cinyihane ka hape, hna hamëne la itre “ahnahna [cili] kowe la nöjei ate . . . nyine kuca amekötine la nöjei ate hmitöt, nge nyine xomexatuane la huliwa, nge nyine [eköthe] la [ngönetrei] Keriso; uti hë la traqa asë hë shë kowe la ce hni ngöne la lapaun, me wangate hmekune la Hupuna i Akötesie, me kowe la inamacan, me kowe la tulu ne la etrune la tiqa i Keriso.”—Efe. 4:8, 12, 13.

⁸ Tha tro kö a acile la itre nekö trahmany, maine itre ka xötrei xomi bapataiso pena troa xome la hnëqa ne atre thup. Ngo itre trejine ka melëne hë la nyipici, nge ka atre hnyawa la Tusi Hmitrötr me trotrohnine hnyawa la itre mekune ka jui ne ej. Nge ketre, ka nyipici la ihnimi angatr kowe la itre atrene la ekalesia. Maine hetre ewekë ka ngazo hna kuca, tre, tha xou i angatre kö troa qaja amamane lai, me amekötine lai atr. Celë hi ka troa thupëne la itre mamoe qa ngöne la itre atr ka thele troa athixötrë nyudren. (Is. 32:2) Mama hnyawa hi kowe la nöjei atrene la ekalesia ka hape, itre atr ka macaj angatr, nge ka hnime la itre mamoe i Akötresie.

⁹ Ame la trejin hna acil troa xome la hnëqa ne atre thup, tre, hnei angeic hna amamane ngöne la mele i angeic, laka, ka inamacane la aqane ujë i angeic. E ka faipoipo angeic, angeic a trongëne la itre trepene meköti hna amë thatraqane la itre ka faipoipo, ene la troa ca fö me ate musinëne aloine la lapa. E ka trene kuku ka lapaun, nge ka tha hlemu ngazo me ena, haawe, tha jole kö kowe la itre atrene la ekalesia troa easenyi angeic, matre xatua angatr troa trongëne la itre trepene meköti Akötresie ngöne la hnepe lapa i angatr, me ngöne la aqane melëne angatre la nyipici. Ame fe la atre thup tre, ka pë gelene angeic me pë ethan, nge ka hlemu loi koi angat’ e kuhu tröne mina fe. Tha tro pi kö a hetre engazone la aqane ujë i angeic, wanga qaja angazone jë la ekalesia. Tha tro kö a xome la hnëqa cili hnene la itre hna nyipi hajin pine la ketre ngazo hna kuca. Tro lai a hetre aja ne la itre atrene la ekalesia troa xötrethenge la tulu ka lolo i angeic. Ketre, hetre mejiune i angatr laka, tro angeic a thupëne matre tha tro kö a hetre ethanyine la aqane imelekeu i angatr me Iehova.—1 Kor. 11:1; 16:15, 16.

¹⁰ Ijije hi tro la itre thupëtresiji cili ka macaj a hane ujë e hnine la ekalesia tune lo itre qatre ne Isaraela ekö, itre ka “inamacan, me maca mek, me wangate hmekune.” (Deu. 1:13) Eje hi laka, tha itre atr ka pexeje kö la itre qatre thup. Ngo itre ka hlemu loi angatr kowe la itre atrene la ekalesia, me kowe la itre atr ka lapa ezi angatr, ke, itre atr ka meköt nge ka xoue Akötresie. Nge hnei angatre hë hna amamane hnyawa laka, angatr a melëne la itre trepene meköti Akötresie. Pine laka pëkö gele i angatr, ene pe ijiji angatre hi troa hamë eamo kowe la ekalesia.—Rom. 3:23

¹¹ Kola mama thene la atre thup laka, ka hmek angeic maine ka thupëne wanga sasaithi tulu jë ngöne la itre hnei angeic hna majemine kuca, me ngöne la aqane ce mele angeic me itre atr. Tha ka isine kö angeic troa hune fë la itre mekuna i angeic. Ngo kolo pe a mama thei angeic la atreine tulu ewekë me atreine xomihni. Angeice fe a thupën la aqane xen me iji angeic, me aqane huliwane angeic la itre nyine iamadrinë. Angeic a thupëne matre tha tro kö a sasaithi tulu ngöne la aqane troa iji ka haitr, wanga qeje angeice jë ka hape, atre iji waina atrun. Ame la atr ka hmo hnei ka haitr, tre, canga tro hi angeic a pë xomihni, matre tha ijiji angeice hë troa öhne la itre hna ajan hnene la ekalesia.

¹² Nyipiewekë tro la atre thupëne la ekalesia a atreine hnëkëne amë la huliwa i angeic. Tro lai a mama hnyawa ngöne la aqane heetre i angeic, me aqane nyidrawan angeice la hnalapa i angeic, memine fe la itre huliwa hnei angeice hna kuca e nöjei drai. Tha angeice kö a uthe lapane la itre huliwa nyine kuca. Ka mama hnyawa pe koi angeice la itre nyine kuca, me hnëkëne amë itre ej. Nge ka melëne angeice la itre trepene meköti Akötresie.

¹³ Nyipiewekë tro la qatre thup a atreine tulu ewekë, kolo lai a hape, tro angeic a atreine casi me ce huliwa memine la itre xa atrene la lapa ne la itre qatre thup. Loi e tro angeic a thupëne la aqane ujë i angeic kowe la itre xan, tha tro kö angeic a imusinë. Maine ka atreine tulu ewekë angeic, tha tro kö angeic a thele troa hune fë mekun, me mekune laka, ka sisitria kö la aqane waiewekë i angeic hune la itre xa qatre thup. Maine jë, hetrenyi thene la itre xa qatre thup la itre thiina ka lolo, maine itre hna atreine kuca pena ka patre thei angeic. Tro fe a mama la atreine tulu ewekë thei angeic ke, angeic a xome palahi la itre mekune hna nyi trepene hnei Tusi Hmitrötr, me catre xötrethenge la tulu hna hamëne hnei Iesu Keriso. (Fil. 2:2-8) Tha [atre] ishi kö angeic, nge tha ate iwatratra kö ngöne la aqane ujë, maine aqane ithanata pena. Angeice pe a metrötrëne la itre atr me wanga atrunyi angatr. Ketre, tha ka iele fë mekune pena kö angeic, me thele tro la itre xan a kapa la aqane waiewekë i angeic. Tha ka canga iwësitë kö angeic, ngo ka thele tingetinge pe ngöne la aqane ce mel angeic me itre atr.

¹⁴ Ketre mina fe, ka wai mekun la qatre thup ngöne la ekalesia. Kolo lai a hape, tha ka imekuhni kö angeic, ngo ka atreine waiewekë. Ketre, trotrohnine hnyawa hi angeic la itre trepene meköti Iehova, memine la aqane troa trongëne itre ej. Nge ame la atre atreine waiewekë, tre, ka kapa hnyawa la itre eamo me itre hna amekötin. Tha ka lue ialameke kö angeic me huliwa thoi.

¹⁵ Hnei Paulo hna amexeje koi Tito laka, tro mina fe la qatre thup a ajane la ka loi, me thina ka meköt, me hetrenyi la thina ka nyipici. Tro lai a mama ngöne la aqane ce mele angeice me itre atr, me ngöne la aqane sajuëne angeice la meköti memine la thiina ka loi. Ka catre lapa qale angeic koi Iehova, nge ka sajuëne palahi angeice la itre trepene meköti Nyidrë ngöne la mele i angeic. Nge hetre mejiune i angeice palahi koi Iehova. Ketre ate hnimi tenyiwa angeic, ke, angeic a hamëne asë la hnei angeice hna atrein me hna hetreny, matre troa kepe eloin hnei itre xan.—Ite hu. 20:33-35.

¹⁶ Nyipiewekë tro la qatre thup a ateine ini itre xane fe. Nge tune la hnei Paulo hna cinyihan koi Tito, tro la qatre thup a “xome catëne la wesi ula ka nyipici, thenge la hna ini angeic, mate ateine angeice troa ihaji me eamone la ite ka tha idei hnene la ihaji ka pë ethan.” (Tito 1:9) Atreine angeic xatuane la itre xan troa thele ewekë, me anyipicine la itre hna qaja, me atreine sa la itre hnying, me amamane la aqane trongëne la hna qaja hnei Tusi Hmitrötr, matre tha tro kö a luelu la itre hna inin, ngo tro pe a acatrene catrëne la lapaune i angatr. Atre atreine inine angeic ngöne la itre ijine loi me itre ijine ngazo. (2 Tim. 4:2) Hetrenyi thei angeic la xomi hni ahoean matre, atreine angeic troa hajine cememine la hni ka menyik la ketre atr ka tria. Kolo fe a xatuane la atr matre tha tro hmaca kö angeic a luelu, me upi angeice pena troa kuca la itre huliwa ka loi, thenge la lapaune i angeic. Haawe, e ka atreine angeic inine la ka alanyimu maine ala cas, angeice hi lai a eatrëne la ketre götrane ka tru ne la hnëqa i angeic.

¹⁷ Nyipiewekë tro la qatre thup a catre cainöje trootro. Loi e mama e cili koi nöjei atr laka, angeic a thele troa xötrethenge la tulu i Iesu, atre amë panëne la huliwa ne cainöjëne la maca ka loi ngöne la mele i nyidrë. Hnei Iesu hna nyipiewekëne la itretre drei nyidrë, me xatua angatr troa maca ngöne la hna cainöj. (Mar. 1:38; Luka 8:1) Ngacama tru la itre jolene la qatre thup, ngo angeic a cainöjëne la maca ka loi. Celë hi ka upe la itre atrene asë la ekalesia troa catre huliwa i Akötresie. Ketre ame la angeic a cainöj memine la itre atrene la hnepe lapa i angeic, me itre atrene la ekalesia, kola ‘ce akeukawanyi angeic me angatr.’—Rom. 1:11, 12.

¹⁸ Maine jë tro sa mekune ka hape, ewekë ka tru palaha la hna thele thene la qatre thup. Nyipici laka, pëkö qatre thup ka pexej, nge ka atreine troa trongëne asë la itre hna ahnithe koi angeic e hnine la Tusi Hmitrötr. Ngo ame pe, tha tro pi kö a patre la ketre thiina hna amekötine thatraqai angeic, ke ame hë e cili, ngazo ka tru pena ha xajawa i Akötresie. Ame thene la itre qatre thup, tre, isa hetrenyi angatre la itre thiina ka lolo. Matre, hetrenyi hë e hnine la lapa ne la itre qatre thup la itre thiina asë ka lolo, nge ka nyipiewekë nyine troa thupëne hnyawane la ekalesia i Akötresie.

¹⁹ E nöjei ijine kola iëne la ketre trejin trahmanyi hnene la lapa ne la itre qatre thup matre troa xome la hnëqa ne qatre thup, nyipiewekë tro angatr a lapa mekune la itre ithanata i Paulo. Kola hape, “The tro kö kete ate a mekune atrunyi angeice kö hune la ka ijij troa mekun; ngo mekune acone hi, tune la hnei Akötesie hna thawa kowe la nöjei ate la tulu ne la lapaun.” (Rom. 12:3) Loi e tro angatr a isa aconyi angatre kö. Tha tro pi kö ketre a nyi “ka meköti cat” ngöne la kola ithanatane la hna atreine kuca hnene la ketre trejin hna mekune troa acil. (Ate cai. 7:16) Loi e mama hnyawa kowe la lapa ne la itre qatre thup ka hape, hna melëne hnyawa la itre trepene meköti Akötresie hnene lo lai trejin. Maine atrehmekune hi angatr laka, tha ka pexeje kö lai trejin, nge patre kö thei angatr la ië hna hnim me huliwa thoi, haawe, tro hë angatr a iëne lai trejin thenge la aqane amekötine Iehova. Ketre jëne tro lai a tro loi la ekalesia. E iëne mina jë angatre la ketre trejin, tro angatr a pane sipo Iehova la uati hmitrötre i Nyidrë, matre troa xatua angatr troa axecië mekun. Ketre, angatr a sipo ixatua matre, mama hnyawa jë koi angatr ka hape, ka melëne lai trejin la itre trepene meköti Iehova. Celë hi la ketre hnëqa ka tru hna athipe koi angatr, nge tro angatr a eatrëne lai thenge la eamo hna hamëne hnei Paulo, lo kola hape: “The canga ati ime kö hui kete ate.”—1 Tim. 5:21, 22.

WENE NE LA UATI HMITRÖTR

²⁰ Troa mama thene la itre qatre thup ka hape, hna amekötine la huliwa i angatr hnei uati hmitrötr, nge angatre fe a melëne la wene ne ej. Paulo a e wengëne la naene lao igötranene la wene ne la ua, ene la “ihnim, me madrin, me tingeting, me xomihni ahoeany, me hni ka lolo, me thiina ka loi, me lapaun, me thiina ka menyik, me xomehnöth.” (Gal. 5:22, 23, MN) Hnene laka, kola melëne la itre thiina celë hnene la itre qatre thup, ene pe, kola ithuecatrene la itre trejin me aijijëne la itre atrene la ekalesia troa casi ngöne la huliwa i Akötresie. Kola mama ngöne la aqane ujë i angatr, memine la thangane la huliwa i angatr, ka hape, “hnei [u]ati [h]mitöte hna acilë [angatr] nyine itete thup.”—Ite hu. 20:28.

ITRETRE SAJUËNE LA CAS

²¹ Nyipiewekë catre tro la itre qatre thup a ce huliwa matre troa sajuëne la cas e hnine la ekalesia. Nyipici laka isapengöne catre la itre thiina ne la itre qatre thup, nge ame itre xa ijin, isazikeu la itre mekuna i angatr. Ngo, angatre pe a thele troa drenge la mekuna ne la ketre me ketre göi troa sajuëne la cas. Maine pëkö mekun ka ena la ketre trepene meköti ne la Tusi Hmitrötr, haawe, loi e tro angatre a isa kapa me sajuëne la mekune tixenuë hna axeciën. Ame la atr ka ujë tune lai, tre, angeic a amamane laka, hna eatrongë angeice hnene la “inamacane qa koho” ka “tingeting, me menyik.” (Iako. 3:17, 18) Tha tro kö la ketre qatre thup a mekune ka hape, ka draië catre kö angeic hune la itre xan, nge ketre, tha tro kö angeic a thele troa musinë angatr. E tro la itre qatre thup a ce huliwa matre troa kepe eloin hnene la ekalesia, angatre hi lai a ce huliwa me Iehova.—1 Kor. mek. 12; Kol. 2:19.

ITRETRE AJANE LA HNËQA NE ATRE THUP

²² Loi e tro la trejine trahmanyi ka macaj a ajane la hnëqa ne atre thup. (1 Tim. 3:1) Ngo maine celë hi aja i angeic, nyipiewekë tro angeic a huliwa catre koi Akötresie. Kolo lai a hape, tro angeic a thele jëne troa ce huliwa memine la itre trejin, me catre huliwa matre troa acatrene la lapaune i angatr. Ame la atr ka ajane la hnëqa cili, tre, nyipiewekë tro angeic a thele troa melëne la itre hna amekötine hnei Tusi Hmitrötr thatraqane la itre qatre thup.

EWEKË KA TROA SAZE LA MELE NE LA ATRE THUP

²³ Maine jë, ekö hë la ketre qatre thup eatrëne la hnëqa i nyidrë matre kucakuca ha nyidrë, maine qatre pena ha nyidrë. Matre ame e cili, tha ijiji nyidrëti hmaca kö troa eatrëne hnyawa la hnëqa i nyidrë tune lo aqane kuca nyidrëti ekö, maine tune pena la hna kuca hnene la itre xa qatre thup. Ngo ame pe, loi e tro palahi së a wangatrunyi nyidrë me metrötrë nyidrë. Tha hnene kö laka, kola traqa koi nyidrë la itre ewekë cili, matre tha tro hë së a nyipiewekëne la hnëqa i nyidrë. Loi e tro palahi së a wangatrunyi nyidrëti hnyawa, me xome ceitu nyidrë me itre xa qatre thup ka catre thupëne me ithuane la itre mamoe.

²⁴ Ngo maine drenge hi la ketre trejine trahmanyi laka, loi e tro nyidrëti a nue la hnëqa ne qatre thup, hnene laka saze hë la aqane mele i nyidrë nge thatreine hmaca kö nyidrëti troa xome lai hnëqa cili, haawe, meköti tro nyidrëti a xome lai mekune cili. (1 Pet. 5:2) Ngacama tha kolo hmaca kö a ahnithe koi nyidrë la itre hnëqa hna hamëne kowe la itre qatre thup, ngo ijiji nyidrëti pala kö troa kuca la itre ewekë nyine loi kowe la ekalesia; haawe, loi e tro palahi sa metrötrë nyidrë.

ITRE HNËQA HNA ATHIP E HNINE LA EKALESIA

²⁵ Nyimutre la itre hnëqa e hnine la ekalesia hna cile fë hnene la itre qatre thup. Hetrenyi la kordinatör ne la lapa ne la itre qatre thup, me seketere, me atre thupëne la huliwa ne cainöj, me atre xomiujine la Ini ne Ita Ne Thup, me atre thupëne la Mel Me Huliwa Ne Cainöj Ne La Keresiano. Isa hetre gurupen asë hi la itre qatre thup nyine tro angatr a thupën. Tha hna sa ijine kö tro angatr a eatrëne la hnëqa i angatr. Nyipici laka, maine hetre hnëqa hna athipe kowe la ketre trejin nge angeice pena a tro me saze ekalesia, maine hna tithi angeice pena hnei mec, maine hna amë pena pine laka tha trongëne hmaca kö angeice la itre hna amekötine hnei Tusi Hmitrötr, haawe, loi e troa iëne la ketre qatre thup, matre troa nyihnai angeic. Ame ngöne la itre ekalesia, tha tru kö hnei qatre thup, matre ame itre xa ijin, tro la ketre qatre thup a xome la itre xa hnëqa, uti hë la ijine troa acile la itre xa trejin ka melëne la itre hna amekötin thatraqane la itre qatre thup.

²⁶ Kordinatör ne la lapa ne la itre qatre thup la ka xomiujine la icasikeu ne la lapa ne la itre qatre thup. Matre, ka ipië angeic nge ka ce huliwa memine la itre xa qatre thup göi troa thupëne la hnënge mamoe i Akötresie. (Rom. 12:10; 1 Pet. 5:2, 3) Nyipiewekë tro angeic a atreine eköthe hnyawa la icasikeu me iujin ej, nge ka kuca hnyawane la huliwa. (Rom. 12:8) Ketre, angeice fe a hnëkëne amë la itre ka troa cile fë la itre cainöj kowe la ka alanyim. Ijije fe tro angeic a sipone kowe la ketre qatre thup, maine ketre drikona troa xatua angeic ngöne la huliwa celë.

²⁷ Qa ne la seketere troa thupëne la itre pepa ne la ekalesia, me hamëne la itre ithuemacanyi ka nyipiewekë kowe la itre xa qatre thup. Ijije hi troa xatua angeic hnene la ketre qatre thup maine ketre drikona troa kuca la itre xa huliwa kö.

²⁸ Ame la atre thupëne la huliwa ne cainöj, tre hnëqa i angeic troa eköthe la huliwa cili memine kö la itre xa ewekë ka ce tro memin ej. Kolo fe a qaja la itre ewekë nyine tro angeic a kuca thatraqane la itre gurup ne cainöj. Angeic a hnëkën amë la itre ijine tro angeic a wange la nöjei gurup ne cainöj. Angeic a isa aca wange trongëne la itre gurup ne cainöj ngöne la treu. Ame ngöne la itre ekalesia ka co tre, xalaithe hi la itre gurup ne cainöj, matre angeic a alua wai angatr ngöne la macatre. Ame ngöne la ijine angeic a isa wai angatr, angeic a iujine la itre icasikeu ne cainöje trootro, me ce cainöj memine lai gurup, me ce tro me angatr troa iwai hmaca, me ce kuca me angatr la itre ini Tusi angatr.

ATRE THUPËNE LA GURUP

²⁹ Ame la ketre hnëqa ka tru hna eatrën e hnine la ekalesia, tre ene la troa xome la hnëqa ne atre thupëne la gurup. Ame la itre huliwa i angeic tre, ene la (1) troa thupëne matre, lolo palahi la aqane isa huliwa hnene la itre atrene asë la gurup koi Akötresie; (2) troa xatua angatr troa maca, me öhnyi madrin me catre cainöj; me (3) troa inine me hnëkëne la itre drikona ne la gurup, matre troa ajane me atreine xome la itre xa huliwa e hnine la ekalesia. Lapa ne la itre qatre thup la ka axeciëne la itre trejine trahmanyi ka ijije troa xome la itre huliwa celë.

³⁰ Pine laka tru catre la hnëqa i angeic, loi e troa cilëne la hnëqa cili hnene la ketre qatre thup. Maine pëkö, pane cilëne ju hi hnene la ketre drikona, treqene la troa hetre qatre thup. Troa hë angeic ka hape, atre ithupë ka inyihnai, pine laka tha qatre thup petre kö angeic ngöne la ekalesia. Tro angeic a cilëne la hnëqa cili thenge la aqane amekötine hnei itre qatre thup.

³¹ Ame la ketre huliwa ka tru ne la atre thupëne la gurup, tre, ene la troa elemekene la huliwa ne cainöj. Tro la aqane catre cainöje i angeic, me madrine i angeic, a thuecatrene la itre atrene la gurup i angeic. Hnene laka, hetre ithuecatre me ixatua hna kapa hnene la itretre cainöj qa ngöne la hna traqa itronyi, haawe, loi e troa eköth la ketre porogaram ne cainöj ne la gurup ka ijij kowe la itre atrene asë. (Luka 10:1-16) Loi e xecie kowe la atre thupëne la gurup ka hape, hetre teritoar palahi nyine troa huliwan. Tro angeic a iujine la icasikeu ne cainöje trootro me isa thele sane la itre trejin asë matre troa ce cainöj. E tro angeic a patr, loi e tro angeic a thele jëne matre tro la ketre qatre thup maine ketre drikona, nge e pë palaha, tro la ketre trejin ka macaj a eatrëne la itre hnëqa celë matre tro la itretre cainöj a kapa la ixatua ka ijij.

³² Loi e tro la atre thupëne la gurup a hnëkëne amë la itre huliwa, qëmekene la troa traqa la atre thupëne la huliwa ne cainöj troa wang la gurup. Loi e tro fe angeic a canga thuemacane la drai kowe la itre atrene la gurup, me qaja amë la itre eloine lai iwai cili. E trotrohnine hnyawa hi la itre atrene asë ne la gurup la hna hnëkëne celë, tro lai a hetre madrine i angatr troa sajuëne ej.

³³ Hna tuluthe hi la etrune la itre atrene la isa gurup. Tro lai a aijijëne la atr thupëne la gurup troa atre hnyawa la nöjei atrene hna amë ngöne la gurup. Tro angeic a nyipiewekëne la itre atren, isa ala cas, ceitu me ketre atre thupë mamoe ka ihnim. Angeic a thele troa hamëne la ixatua ka ijij koi angatr isa ala cas, me hane thue catre koi angatr troa cainöj me sine la itre icasikeu ne la ekalesia. Angeic fe a thele jëne troa isa acatrene la lapaune i angatr. Ketre, angeic a thupëne matre troa wang la itre ka wezipo, maine ka hace hni pena, matre troa isa hamëne la ixatua ka ijij. Angeic fe a hamë eamo ka troa xatuane la itre xa trejin troa ajane la itre xa hnëqa ngöne la ekalesia, ketre ixatua lai ka tru elanyi kowe la ekalesia. Eje hi laka, ame la nöjei huliwa hna kuca hnene la atre thupëne la gurup, tre nyine xatuane la itre atrene la gurup i angeic. Ngo hnene laka, ketre qatre thup angeic, haawe, angeic fe a wange atrune asë la itre atrene la ekalesia, me sikusikune troa canga xatuane la ketre trejin ka ajan.—Ite Huliwa 20:17, 28.

³⁴ Ame la ketre huliwa ne la atre thupëne la gurup, tre, ene la troa xawane la itre rapor ne hna cainöj ne la itre atrene la gurup i angeic. Kola iupi fë la itre rapore cili kowe la seketere. Loi e tro la itre ka cainöj a ce huliwa memine la atre thupëne la gurup, ene la troa canga hamëne la itre rapor ne hna cainöj. Ijiji hi tro sa hamëne mekötine la rapore së kowe la atre thupëne la gurup ngöne la pune la treu, maine pena troa amë ngöne la trengen hna hnëkën amë thatraqane lai ngöne la Uma Ne Baselaia.

KOMITE GÖI HULIWA NE LA EKALESIA

³⁵ Hetrenyi la itre xa hnëqa hna troa xom hnene hmekuje hi la itre atrene la Komite Göi Huliwa, ene la kordinatör, me seketere, me atre thupëne la cainöj. Hnëqa i angatr troa ce wang matre tro palahi a hetrenyi la itre pepa ne sipo, tune la itre pepa ne sipo itus, me itre pepa nyine troa fejane la hna huliwa hnene la itretre cainöj, me itre pepa nyine nyialiene göi troa acile la itre qatre thup me drikona, maine ami angatr pena. Angatre mina fe a ce axeciëne maine troa nue la Uma Ne Baselaia kowe la itre ka troa faipoipo, maine itre ka troa hnëmeci pena. Qa i angatre mina fe troa thawa la itre trejin ngöne la isa gurup ne cainöj. Angatre fe a kapa la sipo ne la itre ka ajane troa xome la huliwa ne pionie lapa me pionie ka ixatua, me itre xa pengöne huliwa ju kö. Ame itre xa ijin, tre, kola hamën hnene la filial la itre xa hnëqa nyine troa xome hnene la Komite Göi Huliwa ne la ekalesia. Ngo angatre palahi a eatrëne itre ej, thenge la aqane amekötin hnene la lapa ne la itre qatre thup.

³⁶ Ame la itre xa huliwa nyine troa kuca hnene la itre trejine celë, lo huliwa ne la atre cilëne la Ini Ne La Ita Ne Thup, memine la atre thupëne la icasikeu Mel Me Huliwa Ne Cainöj Ne La Keresiano, me itre huliwa hna kuca hnene la itre xa atrene la lapa ne la itre qatre thup, tre, hna qejepengön ngöne la itre tus hna iupi fë hnei filial.

³⁷ Hetre icasikeu hna kuca lapane hnene la lapa ne la itre qatre thup ne la ekalesia, göi troa ce ithanatane la aqane huliwa i Akötresie hnene la ekalesia. Luetre lao icasikeu hna kuca ngöne la macatre, ngöne lo ijine iwai ne la atre thupëne la sirkoskripsio. Hetre ketre icasikeu hna hnëkëne amë nyine troa kuca köni treu thupene la hna iwai. Nyipici laka, hetre itre ewekë ka tru nyine troa canga nyipiewekëne me ithanatane hnene la itre atrene asë la lapa ne la itre qatre thup. Matre, ame lo lai foa lao icasikeu hna kuca ngöne la macatre, tre ijije hi lai tro angatre a canga nyinyine itre ej. Maine hetre jole ka traqa, loi e tro angatr a canga icasikeu. Ngo eje hi laka, e tro la nöjei qatre thup asë a isa nyipiewekëne la hnëqa i angatr, nge e tro la kordinatör ne la lapa ne la itre qatre thup a thawa hnyawa la itre huliwa nyine kuca, haawe, tha tro kö lai a tru menu palaha la itre ijine icasikeu.

DRENGETHENGE JU

³⁸ Ngacama tha ka pexeje kö la itre qatre thup, ngo hnei Iehova hna amekötine laka, tro la itre trejin asë ne la ekalesia a drengethenge angatr. Ke tro angatre lai a isa qeje thiinan xajawa i Nyidrë. Angatre a nyitrengewekë i Nyidrë me mama fë la musi Nyidrë. Öni Heberu 13:17: “Ideiju kowe la ite mekene i nyipunie, me denge thenge ju ; ke angat’ a hmekëne thatraqane la ite u i nyipunie, ke itete troa qeje gelen ; mate troa kuca lai memine la madin, nge tha memine la aköt ; ke ka pë thangane lai koi nyipunie.” Eje hi laka, Iehova la ka acile la trejin troa xome la hnëqa ne qatre thup jëne la uati hmitrötr. Ngo, e tha melëne hë la wene ne la ua hnene la qatre thup, nge tha trongëne hë la itre trepene meköti Akötresie ngöne la mele i angeic, haawe, Iehova fe e cili a xome hmaca qaathei angeic lai hnëqa jëne palahi la uati hmitrötr.

³⁹ Hapeu, hetre hni ne ole së kö kowe la aqane catre huliwa ne la itre qatre thup? Ame la Paulo a cinyianyi kowe la ekalesia ne Thesalonika, öni nyidrë: “Ange tejin, eëhuni a iele nyipunie, ka hape, wai angate angete kuci huliwa thei nyipunie, me musinë nyipunie göi Joxu, me eamo nyipunie ; me anyipi ewekën’ atraqate angate me hnime ngöne la huliwa i angat.” (1 Thes. 5:12, 13) Hnene laka, tru catre la huliwa hna kuca hnene la itretre thupëne la ekalesia, ene pe, hmaloi koi së nge hetre madrine së troa nyihlue i Iehova. Ketre, ame ngöne la pane tusi Paulo koi Timoteo, nyidrëti a amexeje la aqane tro la itre trejin ne la ekalesia a ujë kowe la itre qatre thup, me hape: “Loi e troa atrune hnyawa la nöjei [qatre thup] angete musi aloin, nge sisitia angete huliwa ngöne la wesi ula me ini.”—1 Tim. 5:17.

ITRE XA HNËQA E HNINE LA ORGANIZASIO

⁴⁰ Ame itre xa ijin hna iëne la itre qatre thup troa nyi atrene la Gurup Ne Vizitë Sine Wezipo. Ame itre xan, angatr a sine la Komite Ne Ixatua e Pital (CLH) me hane wange la itre pital me itre droketre, matre troa sipon troa xome la itre aqane inyië göi madra, thenge la hna ajan hnene la Itretre Anyipici Iehova. Ame itre xa qatre thup, angatr a hane sajuëne la huliwa ne Baselaia hnene la hna ixatua xup me nyihnyawa Uma Ne Baselaia me Uma Ne Asabele, maine hane sine pena la Komite Ne Asabele. Atraqatre la hni ne ole së kowe la aqane catre huliwa ne la itre trejine cili, memine la aja ka eje thei angatr troa ujë tune lai. Eje hi lai laka, easa ‘nyipiewekëne la itre atr ka tui angatr.’—Fil. 2:29.

ATRE THUPËNE LA SIRKOSKRIPSIO

⁴¹ Tro la Lapa Ne Xomi Meköt a acile la itre qatre thup ka troa xome la hnëqa ne atre thupëne la sirkoskripsio. Nge filial la ka upi angatr troa wange la itre ekalesia ngöne la sirkoskripsio hnei angatr hna troa thupën, nge troa alua iwai ngöne la macatre. Hetre itre ijine fe la angatr a wange la itre pionie lapa, me itre pionie hut, maine itre mesinare pena ka huliwa ngöne la itre teritoar gaa nanyi catr. Angatr a hnëkëne hnyawa la porogarame i angatr ne troa wange trongëne la itre ekalesia, me canga thuemacanyi itre ej la ijine tro angatr a traqa, matre troa kepe eloin hnene la ekalesia.

⁴² Hnëqa ka tru kowe la kordinatör troa eköthe la porogaram ne la ekalesia, matre tro la iwai cili a acatrene la lapaune ne la itre atrene asë la ekalesia. (Rom. 1:11, 12) Hetre ithuemacanyi hna qaja kowe la ekalesia, ene la ijine traqa ne la atre thupëne la sirkoskripsio (memine la föi angeic e ka faipoipo hë), me itre hnei angeic hna ajan. Tro la kordinatör a ce wange memine la itre xa trejin matre troa wai hnalapa, me itre xa ewekë ju kö ka nyipiewekë. Loi e troa xecie hnyawa koi angeic, laka, ase asë hë thuemacanyine la itre trejin, memine la atre thupëne la sirkoskripsio.

⁴³ Tro la qatre thup ka iwai a ce wange memine la kordinatör ne la ekalesia matre troa eköthe la porogaram ne la itre icasikeu ne la ekalesia, memine la itre icasikeu ne cainöje trootro. Loi e troa eköthe la porogarame cili thenge la itre mekune hna hamëne hnene la atre thupëne la sirkoskripsio, me itre tusi hna kapa qaathene la filial. Loi e troa thuemacane la ekalesia la itre hawa ne icasikeu, me hawa ne icasikeu ne la itre pionie, me itre qatre thup me itre drikona, memine fe la hawa me götran hna hnëkën thatraqane la itre icasikeu ne cainöje trootro.

⁴⁴ Tro la atre thupëne la sirkoskripsio a goeëne la itre dosie ne la ekalesia e hnaipajö ne draiangedic. Angeic a goeëne la itre pepa ne hna huliwa hnene la itretre cainöj, me itre pepa nyine troa cinyianyine la etrune la itre ka sine la icasikeu, me dosie ne teritoar, memine fe la hna ithingë. Celë hi lai ka troa aijijë angeic troa öhne hnyawa la itre hna ajan hnene la ekalesia, memine fe la ixatua ka ijij nyine tro angeic a hamëne kowe la itre trejine ka thupëne la itre dosie cili. Hnëqa ne la kordinatör troa akötrehnin, me hnëkëne la itre dosie, matre tro la atre thupëne la sirkoskripsio a canga kapa itre ej. Qëmekene troa nyiqaane la icasikeu ne draiangedic, tro la atre thupëne la sirkoskripsio a pane ce ithanatane la itre dosie memine la kordinatör maine ketre qatre thup pena.

⁴⁵ Ame ngöne la ijine iwai ne la atre thupëne la sirkoskripsio, tre, angeic a thele troa ithanata memine la itre trejin, angatr isa ala cas, ngöne la ijine icasikeu, me ngöne la kola cainöje trootro, maine ngöne la kola ce xen, maine pena ngöne itre xa ijin. Ketre, angeic a ce icasikeu memine la itre qatre thup memine la itre drikona, matre troa hamë eamo me itre ixatua, me ithuecatr; celë hi lai ka troa xatua angatr troa thupëne hnyawa la hnënge mamoe. (Ite edomë 27:23; Ite Hu. 20:26-32; 1 Tim. 4:11-16) Nge ketre, angeic mina fe a ce icasikeu memine la itre pionie matre troa ithuecatre koi angatr ngöne la huliwa i angatr, me xatua angatr troa cile kowe la itre jol ngöne la hna cainöje trootro.

⁴⁶ Maine hetrenyi la itre xa jol nyine troa nyinyin hnene la itre qatre thup, loi e tro la atre thupëne la sirkoskripsio a hamëne la ixatua i angeic ngöne la wiike cili. Maine hetre ngazo ka tru hna kuca e hnine la ekalesia, nge itre qatre thup a ajane troa kapa la ixatua qaathei angeic, haawe, loi e tro angeic a thele ijine troa xatua angatr. Maine kolo ha troa fenesi la wiik, nge pë palaha nyin lai jol, loi e tro angeic a xatuane la itre qatre thup, maine pena la itre trejine ka aja ixatua troa thele nyin la itre jol ngöne la Tusi Hmitrötr. Maine kolo fe a ajane troa kapa la ixatua qaathene la filial, haawe, loi e tro angeic memine la itre qatre thup ne la ekalesia a cinyiany, me qeje pengöne hnyawa lai jol cili koi filial.

⁴⁷ Tro la atre thupëne la sirkoskripsio a sin asë la itre icasikeu ne lai ekalesia ngöne la ijine iwai. Ame ngöne la itre xa ijin, kola saze la itre ijine icasikeu thenge la hna amekötine hnei filial. Tro angeic a cile fë la itre cainöj hna hnëkëne nyine ithuecatr, me ini, me acatrene la lapaune ne la itre atrene la ekalesia. Tro angeic fe a thele troa akökötrene la ihnim me hni ne ole i angatr koi Iehova, me koi Iesu, me kowe la organizasio.

⁴⁸ Ame la pane ewekë hna thel troa eatrëne hnene la atre thupëne la sirkoskripsio, tre, ene la troa thuecatrene la itre trejin troa catre cainöj, me hamëne la itre ixatua ka ijij. Alanyimu la itre trejin ka hnëkën amë la porogarame i angatr matre troa catre cainöje ngöne lai wiike cili. Ame itre xan, angatr a mekune troa xome la huliwa ne pionie ka ixatua ngöne la treu ne iwai. Ame la itre ka ajane troa ce cainöj me angeic, (maine föi angeic pena) tre, ijije tro angatr a canga siji ëj. Nyimutre la itre thangane ka loi hna troa kapa, e tro sa ce tro memine lai atre thup (maine föe i angeic) troa wange la itre atr hne së hna ce ini Tusi memin, maine pena la itre atr hne së hna troa wange hmaca. Tha ka sihngödri kö la itre trengecatr hne së hna nue troa catre cainöje ngöne la ijine iwai!—Ite edomë 27:17.

⁴⁹ Hna hnëkëne ngöne la nöjei macatre la lue Asabele Ne Sirkoskripsio. Hnëqa ne la atre thupëne la sirkoskripsio troa hnëkën la itre asabele cili. Tro angeic a acile la ketre atre thupëne la asabele memine la atre ce huliwa memin. Loi e tro nyidroti a ce huliwa memine la atre thupëne la sirkoskripsio, matre troa hnëkën la aqane trongene la asabele. Celë hi ka troa aijijëne la atre thupëne la sirkoskripsio matre tro hi angeic a waipengöne hnyawa la porogarame ne asabele. Angeice mina fe a iëne la itre xa trejin ka macaj matre troa cilëne la itre xa hnëqa. Nge ketre, tro angeic a ce goeëne memine la atrekë huliwa ne hle mani la hna ithingë thupene la itre asabele. Ca Asabele Ne Sirkoskripsio nyine troa sin hnene la ketre atrene la filial, nge tro fe angeic a cile fë cainöj. Ame itre xa sirkoskripsio, hna thawa nyimutren ke nanyi la itre gojeny, maine co pena ha la itre hnë asabele.

⁵⁰ Ame ngöne la nöjei treu, tre, tro lai atre thupëne la sirkoskripsio a hamëne mekötine kowe la filial la rapor ne hna cainöje i angeic. Maine tha ase ju kö la ekalesia nyithupene la itre ka nyipiewekë koi angeic ngöne la kola iwai, tune göi loto, me xen, me hnalapa, me itre xane ju kö, haawe, tro pë hë filial a të koi angeic. Ame la itre trejin cili ka iwai trootro, tre, angatr a mejiune kowe la hnei Iesu hna thingehnaean, ka hape, tro fe a hamëne koi angatre la itre ewekë ngöne la götrane la ngönetrei, e hnei angatr hna pane sajuëne la Baselaia i Akötresie. (Luka 12:31) Loi e tro la itre atrene la itre ekalesia a mekune palahi ka hape, ketre manathithi ka tru koi angatr troa kapa ngöne la hnalapa i angatr la itre qatre thup cili, itre ka catre huliwa.—3 Ioane 5-8.

KOMITE NE FILIAL

⁵¹ Ame ngöne la nöjei filial ne la Itretre Anyipici Iehova e cailo, tre, hetrenyi la ca Komite Ne Filial. Könitre la itre qatre thup ka nyi atren ej, ngo ame itre xa filial hna nyi xa atren. Hnëqa i angatr troa thupëne la aqane trongene la huliwa ne cainöj ngöne la nöj, maine ngöne la itre nöj hna ahnithe koi angatr. Ame la ketre trejin e angatr, tre, angeic a xome la hnëqa ne kordinatör ne la Komite Ne Filial.

⁵² Ame la itre ka ce huliwa ngöne la Komite Ne Filial, tre, angatr a ce ithanatane la itre jole ka ketr la itre ekalesia ne la teritoare hnei angatr hna thupën. Angatr a akötrehnine troa thawa hnyawa la itre itusi qaathene la organizasio i Iehova, matre troa acatrene la lapaune ne la itre atrene la itre ekalesia. Qa i angatre troa thupëne la huliwa ne cainöj ngöne la götrane hna ahnithe koi angatr, nge loi e tro mina fe a hnëkëne me inine la itre ekalesia, me itre sirkoskripsio, matre troa atreine xatuane la itre atrene la teritoare i angatr. Kolo fe a wang hnene la Komite Ne Filial la huliwa ne la itre mesinare, me itre ka pionie hut, me itre pionie lapa, memine la itre pionie ka ixatua. Ame la kola hnëkëne la itre Asabele Ka Tru, angatr a canga hnëkëne amë la itre ewekë, me athipe la itre hnëqa, matre troa “kuca alolone . . . me amekötine la nöjei ewekë asë.”—1 Kor. 14:40.

⁵³ Ame itre xa ijin hna acile la Komite Ne La Nöj. Hna kuca tun ke, nyimu nöj hna thupën hnene la Komite Ne Filial, nge hna hnen ej ngöne la ketre nöje kö. Celë hi la ka aijijëne la Komite Ne La Nöj troa thupëne hnyawa la aqane trongene la huliwa ne cainöj. Hnëqa ne la Komite cili troa wange la itre hnahag, me itre biero ne la Bethela, me itre tus nyine troa cinyianyin, me itre rapor, memine la huliwa ne cainöj. Kolo mina fe a ce huliwa hnene la Komite Ne La Nöj memine la Komite Ne Filial, matre troa tro loi la itre huliwa ne la Baselaia e cili.

⁵⁴ Lapa ne Xomi Meköti la ka acile la itre atrene la itre Komite Ne Filial memine la itre atrene la itre Komite Ne La Nöj.

MACA NE LA HNALAPA NE XOMI MEKÖT

⁵⁵ Kolo palahi a akötrehnine hnene la Lapa Ne Xomi Meköti troa upe la itre qatre thup ka macaj troa wange la itre Bethela, isa ala cas e cailo fen. Kola ati ëjene la itre trejine ka xome la hnëqa cili, ka hape, itre maca ne la hnalapa ne xomi meköt. Ame la pane ewekë hnei angatr hna thele troa kuca, tre, ene la troa xatuane la itre atrene la Bethela, memine la Komite Ne Filial, troa thele nyin maine troa ce ithanatane pena la itre ejolene la huliwa ne cainöj. Maine ijij, tro fe lai maca ne la hnalapa ne xomi meköt a icasikeu memine la itre qatre thup ka iwai trootro me itre mesinare ka ce huliwa memine la filial. Angeic a ce ithanatane me angatr la itre jol me itre aja ka eje thei angatr, me hamë ithuecatre koi angatr göne la huliwa ka tru hnei angatr hna kuca, ene la huliwa ne cainöj.

⁵⁶ Tro fe lai maca ne la hnalapa ne xomi meköt a goeëne la aqane trongene la huliwa ne cainöj, me itre xa huliwa ju kö hna kuca hnene la itre ekalesia ngöne la teritoare hna ahnithe kowe itre ej. Maine ijij, tro fe angeic a wange la itre uma ne ujë qene lapa. Maine kola traqa troa iwai ngöne la ketre Bethela hnene la atre thupe celë, haawe, loi e tro angeic a hane cainöje trootro ngöne la götrane cili.

AQANE THUP KA IHNIM

⁵⁷ Nyipici laka, nyimutre la itre manathithi hne së hna kapa qa ngöne la aqane catre huliwa, me aqane thupë së me hnimi së hnene la itre trejin celë. E tro palahi sa drengethenge la itre qatre thup ne la ekalesia, memine la itre xa qatre thup hna acile troa thupëne la hnënge mamoe, tro hë sa cas memine la Hene ne la ekalesia, ene Iesu Keriso. (1 Kor. 16:15-18; Efe. 1: 22, 23) Ame hë e cili, tro la uati hmitrötre i Akötresie a lapane la itre ekalesia asë, nge tro la Wesi Ula i Nyidrëti a amekötine la huliwa ne cainöj e cailo fen.—Sal. 119:105.

HNEI Paulo aposetolo hna cinyihane kowe la ekalesia ne Filipi, ka hape: “Ini Paulo, me Timoteo, lue hlue i Keriso Iesu, a cinyihane kowe la ite ka hmitöte asë thei Keriso Iesu e Filipi, me nöjei [atre thup], me nöjei dikona.” (Fil. 1:1) Easa goeëne e celë laka, hnei Paulo hna qeje itre drikona. Nyipici laka, nyipiewekë catre la huliwa hna athipe koi angatr ekö göi troa xatuane la itre qatre thup, nge tha saze kö enehila. Tru catre la huliwa hna kuca hnene la itre drikona matre troa xatuane la itre qatre thup, nge hetre thangane ka loi mina fe la huliwa i angatr kowe la ekalesia.

² Hapeu, atre fe hi epuni la itre drikona ne la ekalesia i epun? Atrehmekune kö epuni la etrune la huliwa i angatr matre troa acatrene la lapaune i epun me tro loi la ekalesia? Eje hi laka, itre huliwa lai hna wangatrune hnei Iehova. Öni Paulo: “Ame angete kuca aloine la qa ne la dikona, te, tro angat’ a hetenyi la hlemu loi, memine la cate atraqate ngöne la lapaune thei Keriso Iesu.”—1 Tim. 3:13.

ITRE HNA AMEKÖTINE HNEI AKÖTRESIE GÖI TROA DRIKONA

³ Ame la hna thele thene la drikona, tre, ene la troa pë ethane la aqane mele i angeic, nge atre hna troa mejiune kow. Nge tro angeic a eatrëne hnyawa la itre hnëqa hna athipe koi angeic. Celë hi lai ka mama ngöne la tusi Paulo koi Timoteo, lo kola amexeje la itre thiina hna thele thene la drikona; kola hape: “Kete tune lai la nöjei dikona troa thina metöt, tha itete lue hna ewekë, tha itete iji atrunyi waina, tha itete pi hete mo; ngo kola xölehuje la ewekë ka sihngödi ne la lapaune ngöne la mekuthethewe ka wië. Nge pane tupathi angat; ame hna kuca la qâ ne la dikona hnei angat’ e pë gelen. Loi la nöjei dikona, troa isa ca fö, kola musinëne aloine la ite nekö i angat, me ite lapa i angat. Ke ame angete kuca aloine la qâ ne la dikona, te, tro angat’ a hetenyi la hlemu loi, memine la cate atraqate ngöne la lapaune thei Keriso Iesu.” (1 Tim. 3:8-10, 12) Hnene laka, itre drikona a trongëne hnyawa la itre hna amekötine celë, haawe, tha tro kö a jelengazone la ekalesia ke, hetre gelene hna öhne thene la itre trejin ka trene hnëqan.

⁴ Qatre ju hë maine thöthi la drikona, ngo ame la hna thele thei angeic, tre, ene la troa catre cainöjëne la maca ka loi, e nöjei treu. Angeic a xötrethenge la tulu i Iesu, ene la troa hetre “aja atraqate” kowe la huliwa ne cainöj. Celë hi lai ka amamane la aja i Iehova, tro la nöjei atr a mel.—Is. 9:7.

⁵ Ame la drikona, angeic a amamai tulu ka loi ngöne la aqane heetr me aqane isej, me aqane ithanata, me thiina, me aqane ujë. Hetrenyi angeic la aqane waiewekë ka lolo, matre kola metrötrë angeic. Ketre, angeic a nyipiewekëne la aqane imelekeu i angeic me Iehova, memine la itre hnëqa hna athipe koi angeic e hnine la ekalesia.—Tito 2: 2, 6-8.

⁶ Hna ‘pane tupath’ la itre drikona. Kolo lai a hape, qëmekene troa acile la drikona, ase hë angeic pane amamane laka, hnei angeic hna nue mel kowe la huliwa i Akötresie. Hnei angeic hna amamane fe laka, Baselaia i Akötresie la ka tro pa ngöne la mele i angeic. Ketre, angeic palahi a thele troa eatrëne la itre hnëqa ka tru hna ahnithe koi angeic. Matre, tulu lai nyine troa xötrethenge hnene la itre atrene la ekalesia.—1 Tim. 3:10.

HULIWA NE LA DRIKONA

⁷ Ame la itre drikona, angatr a kuca la nöjei pengöne huliwa nyine loi kowe la itre trejin. Matre hetre ijine kowe la itre qatre thup troa eatrëne hnyawa la huliwa i angatr, ene la troa hamë ini, me thupëne la ekalesia. Qëmekene tro la itre qatre thup a athipi hnëqa kowe la itre drikona, nyipiewekë tro angatr a pane wange la itre hna atreine kuca hnene la itre drikona, memine la itre hna ajan hnene la ekalesia.

⁸ Pane ce wange jë së la itre huliwa hnei angatre hna kuca. Hetre drikona ka huliwa ngöne la hna xomi itus, matre hmaloi kowe la itre trejine troa canga kapa la itre itus hnei angatr hna ajane koi angatre kö, me göne la huliwa ne cainöj. Hetre drikona fe ka huliwa ngöne la hna xomi zonal. Ame la itre xan, kola thewe teritoar, maine fejane la etrune la mani hna ithingë, maine tro fë micro, maine aho ikaho, maine ikep, maine kuca la itre xa huliwa kö göi troa xatuan la itre qatre thup. Ketre huliwa fe ka tru la troa nyihnyawane me nyidrawane la Uma Ne Baselaia, matre, kolo mina fe a sipone kowe la itre drikona troa hane ixatua ngöne la götrane cili.

⁹ Pine laka tru la itre drikona ngöne la itre xa ekalesia, haawe, isa hetre hnëqa hna athip koi angatr. Ngo ame ngöne la itre xa ekalesia, troa ahnithe la itre hnëqa ka nyimutre kowe la ca drikona hi. Ame ngöne la itre xan, hna xome la ca huliwa hnene la alanyim. Maine tha tru pena kö hnei drikona ka troa xome la itre xa huliwa, loi e tro la lapa ne la itre qatre thup a wange la itre xa trejine trahmany ka hlemu loi, matre tro angatr a xome la itre huliwa cili. Tro hë angatr elany a maca ngöne la huliwa hnei angatr hna kuca, nge celë hi lai ka troa aijijë angatr troa hane xome la hnëqa ne drikona. Maine pëkö trejine trahmany, nge hetre trejine föe ka hlemu loi, tro lai a upi angeic troa kuca la itre xa huliwa, ngacama tha tro fe kö angeic a hane drikona. Ame la trejin ka hlemu loi, tre ketre tulu ka lolo kowe la ekalesia ngöne la aqane ujë i angeic, me aqane nyihlue i Iehova hnei angeic. Kola qaja fe la aqane sine lapane angeic la itre icasikeu, me catre cainöj, me aqane thupëne angeic la hnepe lapa i angeic, me aqane iëne angeic la itre nyine iamadrinë, me aqane heetr me aqane isej, me itre xa ewekë ju kö.

¹⁰ Ame ngöne la itre ekalesia laka, tha tru kö hnei qatre thup, hna nue kowe la itre drikona ka maca troa ce ithanatane memine la itre ka ajane troa xomi bapataiso la itre hnying göi itre ini ne la Tusi Hmitrötr. Kola mama la itre ini cili ngöne la Itre Xa Mekun, “Paatr 1—Itre Trepene Ini Qa Hnine La Tusi Hmitrötr” me “Paatr 3—Aqane Ameköti Ewekë i Iehova.” Ngo pine laka “Paatr 2—Itre Hna Amekötine Hnei Iehova” a amexeje la itre mekun ka ketr la mele së, haawe, qanyine kö la qatre thup troa ithanatane la götrane cili.

¹¹ E ka loi kowe la lapa ne la itre qatre thup, tro angatr a isazen, e itre xa ijin, la itre huliwa thene la itre drikona. Ngo hetre eloine catr e tro la ketre drikona a lapa xom aqeane la ketre huliwa matre tro angeic a maca me atreine huliwa.

¹² Thenge la aqane trongene la itre ewekë e hnine la ekalesia, hetre itre xa huliwa hna athip kowe la itre drikona. Nge, ka mama koi nöjei atr la aqane huliwa i angatr koi Akötresie. (1 Tim. 4:15) Maine tha tru kö hnei qatre thup, hetre drikona hna acile troa xatuane la atre thupëne la gurup. Ame itre xa ijin, angeic a xome la hnëqa ne atre ithupë ka inyihnai thenge palahi la hna amekötin hnene la itre qatre thup. Tro fe a hane upe la itre drikona troa cile fë la itre xa götrane la icasikeu, Mele Me Huliwa Ne Cainöj, tune mina fe la Ini Tus ne la ekalesia, maine tro pena a cile fë la ketre cainöj koi nöjei atr ngöne la ekalesia. Tro lai a ahnith la itre xa huliwa kowe la itre drikona e kola aja ixatua, nge e ka eatrën hnyawane angatr la itre hna amekötin thatraqane la hnëqa i angatr. (1 Pet. 4: 10) Loi e hetre aja thene la itre drikona troa xatuane la itre qatre thup.

¹³ Ngacama isapengöne kö la huliwa i angatr memine la huliwa ne la itre qatre thup, ngo huliwa i Akötresieti palahi la hnei angatr hna kuca, nge ka nyipiewekë matre troa tro loi la ekalesia. Maine tro la drikona a kuca hnyawa la huliwa i angeic, me eatrëne mina fe la itre hna amekötine thatraqane la hnëqa ne atre thup, me atre hamë ini, haawe, tro hë lai a qeje angeic göi troa hane xome la hnëqa ne qatre thup.

¹⁴ Maine ketre trejin thöth epuni, maine ka xötrei bapataiso, epuni kö a thele troa hane drikona? (1 Tim. 3:1) Alanyimu palahi la itre atr ka xomi bapataiso e nöjei macatre, matre nyipiewekë troa hetre trejin trahmanyi ka maca troa xome la itre hnëqa e hnine la ekalesia. Tro epuni lai a traqa kow, e hnei epuni hna akökötren e kuhu hni epuni la aja ne troa xatuane la itre atr. Ame la ketre aqane troa akökötrene lai, tre ene la troa mekune ajuine la tulu i Iesu. (Mat. 20:28; Ioane 4:6, 7; 13:4, 5) Ame la epuni a melëne la madrine qa ngöne la hna xatuane la itre atr, kolo palahi a kökötre catre thei epuni la aja cili. (Ite hu. 20:35) Haawe, saene jë troa hamëne la ixatua ka ijij kowe la itre atr, me ixatua troa nyihnyawane la Uma Ne Baselaia, maine troa inyihnai troa kuca la ketre iamacanyi ngöne la ijine icasikeu, Mele Me Huliwa Ne Cainöj. Ame la trejine ka ajane la itre hnëqa, loi e tro angeic a majemine ini Tusi matre tro angeic a atreine melëne hnyawa la itre thiina i Akötresie. (Sal. 1:1, 2; Gal. 5:22, 23) Ketre, jëne la itre huliwa hna ahnith koi angeic, kola mama ka hape, angeice la ketre trejin nyine mejiune kow, nge ka eatrëne hnyawa la itre huliwa hna ahnithe koi angeic.—1 Kor. 4:2.

¹⁵ Hna acile la itre drikona jëne la uati hmitrötr, nge nyine loi kowe la ekalesia. Kola amamane hnene la itre atrene la ekalesia la hni ne ole i angatr kowe la aqane catre huliwa ne la itre drikona. Matre angatr a ce huliwa memine la itre drikona ngöne la kola eatrëne la itre hnëqa i angatr. Celë hi aqane amamane la ekalesia la hni ne ole i angatr kowe la itre hna amekötine hnei Iehova matre troa tro loi la organizasio i Nyidrë.—Gal. 6:10.