MEKENE 46
Hnauëne Laka Tro Sa Nue La Mele Së Koi Iehova Me Bapataiso?
Ame la easa nue la mele së koi Iehova, easa sisinyi koi Nyidrë jëne la thith ka hape, Nyidrëti casi hi la hne së hna troa thili kow, nge troa tro pa la aja i Nyidrë ngöne la mele së. (Salamo 40:8) Nge thupene lai, easa bapataiso, matre troa amamane kowe la nöjei atr ka hape, ase hë së nue la mele së koi Iehova. Ame la easa iëne troa nue la mele së koi Iehova, celë hi mekune lai ka nyipiewekë. Nemene la ka upi epun troa xome la mekun cili?
1. Nemene la ka upe la ketre atr troa nue la mele i angeic koi Iehova?
Ihnim la ka upe la ketre atr troa nue la mele i angeic koi Iehova. (1 Ioane 4:10, 19) Öni Tusi Hmitrötr: “Qa i eö troa hnimi Iehova Akötresi eö hnene la hni eö ka pexej, me mele i eö ka pexej, me mekuna i eö ka pexej, me trenge catre i eö ka pexej.” (Mareko 12:30) Easa amamane ka hape, easa hnimi Akötresie jëne la aqane ithanata së, ngo memine fe la itre huliwa së. Tune la ihnim ka upe la trahmanyi me föe troa faipoipo, ihnimi koi Iehova la ka upi së troa nue la mele së koi Nyidrë, me bapataiso.
2. Nemene la itre manathith hna troa kapa hnene la itre ka bapataiso?
Bapataiso a aijijë epun troa sine la fami Iehova ka madrin. Celë hi la ka troa aijijë epun troa atrepengöne la ihnimi Nyidrë, nge ka troa easenyi epun koi Nyidrë. (E jë la Malaki 3:16-18.) Tro hë Iehova lai a Keme i epun, nge tro epuni a hane sine la lapa ne la itre trejin e cailo fen ka hnimi Nyidrë, nge ka hnimi epuni fe. (E jë la Mareko 10:29, 30.) Ngo tune lo hne së hna ce wang, hetre itre ewekë nyine tro sa kuca qëmekene troa bapataiso. Loi e tro epuni a pane inine troa atre Iehova, me hnimi Nyidrë, me lapaune kowe la Nekö i Nyidrë. Thupene lai, epuni ha nue la mele i epuni koi Iehova. Ame hë la epuni a ase kuca la nöjei ewekë cili, me bapataiso, epuni hë lai ngöne la gojenyi ne tro kowe la mele ka pë pun. Öni Tusi Hmitrötr: “Kolo fe a amele nyipunie enehila hnene . . . la bapataiso.”—1 Peteru 3:21.
TROA CE ITHANATAN
Tro sa ce wang la kepin matre nyipiewekë tro epuni a nue la mele i epun koi Iehova me bapataiso.
3. Tro sa isa iëne la nyine tro sa nyihluen
Ame ekö, hnene la angetre Isaraela hna mekun ka hape, ijije hi troa ce nyihlue i Iehova me Baala. Ngo hnei Iehova hna upe la perofeta i Nyidrë, Elia, troa amekötine la aqane waiewekë i angatr. E jë la 1 Ite Joxu 18:21, nge ce ithanatane jë cahu hnying:
Drei la nyine tro la angetre Isaraela a iën?
Tune la angetre Isaraela, nyipiewekë tro sa iëne la hne së hna troa thili kow. E jë la Luka 16:13, nge ce ithanatane jë cahu itre hnying:
Pine nemene matre tha ijije kö tro sa ce thili koi Iehova memine la ketre atr maine ketre ewekë pena?
Tro sa amamane tune kaa koi Iehova ka hape, Nyidrëti hi la nyine tro sa thili kow?
4. Loi e tro epuni a mekune hnyawane la aqane hnimi epun hnei Iehova
Nyimutre la itre ahnahna ka sisitria hnei Iehova hna hamë së. Nemene fe la nyine tro sa hamë Nyidrë? Goeëne jë la VIDEO.
Tune kaa la aqane amamane Iehova ka hape, Nyidrëti a hnimi epun? E jë la Salamo 104:14, 15 me 1 Ioane 4:9, 10, nge ce ithanatane jë cahu itre hnying:
Madrine kö epuni kowe la itre ahnahna hnei Iehova hna hamë epun?
Ame la epuni a kapa la itre ahnahna qaathei Iehova, nemene la ka ketri epun?
Ame la ketre atr a hamëne koi së la ketre ahnahna hnei easë hna ajan, tru la aja së troa olene koi angeic. E jë la Deuteronomi 16:17, nge ce ithanatane jë cahu hnying:
Ame la epuni a mekune la nöjei ewekë hnei Iehova hna kuca koi epun, nemene la hnei epuni hna ajane troa hamëne koi Nyidrë?
5. Tru catre la itre manathithi hne së hna troa kapa e tro sa nue la mele së koi Iehova
Alanyimu la itre atr ka mekun ka hape, tro sa madrin e tro sa cilëne la itre göhnë ka mama, me hetre huliwa ka loi me mani. Ka nyipici kö lai? Goeëne jë la VIDEO, nge ce ithanatane jë cahu itre hnying:
Hnauëne la Andrei a nuetrije la feni balo, ngacama kolo hi lo hnei angeic hna ajane troa kuca?
Hnei angeic hna nue la mele i angeic koi Iehova me nuetrije la feni balo. Ka loi kö la mekuna i angeic? Pine nemen?
Qëmekene tro Paulo a xötrethenge Iesu, ketre atr ka tru angeic ngöne la hmi i angetre Iudra. Ka lolo catre la göhne i angeic. Ngo hnei angeic hna nuetrij la göhnë cili, matre xötrethenge Iesu. Ame koi Paulo, ka loi kö la aqane ië ewekë i angeic? E jë la Filipi 3:8, nge ce ithanatane jë cahu itre hnying:
Pine nemene matre Paulo a aceitunëne me itre “hnasany,” la itre ewekë hnei angeic hna kuca ekö qëmekene troa xötrethenge Iesu?
Nemene la manathith hnei angeic hna kapa?
Nemene la ka troa amadrinë epun, troa nyihlue i Iehova maine kuca la sipu aja i epun?
Tru catre la itre manathithi hnei Paulo hna kapa ngöne la angeic a xötrethenge Iesu hune ekö
HNE SË HNA MAJEMINE DRENG: “Catre hi epuni ae drai, profité jë pe la mel!”
Nemene la ka troa upi epun troa nue la mele i epun koi Iehova?
HANE HI LA HNE SË HNA CE WANG
Ihnimi së koi Iehova la ka upi së troa nue la mele së koi Nyidrë me bapataiso.
Nyine Amekunën
Pine nemene matre ijije hi tro sa hnimi Iehova me nyihlue i Nyidrë hnene la hni së ka pexej?
Tune kaa la aqane amanathithine Iehova la itre ka bapataiso?
Ajane kö epun troa nue la mele i epun koi Iehova?
ITRE XAA NYINE WANG
Hnauëne la iëne jë hnene la ka nyima me ka feni balo, troa nue la mele i nyidro koi Iehova?
Itre Thöth a Hnying—Nemene La Hnenge Hna Troa Kuca Elany?—Meleng Ekö (6:54)
Itre xaa kepin matre tro sa nue la mele së koi Akötresie.
“Pine Nemen Matre Epuni a Sa Xepu Koi Iehova?” (Ita Ne Thup 15 Januare 2010)
Ketre nyima ka amamane la madrinene la itre atr ka nue la mele i angatr koi Iehova.
Ame ngöne la hna melën, “Pendant des années, je me suis demandé pourquoi on existe,” ketre föe a wange la itre ewekë nyine troa amë panëne ngöne la mele i angeic.