1, 2. Nemene la ka mama hnyawa kowe la itretre thupëne la sirkoskripsio ngöne la itre ekalesia?

KOLA troa nyipune la icasikeu hna kuca hnene la atre thupëne la sirkoskripsio memine la itre qatre thup. Angeic a pane goeëne jë la itre trejine nge tru la ihnimi angeic koi angatr, ke tru catre la huliwa i angatr. Ame itre xan e angatr, tre, qatre catre hë, kösë itre keme i angeic. Ngo hetre ketre ewekë ka tru hnei angeice hna hnehengazon. Öni angeic koi angatr: “Trejine fe, nemene la hnei epuni hna kuca göi troa inine me hnëkëne la itre trejine troa xome la itre xa hnëqa e hnine la ekalesia?” Atre hnyawa hi la itre trejine ka hape, ame lo iwai hnapan ne lo atre thupëne la sirkoskripsio, ase hë angeice lo upi angatre troa ami ijine matre troa inine me hnëkëne la itre trejin. Ngo, hna sa hnene la ketre qatre thup ka hape: “Pëkö hne huni hna kuca.” Nge kolo fe a nangenange hnene la itre xa qatre thup.

² Maine epuni fe hi la ketre qatre thup, maine jë epuni fe a hane sa tune lai. Mama hnyawa hi kowe la itretre thupëne la sirkoskripsio ka hape, nyipi ewekë tro la itre qatre thup a ami ijine göi troa inine me hnëkëne la itre trejine trahmany, thöth me itre ka tru, matre troa hane ixatua thupëne la ekalesia. Ngo, jole pi hë. Pine nemene matre nango jole pi hë?

3. (a) Tusi Hmitrötr a amamane tune kaa ka hape, nyipi ewekë catre troa inine me hnëkëne la itre trejin, nge pine nemene matre loi e tro asë hi së a wangatrune lai? (Wange ju la ithuemacany.) (b) Pine nemene matre jole pi hë kowe la itre qatre thup troa inine me hnëkëne la itre trejin?

³ Atre hnyawa hi epun, itre qatre thup, laka, nyipi ewekë tro epuni a ami ijine matre troa inine me hnëkëne la itre trejine trahmany.a (Wange ju la ithuemacany.) Ketre, nyipi ewekë catre hmaca kö enehila troa hetre trejine trahmanyi göi tro pala hi a acatrene la itre ekalesia, me sajuëne la itre ekalesia ka hnyipixe elany. (E jë la Isaia 60:22.) Öni Tusi Hmitrötr, loi e tro epuni a “ini ite xane fe.” (E jë la 2 Timoteo 2:2.) Ngo eje hi laka, jole pi hë troa xomi ijine troa eatrëne lai. Ke tro epuni lai a thupëne la hnepe lapa i epun, me huliwa i maseta. Ketre, tro fe epuni a thupëne la ekalesia, me itre xa jole ju kö ka nyipi ewekë catr. Haawe, pine laka, tru catre hnei jol, loi e tro sa ce wange la itre kepine laka, ka sisitria catre la tro epuni a xomi ijine göi troa inine me hnëkëne la itre trejin.

SIKUSIKUNE JË TROA ININ ME HNËKËN LA ITRE TREJIN TRAHMANY

4. Pine nemene matre itre qatre thup a uthe lapane la troa inine me hnëkëne la itre trejine trahmany?

⁴ Pine nemene matre jole pi hë koi itre qatre thup troa xomi ijine troa inin me hnëkëne la itre trejine trahmanyi ngöne la ekalesia? Itre xan a mekune ka hape: ‘Hetre itre xa huliwa ne la ekalesia nyine troa canga kuca, nge tha nyine tro kö a pane amë. Tha tro kö lai a ajolëne la ekalesia e tha canga inine kö ni la itre trejine trahmanyi me hnëkë angatr.’ Hapeu, nyipici kö lai? Eje hi laka, hetre itre huliwa nyine troa canga kuca. Ngo, e tro epuni a uthe lapane troa inine la itre trejine trahmany, tro lai a hetre ethanyine elanyi kowe la ekalesia.

5, 6. Nemene la hna ini së hnene la ceitune ne la ka xomi loto me aqane tro angeic a kuca matre tro pala hi a lolo la loto i angeic? Tune kaa la aqane tro sa aceitunëne lai memine la troa inin me hnëkëne la itre trejin ngöne la ekalesia?

⁵ Pane mekune jë la ceitune celë: Maine troa lolo pala hi la loto, atre hi la ka xomi loto laka loi e tro pala hi a hetre oel. Ngo, tro jë angeice lai a mekune ka hape, ka loi e troa sikusikune la troa ami sas, ke e traqa ju pë, tro hë lai a cile la loto. Tro fe angeice lai a mekune ka hape, e tru pala ha la jole i angeic, tro pë hë a saze oel elany. Ke, tro pala hi lai a nyenyape la loto. Ngo hetre engazone lai. Maine tha saze oele kö hnene la ka xomi loto, tro kö lai a traqa la ijine troa ngazo la loto. Nge ame la pune lai, tro hë a tru hnei mani me traeme i angeic hna hamëne troa nyidrawane hmaca la loto. Nemene la ini koi së?

⁶ Loi e tro la itre qatre thup a canga kuca la itre jole ka nyipi ewekë catr. Maine tha canga kuca kö angatr, troa hetre ethanyine kowe la ekalesia. Tune la atre xomi loto laka, nyipi ewekë tro angeic a xomi sas, haawe, tro fe la itre qatre thup a wange hnyawa la nöjei ewekë ka nyipi ewekë catr. (Filipi 1:10) Ngo ame itre xa ijin, tru catre pala ha la itre ewekë nyine troa kuca hnene la itre qatre thup, matre pëhë traeme i angatre troa inine me hnëkëne la itre trejin. Ceitune hi lai memine la troa tha nyipiewekëne la troa ami oelene la loto. Maine tro la itre qatre thup a uthe lapane la troa inine me hnëkëne la itre trejine trahmany, haawe, tro kö lai a traqa la ijine laka, tha ijije hë la itre trejine trahmanyi ngöne la ekalesia troa kuca asë la itre huliwa.

7. Nemene la aqane tro sa goeëne la itre qatre thup ka xomi ijin troa inin me hnëkëne la itre trejin?

⁷ Haawe, the mekune pi kö ka hape, tha nyine tro kö a sikusikune la troa inin me hnëkëne la itre trejin trahmany. Ame la itre qatre thup ka wangatrune la loi ne la ekalesia elany, nge ka xomi ijine troa inin me hnëkëne la itre trejin, tre itre hlue ka inamacan, nge ka nyipi ewekë angatr kowe la itre trejine trahmanyi me föe. (E jë la 1 Peteru 4:10.) Nemene la aqane kepe eloine hnene la ekalesia?

HULIWANE HNYAWANE JË LA TRAEM

8. (a) Nemene la itre kepin matre loi e tro la itre qatre thup a hane inin itre xan? (b) Nemene la nyine troa sikusikun hnene la itre qatre thup ka huliwa ngöne la itre nöj gaa aja ixatua? (Wange ju la itre mekune hna eköhagen, “Huliwa Nyine Sikusikune.”)

⁸ Eje hi laka, loi e tro la itre qatre thup ka hekö hë a atrehmekune laka, angatr a utipië trootro nge tro ha traqa la ijine tro angatr a thatreine huliwa tune ekö. (Mika 6:8) Ketre, atre hnyawa hi angatr laka, troa traqa “la ijine memine la ewekë ka xulu” ene pe, tro ha jole koi angatr troa xome la itre hnëqa i angatr. (Ate Cainöj 9:11, 12; Iakobo 4:13, 14) Haawe, pine laka kola hnime me thupëne hnene la itre qatre thup la itre hlue i Iehova, angatr a hane catre ce thawa memine la itre trejin trahmanyi thöth la itre ini hnei angatr hna melëne hë ngöne la ite macatre.—E jë la Salamo 71:17, 18.

9. Pine nemene matre nyipi ewekë catre troa inin me hnëkëne la itre trejin?

⁹ Ka lolo catre fe la itre qatre thup ka inine la itre xan, ke angatre hi lai a ixatua acatrene la lapaune ne la ekalesia. Kola aijijëne la itre trejin ka kapa la ini cili, troa hane xatuane la ekalesia matre tro ej a casi me mele nyipici koi Akötresie. Pine laka easa melëne la itre drai tixenuë, nyipi ewekë catre la lue thiina cili enehila, nge tro hmaca kö lue ej a nyipi ewekë catre elanyi e traqa pi la akötr atraqatr. (Ezekiela 38:10-12; Mika 5:5, 6) Haawe, itre qatre thupe fe, enehila hi la ijine tro nyipunie a nyiqaane inin me hnëkëne la itre xa trejin.

10. Nemene la nyine tro la qatre thup a kuca matre hetre traeme i angeic jë troa inin me hnëkë itre xan?

¹⁰ Öhne hnyawa hi eahuni la etrune la huliwa hnei nyipunieti hna kuca matre troa thupëne hnyawa la ekalesia. Ngo loi e tro mina fe epuni a hane xomi ijine troa inin me hnëkë itre xan. (Ate Cainöj 3:1) Aqane tro hi epuni lai a huliwane hnyawane la traeme i epun, nge tro hë la ekalesia elanyi a hane kepe eloin qa ngön.

HNËKËNE JË LA HNI NE LA HNA ININ

11. (a) Nemene la eloine koi së qa ngöne la itre ixatua hna hamëne hnene la itre qatre thup ngöne la itre nöje ka isapengön? (b) Tune la hna qaja ngöne Ite Edomë 15:22, pine nemene matre nyipi ewekë troa ce ithanatane la itre ixatua qaathene la itre xa qatre thup?

¹¹ Hnene la itre xa qatre thup ka atreine inin me hnëkëne la itre trejin trahmanyi troa huliwa atrun hnine la ekalesia, hna hane qaja la aqane kuca i angatr.b (Wange ju la ithuemacany.) Ala nyimu la itre qatre thup ka hane kuca tun, ngacama isapengöne kö la aqane mele i angatr. Nemene la ka mama e cili? Kola amamane laka, ame la itre ini hna hamëne hnei Tusi Hmitrötr tre, thatraqane la nöjei atr ngöne la “nöjei ekalesia e cailo.” (1 Korinito 4:17) Haawe, ame ngöne la tane mekune celë memine la ka troa xulu, tro sa ce wange la itre aqane inin la itre xan hnene la itre qatre thup. (Ite Edomë 15:22)

12. Nemene la nyine tro la qatre thup a pane kuca, nge pine nemen?

¹² Ame la pane ewekë nyine tro la qatre thup a kuca, tre, ene la troa hnëkëne la hni ne la hnainin. Pine nemene matre ka nyipi ewekë catre lai? Ame la atre eëny, nyipi ewekë tro angeic a hnëkëne hnyawane la dro qëmekene troa jumi feja, ketre tune mina fe, tro la qatre thup a hnëkëne la hni ne la trejin trahmany qëmekene troa ini angeic la itre aqane huliwa ka hnyipixe. Haawe, tro la qatre thupe a hnëkëne tune kaa la itre ewekë ka ijij göi troa inine la trejin? Loi e tro angeic a xötrethenge la tulu i Samuela perofeta, ketre atr ekö ka inin me hnëkëne la ketre hlue i Akötresie.

13-15. (a) Nemene la hnei Iehova hna upi Samuela troa kuca? (b) Hnei Samuela hna hnëkë Saulo tune kaa kowe la hnëqa ka hnyipixe i angeic? (Wange ju la pane iatr.) (c) Pine nemene matre hetre ini nyine tro la itre qatre thup a xome enehila qa ngöne la tulu i Samuela?

¹³ Ame la ketre drai, a traqa ha enehila koi 3 000 lao macatre, hnei Iehova hna qaja koi Samuela, ketre perofeta ka qatre catre hë ka hape: “Tro ni a upe koi ’ö elanyi e ijine tune la, la ate qa ngöne la nöje Beniamina, tro eö a sië angeice nyine tane la nöjeng’ angete Isaraela.” (1 Samuela 9:15, 16) Trotrohnine hnyawa hi Samuela e cili ka hape, tha nyidrë hmaca kö la ka troa elemekene la nöje Isaraela, nge aja i Iehova tro nyidrëti a siëne lo lai atr matre tro pena ha elemekene la nöj. Celë hi matre, ame göi troa hnëkëne lai atr thatraqane la hnëqa i angeic ka hnyipixe, hetre mekune hnei Samuela hna eköth, ame hnei nyidrëti hna kuca ju.

¹⁴ Ame la drai thupen, ame la Samuela a öhnyi Saulo, öni Iehova koi Samuela perofeta: “Hana wange la ate.” Ame hnei Samuela hna kuca la hnei nyidrëti hna hnëkëne amë hë. Hnei nyidrëti hna thele jëne matre tro nyidrëti a ithanata koi Saulo. Samuela pë hë a könë Saulo jë me itre hlue i angeic troa ce xen, me hnëkëne la itre göhnë ka lolo, memine lo itre sine mitr ka sisitria ne la öni. Öni Samuela: “Hana wange la sine thelen ; amëju qëmeke i nyipë, gö öni nyipë, ke hna thupën’ eje thatraqai nyipë.” Thupene la hna xen, Samuela a könë Saulo kowe la hnalapa i nyidrë. Ame e kuhu gojeny, nyidroti a madrin me porotrik. Ame la nyidroti a traqa, nyidroti a elë jë ngöne la hune la uma, nge nyidroti pala hi a porotrik uti hë la isa tro nyidro troa meköl. Ame ngöne la drai thupen, Samuela a sië Saulo, me dremi angeic, me hamëne la itre xa ithuemacany. Ame hë e thupen, Saulo a mejë jë me tro, nge hnëkë hë angeic thatraqane la itre drai ka troa xulu.—1 Samuela 9:17-27; 10:1.

¹⁵ Hnei Samuela hna sië Saulo troa joxu ne la nöj. Nyipici laka, ka isapengöne memine la troa inine me hnëkëne la ketre trejin troa qatre thup maine drikona ngöne la ekalesia. Ngo, nyimu ini ka tru nyine tro la itre qatre thup a xome qa ngöne la aqane hnëkëne Samuela la hni Saulo. Tro sa ce wange la lue ini.

HETRE HNI NE AJANE JË NGE NYI SINEE JË

16. (a) Nemene la mekuna i Samuela la kola ajane la ketre joxu hnene la angetre Isaraela? (b) Nemene la aqane ujë i Samuela lo kola upi nyidrë hnei Iehova troa sië Saulo?

¹⁶ Loi e hetre hni ne ajan nyipunie, nge the cile hnö kö. Ame la Samuela a xötrei drenge la kola qaja hnene la angetre Isaraela la aja i angatre troa hetre joxu, tha madrine kö nyidrë, ke kösë kola thipetriji nyidrë. (1 Samuela 8:4-8) Matre akönia upi Samuela jë kö hnei Iehova troa drenge la nöj, ke, tha pi eatrëne kö nyidrë la aja i angatr troa hetre joxu. (1 Samuela 8:7, 9, 22) Maine nyipici laka, hetrenyi Samuela la itre mekune cili, ngo tha traqa pi kö koi nyidrë la zalu, maine wesitre pena kowe la atr ka troa nyihna i nyidrë troa elemekene la nöj. Ame la Iehova a upi Samuela troa sië Saulo, tha cile hnö kö nyidrë. Ngo hetre hni ne aja i nyidrëti pe troa idrengethenge, pine laka, tru la ihnimi nyidrë koi Iehova, ngo tha hnene kö laka qa i nyidrë troa kuca.

17. Itre qatre thup enehila a nyitipune tune kaa la tulu i Samuela, nemene la thangane lai koi angatr?

¹⁷ Ala nyimu la itre qatre thup enehila ka maca, nge ka nyitipu Samuela, ene la hna inin me hnëkëne la itre trejin trahmany cememine la ihnim. (1 Peteru 5:2) Hetre hni ne ajane la itre qatre thupe celë troa inine la itre trejin, nge tha ka cile hnö kö troa ce thawa la itre hnëqa ngöne la ekalesia memine la itre xa trejin hna inin. Ame koi angatr, ame la itre trejine hna inine celë, tre, itre sine “ce huliwa” me angatr ka nyipi ewekë catr. Nge itre trejine lai ka troa xatua angatre elanyi troa kuca la itre huliwa ne la ekalesia. (Roma 16:3; Heberu 13:16) Ketre, tru la madrine ne la itre qatre thupe troa goeëne la itre trejin hna inin la angatr a huliwane la atreine i angatre troa xatuane la itre hlue i Iehova.—Ite Huliwa 20:35.

18, 19. Tro la qatre thup a hnëkëne tune kaa la hni ne la trejine trahmany kowe la ini hna troa kapa, nge pine nemene matre ka nyipi ewekë lai?

¹⁸ Loi e ketre sinee nyipunie, ngo tha atre hamë ini hmekuj. Ame lo kola öhnyi Saulo hnei Samuela, tre maine ju tro hi la perofeta a canga xome la wakacu me nenge hune la he i Saulo matre troa acili joxu angeic. Ame e cili, tro hë angeice lai a joxu, ngo ame pe tha ka hnëkë kö angeic troa elemekene la nöje i Akötresie. Hnei Samuela pe hna xomi ijine troa pane hnëkëne la hni Saulo thatraqane la hnëqa i angeic ka hnyipixe. Qëmekene troa sië Saulo, hnei nyidro hna pane ce xen, me nango ce tro, me ce porotrik, me ce mano. Ame hnei Samuela hna treqene la ijine ka ijij troa siëne la joxu ka hnyipixe.

¹⁹ Celë hi ewekë fe nyine troa kuca enehila. Qëmekene troa inin me hnëkëne la itre trejin, tro la qatre thup a pane thele troa nyi sineene la hna inin. Ame göi aqane troa nyi sineene la hna inin hnene la itre qatre thup, tre tha ka ceitun asë kö ngöne la itre nöj. Ketre, isapengöne kö la itre qenenöj. Ngo, isa mele ju hë epun ngöne itre nöje ka isapengön, ngo e tro epuni a xomi ijine ngöne la porogarame i epun thatraqane la hna inin, tro hë angeice lai a atrehmekune ka hape, ka nyipi ewekë catre angeic koi epun. (E jë la Roma 12:10.) Eje hi laka, tro ha tru la hni ne ole ne la itre trejin hna inin kowe la traeme me ihnim hnei epuni hna amamane koi angatr.

20, 21. (a) Nemene la aqane tro epuni a qejepengöne la qatre thup ka maca? (b) Nemene la hne së hna troa ce ithanatane ngöne la tane mekune ka troa xulu?

²⁰ Nyipici laka, ame la qatre thup ka maca, tre ka hetre ajane troa inin me hnëkëne la trejin. Ngo nyipi ewekë tro fe angeic a hnime la atr hnei angeic hna inin. (Wange ju fe la Ioane 5:20.) Pine nemene matre ka nyipi ewekë catre lai? Pine laka, e tro la hna inin a mekune ka hape, epuni a wangatrunyi angeic, tro hë angeice lai a hmaca troa kapa la ini qaathei epun. Haawe, itre qatre thupe fe, catre jë troa hamë ini, ngo nyipi ewekë catre fe troa nyi sineene la hna inin.—Ite Edomë 17:17; Ioane 15:15.

²¹ Thupene la hna hnëkëne la hni ne la trejin hna inin, tro la qatre thup a inin me hnëkë angeic. Nemene la itre nyine kuca hnene la qatre thup? Celë hi hne së hna troa ce ithanatane ngöne la tane mekune ka troa xulu.

1. (a) Nemene la hna atre hë ekö hnene la itre hlue i Akötresie göi troa inin me hnëkëne la itre trejin, nge nemene la aqane eatrëne lai enehila? (b) Nemene la hne së hna troa ce ithanatane ngöne la tane mekune celë?

EKÖ hë atre hnene la itre hlue i Akötresie ka hape, hetre eloine catre la troa inin me hnëkëne la itre trejin. Hanawange la tulu i Aberahama, hnei angeice hna hnëkëne me eköthe hnyawa la “ite ate i angeice hna . . . inine,” itre ka tro ne isi göi troa amele Lota. (Genese 14:14-16) Hna hane fe “inine” la itre ka nyima ngöne la hneijine i Davita Joxu göi troa nyimane la itre nyima koi Iehova. (1 Aqane lapa ite Joxu 25:7) Ame enehila, nyipi ewekë tro sa isi me Satana me fene i angeic. (Efeso 6:11-13) Ketre, easa huliwa catre troa atrunyi Iehova hnene la hna qaja trongëne la ëje i Nyidrë kowe la itre atr. (Heberu 13:15, 16) Tune la itre hlue i Akötresieti ekö, maine aja së troa maca, nyipi ewekë troa ini së. Ame ngöne la ekalesia, hnei Iehova hna athipe kowe la itre qatre thup la hnëqa ne troa inin me hnëkëne la itre trejin. (2 Timoteo 2:2) Nemene la hna kuca hnene la itre xa qatre thup göi troa inine me hnëkëne la itre trejine trahmany matre troa hane thupëne la itre hlue i Iehova?

ACATRENE JË LA IHNIMI NE LA TREJINE HNA ININ KOI IEHOVA

2. Qëmekene troa inine la trejin la itre aqane huliwa ka hnyipixe, nemene la nyine tro la qatre thup a kuca, nge pine nemen?

² Hna aceitunëne la qatre thup memine la atre eëny. Qëmekene troa jumi feja, tro la atre eëny a nyi nyiköne la dro hnei itre xa ewekë tune la itre wanane sinöe matre tro la itre feja a cia hnyawa me kökötre lolo. Ketre tune mina fe, qëmekene tro la qatre thup a inine la trejin trahmanyi la itre aqane huliwa ka hnyipixe, loi e tro nyidrëti a ce thawa me angeic la itre trepene meköti ne la Tusi Hmitrötr ka troa xatua angeic troa canga trongëne la itre hnei angeic hna inin.—1 Timoteo 4:6.

3. (a) Nemene la aqane troa ce ithanatane la mekun ngöne Mareko 12:29, 30 memine la hna inin? (b) Nemene la thangane la hna thithi hnene la qatre thup kowe la hna inin?

³ Nyipi ewekë troa pane atre la thangane la nyipici kowe la mekune me hni ne la hna inin. Haawe, loi e tro epuni a hnyingë angeice la aqane saze la mele i angeic qaane lo angeic a nue la mele i angeic koi Iehova. Tro hë lai a fe ithanata göi aqane troa nyihlue i Iehova cememine la hni ka pexej. (E jë la Mareko 12:29, 30.) Ijije fe tro epuni a hane thithi memine lai trejin, me sipone koi Iehova la uati hmitrötr i Nyidrë matre xatua angeic ngöne la ini hnei angeic hna kapa. Ame ju hi la kola drenge la thithi epuni hnene lai trejin, tro hë lai a thuecatre i angeic troa huliwa atruny!

4. (a) Qaja jë la itre xa edromë ne la Tusi Hmitrötr ka troa xatuane la hna inin troa kökötre lolo. (b) Nemene la hna thele hnene la itre qatre thup la angatr a inine la itre trejin?

⁴ Ame ngöne la epuni a xötrei inine la trejin, loi e tro epuni a ce ithanatane la itre edromë ne la Tusi Hmitrötre ka troa xatua angeic troa atrehmekune la enyipiewekëne la troa ixatua, me troa ketre trejin nyine mejiune kow, me troa ipië. (1 Ite Joxu 19:19-21; Nehemia 7:2; 13:13; Ite Huliwa 18:24-26) Ka nyipi ewekë catre la itre thiina cili kowe la hna inin, ceitune hi lai memine la itre wanane sinöe hna nyi nyiköne la dro. Tro itre eje lai a xatuane la hna inin troa nyimenyime kökötre lolo. Hnei Jean-Claude, ketre qatre thup qaa France hna qaja ka hape, ame la kepin matre nyidrëti a inin me hnëkëne la ketre trejin, tre göi troa xatua angeic troa xomi mekune hnyawa, thenge la itre trepene meköti ne la Tusi Hmitrötr. Öni nyidrë: “Eni a thele la itre ijine tro nyiho a ce xome la ketre xötre ne la Tusi Hmitrötr matre troa ‘ahlëne la lue meke’ i angeic, nge tro angeic a öhne la ‘itre nyine haine’ ka eje e hnine la Wesi Ula i Akötresie.” (Salamo 119:18) Nemene la itre xa aqane troa acatrene la lapaune ne la hna inin?

QAJA JË LA MEKUNE NYINE EATRËN, NGE QAJA JË LA KEPIN

5. (a) Nemene la enyipiewekëne la troa ce ithanatane la itre mekune hna thele troa eatrëne hnene la hna inin ngöne la huliwa i Iehova? (b) Pine nemene matre tro la itre qatre thup a inine la itre trejine trahmanyi e thöthi petre kö angatr? (Wange ju la ithuemacany.)

⁵ Hnyingëne jë kowe la hna inin la itre mekune hnei angeic hna thele troa eatrëne ngöne la huliwa i Iehova. Nge maine pëkö, xatua angeice jë troa hnëkën amë la ketre nyine troa eatrën. Ame la epuni a qaja koi angeic la ketre mekune hnei epuni hë hna eatrën, tre qaja jë ngöne la madrin, memine fe la madrine i epuni la epuni a eatrën. Tha ka jole kö la aqane huliwa celë, nge ka hetre thangane catr. Hnei Victor, ketre qatre thup nge ka pionie e Afrique hna qaja ka hape: “Ame lo eni a thöth, hnene la ketre qatre thup hna hnyingë ni la itre ajange hnenge hna thele troa eatrën. Celë hi ka xatua ni troa nyiqaane mekune hnyawane la hnenge hna kuca koi Akötresie.” Hna qaja hnene la itre qatre thup ka maca ka hape, nyipi ewekë catre troa inin me hnëkëne la itre trejin trahmany e thöthi petre kö angatr. Loi e tro epuni a thue huliwa i angatre ngöne la ekalesia thenge la itre macatre i angatr. Maine hna inin me hnëkëne la itre trejine trahmanyi e thöthi petre kö angatr, tro lai a xatua angatre troa catre eatrëne la itre aja i angatr. Matre e tru hë angatr tha tro kö a ajeane la itre mekuna i angatr hnene la itre xa ewekë.—E jë la Salamo 71:5, 17.a (Wange ju la ithuemacany.)

6. Nemene la hnei Iesu hna kuca ngöne la nyidrëti a hamë ini?

⁶ Maine aja i epuni troa aciane la aja thene la hna inin troa ixatua, tha tro hmekuje kö a qaja la huliwa nyine tro angeic a kuca, ngo loi fe tro epuni a qaja la kepine matre nyipi ewekë troa kuca. Hnei Iesu, lo Atre Hamë Ini Ka Tru hna upe la itre aposetolo i nyidrë troa cainöj. Ngo hnei nyidrëti hna pane hamë angatre la kepine matre tro angatr a trongën. Öni nyidrë: “Ase hë hamë ni la nöjei musi asë e hnengödrai me celë fen. Qa ngöne lai, trojë nyipunie a inine la nöjei nöj’ asëjëihë.” (Mataio 28:18, 19) Nemene la aqane tro epuni a nyitipune la aqane hamë ini Iesu?

7, 8. (a) Nemene la aqane nyitipune hnene la itre qatre thup enehila la aqane hamë ini Iesu? (b) Pine nemene matre ka nyipi ewekë troa qaja aloine la hna inin? (c) Nemene la itre ixatua hna hamëne ka troa aijijëne la itre qatre thup troa inine la itre trejin? (Wange ju la itre mekune hna eköhagen, “Aqane Ini Me Hnëkë Angatr.”)

⁷ Ame la epuni a upe la ketre trejine troa kuca la ketre huliwa, qaja jë qa hnine la Tusi Hmitrötr la kepine matre nyipi ewekë catre la huliwa cili. E tro epuni a kuca tune lai, epuni hi lai a ini angeic troa kuca la itre ewekë thenge la itre trepene meköti ne la Tusi Hmitrötr, ngo tha thenge hmekuje kö la itre hna amekötine hnene la ekalesia. Maine epuni a upe la ketre trejine trahmanyi troa thupëne matre tro pala hi a porop la hnë lö kowe la Uma Ne Baselaia, nge pëkö ethanyin e troa trongën, loi e tro epuni a amamane la xötre ne Tito 2:10. Qaja jë la aqane tro la huliwa i angeic a amingömingöne la maca ne la Baselaia. Ketre, upi angeice jë fe troa mekune la itre ka qatre hë e hnine la ekalesia, memine la thangane la huliwa cili koi angatr. Tro la itre mekune celë hna ce thawakeun a ini angeic, me xatua angeic troa mekune catrëne la itre atr hune la tro hi a trongëne la itre hna amekötin. E tro angeic a goeëne la eloine la huliwa i angeic kowe la itre trejine trahmanyi me föe, tro hë angeice lai a madrine troa huliwa thatraqane la itre trejin.

⁸ Ketre, the thëthëhmine kö troa qaja aloine la hna inin hnene la hna trongëne la itre ixatua hnei epuni hna hamën. Pine nemene matre ka nyipi ewekë catre lai? Tune la tim kola aciane me akökötrene la feja, haawe, ame la epuni a qaja aloine la hna inin, tro fe lai a aijijë angeic troa kökötre hnyawa ngöne la huliwa i Iehova.—Wange ju fe la Mataio 3:17.

KETRE JOLE KA MAMA

9. (a) Pine nemene matre jole kowe la itre qatre thup ngöne la itre nöje gaa hetre mo troa inine la itre trejine trahmany? (b) Pine nemene matre tha huliwa i Akötresieti kö la ka tro pa ngöne la mele ne la itre trejine thöth?

⁹ Jole kowe la itre qatre thup ne la itre nöje gaa hetre mo troa xatuane la itre trejine trahmanyi ka 20 maine 30 lao macatre troa huliwa catre hmaca kö ngöne la ekalesia. Hna qajaqaja hnene la itre qatre thup ka maca, qa ngöne la 20 lao nöj, la kepine matre tha huliwa catre kö hnene la itre xa thöth ngöne la ekalesia. Öni angatr, ame petre kö lo kola thöth la itre trejin trahmany, tha hna thuecatre i angatre kö hnei keme me thine troa hnëkëne amë la itre mekune nyine troa eatrëne ngöne la huliwa i Iehova. Nge ame pena la kola hetre aja thene la itre thöth troa huliwa catre koi Iehova, itre keme me thin pena ha a thuecatre koi angatre troa hnëkëne amë la itre mekune nyine troa eatrëne ngöne la itre hna ini ka tru, maine ngöne la itre huliwa hna troa kuca elanyi ngöne la fen! Haawe, trotrohnine hi së la kepine matre tha huliwa i Akötresieti kö la ka tro pa ngöne la mele i angatr.—Mataio 10:24.

10, 11. (a) Nemene la aqane tro la qatre thup a xatuane trongëne la trejine trahmany troa ujë la mekuna i angeic? (b) Nemene la itre xötre ka troa xatuane la qatre thup troa aciane la aja thene la ketre trejin, nge pine nemen? (Wange ju la ithuemacany.)

¹⁰ Maine pëkö aja thene la trejine trahmanyi troa huliwa catre ngöne la ekalesia, tru la huliwa nyine tro epuni a kuca nge loi e troa atreine itreqe, ke tro lai a qea la ijine matre ujë jë la mekuna i angeic. Tro la atre eëny a xatuane la feja troa kökötre hnyawa hnene la hna wenë trongëne la itre hone feja. Ketre tune mina fe, loi e tro epuni a xatuane trongëne la trejine troa trotrohnine ka hape, nyipi ewekë troa ujë la mekuna i angeic göi troa xome la itre hnëqa ngöne la ekalesia. Ngo tro lai a kuca tune kaa?

¹¹ Xomi ijine jë troa nyi sineene la trejin. Qaja jë koi angeice ka hape, nyipi ewekë catr angeic kowe la ekalesia. Ame hë e ketre ijin, loi e tro epuni a lapa me ce ithanatane la itre xa xötre ne la Tusi Hmitrötr, ka troa xatua angeic troa mekune hnyawane lo kepine matre angeic a nue la mele i angeic koi Iehova. (Ate Cainöj 5:4; Isaia 6:8; Mataio 6:24, 33; Luka 9:57-62; 1 Korinito 15:58; 2 Korinito 5:15; 13:5) Thele jë troa ketre la hni angeic hnene la itre hnyinge ka tune la: ‘Nemene lo hnei eö hna sisinyi koi Iehova la eö a nue la mele i eö koi Nyidrë? Tune kaa lo mekuna i Iehova la Nyidrëti a goeë eö e xomi bapataiso?’ (Ite Edomë 27:11) ‘Nemene la mekuna i Satana?’ (1 Peteru 5:8) Ka hetre thangane catre la itre xötre celë, nge ka troa ketre hnyawa la hni ne la trejin.—E jë la Heberu 4:12.b (Wange ju la ithuemacany.)

ITRE HNA ININE FE, HULIWA NYIPICI JË

12, 13. (a) Nemene la thiina hna amamane hnei Elisaia, ketre hna inin? (b) Nemene la aqane nyijune Iehova la aqane huliwa nyipici i Elisaia?

¹² Itre trejine fe hna inin, kola ajane la ixatua i nyipunie hnene la ekalesia. Nemene la thiina ka troa xatua epuni troa huliwa hnyawa koi Iehova? Tro sa sa la hnyinge celë hnene la hna ce ithanatane la itre ewekë ka traqa ngöne la mele i Elisaia, ketre hlue i Akötresieti ekö hna inin.

¹³ Traqa koi 3 000 lao macatre enehila, hnei Elia hna könë Elisaia nge thöthi petre kö angeic, matre troa hane xatua nyidrë. Ame hna canga kapa hnei Elisaia, me kuca la huliwa hna athipe koi angeic ngacama ketre huliwa hna wangacon. (2 Ite Joxu 3:11) Hnei Elia hna inin me hnëkë Elisaia koi sikisi lao macatre. Ame hë la kola nyipune la huliwa i Elia perofeta e Isaraela, nyidrëti hi lai a qaja koi Elisaia ka hape, tha tro hmaca kö angeic a ce huliwa me nyidrë. Ngo akönia qaja Elisaia ka hape: “Tha tro kö ni a nue cilie.” Ka xeci e kuhu hni angeic troa ce lapa aqeanyi memine la atre hamë ini koi angeic. Ketre, hnei Iehova hna nyijune kowe la aqane huliwa nyipici i Elisaia ngöne laka, hnei Nyidrëti hna aijijë angeic troa goeëne la kola xomi Elia draië hnengödrai eë hnene la ketre janacas.—2 Ite Joxu 2:1-12.

14. (a) Nemene la aqane tro la itre trejine hna inin a nyitipu Elisaia enehila? (b) Pine nemene matre nyipi ewekë catre kowe la hna inin troa huliwa nyipici?

¹⁴ Itre hna inine fe, tro epuni a nyitipu Elisaia tune kaa? Canga nyimenyime jë xome la itre hnëqa, ngacama itre huliwa hna wangacon. The thëthëhmine kö laka, ame la atre hamë ini koi epun, tre, sinee i epuni hi lai. Qaja jë koi nyidrë ka hape, epuni a madrine la hnei nyidrëti hna kuca koi epun, nge amamane jë ka hape, aja i epuni pala hi troa kapa la ini qaathei nyidrë. Ame la ka sisitria, tre, xome hnyawa jë la hnëqa i epun. Pine nemen? Ame la epuni a amamane ka hape, ka huliwa nyipici epun, nge ijije hi troa mejiune koi epun, kolo lai a mama hnyawa kowe la itre qatre thup ka hape, aja i Iehova tro epuni a hetre itre xa hnëqa hmaca kö hnine la ekalesia.—Salamo 101:6; e jë la 2 Timoteo 2:2.

METRÖTRËNE JË LA ITRE QATRE THUP KA MACA

15, 16. (a) Hnei Elisaia hna amamane tune kaa la metrötre i angeic kowe la atre hamë ini koi angeic? (Wange ju la pane iatr.) (b) Pine nemene matre itre xa perofeta a mejiune koi Elisaia?

¹⁵ Ketre, kola amamane hnene la hna melëne hnei Elisaia ka hape, nyipi ewekë catre kowe la itre trejine trahmanyi enehila troa metrötrëne la itre qatre thup ka maca. Thupene la hnei Elia me Elisaia hna wange la ketre neköi lapa i itre perofeta e Ieriko, traqa ha nyidroti ngöne la hneopegejë ne Ioridrano. Ame e cili, “hnei Elia hna xome la ixete i angeice me ewath, me lepe la hneopegejë, ame hna kaqa luë pi.” Nyidroti a tro sasaithe jë la gaa weliwel, nge “nyidoti pala kö a tro, me ithanata.” Elisaia a drenge hnyawa la nöjei ewekë hna qaja hnene la atre hamë ini koi angeic, ame hna kepe ini pala hi qaathei nyidrë. Tha mekune pi kö Elisaia ka hape, atre asë hë angeic la itre ithuemacany cili. Ame hë e thupen, hna xomi Elia draië hnengödrai eë hnene la ketre janacas, ame hna bëeke hnei Elisaia a tro Ioridrano. Ame e cili, angeic a lepe la tim hnene la ixetre i Elia, me qaja ka hape: “E ka Iehova Akötesi Elia?” Ame hna kaqa luë hmaca pi la hneopegejë.—2 Ite Joxu 2:8-14.

¹⁶ Tune kaa la pane iamamanyikeu hna kuca hnei Elisaia, ceitune hnyawa kö memine la iamamanyikeu hna kuca tixenuë hnei Elia? Nemene la ini hne së hna xome qa ngön? Tha mekune kö Elisaia ka hape, pine laka, angeice hë enehila la ka xome la hnëqa ne perofeta, tha nyipi ewekë hmaca kö tro angeic a nyitipu Elia. Ngo hnene la hnei Elisaia hna kuca la itre aqane huliwa i Elia, angeice hi lai a amamane la metrötre i angeic kowe la atre hamë ini koi angeic; celë hi ka xatuane la itre xa perofeta troa mejiune koi Elisaia. (2 Itre Joxu 2:15) Traqa koi 60 lao macatre ne Elisaia a nyi perofeta, nge hnei Iehova hna hamëne koi angeice la men matre troa kuca la itre xa iamamanyikeu, nyimutre catre kö hui Elia. Nemene la ini kowe la itre trejin hna inin enehila?

17. (a) Tro la itre hna inin a nyitipune tune kaa enehila la thiina i Elisaia? (b) Nemene la aqane tro Iehova a xatuane la itre hna inin ka nyipici?

¹⁷ Maine epuni a kapa la itre hnëqa ngöne la ekalesia, the mekune kö ka hape, tro hë epuni a kuca ketre pengönëne la itre ewekë hune ekö. The thëthëhmine kö ka hape, e troa saze, tre hnene laka, hetre ewekë nyine kuca ngöne la ekalesia, maine pena ketre hna amekötine qaathene la organizasio i Iehova. Tha tro kö a kuci mekunëne la itre hnëqa cili. Qa ngöne la hnei Elisaia hna catre xötrethenge la itre aqane huliwa i Elia, haawe, angeice fe a hane xatuane la itre xa perofeta troa mejiune koi angeic, nge angeice fe a amamane e cili laka, ka metrötrën angeice la atre ini angeic. Ketre tune mina fe, maine tro epuni a catre xötrethenge la itre aqane huliwa ne la atre ini epun, epuni hi lai a metrötrëne la itre qatre thup ka maca, nge tro hë la itre trejine trahmanyi me föe a mejiune fe koi epun. (E jë la 1 Korinito 4:17.) Ame hë la epuni a maca trootro, ijiji epuni hë troa xatuane la ekalesia matre tro angatr a xötrethenge hnyawa la itre hna amekötine hna xötrei kapa qathene la organizasio i Iehova. Ketre, tro kö Iehova a xatua epuni troa kuca la itre huliwa ka tru catre kö hune la itre ka hamë ini koi epun, tune lo aqane kuca Nyidrë koi Elisaia.—Ioane 14:12.

18. Pine nemene matre loi e troa sikusikun troa inin me hnëkëne la itre trejin trahmany ngöne la itre ekalesia?

¹⁸ Eahuni a ajane tro la tane mekune celë memine lo hnapan, a upe la itre qatre thup troa xomi ijine troa hane inin me hnëkëne la itre trejin trahmany. Nge eahuni a thithi fë matre troa tru hnei trejine trahmanyi ka ajane troa hane kapa la ini, me xome la hnei angatre hna inin matre troa hane thupëne la itre hlue i Iehova. Tro lai a acatrene la itre ekalesia asë e cailo fen, me xatua së isa ala cas troa mele nyipici ngöne la itre drai ka troa xulu.